Read Bambam Pa'palosai 7 Bible Online

Pa'palosai 7 - Bambam bible

Pa'palosai 7

¹Puhai ia too kuitam appa' malaika' ke'de' umposanda sikunna lino. Ullapa' appa' lalanna hibu' illaam lino anna mala pa'de hibu' yabo galantangam, illaam le'bo', indana deenni uhhodo ingganna kaju.

²Mane kuitai mesa malaika' senga' buttu illaam mai tandai mata allo umbaba petandana Puang Allataala to tubo, la ditandaiam umma'na. Iya metambam lako indo to appa' malaika' to puha nabeem Puang Allataala kakuasaam la ungkadakei galantangam anna le'bo' naua:

³“Dapa yolo ungkadakei galantangam sola le'bo' anna ingganna kaju, ke tä'i puha kitandai yolo kidena ingganna sabua'na Puang Allataala Debatanta.”

⁴Iya kuhingngim indo to ditandai sahatu' appa' pulo appa' sa'bu tau budanna. Indo to ditandai, pessubunna sapulo dua pentoosanna to Israel,

⁵susinna pessubunna Yehuda sapulo dua sa'bu ditandai; pessubunna Ruben sapulo dua sa'bu; pessubunna Gad sapulo dua sa'bu;

⁶pessubunna Asyer sapulo dua sa'bu; pessubunna Naftali sapulo dua sa'bu; pessubunna Manasye, sapulo dua sa'bu;

⁷pessubunna Simeon sapulo dua sa'bu; pessubunna Lewi sapulo dua sa'bu; pessubunna Isakhar sapulo dua sa'bu;

⁸pessubunna Zebulon sapulo dua sa'bu; pessubunna Yusuf sapulo dua sa'bu; anna pessubunna Benyamin sapulo dua sa'bu.

⁹Puhai ia too kuita pole oom tau mepilla'-pilla' budanna, tä' deem mesa tau la umbelai nahekem. Indo tau buda buttu dio mai ingganna kahajaam, kabuttuam, botto, anna basa illaam lino. Sangngim ke'de' dio olona indo okkosam kahajaam anna dio olona indo Änä' Domba. Sangngim ma'juba mabusa anna umposanda palapa andulam,

¹⁰napasindum sikatamba naua: “Kasalamasam buttu di Puang Allataala Debatanta to muokko' yabo okkosam kahajaam, anna buttu di Änä' Domba.”

¹¹Ingganna malaika' ke'de' umpali' indo okkosam kahajaam sola ingganna to pebaba anna indo appa' to ma'penaba. Sangngim ma'balinguntu' menomba lako okkosam kahajaam umpenombai Puang Allataala

¹²napasindum naua: “Abana tappa' susi! Dipuji Puang Allataala Debatanta. Dipuji kamatandeanna anna kakeakasanna. Ditilalla'i anna dipa'kasallei anna dipuji kakuasaanna sola kamatohoanna sule lako salako-lakona. Abana inna la diua!”

¹³Iya nakutanaimä' mesa indo to pebaba naua: “Menna hia inde lako ma'juba mabusa anna buttu umba hia ngei?”

¹⁴Kutimba'im kuua: “Tä' kuissam tuam, aka iko hia la muissanni.” Iya natulasammä' naua: “Inde lako tau to puha ussi'dim pandahhaam kasalle. Puhaim umpake hahana Änä' Domba untappa'i jubana lambi' mabussä'.

¹⁵Nasuhum ke'de'um dio olona okkosam kahajaanna Puang Allataala anna menombai allo bengi illaam Banua Di Ada'na. Anna indo To muokko' yabo okkosam kahajaam, Iam too muongannii

¹⁶napolalam tä'um la ussi'dim katadeasam anna kamabähhängam, anna tä'um la nadä'dä' allo mapana'.

¹⁷Aka indom Änä' Domba ke'de' dio ampe'na okkosam kahajaam la ungkambi'i anna la natette lako uwai katuboam. Anna Puang Allataala la umpassiianni uwai matanna.”