Read Bandi MÁFIYU 24 Bible Online

MÁFIYU 24 - Bandi bible

MÁFIYU 24

¹Kɛ Jísu i gulaá Hɛ́ɛ́ma Yála Pɛ́lɛi góvii h̃úu wa áá li, kɛ polú yélaitii tí váa ngelé, tí pɛ́lɛ loko létema Hɛ́ɛ́ma Yála Pɛ́lɛi wá ɛ́ɣɛ kpela vɛ́lɛitii, ngáá Jísu í wɔ́lɛ ti w̃a.

²Kɛ Jísu í tí w̃ɔ́ɔ́ninga, i ɣɛ ti w̃a, “Kɛ́mbɛ wá lɔ́ɔ ti kpɛ́lɛɛ tɔ? Ngí tɔɔỹaá haa le wú w̃a, kpɛ́lɛɛ tɔ́ɔ vá wóloma ngáá kɔtu yílaa kéle tɔ ɛi lo lááni ngi mbála w̃aah̃u. Kpɛ́lɛɛ aa woló í vú.”

³Kɛ Jísu i liingá í héi ngihéi sí wá taa tóli ngáá Ɔ́levi Wuluí Yíhei. Kɛ polú yélaitii tí váánga ngelé tiyá léé léé. Tí mɔ́ɔ́nii ti ɣɛ́ ma, “Nde lɛ́ɛ́ ni w̃a, bele hɔ́wɔ lɔ faí sítiini táá vá ɣɛ́ma yí yɛ́pɛngɔ kɔwɔ́ato ti wa? Ná vólu, bɛ́ɛ́ vá tɔ́ áá í váálai yakɛ́ kpál̃au ɛ́ɣɛ ngetéyangi yakɛ́ɛ́lɛmai?”

⁴Jísu í mɔ́ɔ́ ti woo yápoteni, i ɣɛ ta, “A w̃aah̃ú béle nuu fíli álaa wú yákpolowa.

⁵Sífaa, nuu bíh̃iw̃aa lɔɔ vá vaamá tíwaa ndááheingi vɛ́lɛ wa, tí yilá ngíla fíli taa ɣɛ́ taa ɣɛ́ ta, ‘Nyá lɔ́ ngí ngáá Ngalángi Lókolo Mbá W̃ɔ́i.’ Aáva taá nuu bíh̃iw̃aa yakpólowa.

⁶Wáá ɣɛ́ wáá kɔɔní máá woo ỹɛ́ni beláá ɔɔ wú tɛingáá w̃áá woo ỹɛ́ni ỹanda vékaitii, kɛ́ ná fíli su, wú líí álaa gúla wú wa, bɔw̃álale kɛ nátii tí ɣɛ, kɛ́ ngetéyangi yakɛ́ɛ́lɛmai ɛi ɣɛ ngáá ná.

⁷Híítii taa ɣɛ́ taa lápi ngáá ỹɔw̃ɔ́ ỹɔ́w̃ɔ. Ndɔwɔlɔ́ wú ngiláángi aa ɣɛ áá lápi ngáá ndɔwɔlɔ́ wú pékai. Ndɔlɛí aa ɣɛ áá gúla, ná vólu, ndɔwɔlɔ́i aa ɣɛ áá bɛ́li, íwaa vú su ỹandá kpɛ́lɛɛ kpɛ́lɛɛ.

⁸Aáva nátii kpɛ́lɛɛ ti gúlangɔɔ lé nɔ́ɔ ngáá hésendaa goo h̃u baalɛí ɣɛ kíli ndoú léndaa h̃u.

⁹Ná nátii taa ɣɛ́ taa ɣɛ́, tiyá lɔɔ vá ɣɛ́ma taa wú hóu, táa wú lókoleve ngáá wú faa bá maahɔ́lɔ taá sái. Aáva ngeléi sí wu yélaitii kpɛ́lɛɛ taá híli ngáá wú yé sífaa wá lɔ ngáá pólu yélaa.

¹⁰Aáva maa l̃áingi ná h̃uu vá nuu bíh̃iw̃aa táa vólu yafé ti lángi wá kɔwɔ́ato mbá. Táá ɣɛ́ taa ỹɔw̃ɔ́ ỹɔ́w̃ɔ lókoleve nungáá w̃a, táá híli ngáá ỹɔw̃ɔ́ ỹɔ́w̃ɔ.

¹¹Ná vólu, nungáá bih̃íw̃aa lɔɔ vá vááma, táá nde ngáá tiyá lɔ́ ngáá Ngalá ndaa háá lé mbélaa, kɛ́ ɛi ɣɛ ngáá tɔɔỹaá, aáva taá nuu bih̃íw̃aa yákpolowa.

¹²Aáva sífaa, nyaamái ya ngáá vá ɣɛ́ma nɔ́ɔ áá ɣɛ́ wɔ́ɔ́lɔ kélei ndongí áá ɣɛ́ nungáitii su, aa ɣɛ́ gulo kw̃ɛ́ɛ́.

¹³Kɛ́ nuí fíli áá ló ní hái h̃u, í ló su ngetéyangi yakɛ́ɛ́lɛmai í fólo, Ngalá ngáá ngumááwo.

¹⁴Aáva keela woó vándai sí kɔwɔ́ato Ngalángi w̃ásandai wa, pólu yélaitii taá ndé ỹandáitii kpɛ́lɛɛ ngeleí sí wu. Ná vá ngáá ɣɛ́ kɛinɔɔ́ nuu kpɛ́lɛɛ tí Ngála kééla woí ỹɛ́ni. Ná ná áá ɣɛ́, ngetéyangi aa vilá naá.”

¹⁵Jísu i mɔ́ɔ́ ndeí ti w̃a, i ɣɛ ta, “Ná wáá ŋani lɔ nyɔúngɔ áá kɛ ngáá háwu kpalo í vɛ́lɛ ngangímba ỹánda wála wa, maa ŋánii ná i lóóni Hɛ́ɛ́ma Yála Pɛ́lɛi wu, laá lɔ Ngalá ndaa háá lé mɔ́i Daníyɔ í yɛ́pɛi kɔwɔ́ato mba.” Yɛ́i yáá mbéi galá, yí faí sí yatɔ́ mba.

¹⁶Jísu í mɔ́ɔ́ ɣɛ ta, “Ná ná áá ɣɛ́, nungái sítiini taa ɣɛ́ Judíya lataí h̃u, kɛ tí w̃áávela, tí lí ngihéitii su.

¹⁷Nuí áá ɣɛ́ ngi vɛ́lɛi gɔ́ma, álaa hítɛ ɔ́ɔ́ ɣɛ́ kɛ aa ngi wɔ́lingi ta fíli ngéɣe ngi vɛ́lɛi wu.

¹⁸Nuí sí va áá ɣɛ́ kpaala h̃u, álaa lí ngi vɛ́lɛ la ngi lóma kooh̃a yeɣé fááw̃a.

¹⁹Maa hóloitii suuỹɔúngɔ aa ɣɛ la koo ỹah̃áitiini faaw̃a ɛ́ɣɛ koímaitiini.

²⁰A Ngala fɛ́li ngáá wú w̃áávela hóloi ná álaa bɛ́ saw̃a w̃a, ɔɔ ná láá lé, álaa bɛ́ a mu Lɛ́ɛ́lɛmbo Ngála Fɛli Fóloi w̃a!

²¹Sífaa, maanɔw̃ɔ́ wála lɔɔ vá láma táingi ná h̃ú. Aáva maa w̃áánɔw̃ɔi h̃úú áá ɣɛ́ ỹɔ́u, í lɔ́ve maanɔw̃ɔ́ kpɛ́lɛɛ mbá í lánga í séi ngetéyangi sí lɔkúla héimai w̃a í fólo sí h̃úi w̃a, aáva maa w̃áánɔw̃ɔi gɛɣɛ́laa fíli ɛi mɔɔ ɣɛ́ na.

²²Kɛbei Ngalá ngáá ɣɛi folói nátii sɔíngi h̃uu ɣɛ́i lúkpu, nuu fíli ɛ́i belé lo ndɛɛh̃ú h̃u. Kɛ́ nungái sítii faaw̃a í lókolonga ti wa ngáá ngi vóngaa, i maa hóloitii sɔíngi h̃úu ɣɛngá lúkpu.

²³Faalɔ, maa táingi ná h̃u, ná nuu fíli áá ɣɛ́ wú w̃á, ‘A wɔlɛ lɛ́ɛ, Ngalángi Lókolo Mbá W̃ɔ́i belé tɛ mbéi!’ Ɔɔ ná láá lé, i ɣɛ wú w̃á, ‘Aá lɔ́ múl̃ɔnda!’ Wálaa la ngáá maa hái.

²⁴Sífaa nungáá tiyá lɔɔ vá vááma, táá nde ngáá tiyá lɔ ti ngáá Ngalángi Lókolo Mbá W̃ɔ́i. Ti lɛ́ingaa táá nde ngáá tiyá lɔ ti ngáá Ngalá ndaa háá lé mbélaa. Kɛ́ ta fíli ɛi ɣɛ ngáá tɔɔỹaá. Aáva taá ɣɛ́ taa káámaa haa ɣɛ ɛ́ɣɛ kíndaa vilí fáa kɛinɔɔ́ ná wɔ́lii ɔ́ɔ́ ɣɛ ngáá solowo fáá ti yaá, ti sítii ngakpólowa Ngalá ngí lokolongá ti wa ngáá ngi vóngaa.

²⁵Ngí fái sítii ndengá wú w̃á naa wutúwɔɔ, faalɔ, a giséi w̃a!

²⁶Ná bɛ́lɛ taa ɣɛ́ wú w̃a, ‘A wɔlɛ lɛ́ɛ, aá lɔ ngaalaí h̃u!’ wálaa lí na, kɛlaa maa tɔɔ́ ɣɛ́ wú w̃a, ‘A wɔlɛ lɛ́ɛ, aá lɔ lómui h̃u!’ wɔ́ɔ́ lá la.

²⁷Bɔw̃álale nuí síí w̃ɔ́i taa ɣɛ́ ma Nuu Búsa Goo H̃ú Loí paalái volú aa ɣɛ gulaí ngáá ngeleí áá ɣɛ́ míỹa míỹa í séi foló gúla veléi h̃u véle, í fólo foló líi veléi h̃uu véle.”

²⁸Jísu i maa hái h̃uw̃ái nɔ́ɔ faanɛ́ɛ́ngi sí w̃a. Ná wáá ngáá, sí í ɣɛ́i ta, “Mbéi fíli suwa vuw̃ái áá ɣɛ́ na, naa lɔ koɣɛítii taa yátɛ mbá na.”

²⁹Jísu i ɣɛi nɔ́ɔ mɔ́ɔ áá yɛ́pɛ, áá ɣɛ́ ta, “Ná nɔ́ɔ léi táingi ná h̃uu w̃áánɔw̃ɔitii taa ɣɛ́ gúlai su kp̃óu, folói ɛi mɔɔ ɣɛ áá gula kɛlaa maa ngalúngi ɔ́ɔ́ ɣɛ́ áá hólo. Temúleɣaitii ti ngeleí ya táá h̃úndɛ, ngeleya kɔ́lingaitii kpɛ́lɛɛ táá ɣɛ́ taa lííka lííka.

³⁰Ná ná áá ɣɛ́, ŋani tá aa ɣɛ ngeleí ya sí áá nuí síí w̃ɔ́i taa ɣɛ́ ma Nuu Búsa Goo H̃ú Loí váálai volú hái yakɛ́. Híítii kpɛ́lɛɛ tí ngelewu ti w̃áá áá w̃áánu. Taá Nuu Búsa Goo H̃ú Loí lɔ íwaa vá i njɛ bilíítii nga, ngakpá ngí ngeyá, ná vólu, áá hólo míl̃a mil̃a.

³¹Búlu wói aa ɣɛ wɔɔlɔ ngwala áá hɛ. Aáva Nuu Búsa Goo H̃ú Loí aa ngi w̃álekaitii tɔve nungái sítii ngelé Ngalá ngí lókolonga ti wa ngáá ngi vóngaa, taá ti gúla ỹanda kpɛ́lɛɛ kpɛ́lɛɛ ngeleí sí wú, tí tí yatɛ́ mba ỹanda yílaa.”

³²Kɛ Jísu i mɔɔ ɣɛa ti w̃a, “Kɛ a gisíya lɛ́ɛ́ ngáá féki wuluí kíya í na. Ná wáá ngáá, ná féki wuluí yékeitii taa nɛ́ku, wáá ɣɛ nɔ́ɔ kɔlɔ́ ngáá kɛ saw̃aí i bɛɛngá mba.

³³Aáva ngimɔ́ɔ́ nɔ́ɔ jɔ́ ná wáá fái sítiini tɔ́ tíwaa ɣɛ́, wáá ɣɛ́ nɔ́ɔ kɔlɔ́ ngáá kɛ i bɛɛngá mba, aá lɔ́ náa naa béla kái kái.

³⁴Ngí tɔɔỹái le wú w̃á, sí h̃uu yéteyangi h̃uu yélai tɛí ha í ló su fái sítiini kpɛ́lɛɛ tí hítɛ nga.

³⁵Ngeleíni ngaa ndɔwɔlɔ́i taa váma ɣɛ́ma na kúnafɔ, kɛ́ ndáá wói lɔ ɣɛ́ na kúnafɔ.”

³⁶Jísu í mɔ́ɔ́ ɣɛ ta, “Nuu fíli aa kɔlɔ́ bele hɔwɔ́ lɔ táingi ná áá vá, folói ɣéle tɔ kɛlaa maa táingi í máá hóloi ná h̃u nuu áá kɔ́lɔ. Malékaitii kele tɔ tí ngelegóóh̃u taá kɔ́lɔ kɛlaa maa Ngalángi H̃íỹɛndou Loí. Kɛ́ kɛ nɔ́ɔ léi Kɛɛɣɛí Ngalá í kɔ́lɔ.

³⁷Kíya í ɣɛ́i Nówa ndá yéteyangi h̃u, ngimɔ́ɔ́ nɔ́ɔ jɔ́ áá vá ɣɛ́ma nuí síí w̃ɔ́i taa ɣɛ́ ma Nuu Búsa Goo H̃ú Loí ndá hóloi w̃a íwaa vá vaamá ma.

³⁸Sífaa ɔ́ɔ́ ɣɛ́ p̃ɛ́ɛ́ í fólo táingi ná w̃a njɛhéngi í ngelewu kpɛ́lɛɛ máábɔleni, nungáá ti ɣɛ́i taá laaỹɛ́, tíwaa kpɔle wɔlíngaa bɔle, siỹɛngáá tíwaa nyah̃áá héi, ndoú kɛ́ɛ́ɣɛaitii tíwaa tí nyáh̃alou lengaa hé siỹɛngáá yɛ, í ló su bɛ́lɛ í fólo folói ná w̃a Nówa í lɛ́ɛ́ni kelé ngwálai h̃u.

³⁹Ná fíli su, taá faa wɔ́lɔi sí wá í ɣɛ́i áá vá ɣɛ́ma, í ló su kpóloo njɛhéngi í va í tí kpɛ́lɛɛ máábɔle. Ngimɔ́ɔ́ nɔ́ɔ áá vá ɣɛ́ma nuí síí w̃ɔ́i taa ɣɛ́ ma Nuu Búsa Goo H̃ú Loí vaa l̃áingi w̃a vólu.

⁴⁰Táingi ná h̃u, siỹɛ́ félengɔ taa ɣɛ kpaalaí h̃u, malékaitii tí ngiláángi yéɣe, tí pekaí ló na.

⁴¹Nyah̃aá félengɔ taá ɣɛ́ taá konda híɣa ỹanda yílaa malékaitii tí ngiláángi yeɣé, tí ngiláángi ló na.

⁴²Faalɔ, wá bɛ́lɛ kɛ wáá w̃ááh̃u béle bɔw̃álale wáá kɔlɔ́ folói sí wú Lémɔi áá vá vááma ma.

⁴³Kɛ́ a faí sí yá tɔ lɛ́ɛ mba, kɛbei pɛlɛ́ w̃ɔ́i i ɣɛi kɔ́lɔ táingi ŋúỹa w̃ɔ́i áá vá ma kpindíi, ɔ́ɔ́ ɣɛ́ ɣɛi naa w̃ááh̃u bélei. Ɛ́i belé ɣɛ́ kɛní ŋuỹá w̃ɔ́i ɔ́ɔ́ ngi vɛ́lɛi laa wólo.

⁴⁴Faalɔ, wá bɛ́lɛ kɛ wú w̃aahei wó bɔw̃álale, Nuu Búsa Goo H̃ú Loí lɔɔ vá vaamá táingi sí w̃a wú gí ngɛ́i ɣɛ́ mba ngáá aá lɔ́ɔ vá ma.”

⁴⁵Kɛ Jísu i mɔɔ ɣɛa ti w̃a, “Kɛ ngenge mɔ́i bɛɛ́ lɔ hɔ́ɔ í ngáá tokolá ma yénge mɔ́i aáva ki máá ngúlangɔ lɛí ngi núú walaí áá ngéɣe í to ngi mbála yengé mbélaitii ngutúwɔɔ ngáá áá yáá mɛɛní he ti yaá na mɛɛní ỹɛ́ sɔ́wɔi kái kái áá fólo ma?

⁴⁶Aa ɣɛ ngáá faa vánda ngenge mɔ́i ná hááw̃a ná ngi núú walaí áá yangáima í máále íwaa ngénge tááli ná wo.

⁴⁷Ngí tɔɔỹái le wú w̃a, aa ngenge mɔ́i ná lo yaá wɔ́lingai kpɛ́lɛɛ kpɛ́lɛɛ maa velé la.

⁴⁸Kɛ́ ná wɔ́lii ngenge mɔ́i ná áá ɣɛ́ ngáá nyaama w̃ɔ́ɔ, aa nde náa gi ma, i ɣɛ ta, ‘Ni núú walaí aa h̃umbuwa vaamá táiŋ suugooh̃ángɔ hááw̃a,’

⁴⁹aáva í pɛlɛ náa ngí mbála yengé mbelaí ndevéma, ná vólu, íwaa laaỹɛ́, í ndɔɔ bɔ́le taá ndɔɔ bɔ́le mbélaa,

⁵⁰ngenge mɔ́i ná ngi núú walaí aa va folói sí w̃a ngaah̃ú ɛ́i ɣɛ́ tuwɔ ɛ́ɣɛ táingi sí ki ngɛ́i ɣɛ́ mba.

⁵¹Ngi núu wálai áá faa bá ngwála la má í tɔ́ve mbéinda sítii taá ngenge fái lá yaah̃ú ti núú walaí yaah̃ú kɛ́ tɛ́i mbo, tí ná. Naa lɔ taa ɣɛ́ ná táá wɔ́lɔ, táá laangɔ́lu yámɛ.”