Read Bandi MÁI 12 Bible Online

MÁI 12 - Bandi bible

MÁI 12

¹Kɛ Jísu i pɛlɛngá yɛpɛmá nungáitii ngelé faanɛ́ɛ́ngaitii su íwaa ɣɛ́ ta, “Siỹɛndópoi lɔ wɔ́lɔ í ɣɛ́i na, i kpelé láni í sí ŋaníí hí mba taá tóli ngáá gilépii. I kpakií lóni ma. Ná vólu, í ndówai wɔ kɔtuí wa ngáá ti ɣɛ́ táa gilépii yanjɔ́wɔlɔ suu yɛí áá ɣɛ́a vú su, tí kpátɛ ngáá gilépi lɔí. Ná vólu, i mɔɔ kpɔ́ngi lóni ngáá kɔtuí kpeléi ná h̃u. Kɛ i maa bélei hénga kpelé híŋa mbélaitii ngeyá siŋa h̃u, í yóóɣe, í lí siya má.

²Ná gilépii gula sɔ́wɔi í fóloni ma, kɛ kpelé w̃ɔ́i i ngi yénge mɔ́i tá yiláá tɔ́venga kpéle híŋa mbélai ngéle ngáá tí kɔ́lɛ, tí ngí ndái he ngi yénge mɔ́i yáa, í váá la ngelé.

³Kɛ́ kpéle híŋa mbélai tí ngénge mɔ́i ná hóuni, tí ndéve, tí tɔve, í li ngáá yaá ỹaaká.

⁴Kɛ kpelé w̃ɔ́i i mɔɔ ngenge mɔ́ɔ́ véka lɔvengá. Kɛ́ kpelé híŋa mbélai nátii tí ỹánda héini siỹɛndópoi wa ngu mba, tí suuhóu kíli ỹɔu wo.

⁵Kɛ́ ná fíli sú, kpelé w̃ɔ́i i mɔɔ peka lɔvení tí yelé, kɛ́ kpelé híŋa mbélai tí pááni. Kpelé w̃ɔ́i í pékaa lɔvení múl̃ɔ, kɛ́ kpéle híŋa mbélai tí ti lɛ́ingaa léveni, tí tí lɛ́ingaa vaa.

⁶Nuu yílaa tɔ́ náa í ɣɛ́i loí kpéle w̃ɔ́i yaá ngáá í tɔ́ve, ná wáá ngáá, ngi h̃íỹɛndou loí ndóngɔ la. Ngapumái tɛ́ɛ́lɛ tɛ́ɛ́lɛ, i ngi lói ná lɔ́veni, i ɣɛ ta, ‘Kpelé híŋa mbélai tiyá lɔɔ vá wúfema ní lói w̃a.’

⁷Kɛ́ kpelé híŋa mbélaitii ti ɣɛ́i ỹɔw̃ɔ́ ỹɔ́w̃ɔ w̃a, ‘Sí lɔ́ áá vá poŋaníaitii maahɔ́lɔma ná ngi kɛ́ɛ́ɣɛ áá há, a vá, a mú páa, poŋaníaitii taá ɣɛ́ naa ngáá a mu ndá.’

⁸Kɛ ti búndɛnga ma, tí páa, ti gúla lá kpélei h̃uu wá, tí píli.”

⁹Kɛ Jísu i mɔɔningí wónga, i ɣɛ ta, “Ná kpéle w̃ɔ́i sí áá vá, ndeé lɔ áá kɛ? Aa va í kpéle híŋa mbélai nátiini páa, í kpélei he kpelé híŋa mbélaa vekaa yaá siŋa h̃u.”

¹⁰Í mɔ́ɔ ɣɛ ta, “Kɛ́mbɛ wú Ngalá Kɔ́lɔi gálanga? Sí í ɣɛ́ngɔ ta, ‘Kɔtuí sí pɛlɛ́ ló mbélai ti bééleni mba í ɣɛ́i ti gi má nga ngáá mba, laá lɔ́ náa í ɣɛ́a ngáá ngangímba wɔ́tui pɛlɛ́i lo fááw̃a, í lɔ́ve kɔtu vekái kpɛ́lɛɛ mbá.

¹¹Ndemɔí Ngalá tɔ í sí ɣɛ́i, aáva maa wɔ́tui w̃aanɛ́ɛ́ngɔɔ lé a mu yaah̃ú!’ ”

¹²Nungái sítii Jísu í njɛpɛí sí vúni tí w̃a, ti ɣɛ́i taá péle wɔlí mba ngáá ti Jísu hou, bɔw̃álale ti ɣɛ́i kɔlɔ́ ngáá kɛ i faanɛ́ɛ́ngi sí héingɔ ti yɛ. Kɛ́ ti ɣɛ́i taa lúwa faŋaí wa. Faalɔ, tí ndóni na tí li.

¹³Ná ná í gúlani su, Júsuai sítii taa ɣɛ́ ti w̃a Falósiai tí tí lɛ́ingaa lɔvení ɛ́ɣɛ Masangí Hɛ́lɔdi guuwu h̃uu yélai ngáá ti Jísu hou ndaa wóó wá.

¹⁴Kɛ tí liingá Jísu yelé, ti ɣɛ́ ma, “Kaamɔ́ɔ́, ní kɔ́lɔ ngáá yá lɔ ngáá tɔɔỹaá w̃ɔ́ɔ, sífaa yáá béɣei ngáá sí núngai taá gísiya lá, bɔw̃álale yáá béɣei nuu yéɣe fááw̃a kɛ kíli h̃u, kɛ́ yáá kalambongí wó ngáá Ngalángi lɔ́ɔ́ỹaa veleí. Faalɔ, ni longɔ́ɔ́ lé ni ɣɛ́ kɔ́lɔ ná wɔ́lii aá lɔ́ pele w̃a Ngala sávai h̃u ngáa ní páva he Lóómi Lɔwɔlɔ́ W̃ása Ngwalaí yáá baa aa pele w̃a?

¹⁵Kule lɔ́ ni w̃a ngáá ní fe baa ná laá fe?” Kɛ́ Jísu i ɣɛi kɔlɔ́ ngáá sí ti ɣɛ́i taá nde ti ɣɛ́i nɔ́ɔ taá nda yaah̃ú. Faalɔ, i ti w̃ɔ́ɔ́nini, i ɣɛ ti w̃a, “Ndeénii le wáá ɣɛ́ wú sóu ndáá woo wá? A vá ngáá maa gápangi ta ngí tɔ.”

¹⁶Kɛ tí váánga lá ngelé. Kɛ i ti w̃ɔ́ɔ́ninga, i ɣɛ ti w̃a, “Ele hootó lɔ, ná vólu, ele laahéi tɔ́ í kápangi sí w̃a?” Kɛ nátii tí ngoo yápotenga, ti ɣɛ́ ma, “Lóómi Lɔwɔlɔ́ W̃asa Ngwalaí.”

¹⁷Kɛ Jísu i ɣɛa ti w̃a, “Sí hɔ́ɔ́ í Lóómi Lɔwɔlɔ́ W̃asa Ngwalaí hááw̃a, a fe Lóómi Lɔwɔlɔ́ W̃ása Ngwalaí yáa. Sí va í na Ngalá fááw̃a, wú fé Ngála ngéya.” Ná Jísu í ngói sí léni, ngi hái i ti gindáá vílini.

¹⁸Kɛ Júsuai sítii taa ɣɛ́ tí w̃a Sájusiai, tiyɛ́i taa ɣɛ́i laní ngáá mbuyoɣe saa h̃ú hái, tí lɛ́ingaa tí liiní Jísu yelé ngáá tí mɔ́ɔ́ni.

¹⁹Faalɔ, ti ɣɛ́i ma, “Kaamɔ́ɔ́, Muusé í sáva vɔ́nɛngɔ mu hááw̃a ngáá ná siỹɛ́ ngɛ́i ɣɛ ndóu léni í ló su í há, kɛ ngi ndéɣe ɔɔ ngi ndíya í ponyah̃ái ná yéɣe kɛinɔɔ́ tí ndéngaa le siỹɛ́ngi ná yɛ áá ɣɛ́ náa haaní.

²⁰Ná ná áá ɣɛ, njee koo h̃u ngɔ́felangɔ lɔ wɔ́lɔ ti ɣɛ́i na, ti ngáá siỹɛngáá. Kɛ ti ndíya wálai i nyah̃á héinga kɛ́ taá ndóu léni taá nyah̃ái ná í ló su í ha.

²¹Kpelaa gélei ná í ponyah̃ái ná yéɣe, ti héi taá láa, kɛ́ taá ndóu léni í ló su laá bɛ́lɛ í ha. Ngimɔ́ɔ́ nɔ́ɔ jɔ́ í ɣɛ́i ngáá náá ndá vólu leɣeí.

²²Aáva ngimɔ́ɔ́ í síyani nga ngáá ti ngɔ́felangɔ. Taá ndóu léni nyah̃ái ná wa í ló su tí ha. Ngapúmai tɛ́ɛ́lɛ tɛ́ɛ́lɛ, nyah̃ái bɛ́lɛ nɔ́ í há.

²³Ná ná áá ɣɛ, ná saa yeláitii taa yóóɣe sái h̃u, ti ngɔ́felangɔ h̃u ele lɔ ngi ỹáh̃a áá ɣɛ́ la, sífaa i walaí tí ngɔ́felangɔ kpɛ́lɛɛ ngéya ngáá nyah̃á?”

²⁴Kɛ Jísu i ti woo yápotenga, i ɣɛ ti w̃a, “Wá lɔɔ lí ngáá kaka péle, bɔw̃álale wáá Ngala Kɔ́lɔi yatɔ́ma mba kɛlaa wɔ́ɔ́ ɣɛ́ faa fíli kɔ́lɔ kɔwɔ́ato ngi yákpangi wa.

²⁵Ná sáa yeláitii taa yóóɣe sái h̃u, siỹɛ́ kpɔ́ngɔ nyáh̃a wá, siỹɛ́ ngɛ́i nyah̃á héi kɛlaa nyah̃á ɔ́ɔ́ wála kɛmbɛ h̃u, kɛ́ ti lúva veléi aa ɣɛ nɔ́ɔ́ ngáá Ngalángi w̃álekaitii ti ndái ɣɛ kíli tiyɛ́i tɛi ná tá ɣɛ.

²⁶Bɛlɛ́ naá ngí yɛ́pɛ wú yéle kɔwɔ́ato mbuyoɣe saa h̃úi wa. Muusé gɔlɔ vɔnɛngɔ́i h̃u mbéi í pɔ́nɛngɔ na kɔwɔ́ato ndɔbɔí wá í ɣɛ́i áá w̃ɔ́, wú náá galánga sɔ́, kɛ́lɛi? Naa lɔ pɔnɛngɔ́ na ngáá Ngalá ngí ɣɛ́i Muusé w̃á, ‘Nyá lɔ ngí ngáá Lébilah̃au ɛ́ɣɛ Áiseni ngaa Jékɔ ti Yálangi.’

²⁷Aa ngáá Ngalá sítiini fááw̃a ti háángɔ, kɛ́ laá lɔ́ ngáá Ngalá sítiini fááw̃a tí ndɛɛh̃ú h̃ú. Pɔɔla walá w̃úl̃a wú púnga nga ngáá kɛ saa yeláitii tɛí yóóɣe sái h̃u!”

²⁸Kaamɔítiini Ngala sávai hááw̃a ti tá yiláa i maalení Sájusiaitii tíwaa Jísu w̃aaɣaalí. Ná í tɔ́ni ngáá kɛ Jísu i ngoo yapóte pánda héngɔ ti yaá, kɛ i Jísu w̃ɔɔningá, i ɣɛ ma, “Bɛɛ́ lɔ í ngáá savaí bíkpingi savaítii kpɛ́lɛɛ kpɛ́lɛɛ su Ngalángi féni Muusé yaá?”

²⁹Jísu i ngoo yápoteni, i ɣɛ ma, “Sí í ngáá savaí bíkpingi aá wáá ngáá sí pɔ́nɛngɔi su ngáá í ɣɛ́ngɔ ta, ‘Wɛ́i wú ngáá Ísulɔ yeláitii a wolílo, Ndemɔí a mu Yálangi lɔ í ngáá Ngalá aáva ngilaá kpé tɔ́ í ngáá Ndemɔí.

³⁰Kɛ yí ló ngáá Ndemɔí í Yálangi ngáá í líí kpɛ́lɛɛ ɛ́ɣɛ í lɛ́ɛ́h̃ui kpɛ́lɛɛ ɛ́ɣɛ gí mái kpɛ́lɛɛ í lɔ́ve ŋani kpɛ́lɛɛ mbá í lóngɔ áá ɣɛ́ lá la.’ ”

³¹Jísu í mɔ́ɔ́ ɣɛ ta, “Fele kélei waa ngáá sí, ‘Ló ngáá í mbála nuú búsaitii kíya í lóngɔ ngáá bɔwɔ́.’ Sava fíli aa na ɔ́ɔ́ lɔ́ve savaí sítiini mba.”

³²Kɛ kaamɔí ná Ngala sávai hááw̃a i ɣɛa Jísu w̃a, “Tɔɔỹaá lé yíwaa ndé ngáá Ngalángi i yíla kpé, aáva Ngala péka fíli aa na kɛ léi ngilaá kpé.

³³Ná vólu, kɛ nuu í ló la ngáá lií kpɛ́lɛɛ ɛ́ɣɛ nuu gí mái kpɛ́lɛɛ í lɔ́ve ŋani fíli mbá ndongɔ́ la. Ná vólu, nuu í ló ngáá nuu mbála nuú búsaitii kíya nuu lóngɔ ngáá bɔwɔ́. Savaí sítiini tɔvengɔ́ɔ́ lé fembɛ wɔ́li fíli mbá nuu áá fe Ngalá mbɛ ɛ́ɣɛ saáɣa vekaítii kpɛ́lɛɛ.”

³⁴Ná Jísu í tɔ́ni ngáá kɛ siỹɛndópoi i ngoo yápotengɔ ngáá kele ɣelé ngóó, i ɣɛi ma, “Í lúw̃angɔ vóto te náa ma ngáá Ngalángi w̃ásandai í ɣɛ́ í w̃ááh̃u.” Aáva í síɣe náá ná h̃uu w̃á í lí naa wutúwɔ, nuu fíli aa mɔɔ kɔvɔ́i ngáá ɔ́ɔ́ Jísu w̃ɔɔní ngáá faa fíli.

³⁵Ná Jísu í ɣɛ́i áá kalambongí wó Hɛ́ɛ́ma Yála Pɛ́lɛi góvii h̃u, i mɔɔningí wóni, i ɣɛ ta, “Ndeénii le kaamɔítiini Ngala sávai hááw̃a taá kalambongí wo, ti ɣɛ́ ta, ‘Ngalángi Lókolo Mbá W̃ɔ́i lɔ í ngáá Masangí Deevé láála loí’?

³⁶Deevé bútei va i yɛpɛní Hɛ́ɛ́ma Ỹínangi yákpangi h̃u, i ɣɛ ta, ‘Ndemɔí Ngalá i ndení Ndémɔi w̃a, i ɣɛ ma, héi ngufema ỹándai kpéla ní w̃ásandai h̃u í ló su kpóloo ngí í wááhilima yélaitii pu í gɔ́wɔ wú.’ ”

³⁷Jísu í mɔ́ɔ́ ɣɛ ta, “Ná Deevé bútei áa Ngalángi Lókolo Mbá W̃ɔ́i lóli ngáá Ndémɔi, kɛ aa ɣéle ɣɛ́ náá ngáá Deevé láála lóu?” Faŋaí sítiini ti wolilóngɔ í ɣɛ́i lá Jísu w̃a, i ti góóh̃unɛɛni.

³⁸Jísu galambo ngoí h̃u i ɣɛi áá ɣɛ́ ta, “A w̃aah̃ú béle ngáá kaamɔítiini Ngala sávai hááw̃a. Tí loí ngáá lɔvé tɔvéndaa ti lóma kooh̃aítii su kɛinɔɔ́ nungáá yaah̃u í ɣɛ́ ti wa. Ɛ́ɣɛ mɔ́ɔ́ tí loí ngáá nungáá taa ɣɛ́a laalí ti w̃a ngufema h̃ú lííwa wála walaítii.

³⁹Ná vólu, tí loí ngáá heindáá ngufema ỹándaitii Ngala fɛli máákpɔ wotaítii mbu. Ɛ́ɣɛ mɔ́ɔ́ tí loí ngáá heindáá ngufema ỹándaitii ná taa w̃ɔ́ɛɛ kpɔ sú ndaaỹɛ́ mbómaa.

⁴⁰Ná vólu, taá pónyah̃aitii ti vɛ́lɛitii kulá ti yaá, tí kɛ́ ngáá vo, tí pɛ́lɛ bɔwɔ́ gúlama ngáá nuu vándaa nungáitii ngaah̃ú ngáá ti Yála fɛlindái taá súú ɣɛ gooh̃á. Kɛ́ nuu láálii sítii pa faa bángi áá vá láma ti w̃a, aa lɔve nungáá vekaítii ti ndái wa.”

⁴¹Ná vólu, kɛ Jísu i heingá Ngala kɔ́ pu nyáákai béla Hɛ́ɛ́ma Yála Pɛ́lɛi góvii h̃u, íwaa faŋaí béle táá ti gápangai pili Ngala kɔ́ pú nyáákai h̃u. Kpatɛ yélaa bih̃íw̃aa tí piliní sú bih̃í.

⁴²Kɛ́ ponyah̃á yiláá nyaaningɔ́ í ɣɛ́i la, i vaaní, í kápa kulo gulo félengɔ víli su ngáá ɔ́ɔ́ híti nɔ́ɔ bɛ́lɛ kɔlu yílaa su.

⁴³Kɛ Jísu i volú yélaitii tólinga, i ɣɛ ti w̃a, “Ngí tɔɔỹái le wú w̃á, ponyah̃á ỹááningɔi sí, i Ngala kɔ́ngi héa bih̃í í lɔ́ve nuu vékaitii kpɛ́lɛɛ mbá tí Ngala kɔngítii punga nyaakái h̃ú.

⁴⁴Sífaa nungái sítii kpɛ́lɛɛ tí tí bátɛitii ta yeɣé ngéɣengɔ nɔ́ɔ maah̃u, tí fé ngáa Ngalá kɔ́ngi, kɛ́ ponyah̃ái sí láa nyaani kíli w̃a, ngeyá wɔ́lingi kpɛ́lɛɛ mil̃a í pílinga su ngáá ɔ́ɔ́ ɣɛ́ ɣɛi loí ngeyá ndaa ỹɛɛní hááw̃a.”