Read Bandi MÁFIYU 2 Bible Online

MÁFIYU 2 - Bandi bible

MÁFIYU 2

¹Mɛɛloí i Jísu lení taí sí h̃u taá náá lolí ngáá Bɛ́tileh̃ɛ, Judíya lataí h̃u. Táingi ná h̃u, Hɛ́lɔdi lɔ í ɣɛ́i ngáá masangí tataí ná h̃u. Jísu lengɔ́i w̃a féyaa, ki maa gula yélaa ti gúlani ngáá foló gúla veléi h̃uu véle, tí va taa walái sí h̃u taá tóli ngáá Jɛlúsɛl̃ɛ,

²tí mɔ́ɔ́ningi wó, ti ɣɛ́ ta, “Míl̃inda lɔ ndoúlalai sí í na, í ngáá Júsuai ti w̃ásangi tí ndénga? Ní ndendái w̃aa woo híya témuleɣai lɔ́ngɔ ngeleí yá foló gúla veléi h̃uu véle. Ní váánga ngáá ní ngufema hé mbɛ.”

³Ná Masangí Hɛ́lɔdi í fái sí ỹɛ́nini, i ɣɛi wu nga wúúlee, nungái sítii kpɛ́lɛɛ ti ɣɛ́i Jɛlúsɛl̃ɛ taa h̃u, tiyá bɛ́lɛ tí ɣɛ́i wu nga wúúlee.

⁴Masangí Hɛ́lɔdi i Ngala sááɣa gula mbélai ti wutúwɔai maakpɔ́i mba ɛ́ɣɛ kaamɔítii Ngala sávai hááw̃a í féni Muusé yáá i ti w̃ɔ́ɔ́ni, i ɣɛ ti w̃a, “Míl̃inda lɔ táa vá Ngalángi Lókolo Mbá W̃ɔ́i lemá na?”

⁵Nátii pa tí ngoo yápotei, ti ɣɛ́ ma, “Tiyá lɔɔ́ vá ndemá Bɛ́tileh̃ɛ taí h̃u, Judíya lataí h̃u. Sífaa, ná lɔ́ Ngala ndaa háá lé mɔ́i í pɔ́nɛni.

⁶‘Wɛ́i wú ngáá Bɛ́tileh̃ɛ yeláitii, Júda lataí h̃u, wú lɔ́wɔ yánjeingɔ láá le, Júda lataí h̃uu láá wala walaítii ndiiwáá, tiyɛ́i ti lɔwɔ́itii tɛ́ngɔi. Wú lɔ́wɔitii tɛngɔ́ɔ́ lé bɔw̃álale ngutuwɔ́ w̃ɔ́ɔ́ lɔɔ vá gúlama wú h̃ú, lɛ́i áá ɣɛ́ ní vóngai maah̃u tiyɛ́i tí ngáá Ísulɔ yeláitii.’ ”

⁷Kɛ Hɛ́lɔdi i ki maa gula yélai tolínga, laá ɛ́ɣɛ nungái nátii, tí maakpɔ́ hóu ndɔɔwu h̃ú. I ti w̃áakpɔni mba ngáá í tí w̃ɔ́ɔ́ni ngáá í ɣɛ́ kɔlɔ́ kuí ná kái kái má tí temúleɣai ná lɔ́ni ngeleí ya.

⁸Ná vólu, i ti lɔ́vei naá Bɛ́tileh̃ɛ i ɣɛ ti w̃a, “A lí wú ndói ná wɔ́li ngáá pangɔ́. Ná wáá tɔ, wú kɛ́ ngí ɣɛ́ faa wɔ́lɔ mba, kɛinɔɔ́ nyá bɛ́lɛ ngí lí ngí ngufema hé mbɛ.”

⁹Kɛ nungái nátii tí siyangí lɔ́kula héinga táá lí. Ti lííw̃ai, kɛ ti mɔ́ɔ temúleɣai ná lɔ́nga ti ɣɛ́i tɔí hése fólo gúla vélei h̃uu véle ná h̃ú ti ɣɛ́i taa vá Jɛlúsɛl̃ɛ taa h̃u. Faalɔ, i ti góóh̃unɛɛni, ti lii í la tɔ́. Tí lói náa mɔ́ɔ polú kpóloo i ngeleí ya, áá lí ngáá ti wutúwɔɔ véle í lo su tí folo. I gɛ́ɛ́lɛi náa mbéinda w̃ááh̃u ndoí í ɣɛ́i na.

¹¹Ti wálai náa maa vɛ́lɛi wu, tí ndoí lɔ ɛ́ɣɛ ngi njéé Mɛɛloí. Kɛ ti hítɛnga wúmbu ya, tí ngufema hé ndói yɛ. Tí tí yandɔ́ɔ́lɔ nyakáitii ndaa wói náa tí ndói w̃áábatɛngaitii fé ngeyá. Maabatɛ́ngaitii tí ɣɛí ngáá, góólii ɛ́ɣɛ ngɛ́ingai nátii ti hɔ́w̃ɔ bangɔ́ walaí taa ɣɛ́ tí w̃a filakísɛngi ɛ́ɣɛ mɛ́i.

¹²Kɛ tí yangáimanga ti lɔ́wɔlɔi h̃u ngáá pele veká. Ti ná ɣɛ́i bɔw̃álale Ngalá ngi ti laahíni síŋal̃ai h̃u ngáá tálaa yángaima Masangí Hɛ́lɔdi yelé.

¹³Ná ki maa gula yélaitii ti gúlai Jísu lemái wa, Ndemɔí Ngalángi w̃áleka i gulaí Joosɛ́ yááh̃u siŋal̃ái h̃u, i ɣɛ ma, “Masangí Hɛ́lɔdi lɔɔ vá ɣɛ́ma áá ndói sí wɔ́li kɛinɔɔ́ í paá. Náá háaw̃a, wuyoɣé, yí ndoí yeɣé taá ngí njéé, wú w̃áávela ndɔwɔlɔ́i sí h̃u taá tóli ngáá Íjepi. A ló na í ló su kpóloo kɛ ngáá ɣɛ́ wú w̃á p̃ɛ́ɛ́ a gulá náa wa, wɔ́ɔ́ ɣɛ́a gulá náa wa.”

¹⁴Kɛ Joosɛ́ í wúyoɣenga, í ndói yeɣé taá ngi njée, tí pɛlɛ liimá Íjepi lɔwɔlɔí h̃u kpɔkɔ́i ná nɔ́ɔ kái kái.

¹⁵Naa vá tɔ ti loí na í ló su Masangí Hɛ́lɔdi í há. Sí kpɛ́lɛɛ i ɣɛ́i kɛinɔɔ́ faí sí Ndemɔí Ngalá ngi ndéni laa háá lé mɔ́i w̃a, ná í ndeí í hítɛ nga ngáá sí í ɣɛ́i ta, “Ngí ní H̃íỹɛndou Lói lólinga ngáá í gúla Íjepi wa.”

¹⁶Ná Masangí Hɛ́lɔdi í ngatɔ́ni mbá ngáá kɛ ki maa gula yélaitii tí ngakpólowanga, ndiiyáw̃al̃angɔ i ɣɛi lá. Faalɔ, i ndeí sóyaitii ma ngáá ti lí Bɛ́tileh̃ɛ taa h̃u, ɛ́ɣɛ ma látaitii su, tí ndoúlalai kpɛ́lɛɛ páá ti ngáá siỹɛndóu lengaa híítii su í séi sítii mba tí tí lengɔ́ ngáá niina, ɛ́ɣɛ sítii tí fowó félengɔ ɣɛ́nga. Táingi sí ki maa gulá yélai nátii tí kɛ́ni ngáá Masangí Hɛ́lɔdi, laá lɔ́ í gisíyai su, í kuí levéi mba ndengái paa fái w̃a.

¹⁷Sí vá i ɣɛí kɛinɔɔ́ sí Ngalángi ndéni laa háá lé mɔ́i Jɛlemáya w̃a, í hítɛ nga ngáá sí í ɣɛ́i ta,

¹⁸“Ngoo lɔ́ɔ gúla Lama taí h̃u aá lɔ ngáá maaw̃aanú wɔ́lɔ woo. Lesiyo lɔɔ wɔ́lɔ ngi léngai faaw̃a, aa luw̃ángɔ ma ngáá ndiiyá ngɔ́ɔ́ vɔ́pɔ, bɔw̃álale ngi léngaitii saangɔ́ɔ́ lé náa.”

¹⁹Kɛ́ ná Masangí Hɛ́lɔdi í hááni, Ndemɔí Ngalángi w̃áleka i gulaní Joosɛ́ yááh̃u siŋal̃ái h̃u Íjepi lɔwɔlɔí h̃u,

²⁰i ɣɛ Joosɛ́ w̃a, “Wuyoɣé, yí ndói yeɣé taá ngí njéé wú yángaima Ísulɔ lɔwɔlɔí h̃u, bɔw̃álale sítii ti ɣɛ́ngɔ taá péle wɔlí mba ngáá tí ndói váa, tí háánga.”

²¹Faalɔ, Joosɛ́ i wuyoɣéi naá, í ndói yeɣé taá ngi njéé, tí yángaima Ísulɔ.

²²Kɛ́ ná Joosɛ́ í mɛniní ngáá kɛ Ákeleyɔ lɔ í masandái w̃aahɔ́lɔnga ngi kɛ́ɛ́ɣɛ Hɛ́lɔdi vomá, Judíya lataí w̃ááh̃u, maa hái i nduwá vúni Joosɛ́ h̃ú ndii haáw̃a na. Kɛ́ Ngalá ngi ndaahí mbói ngáá Joosɛ́ siŋal̃á véka h̃u, faalɔ, i lií náa Galéli lataí h̃u.

²³I lií í ɣɛ́ taí sí h̃u taá tóli ngáá Násɔlɛ. Ná vá tɔ náa í kɛ́ni faí sí Ngalá ngi ndení laa háá lé mbélaitii ma tí hítɛi nga, ngáá sí tí ɣɛ́i ta, “Taá ɣɛ́ taá tóli ngáá Násɔlɛ w̃ɔ́i.”