Read Bandi MÁFIYU 23 Bible Online

MÁFIYU 23 - Bandi bible

MÁFIYU 23

¹Kɛ Jísu i yɛpɛá faŋaí yéle ɛ́ɣɛ polú yélaitii,

²i ɣɛ ti w̃a, “Kaamɔítiini Ngala sávai hááw̃a ɛ́ɣɛ Júsuai sítii taa ɣɛ́ ti w̃a Falósiai tɔ ngakpángi ti yaá savaí laa háá lé fááw̃a Ngalá ngí féni Muusé yáa.

³Faalɔ, kɛ wú ti woo ỹɛ́ni, ná vólu, sítii taá nde wú w̃a wú kpɛ́lɛɛ kɛ. Kɛ́ sí taá kɛ, wálaa tá ɣɛ, sífaa sí taá nde nungáá vékaitii ma ngáá tí kɛ, tiyá bútei tɛí kɛ.

⁴Taá sava bih̃í bíh̃i nda nungái ngeyá kíya nɔ́ɔ nuu áá kásɔ ỹíí míí nda nungáá wu mba sí tɛi hómbo mbu, kɛ́ tiyá bútei tɛí líka vóma ngáá tɔɔ́ bɔ́ ti wa.

⁵Taá tí háitii kpɛ́lɛɛ kɛ́ kɛinɔɔ́ nungáitii taayáa ti lɔ. Taa ngɛ́ingaitii ngili wu mba ɛ́ɣɛ ti báki su Ngala kɔ́lɔ lukpu lukpu vɔnɛngɔ́itii tí su mbɔlɔ wɔ́lɔngɔɔ. Tí njifa njifángi ɣɛ́ gooh̃a wóóh̃a ti lómangaitii mba.

⁶Tí lói ngáá heindáá ngufemaa ỹándaitii ná taa w̃ɛ́ɛ kpɔ sú ndaaỹɛ́ mbóma. Ná vólu, tí lói ngáá heindáá ngufemaa ỹándaitii Ngala fɛli máákpɔ wotaítii mbu.

⁷Taa ɣɛ lói nungáá taayáá laalí tí w̃a ngufema h̃ú lííwa wála walaítii, ná vólu, taa ɣɛ lói ngáá nungáá taa yáa ti lolí ngáá, ‘Kaamɔ́ɔ́.’ ”

⁸Kɛ́ Jísu i ɣɛi volú yélaitii ma, “Wálaa kɛ nuu fíli ɔ́ɔ́ ɣɛ́ wú w̃á, ‘Kaamɔ́ɔ́,’ bɔw̃álale wú kpɛ́lɛɛ wá lɔ́ ngáá mbala lopoa, aáva Kaamɔí lɔ wú yáa yíla kpé.

⁹Aáva wálaa ɣɛ́ nuu fíli má Kɛ́ɛ́ɣɛ ngeleí sí wú, bɔw̃álale Kɛɛɣɛí lɔ wú yáa yíla kpé aáva aá lɔ ngelegóóh̃u.

¹⁰Kɛlaa tɔɔ ɣɛ́ wú w̃á ‘Masa,’ bɔw̃álale Masangí lɔ wú yáa yíla kpé aáva tɔ í ngáá Ngalángi Lókolo Mbá W̃ɔ́i.

¹¹Ngakpa mɔ́ɔ walaí í wú lííwaa kɛ í ɣɛ́ ngáá mɔl̃ɛ w̃ɔ́i.

¹²Nuí fíli áa bɔ́wɔ haa lɛngá, Ngalá ngáá ngu nga njéi. Kɛ́ nuí fíli áá bɔ́wɔ wú nga njéi, Ngalá ngáá ngu mbúyoɣe.”

¹³Kɛ Jísu i ɣɛa ti w̃a, “Suu vá tɔ vá ɣɛma ỹɔú wú w̃a wɛ́i wú ngáá kaamɔítiini Ngala sávai hááw̃a ɛ́ɣɛ Júsuai sítii taa ɣɛ́ ti w̃a Falósiaitiini, wɛ́i wáá Ngala fái lá yaah̃ú kɛ́ aa wú líi h̃u! Wá lɔ wú Ngalángi w̃ásandai góngi laabɔ́lungɔ nungáá lúwɔ, kɛ́ wá bútei wáá lɛɛmá ná kɛlaa wɔ́ɔ́ bé sítii mba táá yákpa ngáá ti lɛ́ na, tɔɔ lɛ́. [

¹⁴Suu vá tɔ vá ɣɛma ỹɔú wú w̃a wɛ́i wú ngáá kaamɔítiini Ngala sávai hááw̃a ɛ́ɣɛ Falósiaitii, wɛ́i wáá Ngalá fái lá yaah̃ú kɛ́ aa wú líí h̃u! Wáá ponyah̃áitii ti vɛ́lɛitii kula ti yaá wú kɛ ngáá vó, wú pɛ́lɛ bɔwɔ́ gúlama ngáá nuu vándaa nungáitii ngaah̃ú ngáá wú Yála fɛlindái wáá suu ɣɛ́ gooh̃á. Kɛ́ wú ndá háá bamaí á vá láma wú w̃a, aa lɔve nungáá vekaítii ti ndái wa.]

¹⁵Suu vá tɔ vá ɣɛ́ma ỹɔú wú w̃a wɛ́i wú ngáá kaamɔítiini Ngala sávai hááw̃a ɛ́ɣɛ Falósiaitiini, wɛ́i wáá Ngala fái lá yaah̃ú kɛ́ aa wú líí h̃u! Wá lɔ wáá lí ỹánda kpɛ́lɛɛ kpɛ́lɛɛ wáá nuu wɔ́li ngáá í báha wú wá. Ná wáá maahɔ́lɔ, wáá kɛ́ ngáá háwu njahááma líí haí í ló maa w̃ɔ́i wa í lɔ́ve bɛ́lɛ wú ndá líí haí wa na!”

¹⁶Jísu í mɔ́ɔ́ ɣɛ́ ti w̃a, “Suu vá tɔ vá ɣɛ́ma ỹɔú wú w̃á wɛ́i wú ngáá mbole yélaa ɣɛ́ kíli, wáá peleí ɣɛ́ mɔ́ɔ ngáá mbole yélaitiini! Wá lɔ wáá ɣɛ́ ta, ‘Ná nuu fíli áá véle Hɛ́ɛ́ma Yála Pɛ́lɛi w̃a, kɛ faa fíli táá na, kɛ́ ná nuu fíli áá véle góólii w̃a í Hɛ́ɛ́ma Yála Pɛ́lɛi wú, kule lɔ ma ngáá kɛ í ngi gúúlongi hítɛnga na!’

¹⁷Wú wólengɔɔ lé, wú wútɔngɔ! Bɛɛ́ lɔ tɔvengɔ́ ngi mbála wa, góólii bútei baa Hɛ́ɛ́ma Yála Pɛ́lɛi lɛí í kɛ́a góólii yángi mba?

¹⁸Wú mɔ́ɔ́ ɣɛngɔ ta, ‘Ná nuu fíli áá véle Ngala sááɣa gula tútui w̃a, kɛ faa fíli táá ná. Kɛ́ ná nuu fíli áá véle Ngala kɔ́ngi w̃á áá ɣɛ lááni maah̃u, kule lɔ́ ma í bɔ́wɔ guulongɔ́i hítɛnga áá ɣɛ́ mbói.’

¹⁹Wá lɔ́ ngáá mbole yélaa! Bɛɛ́ lɔ tɔvengɔ́ ngi mbála wa, Ngalá kɔ́ngi bútei baa Ngala sááɣa gula tútui lɛ́i áá kɛ kpalo ɛ́i ɣɛ́ Ngala kɔ́ngi wa?

²⁰Faalɔ, nuí fíli áá véle Ngala sááɣa gula tútui w̃a, kɛ i veléa ma, í véle sí kpɛ́lɛɛ má áá ɣɛ́ lááni maah̃u.

²¹Ná vólu, nuí áa véle Hɛ́ɛ́ma Yála Pɛ́lɛi w̃a, kɛ i veléa ma, í véle Ngalá kpútei w̃a lɛ́i í mbu.

²²Nuí áá véle ngelegóóh̃u w̃a, kɛ aá lɔɔ véle Ngalángi w̃ása kpɔkpɔngí w̃a ɛ́ɣɛ Ngalá kítei w̃a í héini ma.”

²³Í mɔ́ɔ́ ɣɛ ta, “Suu vá tɔɔ vá ɣɛ́ma ỹɔú wú w̃a wɛ́i wú ngáá kaamɔítiini Ngala sávai hááw̃a ɛ́ɣɛ Falósiaitiini, wɛ́i wáá Ngalá fái lá yaah̃ú kɛ́ aa wú líí h̃u! Wú hɔ́lɔ wɔlíngaitii wáá puu kélei he Ngalá ngéya í li bɛ́lɛ í to sí gúlo guloí wa wáá pu hakpá su áá kɛ nɛɛni. Kɛ́ sí kái kái í ngáá Ngala sávai h̃uu háitii, wáá kɛ́ngɔ wɔ́ɔ́ híya ngáá ti ye. Ná wáá ngáá, wáá baah̃áa sítii kɛ́ma tí péle w̃a ngáá wú kɛ ngáá nungáá vekaítiini, wɔ́i nungáitii ngaah̃ú w̃ááw̃aanu hóu ɛ́ɣɛ wáá ngáá tokolá ma yélaa. Kule í ɣɛ́ngɔ ɣɛi wú w̃a wú sítiini kɛ, kɛ́ wálaa Ngala kɔ́ féndai yafándɛ.

²⁴Wɛ́i wú wólengɔi wáá pele ɣɛ́ mɔ́ɔ́ ngáá mbole yélaitii! Wáá kaa kúlo kw̃ɛ́ɛ́ngi gúla wú bɔ́le wɔlíngi ya, kɛ́ wú kɔ́tu walaí bɔ́le!”

²⁵Jísu í mɔ́ɔ́ ɣɛ ta, “Suu vá tɔɔ vá ɣɛ́ma ỹɔú wú w̃a wɛ́i wú ngáá kaamɔítiini Ngala sávai hááw̃a ɛ́ɣɛ Falósiaitiini, wɛ́i wáá Ngala fái la yaah̃ú kɛ́ aa wú líí h̃u! Wáá wú gɔ́pungi ɛ́ɣɛ wú ỹáákaitii maabalé fó, kɛ́ su laahéngɔ ngáá sí wú sɔlɔngɔ́ ngáá bangálima véle sífaa wá lɔ́ ngáá mɔní mɔ́ni mbélaa.

²⁶Wɛ́i wú ngáá Falósiaitii wu wólengɔ, sí í wú gɔ́pungi h̃u ɛ́ɣɛ wú ỹáákaitii, a kpalé lɛ́ɛ su hése, ná lɔ áá kɛ polú véle aa balé náa laá bɛ́lɛ!”

²⁷Í mɔ́ɔ́ ɣɛ ta, “Suu vá tɔɔ vá ɣɛ́ma ỹɔú wú w̃a wɛ́i wú ngáá kaamɔítiini Ngala sávai hááw̃a ɛ́ɣɛ Falósiaitii, wɛ́i wáá Ngala fái lá yaah̃ú kɛ́ aa wú líí h̃u! Wú gúlangɔɔ lé ngáá kambái taá ngohó wólengi híya ma í kɛ́ váni, kɛ́ suu vélei laahéngɔ ngáá nuu háángɔ gaalɛí ɛ́ɣɛ ŋani bumbúitii.

²⁸Ngimɔ́ɔ́ nɔ́ɔ wáá bɔ́wɔ ɣɛ́ ngáá tuva velé vánda yelaa nungáitiini ngaah̃ú, kɛ́ wú h̃úú vélei, wá lɔ ngáá Ngala fáá la mbélaa yaah̃ú kɛ́ aa wú líí h̃u ɛ́ɣɛ nyaamái lɔ wú h̃ú.”

²⁹Jísu í mɔ́ɔ́ ɣɛ ta, “Suu vá tɔɔ vá ɣɛ́ma ỹɔ́u wú w̃á wɛ́i wú ngáá kaamɔítii Ngala sávai hááw̃a ɛ́ɣɛ Júsuai sítii taa ɣɛ́ ti w̃a Falósiai! Wɛ́i wáá Ngala fái la yaah̃ú kɛ́ aa wú líí h̃u! Wáá Ngalá ndaa háá lé mbélai ti gámbaitii kpátɛ váni, ná vólu, sítii ti ɣɛ́i ngáá tuva véle vánda yelaa, wú tí gámbaitii maabátɛ.

³⁰Wáá ɣɛ́ ta, ‘Kɛbei ti ɣɛ́i ni lení ni káwalani ti ndá yéteyangi h̃u, nɛ́i belé ɣɛ́ bahaí ti wa nɔ́ɔ Ngalá ndaa háá lé mbélaitii paa.’

³¹Ná ná áá ɣɛ́, kɛ wá bútei lɔ náá wú bɔ́wɔ waalévenga ngáá kɛ sítii tí Ngalá ndaa háá lé mbélaitii paaní ti léngai mbaa ngáá wú ye!

³²Kɛ a lí náa lá ngu ma wú sí wúkula wú káwalani tí tɔ́kula héini!

³³Wá lɔ ngáá kaaliá ɣɛ́ kíli aáva wú ngáá ti góó h̃u léngaa ɣɛ́ kíli! Wáá ɣéle w̃aavelá faa bámai sí h̃ú Ngalá ngáá vá ndáma wú w̃a í wú lɔ́ve njahááma?

³⁴Faalɔ, nyáá ngáá Ngalá ndaa háá lé mbélaitii tɔve wú yéle ɛ́ɣɛ siỹɛngái sítii tí Ngala sávai wɔ́lɔ ɛ́ɣɛ kaamɔítii Ngala mbélaitii fááw̃a. Wáá tí lɛ́ingaa váá, wú pékaitii paa ngáá ti bakpándai kulɔ́sii w̃a, wú pékaitii ngamɔ́ Ngala fɛ́li máákpɔ wotaítii mbu, ná vólu, wú tí bɛ taítii su.

³⁵Sífaa, wáá vá ná ɣɛ́ma, nungái sítii kínɛi taa ɣɛ́i faa fíli kɔ́lɔ faa wá tí tí vááni ngeleí sí wú, ti háá hái lɔɔ lɛ́ wú wú mba. Í séi siỹɛndópoi sí wa tɔ́ɔ́ ɣɛ ma Éébɛ áá ɣɛ́i faa fíli kɔ́lɔ faa wá tí paaní wɔ́lɔ, í ló su í fólo Sakaláya haa haí w̃a, Balakíyɔ loí, lɛ́i wú pááni Hɛ́ɛ́ma Yála Pɛ́lɛini ngaa Ngala sááɣa gula tútui lówah̃u.

³⁶Ngí tɔɔỹái le wú w̃a, faí sítii kpɛ́lɛɛ taá lɛ́ wú wú mba wɛ́i kínɛi wú sí h̃u yéteyangi h̃u.”

³⁷Jísu í mɔ́ɔ́ ɣɛ nungái sítii ma ti ɣɛ́i Jɛlúsɛl̃ɛ taa h̃u, “Wɛ́i wú ngáá Jɛlúsɛl̃ɛ yeláitii, wá lɔ wáá Ngalá ndaa háá lé mbélaitii páa, ná múl̃ɔ áá ti lɛ́ingaa lɔ́ve wú yéle, wú ti hɔ́ɔ́ ngáá kɔtu. Naa héiw̃aa í ɣɛngɔ bih̃í ká ká ngí ɣɛ́ngɔ ngí wú vóngaitii ngatɛ́ mba ỹanda yílaa kíya tɛɛnjéi áá ngi yívoaitii ngatɛ́ mba govóngi wu, kɛ́ wáá béngɔ mbá ngɔ́ɔ́ kɛ.

³⁸Faalɔ, Ngalá tɔɔ́ lokogúla wú vɛ́lɛi háá h̃u,

³⁹aáva nyá lɔɔ́ ndé wú w̃á ngáá wɔ́i mɔ́ɔ yaah̃ú lá ma í ló su kpóloo táingi í fóloma ngáá wáá ɣɛ́ ta, ‘Hɛ́ɛ́ lɔ nuí síí w̃ɔ́i w̃a, lɛ́i áá vá Ndemɔí Ngalá ndaahéingi h̃u.’ ”