Read Bandi MÁFIYU 17 Bible Online

MÁFIYU 17 - Bandi bible

MÁFIYU 17

¹Ná foló ngɔ́hitangɔ í gúlai su, Jísu i Pítɛ yeɣéni ɛ́ɣɛ Jimisíni ngaa ngi ndéɣe Njɔú, taa tiyéni tí lí ngíhe góóh̃a wálai wú mba. Naa lɔ tiyá léé léé ti ɣɛ́i na.

²Naa vá tɔ Jísu ɣɛ kíli w̃aa í lóvini ná ti gakála. Ngaah̃úi i holóni kíya kpéiŋ folói í na, ɛ́ɣɛ mɔ́ɔ maa gúlai wólengɔ áá hólo kíya kpéiŋ mɛl̃ɛ mɛl̃ɛ́i í na.

³Ngamá nɔ́ɔ, kɛ Muusé ɛ́ɣɛ Iláija ti gúlaa ti yaah̃ú táá yɛ́pɛ Jísu yelé.

⁴Kɛ Pítɛ i yɛpɛngá, i ɣɛ Jísu w̃a, “Kɛɛɣɛ́, pangɔ́ɔ́ lé a mu hááw̃a ngáá a mu ɣɛ́ mbéinda. Ná yáá lúw̃ama, ngáá kpabá sáángɔ lo mbéinda. Ngiláángi aa ɣɛ í hááw̃a, ngiláángi i Muusé hááw̃a, ná vólu, ngiláángi i Iláija haaw̃a.”

⁵Pítɛ i lói nɔ́ɔ njɛpɛí vúma, ngamá nɔ́ɔ kɛ njɛ bilíi i ɣɛ́i áá hólo ngwala i vaangá, í ti w̃áábɔlu. Kɛ ngoí ta aá tɔ áá gúla njɛ bilíi ná h̃u. Ngoí ná i ɣɛi ngáá sí, “Sí lɔ í ngáá ní H̃íỹɛndou Loí, ndóngɔ lá, aá lɔ ndíílɛingɔ fááw̃a ngwala. A wolílo ndaa wóó w̃a!”

⁶Ná Jísu volú yélaa sáángɔitii tí ngói sí ỹɛ́nini, ti h̃undɛ́i tí ya pɛ́lɛ ndɔwɔlɔ́i wa ti h̃ú áá bɛ́li.

⁷Kɛ Jísu i vaa í lúba ti wa, i ɣɛ ta, “A yooɣé, a waa lúwa!”

⁸Ná tí wú nga séini, taá núu fíli tɔ́i kɛ léi Jísu.

⁹Ná ti ɣɛ́i taa híɣe ngihéi wa, Jísu i ndaahí kpá kpa mboní ngáá ti ye i ɣɛ ti w̃a, “Sí wú tɔ́ngɔ ngihéi wa, a waá nde nuu fíli má í ló su kpóloo nuí síí w̃ɔ́i taa ɣɛ́ ma Nuu Búsa Goo H̃ú Loí Ngala ngí mbúyoɣe sái h̃u.”

¹⁰Kɛ Jísu volú yélaa sáángɔi ti Jísu w̃ɔɔniá, ti ɣɛ́ ma, “Ndeénii le kaamɔítiini Ngala sávai hááw̃a ti ɣɛ́ kɛ Iláija hése aa va Ngalángi Lókolo Mbá W̃ɔ́i ɔ́ɔ́ ɣɛ́a va?”

¹¹Jísu i ti woo yápoteni, i ɣɛ ti w̃a, “Tɔɔỹáa le, Iláija lɔɔ vá, í ŋanií kpɛ́lɛɛ kɛ́ kíli batɛ́.

¹²Kɛ́ ngí nde wú w̃á, Iláija i vái kílii kɛ́ nungáitii taá ɣɛ́i kɔlɔ́, sí fíli pá í ti liivóni ti kpɛ́lɛɛ kɛ́ni lá. Ngimɔ́ɔ́ nɔ́ɔ jɔ́ Nuu Búsa Goo H̃ú Loí áá vá w̃aanɔw̃ɔ́ma ti yaá.”

¹³Kɛ Jísu volú yélaitii tí ngatɔ́a mba ngáá kɛ aa ɣɛngɔ áá yɛ́pɛ ti yelé kɔwɔ́ato Iláija wa, kɛ́ Nguya Wó Mɔ́i Njɔú í ɣɛ́i lá í ɣɛ́i áá yɛ́pɛ mba.

¹⁴Ná Jísuni ngaa polú yélaa sáángɔi tí yangáimai ngihéi wu, siỹɛndópo yiláá i vái Jísu yelé, í hítɛ wumbú ya kakála,

¹⁵i ɣɛ ma, “Kawálai, ní h̃íỹɛndou loí yaah̃ú w̃ááw̃aanu hóu kái. Kpɔle bɔ́lei lɔ í mba. Seebɛí sí i maanɔw̃ɔ́nga ngwála, táiŋ kpih̃íw̃aa w̃a, aa vilí ngɔmbuí ya ɔɔ í víli njɛí wu.

¹⁶Ngí vaangɔ́ lá í vólu yélaitii ngelé kɛ́ taá hombóngɔ tɔɔ́ mbálo.”

¹⁷Kɛ Jísu i ɣɛa ta, “Wá, nda tálai lɔ í wú h̃ú sí h̃uu yéteyangi h̃uu yélaitii, wáá lí ngáá kaka pélei! Táingi bɛɛ́ lɔ náa ngáá kɛ wú lííwaa wɔ́ɔ ɣɛ́a fái sítii ngatɔ́ mba?” I ɣɛ siỹɛndópoi w̃a, “Vá ngáá í lói mbéi.”

¹⁸Jísu i ndení ỹína nyɔí w̃a ngáá ngakpá ngáá í léve siỹɛndóu loí vólu, laáva i levéi polú. Ngamá nɔ́ɔ, siỹɛndóu loí i walói.

¹⁹Kɛ Jísu volú yélaitii tí liingá ngelé tiyá léé léé, tí mɔ́ɔ́ni, ti ɣɛ́ ma, “Ndeénii le naa hómbongɔ nɔɔ́ ỹína nyɔí léve siỹɛndóu loí vólu?”

²⁰Jísu i ti woo yápotei, i ɣɛ ti w̃a, “Wú lángi í wú h̃ú Ngalá fááw̃a aa letéi, kɛ́ ngí tɔɔỹái le wú w̃á, kɛbei ndangí sí í wú h̃u i ɣɛi wɔɔlɔ kulo kw̃ɛ́ɛ́ bɛ́lɛ í híti mɔ́sita gáálɛi h̃u, wáá hómbo wú ɣɛ́ ngihé ngwálai w̃a, ‘Hiɣe mbéi, yí lí múl̃ɔnda!’ Aáva aa lí ná. Wɔ́i bááh̃aa faa fíli mbá! [

²¹Kɛ́ kɛ léi Ngala fɛ́lindai ɛ́ɣɛ sú soundái áá hómbo í ỹína nyɔu laalií sí léve nuí vólu, kɛ́ peka fíli ɛ́i hombó ɔ́ɔ́ kɛ.]”

²²Ná Jísuni ngaa polú yélaitii tí yatɛ́i mba ỹanda yílaa Galéli tiyá léé léé, Jísu i ɣɛi ti w̃a, “Tiyá lɔ́ɔ́ va nuí síí w̃ɔ́i ta ɣɛ́ ma Nuu Búsa Goo H̃ú Loí lókolevema nungáá w̃a.

²³Taá páa, kɛ́ ná fólo félengɔ áá gúla su, sawa kélei w̃a, Ngalá ngáá mbuyoɣé sái h̃u, í ndɛɛh̃úu vú su.” Polú yélaitii ti w̃ááw̃aanungɔ i ɣɛi lá ngwala.

²⁴Ná Jísuni ngaa polú yélaitii ti vááni Kapɛ́ɛ́niya taí h̃u, Hɛ́ɛ́ma Yála Pɛ́lɛ váva hou mbélaitii tí vaaní Jísu volú w̃ɔ́ɔ́ yiláá ngéle taa ɣɛ́ ma Pítɛ, tí mɔ́ɔni, ti ɣɛ́ ma, “Wú káámɔɔ aa ngi ndá vávai he Hɛ́ɛ́ma Yála Pɛ́lɛi hááw̃a?”

²⁵Pítɛ i ti woo yápoteni, i ɣɛ ti w̃a, “Aá fe.” Ná Pítɛ í lɛ́ɛ́ni pɛlɛ́i wu, Jísu i yɛpɛí hése, i ɣɛ ma, “Sáimɔ, bɛɛ́ lɔ í ngáá í gí maa hái? Elení tɔ ngelewu w̃ásangaitii taá pávai gúla ti yaá? Ndɔwɔlɔ́ léndengaitii baa ndɔwɔlɔ véka h̃uu yélaitii?”

²⁶Pítɛ i Jísu woo yápoteni, i ɣɛ ma, “Ndɔwɔlɔ véka h̃uu yélaitii.” Kɛ Jísu i ɣɛa ma, “Kɛ ndɔwɔlɔ́ lé ndéngai tɛí ɣɛ́ naa wa hɔ́ɔ.

²⁷Kɛ́ maá lói mɔɔ́ ti báálɛ mba háá ɣɛ. Faalɔ, lí njɛ wálai la, yí ndoolíngi víli mbu, hésendaa ỹɛí yáa sóu, ndaawó, yáa kápangi lɔ́ nda sí áá kúlaɣɛ ngáá ní ndá pávai ɛ́ɣɛ í ndái. Maa gápangi ná yeɣé, yí líí la, yí mú ndá pávaitii fé lá.”