Read Bandi MÁFIYU 15 Bible Online

MÁFIYU 15 - Bandi bible

MÁFIYU 15

¹Kɛ́ Júsuai sítii taa ɣɛ́ ti w̃a Falósiai ɛ́ɣɛ kaamɔítii Ngala sávai hááw̃a ti lɛ́ingaa ti híɣeni Jɛlúsɛl̃ɛ, tí vá Jísu yelé ti mɔ́ɔ́ni, ti ɣɛ́ ma,

²“Ndeénii le í vólu yélaitii taa híyama ngáá a mu káwalani ti volú hái? Sífaa tɛí yáa wúya kíya kule í ti w̃a tí kɛ p̃ɛ́ɛ́ tɔɔ́ ɣɛ́a laaỹɛ́.”

³Kɛ́ Jísu i ti woo yápoteni, i ɣɛ ti w̃a, “Ndeénii le wá bɛ́lɛ nɔ wáá híyama ngáá Ngala sávai, wú hítɛa wú wú maa ɣélei vólu?

⁴Sífaa Ngalá ngí ndengɔ́, i ɣɛ ta, ‘Wufe í kɛ́ɛ́ɣɛ w̃a taa í njéé’ aáva ‘Nuí fíli áá ngoo ỹɔ́u lé kɔwɔ́ato ngi kɛ́ɛ́ɣɛ ɔɔ ngi njéé wa, kɛ tí maa w̃ɔ́i váa.’

⁵Kɛ́ wáá wú gálambongi wo ngáá, ná nuu fíli áá ŋáni hɔ́lɔ ngáá ɔ́ɔ́ bɔ́ la ngi kɛ́ɛ́ɣɛ ɔɔ ngi njéé wa, kɛ́ i ɣɛ ta, ‘Ngí Ngalá kuulónga náa lá kílii,’

⁶aa ngáá maa gúle ngáá ɔ́ɔ́ wúfe ngi kɛ́ɛ́ɣɛ w̃a ɔɔ ngi njéé w̃a fe fááw̃a ti yaá, sífaa, i Ngalá kuulonga náa lá. Ná yáa sí ɣɛ, kɛ yáa híyama ngáá Ngala sávai. Náá hááw̃a, kɛ wú híɣe veléi lɔ ngáá ná Ngala sávai vólu kɛinɔɔ́ wú hítɛ wúmaa gálambongi vólu.

⁷Wá lɔ́ ngáá Ngala fáá la mbélaa yaah̃ú kɛ́ aa wú lií h̃u! Ngala ndaa háá lé mɔ́i Aisáya ndái i ɣɛi pele w̃a ná Ngalángi ngói sítii ndení ma ngáá í ndé kɔwɔ́ato wú wá, ná wáa ngáá, sí Aisáya í ndéni, i ɣɛ ta,

⁸‘Nungái sítii taá wúfe má ngáá laa wóo, kɛ́ ti liítii maa gooh̃ángɔɔ lé mbá.

⁹Kulasuunúma aa ti yɛ fɛ́lindai h̃u, bɔw̃álale, taá ɣɛ taá nuu búsa hávai ɣɛ ngáá nungáitii kíya kpéiŋ áá ɣɛ́ ngáá ní háva!’ ”

¹⁰Kɛ Jísu i faŋaí lolínga yelé, i ɣɛ ti w̃a, “A wolílo sí w̃a ngáá nde wú ngatɔ́ mba!

¹¹Mɛɛníi sí núi áá mɛ ɛ́ɣɛ sí áá kpɔ́le, aá láa le áá núi ná ɣɛ́ ngáá kpaló mba w̃ɔ́ɔ́ Ngala fɛ́li fááw̃a, kɛ́ ngói sítii taa gúla nda áá nde, aá lɔ áá kɛ ngáá kpaló mba w̃ɔ́ɔ.”

¹²Kɛ Jísu volú yélaitii tí váa ngelé, ti ɣɛ́ ma, “Yí kɔ́lɔ ngáá ngoí sí yí ndéngɔ i baalɛngɔ́ Júsuai sítii mba taa ɣɛ́ ti w̃a Falósiai?”

¹³Kɛ́ Jísu i ti woo yápoteni, i ɣɛ ta, “Sí kínɛi í ngáá sí ŋaníí ní Kɛ́ɛ́ɣɛ í ngelegóóh̃u áá síngɔ, kpɛ́lɛɛ aa vulukúla.

¹⁴A waa béɣe ngáá Falósiaitii, tiyá lɔ ngáá mbole yeláa ɣɛ kíli, táa pele ɣɛ ngáá mbole yeláá. Mbole w̃ɔ́i va ná áá ngi mbála wole w̃ɔ́i lokohóu ngáá í péle ɣɛ lá, ti félengɔ taá víli ndowá h̃u.”

¹⁵Kɛ́ Jísu volú w̃ɔ́ɔ yiláa i ɣɛi na táá ɣɛ́ ma Pítɛ, i yɛpɛní Jísu yelé i ɣɛ ma, “Faanɛ́ɛ́ngi sí h̃úúɣɛ ngáá ni ye.”

¹⁶Kɛ́ Jísu i ɣɛi volú yélaitii ma, “Wɔ́i nɛ́ɛ́ faa yátɔ mba kpɛ́?

¹⁷Wáa suuwɔ́lɔ ngáá mɛɛníi fíli nuí áá mbála la aa lí koo ya, laáva aa gula koo ya?

¹⁸Kɛ́ ngoí núi áá kulá la í ndé, aá lɔ́ɔ gúla ndií h̃u, nátii pa tɔ taá nuí ɣɛ́ ngáá kpaló mba w̃ɔ́i Ngala fɛ́lindai h̃u.

¹⁹Sífaa, núi gí mai lɔ́ kisiyá ỹɔ́i áá gúla na sí áá kɛ ngáá háwu í nuu váa, í kɔ́lɔsiya mbo, í ŋúỹa wó, í káha hééle woo le, ɛ́ɣɛ í maaboo ngoo le kɔwɔ́ato nungáá véka wa.

²⁰Sítii tɔ taá kɛ núi áá ɣɛ́ ngáá kpaló mba w̃ɔ́i Ngala fɛ́lindai h̃u. Kɛ́ mɛɛníi nuí áá mɛ ɛ́i ɣɛ́ yaa wúyai, kíya Falósiaitii tí ndéngɔ ngáá nuu í kɛ, ɛi nuu ɣɛ́ ngáá kpaló mba w̃ɔ́ɔ́.”

²¹Jísu i hiɣeí mbéi í ɣɛ́i na í lí tataí ná h̃u í taa walái nátii kpela taa tí lolí ngáá Táya ɛ́ɣɛ Sáidɔ.

²²Nyah̃ápo yiláa tɔ́ wɔ́lɔ í ɣɛ́i na, i ɣɛi ngáá taí sí h̃u w̃ɔ́ɔ́ taá náá lolí ngáá Kééna. I hiɣeí Táya ɛ́ɣɛ Sáidɔ lataí h̃u í vá Jísu yelé. I ɣɛi áá woo gúla áa ɣɛ́ Jísu w̃a, “Kawálai, yɛ́i taa í lóli ngáá Masangí Deevé Láála Loí, mááw̃aanu hóu kái! Faa bɔ́lungɔɔ lé ní ỹáh̃aloi la ngwala, maa lɔɔ nɔ́w̃ɔ ngáá ỹína nyɔí í pólu.”

²³Kɛ́ ngoo yílaa bɛ́lɛ Jísu aa ndeí ma. Kɛ Jísu volú yélaitii tí váa Jísu yelé, tí maanɛ́ɛ́nɛ, ti ɣɛ́ ma, “Nyah̃ápoi sí bɛ́ mu volú, aá lɔ nɔ́ɔ mu volú áá mu lolí ngéleya.”

²⁴Kɛ Jísu i ɣɛa ta, “Ngalá ngí tɔ́vengɔ nɔ́ɔ Ísulɔ yeláitii ngéle, tiyɛ́i ti gúlangɔi ngáá mbaalaítii ti longɔ́i su.”

²⁵Ná Jísu í fái sí léni, nyah̃ápoi i vaí, í lá mbɛ, i ɣɛ ma, “Kawálai, bɔ́ mba kái!”

²⁶Jísu i ɣɛ ta, “Aa pele w̃a ngáá nuu ɔ́ɔ́ ndopóaitii ti ỹɛ́nii yéɣe ɔ́ɔ́ píli kékeaitii mbɛ.”

²⁷Kɛ́ nyah̃ápoi i ɣɛi ta, “Tɔɔỹaá le, kawálai, kɛ́ laáva kékeaitii kéle tɔ taá mɛ́ɛ́ni búlu kpúlungi ỹɛ áá híɣe ti lo mbélaitii ti léévei ya áá gúla ndɔwɔlɔ́i wa.”

²⁸Kɛ Jísu i nyah̃ápoi woo yápotea, i ɣɛ ma, “Yá lɔ ngáá nyah̃á í lángi h̃úúbangɔ! Sí í lóngɔ lá aá lɔ́ɔ ɣɛ́ í yɛ́.” Ngamá nɔ́ɔ, nyah̃ápoi ỹáh̃aloi i walóni.

²⁹Jísu i hiɣéi ỹandái míl̃anda í ɣɛ́i na, í lí Galéli Yɛ Walaí góóɣaka w̃á, í lɛ́ ngihéi wa, í héi na.

³⁰Faŋa walá i vaí ngele ngáá mɛŋɛl̃ɛ́ yélaitii, mbole yeláitii, nɔɔnɔ yeláitii, bóboaitii ɛ́ɣɛ seebɛ yeláa vékaa bih̃íw̃aa, tí tí kpɛ́lɛɛ pú Jísu gakála, laáva í ti waló.

³¹Nungáitii kindáá vílingɔ i ɣɛi lá ngwála ná ti bóboai tɔí táa yɛ́pɛ, nɔɔnɔ yeláitii ti walóngɔ, tí mɛŋɛl̃ɛ́ yélai tɔ táa híya, ɛ́ɣɛ tí mbole yélai tɔ táa ỹandá lɔ, aáva ti kpɛ́lɛɛ ti Ísulɔ yeláitii ti Yálangi laaw̃áálɛi.

³²Kɛ Jísu i volú yélaitii tólinga, i ɣɛ ti w̃a, “Nungái sítii maaw̃áánu lɔɔ sóu, bɔw̃álale, tí kɛ́nga náa mbéi ngáá foló sáángɔ aáva ŋani fíli aa ti yaá tɔ́ɔ mɛ. Nyáá vá ngáá lói ngɔ́ɔ́ ti lɔ́ve ti láitii su ngáá ndɔlɛí, sífaa tɛingaa h̃u taá vúw̃a ngáá ndɔlɛí pélei h̃u.”

³³Kɛ́ polú yélaitii tí mɔɔnií ti ɣɛ́ ma, “Míl̃inda lɔ maá mɛ́ɛ́ni hɔ́lɔ na áá kulaɣɛ maá fáŋa walái sí laawɔ́ lá ngaalaí sí h̃u?”

³⁴Jísu i ti w̃ɔ́ɔ́nii, i ɣɛ ti w̃a, “Bilé búsa nɔ́nɛngɔ lɔ í wú yáá?” Tí ngoo yápoteni, ti ɣɛ́ ma, “Bilé búsa ngɔ́felangɔ ɛ́ɣɛ nyɛɛ guló gulo lɛingáá.”

³⁵Kɛ Jísu i ndengá fáŋai w̃a ngáá ti héi ndɔwɔlɔ́i wa.

³⁶Kɛ i bilé búsa ngɔ́felangɔi yeɣénga ɛ́ɣɛ nyɛ́i, í sɛ́ɣɛɛ gula Ngalá ma, í tí yalé ngále su, í tí he volú yélaitii ngeyá. Polú yélaitii pa tí féé hee nungáitii ngeyá.

³⁷Ti kpɛ́lɛɛ tí mɛ́ni, í kúlaɣɛ ngáá ti ye. Kɛ Jísu volú yélaitii tí kambáli ngwála wála ngɔ́felangɔ yeɣénga tí ndaa hé ngáá mataí í gúlai polú.

³⁸Siỹɛngáitiini sɔíngi tí ndaaỹɛ́ngi wóni ti ɣɛ́i ngáá tásu nááningɔ, nyah̃áitii ɛ́ɣɛ ndopóaitii taá ɣɛ́i kpaɣai h̃u.

³⁹Kɛ Jísu i nungáitii tɔveá ti láitii su, í víli keléngi h̃u, í lí Magada lataí h̃u.