Read Bandi MÁFIYU 20 Bible Online

MÁFIYU 20 - Bandi bible

MÁFIYU 20

¹Kɛ Jísu i ɣɛa ta, “Ngalángi w̃ásandai gúlangɔɔ lé ngáá faanɛ́ɛ́ngi sí ɣɛ́ kíli. Siỹɛndópo lɔ wɔ́lɔ í ɣɛ́i na, kpeléi i ngeyá, kɛ i liingá ngelendáá lɛtɛngí ndɔwɔ́ bálangi ya ngáá í siỹɛngáá wɔ́li ti yénge ngi bélei h̃u.

²I luw̃áni ma ngáá í fólo w̃aa yílaa kápangi hé ti yaá, laa vá í ti lɔ́ve ngi bélei h̃u.

³Ná ngele holói h̃uu í bái kínɛi, kɛ i mɔɔ liinga ndɔwɔ́ bálangi ya, í siỹɛngáitii tɛingáá lɔ lóóni na taá ɣɛ́i taa faa fíli kɛ́.

⁴Kɛ i ɣɛa ti w̃a, ‘Wá bɛ́lɛ a lí wú yénge ní bélei h̃u, ngáá wú páva ngáá sí l̃ɔ́ingi kule áá ɣɛ́ ma ngáá wú maahɔ́lɔ.’

⁵Nátii tí lí. Ná fóloi yangí báni té té ɛ́ɣɛ ná kpɔkɔ hóloi í ɣɛ́i náa áá bɛ́ɛ́ mba, i mɔ́ɔ liiní ndɔwɔ́ bálangi ya í fáa yílangi ɣɛ nɔ́ɔ jɔ́.

⁶Kpɔkɔ hólo yandɛ́imai i ɣɛi náa lá, í mɔ́ɔ li ndɔwɔ́ bálangi yá í siỹɛngáá vékaa w̃aale lóóni na. Kɛ i ti w̃ɔ́ɔ́ninga, i ɣɛ ta, ‘Ndeénii le wú hááwɔ hóloi ỹááninga mbéinda wáa péka fíli kɛ́ngɔ?’

⁷Nátii tí ngoo yápoteni, ti ɣɛ́ ma, ‘Nuu fíli aa ni yeɣéngɔ ngáá ni yénge mbɛ.’ Kɛ i ɣɛa ti w̃a, ‘Kɛ a lí hɔ́ɔ́ wá bɛ́lɛ wú yénge ní bélei h̃u.’

⁸Ná kpindí í vɛ́lɛni, kpelé w̃ɔ́i i ɣɛi ngi héimai w̃a, ‘Ngenge mbélaitii tolí yí tí páva, yí tɔkúla héi ngáá sítii ngí ti yeɣengɔ́ ngapúmai, yí ngákɛɛlɛ ngáá sítii ngí ti yeɣéngɔ hése.’

⁹Siỹɛngái sítii tí ngengengí lɔ́kula heini ngáá kpɔkɔ hólo yandɛ́imai, tí folo w̃aa yílaa pávai héni ti yaá bɛ́kpɛ.

¹⁰Siỹɛngái sítiini pa tí ngengengí lɔkúla heini ngáá ngelendáá lɛtɛngí, ná ti ɣɛ́i taa vá ti pávai hemá ti yaá, i ɣɛi ti gi má ngáá tí ndái lɔɔ ɣɛ́ bih̃í í lɔ́ve ngénge mbélaa vékai nátii mba. Kɛ́ tiyá bɛ́lɛ folo w̃a yílaa kápangi lɔ tí féi tí yaá bɛ́kpɛ.

¹¹Ná tí tí gápangi w̃aahɔ́lɔni, tí pɛ́lɛ wusú bɔɔlɔ́ma ngáá kpelé w̃ɔ́i,

¹²ti ɣɛ́ ta, ‘Siỹɛngái sítii yí ti yeɣéngɔ ngapúmai ti yéngengɔ nɔ́ɔ háwa yiláa ndáá lówah̃u, yí ni gápangi w̃ááɣɛ tɔ́iŋ naá tiyéni niỹɛ́i ni ngénge kpángɔi wónga foló bándii ya!’

¹³Kɛ́ kpelé w̃ɔ́i i ngiláángi woo yápoteni, i ɣɛ ma, ‘Mu mbálai, ngáá í gáhangɔ, bɔw̃álale yí luw̃ángɔ ma ngáá yí yénge folói w̃a kp̃ái, ngí folo w̃aa yílaa pávai he í yáa.

¹⁴Faalɔ, í pávai yéɣe yí lí í vɛ́lɛ la. Ndóngɔɔ lé ngí siỹɛngái sítii pava ti váángɔ ngapúmai ngáá sí gɛɣɛ́lai jɔ́ ngí fengɔ́ wú yáa.

¹⁵Kule áá má sí ngáá ɣɛ́ lói ngí kɛ ngáá ní gápangi ngɔ́ɔ́ kɛ lá? Baa tolóma lɔ wáá kula sífaa fáá bɔwɔ́ngɔ?’ ”

¹⁶Ná lɔ́ í kɛ́ni faanɛ́ɛ́ngi sí yákɛɛlɛmai, Jísu i ɣɛi ta, “Faalɔ, sítii taa ɣɛ́ ngáá tɔwɔ́ mbá lála yélaa, tiyá lɔ taa ɣɛ́ ngáá tɔwɔ́ mbá yélaa. Ná vólu, tɔwɔ́ mba yélaa tí ɣɛ ngáá tɔwɔ́ mba lála yélaa.”

¹⁷Ná Jísuni ngaa polú yélaa púúngɔ maah̃úú félengɔitii ti ɣɛ́i taa lí Jɛlúsɛl̃ɛ, i ti lolíni kaka yílaa ma, aá yɛ́pɛ ti yelé tiyá léé léé,

¹⁸aá ɣɛ ti w̃a, “A muỹá lɔ́ɔ lí Jɛlúsɛl̃ɛ taa h̃u, naa vá tɔ tí waa vá nuí síí w̃ɔ́i taa ɣɛ ma Nuu Búsa Goo H̃u Loí lókolevema ná Ngala sááɣa gula mbélai ti wutúwɔaitii ma ɛ́ɣɛ kaamɔítiini Ngala sávai hááw̃a, aáva taá pelé lála ngáá í sáa w̃ááhɔlɔ.

¹⁹Ná vólu, taa tokóleve sítii ma taa ngáá Júsua, tí ngɛ́lɛ gúla sú, ti ngámɔ kíli ỹɔ́u wo, ná vólu, ti kpákpa kulɔ́sii w̃a í ló ma í há. Kɛ́ ná foló félengɔ áá gúla su, sawa kélei w̃a, Ngalá ngaa mbuyoɣé sái h̃u, í va ndɛɛh̃úi h̃u volú.”

²⁰Kɛ Sɛ́bɛdi ỹah̃aí i vaá Jísu yelé ngáá ngi h̃íỹɛndou lou félengɔi í lá Jísu yɛ í mɔ́ɔ́ni faa bɔ́wɔ haaw̃a.

²¹Kɛ Jísu i mɔɔningá, i ɣɛ ma, “Ndeé lɔ́ í lóngɔ la?” Nyah̃ápoi i Jísu woo yápoteni, i ɣɛ ma, “Kúúlo ngáá ná yáá ɣɛ́ ngáá masa, ní h̃íỹɛndou lou félengɔi taá ɣɛ́ ngáá í bélaa yélaitii.”

²²Kɛ Jísu i ɣɛa ti w̃a, “Wáá kɔlɔ́ sí wúwaa kal̃aa w̃ɔ́ɔ́ni.” Kɛ i ɣɛa nyah̃ápoi h̃íỹɛndou lengáitii ma, “Wáá hómbo wú máánɔw̃ɔi yeɣé ngíwaa vá ngéɣema?” Ti Jísu woo yápotei, ti ɣɛ́ ma, “Naá hómbo.”

²³Kɛ Jísu i ɣɛa ti w̃a, “Wá lɔɔ vá w̃áánɔw̃ɔma ngáá tɔɔỹáa kíya ngíwaa va w̃áánɔw̃ɔma, kɛ́ ngákpa ngáá ngéya ngɔ́ɔ́ lokolo nungáá wá ngáá kpéla yélaa. Ní Kɛ́ɛ́ɣɛ Ngalá í naítii ndóngɔ sítiini mbɛ í lokolongɔ́ ti wa.”

²⁴Ná Jísu volú yélaa púúngɔ vékaitii tí faa ỹɛ́nini kɔwɔ́ato nyah̃ápoi w̃ɔ́ɔ́ningi wa í mbói ngáá Jísu faa bɔ́wɔ haaw̃a ngi lóu félengɔi yɛ, ti liiyáw̃al̃angɔ i ɣɛi lá ngi lóu félengɔitii ngeyá.

²⁵Kɛ Jísu i ti kpɛ́lɛɛ tólia ỹanda yílaa, i ɣɛ ti w̃a, “Wú kɔ́lɔ ngáá sítii taa ngáá Júsua ti w̃ása ngwála walaítii ɛ́ɣɛ w̃ása gulo gulóaitii taá bandí bándi héi sítii ma taa ɣɛ́ tí wu ti w̃ásandai h̃u.

²⁶Kɛ́ aáva ná fíli sú, wúndai aa h̃íí na. Kɛ́ aá ɣéle, ná wú tá fíli áá ɣɛ́ lói í ɣɛ́ ngáá ngutuwɔ́ w̃ɔ́ɔ́ wú lííwaa, kɛ aa ɣɛ ngáá mɔl̃ɛ́ w̃ɔ́i pekaítii fááw̃a.

²⁷Nuí fíli pá áá ɣɛ́ lói í ɣɛ́ ngáá ngakpa mɔ́ɔ wú lííwaa, kɛ aa ɣɛ ngáá nduwɔ lopó ɣɛ́ kíli wú kpɛ́lɛɛ fááw̃a.

²⁸Kíya nɔ́ɔ nuí síí w̃ɔ́i taa ɣɛ́ ma Nuu Búsa Goo H̃ú Loí ɣéle tɔ aa vaangɔ́ ngáá nungáá ti w̃ɔ́l̃ɛ mbɛ. Kɛ́ laá ɣéle, i vaangɔ́ ngáá í ɣɛ́ ngáá mɔl̃ɛ́ w̃ɔ́ɔ́ nungáá yɛ, ná vólu, í lɛɛh̃úi gúla kɛ́lɛma nuu bíh̃iw̃aa ti wumááwo fááw̃a.”

²⁹Ná Jísuni ngaa polú yélaitii ti ɣɛ́i ta híɣe taí sí h̃u taá tolí ngáá Jɛlóko, faŋa walá i hitɛní polú.

³⁰Siỹɛndópo félengɔ ti ɣɛ́i ngáá mbole yeláá ti ɣɛ́i héini peleí béla, kɛ tí mɛningá ngáá Jísu i ɣɛngɔ áá lɔ́ve. Faalɔ, tí woo gúlai, ti ɣɛ́ ta, “Kawálai, yɛ́i taa í lóli ngáá Masangí Deevé Láála Loí, ni w̃ááw̃aanu hóu kái!”

³¹Kɛ́ faŋaí i bándɛni ngáá ti ye ngáá tí w̃áá ɣɛ lo. Kɛ́ tiyá ɣéle, tí woo gúlai naá ɣéla ngwala, táá ɣɛ́ ta, “Kawálai, yɛ́i taa í lóli ngáá Masangí Deevé Láála Loí, ni w̃ááw̃aanu hóu kái!”

³²Kɛ Jísu i longá, í ti lolí, í tí w̃ɔ́ɔ́ni, i ɣɛ ti w̃a, “Ndeé lɔ wú lóngɔ ngí kɛ́ wú yɛ?”

³³Tí ngoo yápoteni, ti ɣɛ́ ma, “Kawálai, ni longɔ́ɔ́ lé yí ni yaah̃úi w̃ááwo.”

³⁴Jísu i ti yaah̃ú w̃ááw̃aanu hóuni, í lúba ti yaah̃úitii mba, ngamá nɔ́ɔ, kɛ ti yaah̃úitii maa í wónga ti hítɛ polú.