Read Bambam Pa'palosai 12 Bible Online

Pa'palosai 12 - Bambam bible

Pa'palosai 12

¹Pissananna kuitam yabo langi' mesa tanda memängä-mängä maneanna diita susi. Deem mesa baine umpehhondoi bulam anna umpa'poheba mata allo. Ma'songko' tomahaja dipadekke'i sapulo dua bintä.

²Indo baine kebättä anna lambi'um wattunna la keänä', nasuhum kaoli-oli aka mangnguhiba'um.

³Mane kuita polei yabo langi' mesa tanda memängä-mängä. Deem mesa naga malea pada poa, pitu ulunna anna sapulo tandu'na. Yabo indo ulunna sanda songko' tomahaja.

⁴Umpessämbäsam engko'na, iya umpassii bahe tallunna bintä yabo langi' nahonnosam tama lino. Mane ke'de'i indo naga mangngampa dio olona indo baine la keänä' aka pattujunna naua: “Subunna too indo änä'-änä', tappa kuamma' kalebum.”

⁵Pissananna indo baine ungkeänäsammi mesa muane-ane, to la umpahenta ingganna hupatau umpake palu-palu bassi. Sapo' tappa diala hi indo änä'-änä' dibaba lako Puang Allataala anna dipayaboi okkosam kahajaanna.

⁶Iya tappa muäläi siaham duka' kalena indo baine le'ba' lako ongeam puha napatokaam Puang Allataala dio pohiallasam. Aka la naongei ditahinana sasa'bu dua hatu' annam pulo benginna.

⁷Iya dadim pa'bundusam yabo suhuga. Mikhael sola ingganna malaika' pentuhu'na sibundu' indo naga sola ingganna malaika' pentuhu'na.

⁸Sapo' tä' mala patalo indo naga, nasuhum tä'um dipäbäi la yabo suhuga sola malaika' pentuhu'na.

⁹Iya dipa'tibeammi lao indo naga poa. Iam too indo diuaam nenena naga, ia toi diuaam tomahajanna setam battu diua setam bulitu' to umbaba bulim issinna lino. Iam too indo to dipa'tibeam tama lino sola ingganna malaika' pentuhu'na.

¹⁰Pissananna, iya kuhingngim to metamba illaam suhuga naua: “Tentomai lambi'um pole' wattunna Puang Allataala Debatanta la umpasule lako pattujunna mepasalama'. Anna la ma'kuasa anna ma'pahenta. Anna lambi' toom duka' wattunna indo To nalanti' Puang Allataala umpasalama' hupatau la umpasule lako kakuasaanna. Aka puham dipa'tibeam illaam mai suhuga indo to si angga allo bengi untula' kakadakeanna solasubunta dio olona Puang Allataala.

¹¹Natalo solasubunta aka indo katitolloanna hahana Änä' Domba, anna indo umpa'pakahebaam diona kasalamasam. Anna tä' umpakalando katuboam di lino, sapo' sangngim ahu' umbeho kalena dipatei.

¹²Dadi sihatam anna sipäto' muahhe lembäna suhuga sola ingganna issinna kassi anna tilalla'! Sapo' tilaka ia issinna lino sola le'bo' aka tuhummi tomahajanna setam! Anna ma'tatta' keaha' ma'kasubu-subu aka naissammi naua sai'di' mandam wattu la naolaam.”

¹³Tappana nasi'dim indo naga naua: “Ditibemä' tama lino,” iya tappa umpangngappi' siaham indo baine to ungkeänäsam mesa muane-ane.

¹⁴Sapo' indo baine dipapani'i dua pani'na bunia gege, anna mala mentia' lako indo ongeam dipatokaam dio pohiallasam la naongei ditahinana tallu taum setangnga, anna mala tä' nasägäi indo naga.

¹⁵Tappana naita tä' la mala nalambi', iya umpatibuloso-losom uwai illaam mai sädäna napasopa'i indo baine anna malai naanusam.

¹⁶Sapo' napesäkäi litä' indo baine. Aka indo litä' mengängngä muamma' indo uwai pada salu buttu illaam mai sädäna indo naga.

¹⁷Iya saundu'um meali-ali indo naga lako indo baine, nasuhum le'ba' umbundu' ingganna pebatisam senga'na indo baine, battu diua ingganna indo to untuhu'i pahentana Puang Allataala anna to tontä liu manontom muanda'i pepa'guhuanna Puang Yesus.

¹⁸Mane ke'de'i dio bihim le'bo' indo naga.