Read Bandi MÁFIYU 18 Bible Online

MÁFIYU 18 - Bandi bible

MÁFIYU 18

¹Táingi ná w̃a, Jísu volú yélaitii tí vái ngéle, tí mɔɔní, ti ɣɛ́ ma, “Ele lɔ í ngáá ngakpa mɔ́ɔ walaí Ngalángi w̃ásandai h̃u?”

²Jísu í ndopo gúloi lóli, í to ti liiwáá.

³Kɛ i ɣɛa ta, “Ngí tɔɔỹái le wú w̃a, kɛ léi wú bɔwɔ́ ɣɛ kíli ɣɛ kíya ndopo gúlo gulóaitii tí na, kɛ́ ná láá le, kúnafɔ Ngalángi w̃ásandai ɛi ɣɛ wú w̃ááh̃u.

⁴Faalɔ, nuí fíli ɛ́i h̃úúɣɛ wɔ́ɔ́lɔ, aáva í bɔ́wɔ ɣɛ ngáá ndopói sí ɣɛ kílii, aá lɔ í ngáá ngákpa mɔ́ɔ́ walaí Ngalángi w̃ásandai h̃u.

⁵Aáva nuí fíli áá ló ngáá ngé aáva í lokohéi ndopo gúlo laalií sí tá yílaa kéle tɔ mbu ndongí hááw̃a í su ngáá ngé, kɛ maa w̃ɔ́i i lokohéinga mbú.”

⁶Kɛ Jísu i mɔɔ ɣɛa ta, “Sítii ti langɔ́ ngáá ngé, í lí bɛ́lɛ í tó ndopo gúlo gulóaitii mba, nuí fíli áá kɛ ngáá háwu ti tá yílaa í faa ỹɔ́u ɣɛ, maa ɔ́ɔ́ ɣɛ́ nɛ́ɛ́ni ti ndólo wɔtú wála yili maa w̃ɔ́i woló wá, ti pilí yívo wúúhulungɔi wu í ló mbu.

⁷Suu lɔɔ vá ɣɛ́ma ỹɔ́u nungáitiini ma ngeleí sí wu, sífaa fáitii tɔ naa taá kɛ ngáá háwu taá fáa ỹɔ́i ɣɛ, maa háitii kɛ ti ɣɛ́ nɔ́ɔ w̃ɛ́ɛ́ taa ɣɛ́, kɛ́ suu lɔɔ vá ɣɛma ỹɔú nuí sí w̃a áá kɛ ngáa háwu faí sítii taá ɣɛ́.”

⁸Jísu í mɔ́ɔ́ ɣɛ ta, “Ná í lókoi ɔɔ í gɔ́wɔi áá kɛ ngáá háwu yí faa ỹɔ́u ɣɛ, tevé mba, yí píli yáa! Maanɛ́ɛ́ngɔɔ lé yí víli kúnafɔ lɛ́ɛ́h̃ui h̃u ngáá nɔɔnɔ, í lɔ́ve sí wa í lúwui yafɔ́lingɔ áá ló aáva Ngalá ngí lɔ́ve njahááma kúnafɔ wɔ́mbui h̃u.

⁹Ná í yááh̃u yílaangi áá kɛ ngáá háwu yí faa ỹɔ́u ɣɛ, kulá na, yí píli yáa! Maanɛ́ɛ́ngɔɔ lé yí víli kúnafɔ lɛ́ɛ́h̃ui h̃u ngáá í yááh̃u yílaangi ɛ́i ɣɛ́ na í lɔ́ve sí wa í yafɔ́ningɔ áá ló aáva Ngalá ngí lɔ́ve njahááma wɔ́mbui h̃u.”

¹⁰Kɛ Jísu i ɣɛa ta, “A w̃aah̃ú béle ngáá wálaa tokohíya ngu maah̃ú haa ɣɛ ngáá sítii ti langɔ́ ngáá ngé tí ta yílaa kéle tɔ. Sífaa ngí nde wú w̃á, ti w̃álekaitii tí ngelegóóh̃u, tiyá lɔ ní Kɛ́ɛ́ɣɛ Ngalángi yaah̃ú hɔ́wɔ fíli. [

¹¹Sífaa, nuí síí w̃ɔ́i taa ɣɛ́ ma Nuu Búsa Goo H̃ú Loí i vaangɔ́ ngáá í sítii ngumááwo ti betévengɔi Ngala mba.]”

¹²Kɛ i mɔɔ ɣɛa ti w̃a, “Bɛ́ɛ́ lɔ í wú gí ma? Ndeé lɔ siỹɛ́ngi áá kɛ ná mbáalai áá ɣɛ́ ngéya ngáá hɔ́ndɔ ngílaa, ti tá yílaa í ló su? Ɛi be púú táávungɔ maah̃úú táávungɔi wa ngihéi wa ɔ́ɔ́ lí ngílaangi ná wɔ́lima í lóngɔ su?

¹³Ngí tɔɔỹái le wú w̃á, ná áá tɔ, kooh̃unɛ́ɛ́ngɔ aa ɣɛ lá ngwála mbaala yílaangi ná hááw̃a í lɔ́ve mbaala vúú táávungɔ maah̃ú táávungɔi wa tɛi ɣɛ́ lói su.

¹⁴Ngimɔ́ɔ́ nɔ́ɔ jɔ́ wú Kɛ́ɛ́ɣɛ Ngalá ngí ngelegóóh̃u áá lói sítii ti langɔ́ lá tí tá yílaa kéle tɔ ti betévengɔ ɔ́ɔ́ ɣɛ́ lá mba.”

¹⁵Kɛ Jísu i ɣɛa ta, “Ná í mbálai áá faa ỹɔ́u ɣɛ ngáá í yé, lí ngelé, yí ngi háá ỹɔí ɣɛ́ lá wú félengɔ kpé wú lówah̃u. Ná áá wólilo í w̃á, kɛ wú mɔ́ɔ ɣɛa ngáá mbálalopoa vólu.

¹⁶Kɛ́ ná ɛ́i ɣɛ́ wolíloi í w̃á, nuu yílaa ɔɔ nuu félengɔ yeɣé wú lí na kɛinɔɔ́ sí wáá ɣɛ́ ndei hééle félengɔi ɔɔ heele sáángɔi nátii tí gísei ma.

¹⁷Ná ɛ́i ɣɛ́ kɛ́ni ɔ́ɔ́ wólilo tí w̃a, kpɛ́lɛɛ súúɣɛ ngáá Ngala fɛ́li mbéla vekáitii. Ná ɛ́i ɣɛ́ wóliloi tí w̃a, ngeɣé ngáá nuí sií w̃ɔ́ɔ áá ngáá Ngalá fɛ́li mɔɔ ɣɛ kíli ɔɔ pava gula mɔ́ɔ́[3] ɣɛ kíli gɔ́mɛtii háaw̃a.”

¹⁸Kɛ Jísu i ɣɛa ta, “Ngí tɔɔỹái le wú w̃á, sí wáá bééle mba ngeleí sí wu, Ngala ngáá bééle mba. Sí fíli pá wáa lokohéi mbu ngeleí sí wú, Ngala ngaa lokohéi mbu.

¹⁹Ngí tɔɔỹái le wú w̃á mɔ́ɔ, mbéi hɔ́wɔi fíli wú tá wáa ɣɛ́ féle ngeleí sí wu, wú luw̃á faa fíli má wú Ngala fɛ́li faaw̃a, ní Kɛ́ɛ́ɣɛ í ngelegóóh̃u, aa kɛ wú yɛ́.

²⁰Sífaa mbéi fíli nuu félengɔ ɔɔ nuu sáángɔ táá yátɛmba na ndááheingi h̃u, ngáá ɣɛ ti liiwáá.”

²¹Kɛ Pítɛ i vaangá Jísu yelé, í mɔ́ɔ́ni, i ɣɛ ma, “Kɛɛɣɛ́, naa héiw̃aa aa ɣɛ nɔɔnɛ́ ngáá ní mbálai h̃úúhaalo ná áá faa ỹɔ́i ɣɛ ngáá ngé? Baa naa héiw̃aa áá ɣɛ wɔféla?”

²²Kɛ́ Jísu i ngoo yápoteni, i ɣɛ ma, “Ngí ndé í w̃a, naa héiw̃aa ɛi ɣɛ wɔféla, kɛ́ laa ɣéle, waayaa suuhaaló mbó hɔ́wɔ fíli.

²³Sífaa Ngalángi w̃ásandai gúlangɔɔ lé ngáá faanɛ́ɛ́ngi sí ɣɛ́ kíli. Masa ngílaa tɔ́ í ɣɛ́i na wɔ́lɔ, i ɣɛi loí ti kápa faí yakúla mba taá ngí yénge mbeláitii.

²⁴Kíya í tɔkúla héini ngáá nga kulandái mba, tí vái ngáá ngi yénge mɔí ta ngelé, ngi gúlei i ɣɛi ná w̃a ngáá kpih̃íngɔ.

²⁵Ngenge mɔ́i ná ɛ́i belé hómbo ɔ́ɔ́ kula, masangí í ndení ngáá ngenge mɔ́i, ngi ỹáh̃ai kpahangɔ́ ngi léngaitii mba ɛ́ɣɛ sí kpɛ́lɛɛ í ɣɛ́i ngeyá, tí ti w̃ááɣɛ kɛinɔɔ́ í ngi gápangi w̃aahɔ́lɔ.

²⁶Kɛ́ ngenge mɔ́i i hitɛí wúmbu ya masangí gakála, í maanɛ́ɛ́nɛ, i ɣɛ ma, ‘Mááw̃aanu hóu kái. Nyá lɔ́ vá kpɛ́lɛɛ féma!’

²⁷Masangí vá i maaw̃áánu hóuni, í kuleí ná h̃úúhaalo mbɛ, í bé mba, í lí.

²⁸Kɛ ngenge mɔ́i ná i gulaá, í lí í ngi mbála yengé mɔ́i w̃áále, ngi gúlei í ɣɛi ná w̃á ngáá kápa kulo, kɛ í sóunga mbolóla áá ndiibá, áá ɣɛ́ ma, ‘Ní gúlei gúla!’

²⁹Ngi mbála yengé mɔ́i ná i hitɛí wúmbu ya áá maanɛ́ɛ́nɛ, áá ɣɛ́ ma, ‘Mááw̃aanu hóu kái. Nyá ngáá fe!’

³⁰Kɛ́ aa luw̃ái maanɛ́ɛ́ngi w̃a, í sóu í píli kpindi vɛlɛ́i wu ngáá í ló na í ló su í ngi gúlei gúla.

³¹Ná ngénge mbélaa vékaitii tí tɔ́i sí í híyai, ti lúúngɔ i ɣɛi lá ngáá maa hái, tí lííni ti kpɛ́lɛɛ súúɣɛ ngáá masangí.

³²Kɛ masangí i ngenge mɔ́i ná lólinga, i ɣɛ ma, ‘Yá lɔ́ ngáá nyaama w̃ɔ́ɔ́ wala! Ngí sí kpɛ́lɛɛ súúhaalonga í yɛ́ í ɣɛ́ngɔ í w̃á ngáá ní gúlei sífaa yí máánɛɛnɛngɔ ngáá ngí kɛ.

³³Yɔ́ɔ ɣɛ́ ɣɛi í mbála yengé mɔ́i w̃aaw̃áánu hóuni kíya nɔ́ɔ ngí í w̃ááw̃aanu hóungɔ.’

³⁴Masangí lúúngɔ í ɣɛi lá ngwála, i ngenge mɔ́i ná hóuni í píli kpindi vɛlɛí wu ngáá í ló ná í ló su í ngi gúlei kpɛ́lɛɛ kula.”

³⁵Jísu i faanɛ́ɛ́ngi sí vólui ɣɛí, i ɣɛ ta, “Ngimɔ́ɔ́ ní Kɛ́ɛ́ɣɛ í ngelegóóh̃u áá kɛ ngáá wú kpɛ́lɛɛ ná wɔ́i ɣɛ́ wú mbálangaitii suuhaalóni.”