Read Bambam Pa'palosai 19 Bible Online

Pa'palosai 19 - Bambam bible

Pa'palosai 19

¹Puhai ia too, iya kuhingngim susi kamahanna tau buda muahhe illaam suhuga sikatamba naua: “Dipuji Debata! Aka Puang Allataala Debatanta kabuttuanna kasalamasam, anna ia to handam matande anna ma'kuasa.

²Dipuji aka abana malolo anna sipäto' pesämbä'na. Puham umpassala indo baine passunda' to dipobungam bibi, to ungkadakei lino napobua' passundasanna. Napassala Puang Allataala aka buda sabua'na si napatei.”

³Mane dihingngi polei indo kamaha muahhe naua: “Dipuji Debata! Aka indo hambunna api to muä'bäi indo kota kasalle la tontä liu tumbum sule lako salako-lakona.”

⁴Iya indo dua pulo appa' to pebaba anna indo appa' to ma'penaba sangngim ma'balinguntu' umpenombai Puang Allataala to tadongkom yabo okkosam kahajaam. Anna nauai: “Abana sipäto' dipuji Debata!”

⁵Iya dihingngim kamaha illaam mai indo okkosam kahajaam ia too naua: “O inggammua' to mengkahea' lako Puang Allataala, susi to bahinni' teem to kasalle, pujikoa' Puang Allataala Debatanta!”

⁶Puhai ia too, kuhingngim susi ahhena tau buda, ma'uhhum susi pälämpä kasalle anna magahugu susi guntu' kasalle. Iya kuhingngim ma'kada naua: “Dipuji Debata! Aka ma'pahentam Puang Allataala Debatanta To Handam Kuasa.

⁷Tapada-padaa' kassi anna tilalla' umpuji kamatandeanna Puang Allataala! Aka lambi'um allo kakabenganna Änä' Domba anna tadongkommi to la napobaine.

⁸Aka puham dibeem poheba mabusa millo' anna mapattim la napa'poheba.” (Poheba mabusa millo' kalembasanna pa'pogausam mapianna umma'na Puang Allataala).

⁹Puhai ia too, napa'kadai omä' indo malaika' naua: “Tuli'i naua: ‘Napohongko' to ditambai la mangngala taba illaam hame-hame kakebaineanna Änä' Domba!’ ” Mane nauai: “Inde tula' tappa', buttu di Puang Allataala.”

¹⁰Iya ma'balinguntu'mä' dio olona indo malaika' la kupenombai, sapo' tappa nauaannä': “Daa daa daa, Puang Allataala hia penombai! Aka kao sabua'naä' duka' Puang Allataala susi siangki' anna ingganna solasubummu to manontom muanda'i pepa'guhuanna Puang Yesus. Aka pepa'guhuanna Puang Yesus too'na tula'na ingganna nabi.”

¹¹Mane kuitai titungka' suhuga, iya tandaammi mesa daham mabussä' disäkei. Indo to ussäkei isanga To Manontom anna To Malolo. Si muundu' lollä illaam pahhottosanna anna malolo illaam pa'bundusam.

¹²Susi lelo api matanna, anna yabo ulunna buda songko' tomahaja. Anna dio kalena tisuha' mesa sanga, sapo' anggam Ia muissanni kalembasanna sanga ia too.

¹³Jubana puha dihamme dokko haha. Anna disangai “Battakadanna Puang Allataala”.

¹⁴Anna natuhu'i ingganna sohodadu yabo suhuga sangngim ussäkei daham mabussä', anna ma'poheba mabusa millo' anna mapattim.

¹⁵Tidandoham illaam mai sädäna mesa pa'dam pataham. Iya pa'dam iam too la napake untaloi ingganna hupatau. La ma'pahenta umpake palu-palu bassi. La sihhapam uhhimpi' anggur illaam ongeam pahhimpisam. Indo diuaam pahhimpisam, kalembasanna aha' kasallena Puang Allataala To Handam Kuasa.

¹⁶Tisuha' sanga dio jubana anna dio apanna naua: “Tomahajanna ingganna tomahaja anna Debatanna ingganna debata.”

¹⁷Mane kuitai mesa malaika' ke'de' yabo mata allo metamba untambai ingganna dassi sikatia' yabo lawwa naua: “Maikoa' pangngalataba umpakahoa' pa'hame-hameam kasalle napadadi Puang Allataala.

¹⁸Maikoa' siande-andei balena ingganna tomahaja, balena pangngulunna sohodadu, balena pa'bahani, balena daham sola to ussäkei, balena ingganna hupatau mengkalao to bahinni' sule lako to kasalle, sabua' anna taianna sabua'.”

¹⁹Mane kuitai indo olo'-olo' to peande anna ingganna tomahaja illaam lino sola sohodadunna ma'hempum la umbundu' indo to ussäkei daham mabussä' sola ingganna sohodadunna.

²⁰Iya disakkam indo olo'-olo' to peande sola indo nabi tatappa', battu diua indo to puha umpogau' tanda memängä-mängä umpake kakuasaanna indo olo'-olo' to peande, napolalam umbaba bulim hupatau to umpakei tandana indo olo'-olo' to peande anna to umpenombai indo pa'pasusianna. Puhai disakka indo olo'-olo' to peande anna indo nabi tatappa', iya ditibe tubom tama le'bo' api ma'nala-nala susi dama' ditunu.

²¹Anna ingganna sohodadunna, mesai indo to ussäkei daham mabussä' umpatei asanni, indo pa'dam tidandoham illaam mai sädäna napake. Iya tappa sule siaham buda dassi nalebo napedea'i balena ingganna indo to mate.