Read Bandi MÁFIYU 19 Bible Online

MÁFIYU 19 - Bandi bible

MÁFIYU 19

¹Ná Jísu í vílani faí sítii kpɛ́lɛɛ ndéma, i gulaí Galéli lataí h̃úú wá, í lí Judíya lataí h̃u, Jɔ́ɔ́dɛ Yɛí góóɣaka w̃áá vékai.

²Faŋa walá i hítɛni pólu, aáva sítii ti héébɛngɔ í ɣɛ́i lá, i ti walóni na.

³Júsuai sítii taa ɣɛ́ ti w̃a Falósia ti lɛ́ingaa tí vááni Jísu yelé, ti ɣɛ́i loní tí suugɔvɔ́. Faalɔ, tí mɔ́ɔ́nini ti ɣɛ́ ma, “Aá lɔ́ pele w̃a savaí h̃u Ngalá ngí féni Muusé yáá ngáá siỹɛ́ngi áa bééle ngi ỹáh̃ai wa háwu fíli fááw̃a?”

⁴Jísu i ngapótei, i ɣɛ ta, “Wáá nɛ́ɛ́ sí gúlani í Ngala Kɔ́lɔi h̃u í ɣɛ́ngɔ ta tɔkúla heimai wɔ́lɔ Ngalá ngí nungáitii kpatɛí, siỹɛ́ni ngaa ỹah̃á?

⁵Aáva Ngalá ngi ndengɔ́, i ɣɛ ta, ‘Ná hááw̃a, siỹɛ́ngi aa gula ngi kɛ́ɛ́ɣɛni ngaa ngi njéé ti vɛ́lɛi wu, í báha ngi ỹáh̃ai wa, ti félengɔ ti ɣɛ́ ngáá nuu yílaa’?

⁶Aáva tɛí mɔ́ɔ́ ɣɛ ngáá nuu félengɔ, kɛ́ núu yílaa kpé. Faalɔ, sí Ngalángi í kpahangɔ́ su, nuu álaa ti lówah̃u kɔ́lɛ.”

⁷Kɛ Falósiaitii ti Jísu w̃ɔɔningá, ti ɣɛ́ ma, “Ndeénii le hɔ́ɔ sávai Muusé í pɔ́nɛngɔ a mu hááw̃a í su ngáá ná siỹɛ́ngi áá bééle ngi ỹáh̃ai wa, kɛ aa kɔlɔ he nyah̃ái ná yáa ngáá kɛ i beelengá mba?”

⁸Jísu i ti woo yápoteni, i ɣɛ ta, “Muusé i luw̃ái ma ngáá wááyaa bééle wú ỹáh̃aitii mba bɔw̃álale wú wóli h̃ú bɔ́lɔngɔɔ lé ngwala. Kɛ́ aa ɣɛi h̃íí na táingi ná h̃u Ngalá ngi núu búsai bátɛi.

⁹Kɛ́ ngí nde wú w̃á, kɛ léi nyah̃ái í ɣɛ́ kɔlɔsiyá mbóngɔ, kɛ́ ná láá lé, siỹɛ́ngi fíli áá bééle ngi ỹáh̃ai wa háwu veka fíli fááw̃a, ná áá nyáh̃a véka yeɣé, kɛ i kɔlɔsiyá mbónga.”

¹⁰Kɛ Jísu volú yélaitii ti ɣɛ́a ma, “Ná ngimɔ́ɔ́ áá ɣɛ́ na siỹɛ́ngi lówah̃u taá ngi ỹáh̃ai, kɛ maa áá nɛ́ɛni siỹɛ́ ngɔ́ɔ́ nyáh̃a yéɣe.”

¹¹Kɛ́ Jísu i ngapóteni, i ɣɛ ti w̃a, “Nuí kpɛ́lɛɛ táa le áá hítɛ kalambongí sí volú, kɛ léi sítiini Ngalá ngí naa gúlaa kɛ́lɛma ti yɛ ngaá tí kálambongi sí yatɔ́ mba.

¹²Sífaa háwu bih̃íw̃aa lɔ́ na áá kɛ siỹɛngái tɛí nyah̃á yéɣe. Ti lɛ́ingaa taá tí le ti wúúhaangɔ, ti lɛ́ingaa siỹɛngáá taá tí wúúvaa, ti lɛ́ingaa vá tɛí kɛ tɔɔ́ nyah̃á yéɣe Ngalángi w̃ásandai hááw̃a, kɛ́ nuí fíli áá hómbo í hítɛ kalambóngi sí volú, bɛlɛ́ maa w̃ɔ́i í hítɛ polú.”

¹³Nungáá lɛ́ingaa tí vái ngáá ndopóaitii Jísu yelé ngáá í loko vɛ́lɛ ti w̃a ɛ́ɣɛ mɔ́ɔ í Ngala fɛ́li ti haáw̃a, kɛ́ Jísu volú yélaitii ti ndéni tí w̃a ngáá ti bé ná w̃a.

¹⁴Kɛ́ Jísu i ɣɛi ta, “A bé ndopóaitii mba ti vá ngéle, a waá ti h̃úúhou, sífaa Ngalángi w̃ásandai lɔ nungáá w̃ááh̃u ti ɣɛ kíli í ngáá ndopoá ɣɛ kíli.”

¹⁵I loko vɛ́lɛni tí w̃a, í Ngala fɛ́li ti w̃a, í lí.

¹⁶Siỹɛndópo yiláá tɔ́ í ɣɛ́i na, i vaí Jísu yelé, í mɔɔni i ɣɛ ma, “Kaamɔ́ɔ́, faa vándai bɛɛ́ lɔ ngáá kɛ kɛinɔɔ́ ngí kúnafɔ lɛ́ɛ́h̃ui w̃aahɔ́lɔ?”

¹⁷Kɛ́ Jísu i ngoo yápoteni, i ɣɛ ma, “Ndeénii le yáá mɔ́ɔ́ni ngáá bɛɛ́ lɔ pangɔ́i? Kɛ nɔ́ɔ léi Ngalá ngílaa kpé pangɔ́. Ná yáá ɣɛ́ lói yí kúnafɔ lɛ́ɛ́h̃ui w̃ááhɔlɔ, hítɛ Ngala sávaitii polú.”

¹⁸Kɛ́ siỹɛndópoi i Jísu w̃ɔɔniní, i ɣɛ ma, “Savaítii kpɛ́ɛ?” Jísu i ngoo yápotei, i ɣɛ ma, “Yaá nuu váa, yaá kɔ́lɔsiya mbó, yaá ŋúỹa wo, yaá kahá hééle woo le,

¹⁹wufe í njééni ma taa í kɛ́ɛ́ɣɛ, yí ló ngáá í mbála nuu búsaitii kíya í lóngɔ ngáá bɔwɔ́.”

²⁰Kɛ siỹɛndópoi i Jísu woo yápotenga, i ɣɛ ma, “Ngí híyanga ngáá savaí nátii kpɛ́lɛɛ. Bɛɛ́ lɔ mɔ́ɔ kule í má ngí kɛ?”

²¹Kɛ Jísu i ɣɛa ma, “Ná wɔ́lii yáá ɣɛ́ lói yí fái kpɛ́lɛɛ kɛ́ péle w̃a, lí sí kpɛ́lɛɛ í í yáa yí mááɣɛ, yí maa náholoi hé nyaani yélaitii ngeyá. Ná yáá ná ɣɛ́, kpatɛ́ yandɔ́ɔ́lɔngɔ aa ɣɛ lá náa í hááw̃a ngelegóóh̃u. Ná vólu, vá, yí ɣɛ́ ngáá pólu w̃ɔ́ɔ.”

²²Ná kpatɛ w̃ɔ́i í sí ỹɛ́nini, i gulaí náa wa maaw̃áánungɔ sífaa, kpatɛngɔ́ i ɣɛi lá ngwala.

²³Kɛ Jísu i ɣɛa volú yélaitii ma, “Ngí tɔɔỹái le wú w̃á, naa bangɔ́ɔ́ lé ngáá kpatɛ w̃ɔ́ɔ́ í ɣɛ́ Ngalángi w̃ásandai wu.

²⁴Ngí ndé wú w̃á mɔ́ɔ vólu, naa bangɔ́ɔ́ lé kpatɛ w̃ɔ́i í ɣɛ́ Ngalángi w̃ásandai wu í lɔ́ve sí wa nyɔ́ɔ́mai áá wála sɛɛgulángi wolí h̃u.”

²⁵Ná Jísu volú yélaitii ti sí ỹɛ́nini, ti gindáa vílingɔ i ɣɛi lá ngwála. Kɛ tí mɔ́ɔ́ninga, ti ɣɛ́ ma, “Kɛ ele lɔ náá hɔ́ɔ́ áá ngúmaawongi w̃aahɔ́lɔ?”

²⁶Jísu i ti beléni, i ɣɛ ti w̃a, “Ná áá gɛ́ɛ́lɛ nuu búsa wa, ɛi holowo, kɛ́ ná áá gɛ́ɛ́lɛ Ngalá mbá, faa kpɛ́lɛɛ aa holowo.”

²⁷Kɛ Pítɛ i ɣɛa ma, “Tɔ lɛ́ɛ, ní bengá faa kpɛ́lɛɛ mbá, ni hítɛ í vólu. Bɛɛ́ lɔ náa hɔ́ɔ́ áá hé ní yaá?”

²⁸Kɛ Jísu i ɣɛa ti w̃a, “Ngí tɔ́ɔ́ỹai le wú w̃á, ná nuí síí w̃ɔ́i taa ɣɛ ma Nuu Búsa Goo H̃ú Loí áá ɣɛ́ ngi gáámaa w̃asandai h̃u ngetéya níínai h̃u áá vá kúna, wú púúngɔ wú w̃ááh̃uu félengɔitii wú pólu, wá bɛ́lɛ wáá ɣɛ́ masandáá h̃u, wúwaa nde kpambi púúngɔ maah̃úú félengɔitii kɔsɔ́ ti ngáá Ísulɔ yeláitii.

²⁹Kɛ́ nuí fíli áá volú yafé ngi vɛ́lɛitii mba, ɔɔ ngi ndéɣeni ɔɔ ngi ndíyani mba, kpahangɔ́ ngi njééni ngaa ngi kɛ́ɛ́ɣɛ wa, ɛ́ɣɛ ngi léngaitii kpahangɔ́ ngi báálaitii mba nyá fááw̃a, maa w̃ɔ́i aa kɛɣɛ́laitii maahɔ́lɔ í w̃ɔ́luma ká ka, aáva aa kúnafɔ lɛ́ɛ́h̃ui w̃ááhɔlɔ.

³⁰Kɛ́ sítii kpih̃íw̃aa ti ngáá tɔwɔ́ mbá yélaa taá ɣɛ́ ngáá tɔwɔ́ mbá lála yélaa, aáva sítii kpih̃íw̃aa va ti ngáá tɔwɔ́ mbá lála yélaa, tiyá lɔ́ taa ɣɛ́ ngáá tɔwɔ́ mbá yélaa.”