Read Bandi MÁFIYU 4 Bible Online

MÁFIYU 4 - Bandi bible

MÁFIYU 4

¹Kɛ Hɛ́ɛ́ma Ỹínangi i vaa í peleí ɣɛ́ ngáá Jísu, Jísu í lí ngaalaí h̃u kɛinɔɔ́ Ngutuwɔ́ Ỹína Nyɔí í suugɔvɔ́ ngáá í faa ỹɔ́u ɣɛ.

²Ná Jísu í ɣɛ́i náa foló vúú nááningɔ ɛ́ɣɛ kpindí vúú nááningɔ ɣɛ́i áá súngi hóu ngaalaí h̃u ɛ́i belé laaỹɛ́, ndɔlɛí í ɣɛi náa ma.

³Kɛ Ngutuwɔ́ Ỹína Nyɔí i vaangá ngéle, i ɣɛ ma, “Ná yá lɔ tí yáá ɣɛ́ ngáá Ngalángi H̃íỹɛndou Loí, kɛ nde ná kɔtuí sítiini ma ti vóte ngáá mɛɛní.”

⁴Kɛ́ Jísu i ngoo yápotei, i ɣɛ ma, “Pɔnɛngɔ́ɔ́ lé Ngalá Kɔ́lɔi h̃u ngáá sí, í ɣɛ́ngɔ ta, ‘Aa ngáá kɛ nɔ́ɔ léi mɛɛní áá kɛ́ ngáá háwu nuu lɛ́ɛ́h̃uu áá ló ná, kɛ́ ngoí yíla ngílangi fíli áá gúla Ngalá ndá.’ ”

⁵Ná vólu, Ngutuwɔ́ Ỹína Nyɔí i kɛní ngáá háwu taa Jísu tí lí hɛ́ɛ́ma láa wálai h̃u Jɛlúsɛl̃ɛ, í mɔ́ɔ́ kɛ ngáá háwu tí lɛ́ Hɛ́ɛ́ma Yála Pɛ́lɛi wútevesui,

⁶í ɣɛ ma, “Ná yá lɔ tí yáá ɣɛ́ ngáá Ngalángi H̃íỹɛndou Loí, kɛ bé ná bɔwɔ́ wa, yí gúla ndɔwɔlɔ́i wa. Sífaa pɔnɛngɔ́ɔ́ lé Ngalá Kɔ́lɔi h̃u ngáá sí, í ɣɛ́ngɔ ta, ‘Ngalá ngáá nde ngi w̃álekaitii ma ngáá ti í w̃ááh̃u belé.’ Ná vólu, ‘Taa í w̃ááh̃u belé í gɔ́wɔi ɣéle tɔ ɛi híɣa kɔtu wá.’ ”

⁷Jísu i mɔɔ ngoo yápotei, i ɣɛ ma, “Sí pɔnɛngɔ́ mɔ́ɔ́ Ngala Kɔ́lɔi h̃u aá lɔ́ ngáá sí, ‘Nuu fíli álaa ngi Yálangi, Ndemɔí, h̃úúgɔvɔ.’ ”

⁸Ngutuwɔ́ Ỹína Nyɔí i mɔ́ɔ kɛní ngáá háwu taa Jísu tí lɛ́ ngihénga kooh̃ángɔ wála w̃aah̃u, í ndɔwɔlɔ́itii kpɛ́lɛɛ súú ɣɛ lá ngeleí sí wu ɛ́ɣɛ kindaa vilí kpátɛitii tí su,

⁹i ɣɛ Jísu w̃a, “Ngáá sítii kpɛ́lɛɛ fé í yɛ́, ná yáá hítɛ wumbú ya yí fɛ́li ngáá í yálangi.”

¹⁰Kɛ́ Jísu i ngoo yápotei, i ɣɛ ma, “Setána, léve pólu! Pɔnɛngɔ́ɔ́ lé Ngalá Kɔ́lɔi h̃u ngáá sí, í ɣɛ́ngɔ ta, ‘Ndemɔí hɛ́li lɛ́i í ngáá í Yálangi aáva í ɣɛ́ nɔ́ɔ ngáá ngilangɔ́ kpé yáá fɛ́li.’ ”

¹¹Ngutuwɔ́ Ỹína Nyɔí i betévei náa mba, kɛ Ngalángi w̃álekaitii tí váanga, tí kpɔ́mba hé Jísu yɛ.

¹²Ná Jísu í mɛniní ngáá Masangí Hɛ́lɔdi i Njɔú vília kpindi vɛlɛ́i wu, i yangáimani í lí Galéli lataí h̃u.

¹³Aa loní Násɔlɛ taí h̃u, kɛ́ i liiní ngáá í ló Kapɛ́ɛ́niya taí h̃u, i Galéli Yɛ Walaí béla, Sɛ́biyul̃ɔ ɛ́ɣɛ Náfutali lataítii su.

¹⁴Sí i ɣɛní kɛinɔɔ́ sí Ngalá ngi ndéni laa háá lé mɔ́i Aisáya w̃a í hítɛ nga, sí Aisáya í ndéni, i ɣɛ ta,

¹⁵“Wɛ́i wú ngáá Sɛ́biyul̃ɔ yelaítii ɛ́ɣɛ wɛ́i wú ngáá Náfutali yeláitii, wú yívoi ŋál̃a véle, Jɔ́ɔ́dɛ Yɛí góóɣaka w̃a vékai, Galéli lataí h̃u, wɛ́i wáá ngáá Júsua,

¹⁶wɛ́i wú kpindí h̃u, wá lɔɔ vá folo hólo ngwála lɔmá. Wɛ́i va wú gúlangɔ ngáá wú háángɔɔ lé, maa holói lɔ́ɔ vá ngumááwo peleí ɣɛma ngáá wu ye.”

¹⁷I síɣe ná h̃úú w̃á, Jísu í tɔkúla héini ngáá keéla wói lendáá áá ɣɛ́ ta, “A vólu yáfe wú háá ỹɔítii mba, bɔw̃álale Ngalángi w̃ásandai áá vá ɣɛ́ma nuu kpɛ́lɛɛ mááh̃u h̃umbuwa i folóa ma.”

¹⁸Ná Jísu í ɣɛ́i áá híya Galéli Yɛ Walaí góóɣaka w̃a, i nyɛɛmbɛ́ mbélaa félengɔ lɔ́ni ti ngáá njee koo h̃u yiláá, táá ti ỹɛ́ɛ́ bɛ mbów̃ai víli njɛí ya. Ndiya geleí laahéingi i ɣɛi ngáá Sáimɔ, ndeɣe geleí laahéingi i ngáá Ándulu. Kɛ́ Sáimɔ laahéi pékai í ɣɛi ngáá Pítɛ.

¹⁹Jísu i ɣɛi ti w̃a, “A vá wú hítɛ pólu aáva ngáá wú gálambo wáá kɛ ngáá háwu nungáá táa ɣɛ́ ngáá pólu yelaa.”

²⁰Ngamá nɔ́ɔ, kɛ tí bénga ti wów̃aitii mba, tí tó mba.

²¹Ná mɔ́ɔ í lɔ́vei míl̃anda w̃a, i siỹɛ péka félengɔ lɔ́i ti ngáá njee koo h̃u yiláá. Ti ɣɛ́i ngáá, Jimisí ɛ́ɣɛ ngí ndéɣe Njɔú, Sɛ́bɛdi h̃iỹɛndou lengáitii. Ti ɣɛ́i keléngi h̃u taá ti kɛ́ɛ́ɣɛni, táá tí ỹɛ́ɛ́ bɛ mbów̃aitii suuhɔlɔ́ sɔ́lɔ. Jísu í tí lolíni ngáá ti hítɛ polú.

²²Ngamá nɔ́ɔ tí tí kɛ́ɛ́ɣɛ ɛ́ɣɛ ti gélengi lói na, tí tó Jísu wa.

²³Jísu i híya hiyaí Galéli lataí kpɛ́lɛɛ sú áá nungáá gálambo ngáá Ngala fáitii Júsuai ti Yála fɛli máákpɔ wotaítii mbu, ná vólu, áá keela woó vándai lé kɔwɔ́ato Ngalángi w̃ásandai wa, ná vólu, i ɣɛi áá seebɛ híí kpɛ́lɛɛ mbálo í ɣɛ́i nungáitii mba.

²⁴Kɛ maa woo í híyaa hááli hááli tataí ná h̃u taa náá lolí ngáá Síliya, faalɔ, nungáá tí líí ngéle ngáá seebɛ híí gɛvɛlɛ kɛvɛlɛ mbelaa, ndúwu ya fuulɛ́ héébɛ yelaa, sítii ỹína nyɔí í ɣɛ́i ti volú, kpɔle bɔ́le heebɛ yelaa, í báha náa bɛ́lɛ mɛŋɛl̃ɛ́ yélaa wa, aáva i ti walóni.

²⁵Faŋa wála i toní Jísu wa táá gúla Galéli lataí h̃u ɛ́ɣɛ tataí sí h̃u taá náá lolí ngáá Taa Púúngɔ Látai, ɛ́ɣɛ mɔ́ɔ́ Jɛlúsɛl̃ɛ taa h̃u, í báha náa Judíya lataí ɛ́ɣɛ tataí sí wá i ɣɛ́i Jɔ́ɔ́dɛ Yɛí góóɣaka w̃áá véle.