Read Bambam Lukas 3 Bible Online

Lukas 3 - Bambam bible

Lukas 3

¹Illaam taum kasapulo limanna ma'pahenta tomahaja Tiberius, eta too Pontius Pilatus mendadi gubernur dio Yudea, anna Herodes muanda'i kapahentaam dio Galilea, anna Filipus solasubunna Herodes muanda'i kapahentaam dio Iturea anna dio Trakhonitis, anna Lisanias muanda'i kapahentaam dio Abilene.

²Anna to mendadi sando too' wattu eta too isanga Hanas anna Kayafas. Iya taum etam too anna ma'kadai Puang Allataala lako Yohanes änä'na Zakharia dio pohiallasam.

³Nasuhum le'ba' Yohanes lako ingganna ongeam dio lembäna Salu Yordan umpalanda' kadanna Puang Allataala naua: “Tihokongannia' ingganna kasalaammu ammu behoia' kalemu ditedo' anna mala naampunniangkoa' dosamu Puang Allataala.”

⁴Umba susi puha napayolo lambam nabi Yesaya illaam suha'na naua: “Deem tau dio pohiallasam metamba-tamba naua: ‘Patokaanni lalam Debata, maloloanganni lalam la naolanna.

⁵Mellembäna la ditambunni, matanetena sola mabuntunna la dipomahante, anna ma'lekko-lekkona la dimaloloam anna ma'bo'bä'-bo'bä'na la dipomahampa'.

⁶Anna ingganna hupatau illaam inde lino la muita kasalamasam buttu yabo mai Puang Allataala.’ ”

⁷Ma'kada Yohanes lako tau buda indo to sule la ditedo' naua: “O inggammua' to si mambaba bulim, pessubunna to kadake gau'! Ussanga haka' iko la malakoa' lappa' dio mai aha' kasallena Puang Allataala?

⁸Pa'baju polekoa' anna pa'dodo pole anna tandaanni diua ussosso si'dangkoa' gau'mu anna untingko' basabammu. Daa muuaia': ‘Tä'kam la napassala Puang Allataala aka peampoannakam Abraham.’ Aka kutulasangkoa', inde mai batu la mala duka' napadadi Puang Allataala peampoanna Abraham!

⁹Tentomai la dipembattaammi wase di ada'na Puang Allataala dilemposam ingganna kaju tää'na kembua manappa anna ditibei tama api.”

¹⁰Iya mekutanam tau buda lako Yohanes naua: “Maka' susi, iya aka pahallu la kipogau'?”

¹¹Natimba'im naua: “Menna-menna muampuam dua baju, la naala mesa anna nabeenni lako to tä' deem bajunna. Anna menna-menna muampuam kinande la napateem siam duka'.”

¹²Deem duka' sule sanaka-naka tuam passima maelo' la ditedo', iya mekutanam duka' naua: “O tuangguhu, aka kami' la pahallu kipogau'?”

¹³Natimba'im Yohanes naua: “Daa umpala'bii umpelau anna indo puha diuaangko.”

¹⁴Iya mekutanam duka' sanaka-naka sohodadu naua: “Anna kami', aka kami' la kipogau'?” Natimba' Yohanes naua: “Daa umpangngala bäbäa' lako tau ke taiai lalanna anna tä' tookoa' la umpakolo'-kolo'i bäbä kakadakeam tau anna malai nabaja'. Paganna'unna' iko duka' indo sahomu!”

¹⁵Iya sangngim mekutanam illaam penabanna indo tau buda naua: “Iangka tia umbai' indo To dilanti' la mepasalama' masäem diampai?”

¹⁶Iam too anna nauam Yohanes lako indo tau buda: “Kao-kao uwai kupake untedo'koa'. Sapo' dako'i too sulem To kuasa puha Ia anna la kao. Aka moi la kubukkaiam pekapu' sapatunna tala sihatannä'. Ia-Ia Penaba Maseho anna api la napake natedosangkoa'.

¹⁷Sihhapam to ma'tappi tokam dio limanna petappi la nase'laam banne maläpu' anna läkko'na. Ingganna banne maläpu' la dianna manappa tama loko, anna läkko'na la ditibe ia tama api tapi'de-pi'de.”

¹⁸Anna budapi kada penännä' senga' natula' Yohanes wattunna anna umpa'pakahebaanni indo Kaheba Katilallasam.

¹⁹Sapo' indo ia Herodes to muanda'i kakuasaam dio Galilea nakeaha'i ia Yohanes aka umpobaine Herodias, bainena solasubunna, anna dionapi kakadakeam senga' napogau'.

²⁰Sapo' uhhängänni mandi kakadakeanna aka umpatama tahungkum Yohanes.

²¹Tappana puha natedo' Yohanes indo ingganna tau buda, iya untedo'um duka' Puang Yesus. Puhai natedo', iya ma'sambajammi Puang Yesus. Iya tappa tibukka siaham langi'

²²anna tuhunni Penaba Maseho anggasanna dangam-dangam uhhampoi. Anna dihingngi siaham kamaha buttu yabo mai suhuga naua: “Ikom too inde änä' pa'pakamajangku to umpomasannam penabangku.”

²³Kiha-kiha tallu pulom taunna dadinna Puang Yesus anna umpahandu'i pengkähänganna. Anna situhu' passangainna tau, Puang Yesus änä'na Yusuf. Indo Yusuf änä'na Eli,

²⁴Eli änä'na Matat, Matat änä'na Lewi, Lewi änä'na Malkhi, Malkhi änä'na Yanai, Yanai änä'na Yusuf,

²⁵Yusuf änä'na Matica, Matica änä'na Amos, Amos änä'na Nahum, Nahum änä'na Hesli, Hesli änä'na Nagai,

²⁶Nagai änä'na Maat, Maat änä'na Matica, Matica änä'na Simei, Simei änä'na Yosekh, Yosekh änä'na Yoda,

²⁷Yoda änä'na Yohanan, Yohanan änä'na Resa, Resa änä'na Zerubabel, Zerubabel änä'na Sealtiel, Sealtiel änä'na Neri,

²⁸Neri änä'na Malkhi, Malkhi änä'na Adi, Adi änä'na Kosam, Kosam änä'na Elmadam, Elmadam änä'na Er,

²⁹Er änä'na Yesua, Yesua änä'na Eliezer, Eliezer änä'na Yorim, Yorim änä'na Matat, Matat änä'na Lewi,

³⁰Lewi änä'na Simeon, Simeon änä'na Yehuda, Yehuda änä'na Yusuf, Yusuf änä'na Yonam, Yonam änä'na Elyakim,

³¹Elyakim änä'na Melea, Melea änä'na Mina, Mina änä'na Matata, Matata änä'na Natan, Natan änä'na Daud,

³²Daud änä'na Isai, Isai änä'na Obed, Obed änä'na Boas, Boas änä'na Salmon, Salmon änä'na Nahason,

³³Nahason änä'na Aminadab, Aminadab änä'na Admin, Admin änä'na Arni, Arni änä'na Hezron, Hezron änä'na Peres, Peres änä'na Yehuda,

³⁴Yehuda änä'na Yakub, Yakub änä'na Ishak, Ishak änä'na Abraham, Abraham änä'na Terah, Terah änä'na Nahor,

³⁵Nahor änä'na Serug, Serug änä'na Rehu, Rehu änä'na Peleg, Peleg änä'na Eber, Eber änä'na Salmon,

³⁶Salmon änä'na Kenan, Kenan änä'na Arpakhsad, Arpakhsad änä'na Sem, Sem änä'na Nuh, Nuh änä'na Lamekh,

³⁷Lamekh änä'na Metusalah, Metusalah änä' Henokh, Henokh änä'na Yared, Yared änä'na Mahalaleel, Mahalaleel änä'na Kenan,

³⁸Kenan änä'na Enos, Enos änä'na Set, Set änä'na Adam, Adam änä'na Puang Allataala.