Read Bambam Pa'palakoanna Suho 2 Bible Online

Pa'palakoanna Suho 2 - Bambam bible

Pa'palakoanna Suho 2

¹Tappana lambi' allo kasalle Pentakosta, ma'hempummi indo ingganna to matappa'um dio mesa ongeam.

²Pissananna nahingngim moni susi uhhunna hibu' kasalle tuhum yabo mai langi' umponnoi indo banua naongei tadongkom ma'hempum.

³Iya naitaim titantam api susi lila tungga' uhhampoi indo tau illaam banua.

⁴Silele dipatamai Penaba Maseho nasuhum manähä asam umpake ma'hupa-hupa basa situhu' kada napalosaiam Penaba Maseho la napotula'.

⁵Dio Yerusalem eta too tohho to Yahudi buttu dio mai ma'hupa-hupa botto illaam inde lino. Tau ia too si untuhu'i si'da-si'da Puang Allataala.

⁶Nahingnginna tau buda indo moni ma'uhhum, ma'silullu' siaham sule sisippi'-sippi'. Sangngim pusa' aka tungga' uhhingngi basana napake indo ingganna to matappa'um ma'kada-kada.

⁷Sangngim pilla' lambi' sipa'tula'-tula' naua: “Taia haka tia to Galilea inde lako ma'kada-kada?

⁸Maaka hia susi anna malai tungga' uhhingngikia' basata napotula'?

⁹Susinna kitaa' to Partia, to Media, to Elam, issinna Mesopotamia, Yudea anna Kapadokia, Pontus anna Asia,

¹⁰Frigia anna Pamfilia, Mesir anna lembäna Libia sikahuku' Kirene; anna to sule dio mai Roma

¹¹(susi to Yahudi teem to mentama peadasanna to Yahudi), to Kreta anna to Arab; tahingngi asammia' ma'kada-kada situhu' tula'taa' si mesa-mesa diona kaha-kaha memängä-mängä napogau' Puang Allataala.”

¹²Sangngim pilla' anna mängä-mängä napasindum sipa'tula'-tula' naua: “Aka hia kalembasanna indea'i?”

¹³Sapo' deem siam duka' tau piha mantelle-telle naua: “Inde lako tau mäbo'i aka buda sugali' anggur naihu'.”

¹⁴Sapo' tappa ke'de' Petrus sola indo to sapulo mesa solana napekasallei ma'kada naua: “O to Yahudi anna inggannakoa' issinna Yerusalem, pengngissanniia' anna umpaillaam penaba manappaia' inde kadangku.

¹⁵Inde mai tau tä' tia mäbo' susi passangaimmua' aka temo mane tette' kaseha mebengngi'.

¹⁶Sapo' iam too indee indo puha napa'paissangam Puang Allataala napalombum nabi Yoel naua:

¹⁷‘La dadi illaam allo ma'katampasanna susim too kadanna Puang Allataala: La kutolloi Penaba Maseho ingganna hupatau, nasuhum pessubummua' la umpalombum kadangku. Susi duka' lako ingganna to mangnguhammua' la kulipi, anna mala naita indo kaha-kaha la kupaitai. Anna lako ingganna tomatua ulummua' la si kupalosai illaam tindo.

¹⁸Susi duka' ingganna sabua'ku muane anna baine, la kutolloi Penaba Maseho illaam allo ia too anna umpalanda'i ingganna kaha-kaha indo la kupaissanniam.

¹⁹Anna la kupadadi buda tanda memängä-mängä yabo langi' anna ma'hupa-hupa tanda illaam lino susinna haha, api, sola hambu pelamboho.

²⁰La pi'de mata allo lambi' la malillim pättä anna bulam la malea susi haha anna mane lambi' allo kasuleanna Debata. Allo kasalle ia too la ponnom pole' kamatandeam.

²¹Menna-menna mengkaala längäm Debata illaam wattu eta too, iam too to la untahima kasalamasam.’

²²O inggannakoa' to Israel, patananniia' talinga inde kadangku: Indo to nahua inde tula'ku Puang Yesus to Nazaret, mesa to natuho Puang Allataala. Aka umpogau' ma'hupa-hupa tanda illaam alla'-alla'mua' kahana kakuasaanna Puang Allataala anna nakamängä-mängäi asam ingganna hupatau susi puha muissanna'.

²³Ia toi puha dibeengkoa' anna umpebeenna' dipatei yabo kaju sitambem nakähä to kadake gau' situhu' pattujunna Puang Allataala.

²⁴Sapo' napatibangom anna nalappasam Puang Allataala dio mai kamateam aka tä' Ia la mala nataloi kamateam.

²⁵Aka puha natula' loppo' Daud tula'na Puang Yesus naua: ‘Puang Allataala liu kupahandam anu' ia passappi' matoto'ku dio tandai kanangku, nasuhum tä'ä' la mala tige'ge'.

²⁶Nasuhum ponno kakassiam illaam penabangku anna lemba' katilallasam dio pudu'ku, susi duka' bätä puntingku la masannam anna ponno pahhannuam

²⁷aka tä'ko umpäbäi sungnga'ku la tohho illaam kamateam, anna tä' toi la umpäbäiä' Kao inde To Masehomu la bosi.

²⁸Iko puha umpatuhoiä' lalam lu lako katuboam sule, anna tiala inabangku aka Iko tontä umpasolaiä'.’

²⁹Dadi inggannakoa' solasubungku, kupassubungangkoa' issi penabangku untula' diona Daud nene to taponene puham mate anna puha dilamum, anna ku'bu'na da'da' liupi taitaa' sule lako temo.

³⁰Sapo' indo Daud mesa duka' nabi, dadi naissam naua puha ma'pinda Puang Allataala la napatadongkongam mesa pessubunna la untadongkonni okkosam kahajaanna.

³¹Puha naissam Daud aka la napogau' Puang Allataala lambi' natula' loppo'um diona katuboanna sule To puha dilanti' la mepasalama'. Indo anna natula'i inde naua: ‘Aka tä' Ia la napäbäi tohho illaam kamateam anna tä' duka' la bosi bäbä.’

³²Puang Yesus-um too indo napatibangom sule Puang Allataala anna kami'um too to ussa'bii.

³³Anna naäkä'um Puang Allataala untadongkonni ongeam kamatandeam sola kakuasaam nabeem Ambena anna untahima Penaba Maseho indo puha didandiam. Iam too natolloam yabo mai, indo puhaa' taita anna tahingngi.

³⁴Aka taia Daud längäm suhuga sapo' Daud dia ma'kada naua: ‘Ma'kada Puang Allataala lako Debatangku naua: Okko'ko dio tandai kanangku

³⁵sule lako wattunna la kupadadi pehhondoammu ingganna balimmu.’

³⁶Dadi pahallu muissam si'da-si'da inggammua' to Israel muua indo Puang Yesus to puhaa' umpatei yabo kaju sitambem naäkä'um Puang Allataala mendadi Debata anna To puha dilanti' la mepasalama'.”

³⁷Tappana nahingngi kaha-kaha ia too tappa tillä'bä' buana ingganna tau to dio heem lambi' mekutana lako Petrus anna ingganna solana naua: “Akam la kipogau'?”

³⁸Natimba' Petrus naua: “Tihokongam asangkoa' gau'mu ammu behoia' kalemu ditedo' sola sanganna Yesus Kristus anna mala diampunniangkoa' dosamu anna la nabeengkoa' Penaba Maseho Puang Allataala.

³⁹Aka ikonna' too sola pessubummu anna ingganna tau taianna to Yahudi nahua pa'dandiam ia too. Anna la budapi tau natambai situhu' pattujunna Puang Allataala.”

⁴⁰Iya budapi tula' senga' napakaingasam indo tau buda anna napa'sule-sulei napakilala naua: “Äläikoa' kalemu illaam mai alla'-alla'na inde mai to kadake gau' anna malakoa' salama'.”

⁴¹Ingganna to untahima indo tula'na Petrus umbeho asam kalena ditedo', lambi' allo eta too kehängäm to matappa' kiha-kiha tallu sa'bu tau budanna.

⁴²Iya sangngim manontom muanda'i pepa'guhuanna suhona Puang Yesus, anna tontä liu umpasakalebu kalena. Anna si ma'mesa liu dio mesa ongeam umpiä'-piä' hoti naande pada-pada anna ma'sambajam.

⁴³Mahea' asam ingganna to dio heem tappana muita buda tanda memängä-mängä anna ma'hupa-hupa tanda napadadi Puang Allataala nakähä suhona.

⁴⁴Anna ingganna indo to matappa' tontä liu ma'mesa anna ingganna aka-akanna naampuam pada-pada.

⁴⁵Susi toi ke deenni to umbalu' aka-akanna nataba-taba indo allinna lako solana situhu' kapahalluanna si mesa-mesa.

⁴⁶Sola kamanontongam umpamesa penaba si ma'hempum allo-allo illaam Banua Debata anna umpasibala'-bala' banuanna naongei umpiä'-piä' hoti anna mangngande pada-pada sola katilallasam anna sakalebu penabanna,

⁴⁷napasindum umpuji sanganna Puang Allataala. Napohäe asam tau anna allo-allo tuttuam buda aka nahängänni liu Puang Allataala bilanganna to la salama'.