Read Bambam Matius 1 Bible Online

Matius 1 - Bambam bible

Matius 1

¹Susi inde kalohonganna Yesus Kristus peampoanna tomahaja Daud, peampoanna Abraham.

²Keänä' Abraham undadiam Ishak, keänä' Ishak undadiam Yakub, keänä' Yakub undadiam Yehuda anna ingganna solasubunna.

³Keänä' Yehuda undadiam Peres anna Zerah nasibalii Tamar, keänä' Peres undadiam Hezron, keänä' Hezron undadiam Ram,

⁴keänä' Ram undadiam Aminadab, keänä' Aminadab undadiam Nahason, keänä' Nahason undadiam Salmon,

⁵keänä' Salmon undadiam Boas nasibalii Rahab, keänä' Boas undadiam Obed nasibalii Rut, keänä' Obed undadiam Isai,

⁶keänä' Isai undadiam tomahaja Daud, keänä' Daud undadiam Salomo nasibalii indo bainena to mate Uria,

⁷keänä' Salomo undadiam Rehabeam, keänä' Rehabeam undadiam Abia, keänä' Abia undadiam Asa,

⁸keänä' Asa undadiam Yosafat, keänä' Yosafat undadiam Yoram, keänä' Yoram undadiam Uzia,

⁹keänä' Uzia undadiam Yotam, keänä' Yotam undadiam Ahas, keänä' Ahas undadiam Hizkia,

¹⁰keänä' Hizkia undadiam Manasye, keänä' Manasye undadiam Amon, keänä' Amon undadiam Yosia,

¹¹keänä' Yosia undadiam Yekhonya anna ingganna solasubunna. Wattu eta too dipassa to Israel dipahhim lako Babel.

¹²Puhai dipahhim lako Babel, iya keänä'um Yekhonya undadiam Sealtiel, keänä' Sealtiel undadiam Zerubabel,

¹³keänä' Zerubabel undadiam Abihud, keänä' Abihud undadiam Elyakim, keänä' Elyakim undadiam Azor,

¹⁴keänä' Azor undadiam Zadok, keänä' Zadok undadiam Akhim, keänä' Akhim undadiam Eliud,

¹⁵keänä' Eliud undadiam Eleazar, keänä' Eleazar undadiam Matan, keänä' Matan undadiam Yakub,

¹⁶keänä' Yakub undadiam Yusuf indo muanena Maria to undadiam Puang Yesus battu diua To dilanti' la mepasalama'.

¹⁷Dadi, mengkalao dio Abraham sule lako tomahaja Daud, sapulo appa' lapi'na. Mengkalao dio Daud sule lako wattunna dipahhim to Israel napahhim to Babel, sapulo appa' lapi'na. Anna mengkalao dio wattunna dipahhim to Israel sule lako kadadianna To dilanti' la mepasalama', sapulo appa' oo duka' lapi'na.

¹⁸Susi inde tulasanna indo anna dikebättänganni Yesus Kristus sule lako disubungam: Puhai mekutana Yusuf la umpobaine Maria, iya kebättä hia. Moi anna tä'pi deem sola muane, sapo' kebättä aka kakuasaanna Penaba Maseho.

¹⁹Indo Yusuf mesa to meada', dadi maelo' la ungkattui Maria. Sapo' la mengkamma'-kamma' ungkattui aka moka la umpakasihi'i dio olona tau buda.

²⁰Mane mahassam ma'pikki'-pikki' Yusuf la ungkattui Maria, iya napalosaim mesa malaika' nasua Debata illaam pangngimpi nauaam: “O Yusuf peampoanna tomahaja Daud, daa ummahea' umpobaine Maria, aka indo bättäna, kakuasaanna Penaba Maseho umpadadii.

²¹La undadiam mesa änä' muane-ane anna la ussangai Yesus aka Ia la ullappasam umma'na dio mai dosana.”

²²Ia asanna ia too dadi anna mala sule lako indo kadanna Debata napalombum nabi naua:

²³“Patananniia' talinga, indo änä' daha la kebättä lambi' undadiam mesa änä' muane-ane anna la disangai Imanuel, kalembasanna ‘Puang Allataala muundu'kia'.’ ”

²⁴Tappana milli' Yusuf, iya napalako siaham indo napahentaam malaika'na Debata lambi' umpobaine Maria.

²⁵Sapo' tä' deem moi podo la siampe'um metindo sule lako keänä' Maria. Tappana dadi, iya nasangaim Yusuf indo änä'-änä', Yesus.