Read Bandi MÁFIYU 6 Bible Online

MÁFIYU 6 - Bandi bible

MÁFIYU 6

¹Ná vólu, Jísu í mɔ́ɔ́ ɣɛ́ ti w̃a, “A w̃aah̃ú béle ngáá wú Yála faa ɣɛndái álaa ɣɛ́ nɔ́ɔ ngáá nungáá ti yaah̃ú háa. Ná wáá ná ɣɛ, wú Kɛ́ɛ́ɣɛ Ngalá ngí ngelegóóh̃u, maaỹá fíli ɛi ɣɛ ngeyá wú hááw̃a wá bɛ́lɛ nɔ.

²Faalɔ, ná wáá ŋani he nyaani yélaa yaá, wálaa ɣɛ́ wáa nda yaah̃ú nungáá tɔɔ ɣɛ́ faa wɔ́lɔ mba, kíya nungái sítii taá Ngala fái la yaah̃ú kɛ́ aa ti lií h̃u, taá kɛ. Faa bɔ́wɔi taá kɛ, taá nda yaah̃ú ná taa ɣɛ́ Júsuai ti Yála fɛli máákpɔ wotaítii mbu ɛ́ɣɛ pele walá wálaitii ma taí h̃u. Taa ná ɣɛ́ kɛinɔɔ́ nungáá ti ɣɛ́ taá tí lɛ. Ngí tɔɔỹái le wú w̃á, ti w̃ááyangi kpɛ́lɛɛ míl̃a tí mááhɔlɔnga.

³Kɛ́ ná wáá ŋani he nyaani w̃ɔ́ɔ yaá, waá kɛ nuu fíli ɔ́ɔ́ ɣɛ́ faa wɔ́lɔ mba kulo bɛ́lɛ.

⁴Ná lɔ́ áá kɛ́ áá ɣɛ́ ngáá ndɔɔwu h̃ú háa. Aáva wú Kɛ́ɛ́ɣɛ Ngalá pá áá tɔ sí wáá kɛ ndɔɔwu h̃ú, aá lɔɔ vá wú w̃ááyangi hemá.”

⁵Ná vólu, Jísu i ɣɛ ti w̃a, “Ná wáá ɣɛ́ wáá Ngala fɛ́li, wálaa gúla ngáá nungái sítii kɛ kíli, tiyɛ́i taá Ngala fái la yaah̃ú kɛ́ ɛi ɣɛ ti lií h̃u! Tí lói ngáá londáá Júsuai ti Yála fɛli máákpɔ wotaítii mbu ɛ́ɣɛ tái h̃uu véle wala walaítii maa hɔ́kungitii su táá Ngala fɛ́li kɛinɔɔ́ nungáitii kpɛ́lɛɛ ti ɣɛ́ taá tí lɔ. Ngí tɔɔỹái le wú w̃á, ti w̃ááyangi kpɛ́lɛɛ míl̃a tí mááhɔlɔnga.

⁶Kɛ́ ná wáá ɣɛ́ wáá Ngalá fɛ́li, a lí wú láá lómuitii su, wú wú vɛ́lɛitii ndaabɔ́lu, wú wú Kɛ́ɛ́ɣɛ Ngalá fɛ́li lɛ́i nuu ɛ́i tɔ. Aáva wú Kɛ́ɛ́ɣɛ Ngalá pa áá tɔ sí wáá kɛ ndɔɔwu h̃ú aá lɔ́ɔ vá wú w̃ááyangi héma.

⁷Wú Yála fɛli ngói h̃u, wálaa ɣɛ́ wáá ngoo bɔ́w̃a nde bih̃í kíya sítii taa Ngalá fááw̃a taá kɛ. Taa ná ɣɛ́ bɔw̃álale ti gi ma ná ti Yála fɛ́li ngói h̃uu áá ɣɛ́ gooh̃á, Ngalá ngáá ti woo ỹɛ́ni náa.

⁸Wálaa Ngala fɛ́li kíya taá kɛ bɔw̃álale wú Kɛ́ɛ́ɣɛ Ngalá ngí kɔlɔ́ sí wú béɣengɔ ma wɔ́ɔ́ ɣɛ́ p̃ɛ́ɛ́ wú mɔɔní fááw̃a.

⁹Faalɔ, ngimɔ́ɔ́ kule í wú w̃á wú Ngalá fɛ́li, wáá ɣɛ́ ta, ‘Ni Kɛ́ɛ́ɣɛ Ngalá yɛ́i yí ngelegóóh̃u, kɛ kái ngáá háwu nungáá ti wúfe í w̃a.

¹⁰Í w̃ásandai í vá kái í ɣɛ́ nuu kpɛ́lɛɛ mááh̃u, í líívo fái í ɣɛ́ ngelewu, kíya nɔ́ɔ áá ɣɛ́ ngelegóóh̃u.

¹¹Ni laa ỹɛ́ɛ́ni hé ni yaá ngelewo kúú yilá ngílangi fíli má,

¹²Yí ni háá ỹɔítii suuhaaló kɛ kíya nɔ́ɔ naá sítii suuhaaló taá fáa ỹɔ́u ɣɛ́ ngáá ni ye.

¹³Yálaa kɛ ngáá háwu suugɔ́vɔ kpángɔ ɔ́ɔ́ vá ni yelé ɔ́ɔ́ kɛ nɔɔ́ faa ỹɔ́u ɣɛ, kɛ́ yí ní w̃ááh̃u béle Ngutuwɔ́ Ỹína Nyɔí yáá.’

¹⁴Ná wáá nungáá h̃úúhaalo ti háá ỹɔítii fááw̃a taá kɛ ngáá wú ye, wú Kɛ́ɛ́ɣɛ Ngalá í ngelegóóh̃u laá bɛ́lɛ aa wú háá ỹɔítii suuhaaló.

¹⁵Kɛ́ ná wɔ́i nungáá h̃úúhaalo ti háá ỹɔítii faaw̃a taá kɛ ngáá wú ye, wú Kɛ́ɛ́ɣɛ Ngala bɛ́lɛ nɔ ɛi wú háá ỹɔítii suuhaaló.”

¹⁶Jísu í mɔ́ɔ́ ɣɛ ti w̃a, “Ná wáá ɣɛ́ wáá sú sóu, wálaa yaah̃ú yátaba, kɛ kíya nungái sítii taá Ngalá fái lá yaah̃ú kɛ́ ɛi ɣɛ ti lií h̃ú, taá kɛ. Taá ndɔ́lɛ yaah̃uí bátɛ wa, kɛinɔɔ́ nungáá ti ɣɛ́ kɔ́lɔ ngáá tiyá lɔ́ɔ sú sóu. Ngí tɔ́ɔ́ỹai le wú w̃a, ti w̃ááỹangi kpɛ́lɛɛ míl̃a tí maahɔ́lɔnga.

¹⁷Kɛ́ ná wáá ɣɛ́ wáá sú sóu, a yaah̃ú wúya, wú wúngi yakúla, kɛinɔɔ́ nungáá tálaa ɣɛ́ kɔ́lɔ ngáá wá lɔ́ɔ sú sóu, kɛ́ kɛ nɔ́ɔ léi wú Kɛ́ɛ́ɣɛ Ngalá lɛ́i nuu ɛ́i tɔ, laá lɔ́ áá ɣɛ́ suuwɔlɔ́. Wú Kɛ́ɛ́ɣɛ Ngalá pa áá tɔ sí wúwaa kɛ ndɔɔwu h̃ú, aá lɔ́ɔ vá wú w̃ááỹangi hemá.”

¹⁹Jísu í mɔ́ɔ ɣɛ ta, “Wálaa ngandɔɔlɔ́ mbó bɔwɔ́ hááw̃a ngeleí sí wu, mbéi kaahe ɛ́ɣɛ ngiliá ɣɛ kíli wɔlingaa taá ngi háa h̃uu ỹááni na, ŋuỹá yélaa tí naa h̃úúwolo tí ŋuỹá wó na.

²⁰Kɛ́ aá ɣéle, a ngandɔɔlɔ́ mbó bɔwɔ́ hááw̃a ngelegóóh̃u, mbéi kaahe ɛ́ɣɛ ngiliá ɣɛ́ kíli wɔlingaa tɛí ngi háá h̃úú ỹááni na, aáva ŋuỹá yélaa tɛí naa h̃úúwolo tɔɔ́ ŋuỹá wó na,

²¹sífaa, mbéi fíli í yándɔɔlɔngi áá ɣɛ na, naa lɔ í líi bɛ́lɛ áá ɣɛ́ na.”

²²Jísu i mɔɔ ndení, i ɣɛ ta, “Nuí yááh̃ui lɔ́ í ngáá lámbongi kpusaí hááw̃a. Ná nuu yááh̃uitii pángɔ áá ɣɛ́ la, ɛ́i ɣɛ́ kpindí h̃u.

²³Kɛ́ ná nuí yááh̃uitii tɛ́i ɣɛ́ váni, ná ná áá ɣɛ, kpusaí bɛ́lɛ nɔ aa ɣɛ kpindí h̃u. Faalɔ, ná nuu búsai áá ɣɛ́ kpindí h̃u, ná ná áá ɣɛ́, kɛ nuu h̃úú bindíngɔ aa ɣɛ lá ngwála!”

²⁴Jísu í mɔ́ɔ́ ɣɛ ta, “Nuu fíli ɛi yénge masa félengɔ yɛ́ ngáá maa tɔ́iŋngɔ. Sífaa aa hilí ngáá ngiláángi, í ló ngáá pekaí, ɔɔ aa bɔwɔ́ gúla kɛlɛ́ma ngiláángi yɛ́, í híli ngáá pekaí. Nuu ɛ́i yénge maa tɔ́iŋngɔ kpéiŋ Ngalá mbɛ́ táá naholói.

²⁵Wálaa liihɛ́lɛ ngáá ŋani fíli wú lɛ́ɛ́h̃ui hááw̃a. Ná wáá ngáá, sí wáá mɛ, sí wáá kpɔ́le ɛ́ɣɛ sí wáá ngilí w̃a. Ndɛɛh̃úi lɔ́vengɔɔ lé mɛɛní wa, nuu lúwui va tɔvengɔ́ɔ́ lé kulaí wa.

²⁶A wɔlɛ lɛ́ɛ w̃ɔniáitii mba. Nátii tɛí kpaála la ngáá tí mɛɛni yátɛ mba mɛɛni ngandɔ́ɔ́lɔ fááw̃a. Kɛ́ ná fíli sú, wú Kɛ́ɛ́ɣɛ Ngalá í ngelegóóh̃u, aa ti laa wɔ́. Kɛ laa maa wɛ́i wú lɔ́vengɔ w̃ɔníaitii ma p̃óu p̃óu?

²⁷Ele lɔ í wú h̃u mbéi áá hómbo í tá guló kw̃ɛ́ɛ́ séi lɛɛh̃úi la sífaa nɔ́ɔ ndiihɛ́lɛngɔ áá ɣɛ́ lá la?

²⁸Ná vólu, ndéé lɔ áá kɛ wáá liihɛ́lɛ ngáá kula haá? A gisíya lɛ́ɛ ngáá fuláwaitii tí ndɔbɔí h̃u kíya taa bátɛ, tɛí yénge kɛlaa maa tɔɔ́ kula bátɛ bɔwɔ́ yɛ.

²⁹Kɛ́ ná fíli su, ngí faa lé wú w̃á, ngáá kíya bɛ́lɛ Masangí Sɔ́lɔmɔ batɛngɔ́ í ɣɛ́i lá ngwála, kula áá ɣɛ́i ngeyá pangɔ́ ɔ́ɔ́ ɣɛ́ lá ɔ́ɔ́ híti fuláwai sítiini ti yiláá kéle tɔ su.

³⁰Ná ngimɔ́ɔ́ Ngalá ngáá fuláwaitii maa yíli, tiyɛ́i tí na nɔ́ɔ hááwɔ haaw̃a, kɛ́ díína ɔ́ɔ́ ɣɛ́ í fólo kɛ tí lóbonga, tí tí w̃ɔ́, aa wú gí ma ngáá kɛ Ngalá ngaa hómbo í wú w̃áayili í lɔ́ve fuláwai nátii mba? Tɔɔỹaá hááw̃a, nda ngáá wú h̃u ngwala.

³¹Faalɔ, wálaa líihɛlɛ wɔ́ɔ́ ɣɛ́ wáá ɣɛ́ ta, ‘Míl̃inda lɔ naá laaỹɛ́ɛ́ni hɔ́lɔ na? Míl̃inda lɔ sí naá kpɔle naá sɔ́lɔ na? Ɔɔ míl̃inda lɔ naá w̃aa gúla hɔ́lɔ na?’

³²Sífaa, faí sítii tɔ sítii ti ngáá ngeleí sí wú yélai taa bála kpála la. Kɛ́ wú Kɛ́ɛ́ɣɛ Ngalá ngí ngelegóóh̃u i kɔlɔ́ ngáá sítii kpɛ́lɛɛ ngi wála tɔ wú wa.

³³Wá ɣéle wú béɣema háá walaí í ɣɛ́ ngáá Ngalá ngi ɣɛ́ wú w̃ááh̃u ngi w̃ásandai h̃u ɛ́ɣɛ ngí lúva vele vandaí í ɣɛ́ wú h̃ú. Ngalá tɔ áá wú béɣema wɔlingái sítii kpɛ́lɛɛ kúla kɛlɛ́ma wú yɛ́.

³⁴Ná hááw̃a, wálaa liihɛ́lɛ ngáá díína háitii. Díína lííhɛlɛngi kínɛi, díína ndá w̃úl̃a. Maa áá nɛ́ɛ́ni wɔ́ɔ́ ta báha faa bɔ́lundai wá folo yíla ngílangi áá váá la. Folói fíli, ngi ndá lííhɛlɛngi aa kula ɣɛ folói ná hááw̃a.”