Read Bambam Pa'palosai 18 Bible Online

Pa'palosai 18 - Bambam bible

Pa'palosai 18

¹Puhai ia too, kuita pole oom mesa malaika' senga' tuhum yabo mai suhuga. Muampuam kakuasaam kasalle anna pangkähhäna umpomasiä' lino.

²Anna katamba-tambai naua: “Tilakam! Tilakam Babel indo kota kasalle! Tentomai mendadim ongeanna ingganna setam anna debata kadake; anna naongei ingganna hupanna dassi mekussi'-kussi' si nakahidi' hupatau.

³Aka ingganna issinna lino nababa bulim gau' kadakena sihhapam to dibabai muihu' anggur lambi' sanda-sanda tanapogau' aka mäbo'. Anna umbabai ingganna tomahaja illaam lino ullullu' pa'bannetauam, anna buda pa'balu' lako lino napatomakaka aka natumä kamohäeam sugali'na to Babel.”

⁴Anna mane kuhingngi pole oi kamaha senga' ma'kada yabo mai suhuga naua: “O umma'ku, pessubungkoa' illaam mai kota Babel indana nasussuikoa' dosana anna nalambannikoa' pesämbä'ku.

⁵Aka mentombommi dosana sondä' langi' anna tä' deem nakalembei Puang Allataala indo gau' kadakena.

⁶Pabala'i indo gau' kadakena; Pabala'i penduam tiluppi' umba susi indo si napogau', sihhapam anggur dipangngissiam ihusanna, penduam tiluppi' makahha'na anna indo si napebeem.

⁷Palambi'i kamapi'disam anna kamasussaam la sipadaam indo kamatandeam anna katomakakaam si napomasannangam kalena. Aka si ussangai kalena naua: ‘Kao tomahajaä' to ma'pahenta, taiaä' to balu-balu baine, anna to tala deennä' ussi'dim kamasussaam penaba.’

⁸Kaha-kaha iam too nasuhum illaam allo sangngallo la dipalambi'im ma'hupa-hupa kamapi'disam susinna: saki mandappo'i, kamasussaam penaba, anna kakobeam. La naä'bäi api aka tadisihanteam kakuasaanna Puang Allataala Debatanta to umpassalai.”

⁹Ingganna tomahaja illaam lino to napasola to Babel ullullu' pa'bannetauam anna mangngala taba illaam katomakakaanna la sumahho anna ma'bahata ke naitam hambunna indo api ma'nala-nala mangngä'bäi.

¹⁰Ingganna indo tomahaja ke'de' ma'pahandam mambela aka mahea' la nahua pandahhaam ia too. Anna ma'kadai naua: “Tettekede sägä punalam Babel kota kasalle anna matoho! Maha'um! Illaam mesa tette' dipalambi'i pesämbä' Debata.”

¹¹Ingganna pa'balu' lako lino sumahho anna ma'bahata ussahhoi kasägänganna Babel, aka tä'um deem moi podo la mesa tau muallii balusanna

¹²susinna: bulabam, peha', batu masuli', mutiara, sampim mapia, sampim mellolo pao, sampim malellä, anna sutera. Susi toi duka' kaju mallam dilambi', anna baham-baham toha dipapiai, anna kaju masuli' allinna, gällä, bassi, anna pualam.

¹³Tä' toi deem la muallii kuli'na kaju matannim, hampa-hampa, tunuam bubanau', dama' si bubanau' isanga mur anna kemenyan, anggur, minnä', tappum anna gandum, sapim, domba, daham sola bendi, sabua' anna to disakka illaam pa'bundusam.

¹⁴La ma'kada ingganna indo pa'balu' lako issinna kota Babel naua: “Ingganna indo aka-aka si umpohäea' la muampuam, pa'de asammi. Anna ingganna indo baham-baham masuli' si umpobunga-bunga bäbäa', pa'de asammi, anna tä'um deem la ullambi'.”

¹⁵Ingganna indo to si umbalu' baham-baham ia too dio Babel lambi' naposugi' la ke'de' ma'pahandam mambela, aka mahea' la nahua indo pandahhaam. Iya la sangngim sumahho mandam anna ma'bahata napasindum

¹⁶ma'kada naua: “Tettekede, sägä punalam issinna Babel kota kasalle. Si umpake sampim mapia susinna sampim millo', sampim mellolo pao, anna sampim malellä. Anna si umpake poheba bulabam, batu masuli', anna mutiara!

¹⁷Sapo' anggam mesa tette' anna pa'de asammi indo katomakakaanna!” Susi toi ingganna to si umpalao kappala', anna to si ma'kappala', anna to mengkähä illaam kappala', sola ingganna to si mappameä tama le'bo', la ke'de' umpahandam mambela

¹⁸indo api tumbum hambunna muä'bäi indo kota anna sikaolii naua: “Tä'um deem la susinna inde kota kasalle.”

¹⁹Iya sangngim ussabu'im sobä' ulunna tanda pa'bahataam, mane sumahhoi napasindum sikatamba naua: “Tettekede, sägä punalam pole' Babel kota kasalle! Moi kela daa katomakakaanna si umpatomakaka ingganna to muampuam kappala' le'bo'! Sapo' angga hi mesa tette' anna pa'de asammi ingganna aka-akanna.”

²⁰Sapo' ikoa'-iko inggannakoa' issinna suhuga, la kassikoa' anna tilalla' muita katallanganna kota ia too. O inggannakoa' umma'na Puang Allataala sola ingganna suho anna nabi, la kassikoa' anna tilalla' aka napalambi'im pesämbä'na Puang Allataala indo kota kasalle, bala'na indo puha napogausangkoa'.

²¹Puhai ia too, iya deemmi mesa malaika' bomboam muäkä' mesa batu pada issä gege kasallena anna napa'lebasanni tama le'bo' napasindum naua: “La dipasusim too inde kota Babel mesa kota handam kasalle, la ditallangam lambi' tä'um deem la diita pole.

²²Anna tä'um deem la dihingngi pole poni-poniam illaam kota Babel susinna to ma'katapi, to menani, to ma'sulim, anna to ma'lalloho'. Tä' toom duka' deem la dilambi' moi podo la mesam to manähä kapapia-pia, anna tä' toi duka' deem la dihingngi to lumambu'.

²³O to Babel, tä'um deem la naita tau lekke'na lampu illaam kotamu, anna tä' toi deem la dihingngi to umpakahoa' pa'pakabengam. Indo to ma'balu'mu handam kaissangam illaam lino, anna pa'issangammua' si umpake umbaba bulim ingganna hupatau illaam lino.

²⁴Ia anna dipalambi'i pesämbä' kota Babel, aka naongei hahana ingganna nabi anna hahana umma'na Puang Allataala. Battu diua kota Babel tombongam bukunna umma'na Puang Allataala to dipatei illaam lino.”