Read Bandi MÁFIYU 28 Bible Online

MÁFIYU 28 - Bandi bible

MÁFIYU 28

¹Ná Júsuaitii ti Lɛ́ɛ́lɛmbo Ngála Fɛli Folói í gúlai su, ngele ɣɛ́i náa woí Tɛnɛ́mai ngelendái, Mɛɛloí Magadála taa h̃u w̃ɔi ɛ́ɣɛ Mɛɛloí vekaí, tí liiní wɔlɛmá kambái ŋál̃a.

²Kɛ́ ndɔwɔlɔ́i i bɛliní ngáá ngakpa ngwála, sífaa Ndemɔí Ngalángi w̃álekai i gulaí ngelegóóh̃u, i lí kambái ŋál̃a, í kɔtuí gilí kíli í síɣe nda, í héi maa wɔ́tui w̃a.

³Kɛ kíli gúlangɔ í ɣɛi la ngáá kíya ngeleí áá ɣɛ́ míỹa míỹa, ngi gúlai wólengɔ i ɣɛi la fó fo kíya kpéi hɛ́mgbɛi í na.

⁴Lóómi hoyaítii ti ɣɛ́i taá kámbai w̃aah̃ú béle, tí lúwai mba ti h̃úú í bɛ́li, ti h̃úndɛ ndɔwɔlɔ́i wa. Ti gúlangɔ i ɣɛi nɔ́ɔ lá ngáá puw̃a ɣɛ kíli.

⁵Kɛ malékai i ɣɛa nyah̃áitii ma, “A waa lúwa, sífaa ngí kɔ́lɔ ngáá Jísui sí ti ɣɛ́ngɔ ɣɛi kpakpái kulɔ́sii w̃a laá lɔ wáá kɔlí.

⁶Kɛ́ aa mbéinda, i yooɣénga sái h̃u, kíya nɔ́ɔ í ndéni. A vá, wú tɔ mbéi í ɣɛ́ngɔ lááni na.

⁷Faalɔ, a lí fála fala, wú nde polú yélaitii ma, wú ɣɛ́ ta, ‘Jísu i yooɣéa sái h̃u, aáva aá lɔɔ lí wú wútuwɔ Galéli lataí h̃u. Naa lɔ wáá maalé na!’ A giséi sí w̃a ngí ndénga wú w̃a.”

⁸Kɛ nyah̃ái nátii ti híɣea kambái ŋál̃a ngáá suuhulángɔ nduwái i ti h̃u. Kɛ́ ti h̃úúlaahengɔ ngáá kooh̃unɛ́ɛ́ tíwaa lí ngáá viliỹɛ́ ngáá tí ndé Jísu volú yélaitii ma.

⁹Ti loí nɔ́ɔ liimá, kɛ ti gɔ́ɔ́laa Jísu wa, i ɣɛ ti w̃a “Ndiiheí í ɣɛ́ wú yɛ́.” Kɛ tí liingá, tí la kɔwɔ́ wu, tí sóu kɔwɔ́i wa, tí fɛ́li.

¹⁰Kɛ i ɣɛa ti w̃a “A waa lúwa, a lí, wú nde pólu yélaitii ma, tiyɛ́i ti ngáá ní ndéɣea ɣɛ́ kíli, ti lí Galéli lataí h̃u, naa lɔ taa máále na.”

¹¹Ná nyah̃áitii tí ɣɛ́i taa li, sóyaitii ti ɣɛ́i kambái ŋál̃a, ti lɛ́ingaa tí yangáimani Jɛlúsɛl̃ɛ, sí kínɛi í híyai na ti kpɛ́lɛɛ súúɣɛ ngáá Ngala sááɣa gula mbélai ti wutúwɔaitii.

¹²Ná Ngala sááɣa gula mbélai tí wutúwɔai tí w̃áákpɔi mba taá kéle ɣéle mbélaitii, tí faa h̃uubatɛ́ mbóni. Tí naholó yámbɔɔlɔngɔ héni sóyaitii ngeyá,

¹³ti ɣɛ́ tí w̃a, “A nde ngáá, ní longɔ́ nyii h̃u kpindíi Jísu volú yélaitii tí vá ti Jísu vuw̃aí w̃úỹa.

¹⁴Ná polu haaléngi sí áá foló gɔ́mɛti nuu walaí Páilɛɛ w̃a, naá ndiilá ní kɛ ngáá háwu wɔ́i faa bá maahɔ́lɔ su.”

¹⁵Sóyaitii tí lokohéini naholói wu, ti híya ngáá faí sí tí ndéi tí w̃a. Aáva, faí sí w̃áá woo í híya hiyái hááli haali Júsuaitii ndiiwáá í ló su í fólo hááwɔ holoí w̃a.

¹⁶Ná vólu, Jísu volú yélaa púúngɔ maah̃úú yiláángai tí liiní ngihéi wa í Galéli, mbéi Jísu í ɣɛ́i ndeí tí w̃a ngáá ti lí na.

¹⁷Ná ti Jísu lɔní, tí fɛliní, kɛ́ tí lɛ́ingaa tí nda tála gúlani.

¹⁸Kɛ́ Jísu i vuuvaní ti béla, i ɣɛ ti w̃a, “Ngakpángi sí í ngelegóóh̃u ɛ́ɣɛ ngeleí sí wu, Ngala ngí ti hénga ngéya.

¹⁹Faalɔ, a lí náa nungáá kpɛ́lɛɛ ngéle, ngeleí sí kpɛ́lɛɛ mbú wú kɛ ngáá háwu ti ɣɛ́ ngáá pólu yélaa. Waayaa ngúyai wó ngáá ti ye, Kɛɛɣɛí Ngalángi laahéingi h̃u, ɛ́ɣɛ ngi H̃íỹɛndou Loí laahéingi h̃u ɛ́ɣɛ Hɛ́ɛ́ma Ỹínangi laahéingi h̃u.

²⁰Wú ti galámbo ti híya ngáá faí sítii kpɛ́lɛɛ ngí ndengá wú w̃a ngáá wááyaa ti ɣɛ. Aáva tɔɔỹaá hááw̃a, nyá lɔɔ ɣɛ́ wú vólu hɔ́wɔ fíli í ló sú í foló ngetéyangi sí yakɛ́ɛ́lɛmai w̃a.”