Read Bandi MÁI 15 Bible Online

MÁI 15 - Bandi bible

MÁI 15

¹Ngelendáá lɛtɛngí, Ngala sááɣa gula mbélai ti wutúwɔaitii, kele ɣelé mbélaitii, kaamɔítiini Ngala sávai hááw̃a ɛ́ɣɛ Faa H̃úú Haa Lé Mbélaitii kpɛ́lɛɛ tí faa h̃uubatɛ́ mbóni. Ti Jísu yiliní, tí lii lá, tí fe Lóómingaitii ti gɔ́mɛti nuu walaí Páilɛɛ yaá.

²Kɛ Páilɛɛ i Jísu w̃ɔɔningá, i ɣɛ ma, “Aa ɣɛ́ yá lɔ́ yí ngáá Júsuai ti W̃ása Ngwalaí?” Jísu i ngoo yápoteni, i ɣɛ ma, “Ngimɔ́ɔ́ yí ndénga.”

³Ngala sááɣa gula mbélai ti wútuwɔaitii tí faa bíh̃iw̃aa vɛlɛní Jísu wa.

⁴Faalɔ, Páilɛɛ i Jísu w̃ɔɔniní múl̃ɔ, i ɣɛ ma, “Ngoo yapóte ngáá í lá? Faa bíh̃i bih̃ingái sítii tɔ́ lɛɛ tí pɛlɛngá í wá!”

⁵Kɛ́ Jísu aa ngoo yapóte fíli féni. Faalɔ, maa hái i Páilɛɛ gindáá vílini.

⁶I ɣɛi ngáá Páilɛɛ gɛɛ háá vɔ́lɔ ngáá Ngumaawó Kúi wuya sɔ́wɔi fíli má, ná nungáitii tɔ́ɔ́ lokoló pelésina yiláa mba, ɔ́ɔ́ maa w̃ɔ́i gula kpindi vɛlɛ́i wu, í mááhaalo.

⁷Táingi ná h̃úú vá, siỹɛndópo yiláá tɔ́ɔ́ ɣɛ́ ma Balába i ɣɛi kpindi vɛlɛ́i wu taá nungái sítiini ti ɣɛ́i taa lápi ngáá gɔ́mɛtii aáva ti ɣɛ́i náá nungáá vaaní, ti lápii ná h̃u.

⁸Kɛ faŋaí i vaangá, tí ndé Páilɛɛ w̃a ngáá sí kélei áá kɛ ti yɛ, í ta ɣɛ ti yɛ múl̃ɔ.

⁹Kɛ Páilɛɛ i ti w̃ɔ́ɔ́ninga, i ɣɛ ti w̃a, “Wú lóngɔɔ lé ngí Jísu w̃aahaaló lɛ́i í ngáá Júsuai ti W̃ása Ngwalaí?”

¹⁰Sífaa Páilɛɛ i ɣɛi kɔlɔ ngáá kɛ tolomá lɔ í kɛngɔ́ Ngala sááɣa gula mbélai ti wutúwɔaitii ti Jísu lokolevéngɔ ma.

¹¹Kɛ́ Ngala sááɣa gula mbélai ti wutúwɔai tí nungáitii ngú sú báni ngáá tí ndé Páilɛɛ w̃a í bé Balába wa ti yɛ.

¹²Kɛ i ɣɛa ta, “Ndeé lɔ náa ngáá kɛ ngáá nuí síí w̃ɔ́i wáá tolí ngáá Júsuai ti W̃ása Ngwalaí?”

¹³Tí woo gúlani, ti ɣɛ́ ma, “Kpakpá kulɔ́sii w̃a, í ló na í há!”

¹⁴Kɛ Páilɛɛ i ti w̃ɔ́ɔ́ninga, i ɣɛ ti w̃a, “Ndeénii le? Faa ỹɔ́i bɛɛ́ lɔ í kɛ́ngɔ?” Kɛ́ ti mɔ́ɔ́ woo gúlai gbél̃eiŋ, ti ɣɛ́ ma, “Kpakpá kulɔ́sii w̃a!”

¹⁵Páilɛɛ i ɣɛi loní í fáŋai lii lá. Faalɔ, i Balába w̃aahaalóni. Kɛ i ndengá ti Jísu leve ngáá nyɔúngɔ, í tokóleve Lóómingai ti hóyaitii ma ngáá tí kpakpá kulɔ́sii w̃a.

¹⁶Kɛ sóyaitii tí liingá ngáá Jísu gɔ́mɛti nuu walaí vɛ́lɛi la, ti ti mbála hóya bɔsɔwɔngí lóli ỹanda yílaa.

¹⁷Kɛ tí kula biỹángi vúnga Jísu w̃a, tí masa mbɔ́ɔ́lɔi bátɛni ngáá ngali ngáli sapeí, tí njéi ngungí w̃a. Ti ná ɣɛí ngáá tí ngɛ́lɛ gúla su ngáá kɛ laá lɔ í ngáá Júsuai ti W̃ása Ngwalaí.

¹⁸Kɛ tí pɛlɛngá tolíma, tíwaa ɣɛ́ ma, “Í lɛ́ɛ́h̃ui h̃uu ɣɛ gooh̃á, Júsuai ti W̃ása Ngwalaí!”

¹⁹Ti ɣɛ́i taá ngu mbaaléve ndevé ngáá ngulúi, táá laa yɛ́i vú ma, táá hítɛ wumbú ya, táá fɛli.

²⁰Ná ti ɣɛ́i náa viláni ngɛlɛ́ gúlama Jísu h̃u, tí kula biỹángi gúlani ma, tí kpɔ́wɔ bɔ́wɔ gulaí vú ma. Kɛ tí liingá lá ngáá tí kpakpá kulɔ́sii w̃a.

²¹Ná sóyaitii ti ɣɛ́i taa lí ngáá Jísu, ti w̃ɛ́ɛ́ni taa siỹɛndópo yiláá taa ɣɛ́ ma Sáimɔ. I ɣɛi ngáá taí sí h̃uu w̃ɔ́ɔ́ taa naa lolí ngáá Saílini. I ɣɛi áá gúla kpaalaí w̃a, áá va taa walái h̃u. Alɛsáánda ɛ́ɣɛ Lúfɔ ti kɛ́ɛ́ɣɛ i ɣɛi lá. Sóyaitii tí kpáni ma ngáá kule ngáá í lí ngáá Jísu kulɔsíi.

²²Kɛ tí liingá ngáá Jísu ỹandái ta taá naa lolí ngáá Gɔgɔ́ta. Ná wuí wáá ngáá Ngu Kokó Ỹándai.

²³Ná tí fóloi na, tí ndɔí héi na Jísu yaá supungɔ́ ngáá saléi ta taá tóli ngáá mɛ́i, kɛ́ Jísu aa kɛní ɔ́ɔ́ kpɔ́le.

²⁴Kɛ tí kpakpánga kulɔ́sii w̃a, tí falángi yále ngi gúlai w̃a, tí kɔlɛ wɔlɛ́ wa.

²⁵Ti Jísu bakpáni kulɔ́sii w̃a ngele holó h̃úúbamai.

²⁶Faí sí tí pɛlɛní Jísu wa tí kpakpáni faaw̃a aá lɔ ngáá sí tí pɔnɛní kɔlɔí w̃a tí pɛlɛ ngu kɔlɔ́ɔ́ veleí, ti ɣɛ́ ta, “Júsuai ti W̃ása Ngwalaí lɔ ngáá sí.”

²⁷Ti mɔ́ɔ́ ŋuỹá yélaa félengɔ bákpai kulɔsíítii ma. Ngilángi i ɣɛi Jísu yisa h̃u vélei, pekaí i kɔvɔ h̃u vélei. [

²⁸Kɛ sí pɔnɛngɔ́i Ngala Kɔ́lɔi h̃u, aá lɔ náa í hítɛni nga ngáá sí í ɣɛ́i ta, “Tí suuhóuni ngáá mal̃a kula mɔɔ ɣɛ kíli.”]

²⁹Nungái sítii ti ɣɛ́i taa lɔ́ve mbéi Jísu bakpángɔ í ɣɛ́i la na, ti ɣɛ́i taá laa bɛ́ɛ́lu lá, táá suuhaláta ngóitii nde, tíwaa ɣɛ́ ta, “Yɛ́i yí ɣɛ́a yáá vá Hɛ́ɛ́ma Yála Pɛ́lɛi wóloma yí tó volú foló sáángɔ laa lówah̃u,

³⁰kɛ bɔwɔ́ wumááwo ná, yí gula kulɔ́sii w̃a yí hítɛ!”

³¹Ngimɔ́ɔ́ nɔ́ɔ Ngala sááɣa gula mbélai ti wútuwɔaitii ɛ́ɣɛ kaamɔítii Ngala sávai hááw̃a ti ɣɛ́i taá ngɛlɛ́ɛ gúla Jísu h̃u, táá ɣɛ́ ta, “I nungáá vékaitiini maawalónga kɛ́ ɛi hombó ɔ́ɔ́ bɔ́wɔ w̃ááwalo.

³²Bɛlɛ́ ná Ngalángi Lókolo Mba W̃ɔ́i sí í ngáá Ísulɔ yelái ti w̃ása ngwalaí, í gúla kulɔ́sii w̃á í hítɛ. Naá tɔ́ náa ní lá lá.” Sítii kele tɔ tí tí bakpáni taa Jísuni, ti ɣɛ́i taa Jísu yɛɛlí.

³³Ná fóloi í fóloni nuu wú ndííwaa, kpindíi i hitɛní gíli ndɔwɔlɔ́i ná h̃u kínɛi, í lo su kpɔkɔ hólo yakpamái í fólo.

³⁴Ná kpɔkɔ hólo yakpamái í fóloni, Jísu i baíni woo wála h̃ú ti híí woí h̃u, i ɣɛ ta, “Ila, Ila, léma sabahááni?” Ná wúi wáá ngáá, “Ní Yálangi, ní Yálangi, ndéénii le yí kúlanga ndɔ́bɔ?”

³⁵Nungái sítiini tɛingáá tí ɣɛ́i lóóni na, ti Jísu woo ỹɛ́nini, kɛ ti ɣɛ́a ta, “A wolílo lɛ́ɛ. Aá lɔ́ɔ Ngála ndaa háá lé mɔ́i Iláija lolí.”

³⁶Siỹɛ́ ngiláá i liiní ngáá viliỹɛ́, í ŋani tá yéɣe kɛngɔ́ nyɔ́ɔ́h̃u í li í njéi ndɔɔ lábangɔi wu, í ndɛ́bɛ lá límbɔ, í ngíli ngulúi ya, í fé Jísu yaá ngáá í kpɔ́le. Ná í ná ɣɛ́ni, kɛ i ɣɛa ta, “Bé lɛ́ɛ́ mba a mú tɔ ná wɔ́lii Iláija lɔɔ vá í kúla kulɔ́sii w̃a.”

³⁷Jísu i baíni múl̃ɔ woo wála h̃u, kɛ ndii í gúlanga.

³⁸Kɛ kula walái sí í ɣɛ́i hɛ́lɛni Hɛ́ɛ́ma Yála Pɛ́lɛi wú, i wálinga su féle, í séi kɔlɔ́ɔ́ vélei, í fólo kɔwɔ́ yángi.

³⁹Sóya nuu walaí í ɣɛ́i lóóni Jísu gakála. Na í Jísu baí wói ỹɛ́nini ɛ́ɣɛ kíya Jísu lii í gúlani, kɛ i ɣɛa ta, “Tɔɔỹaá kái kái té, siỹɛndópoi sí i ɣɛngɔ ngáá Ngalángi H̃íỹɛndou Loí.”

⁴⁰Nyah̃áitii tɛingáá ti ɣɛ́i lóóni góóh̃a má táa naa belé. Nyah̃ái nátiini su, Mɛɛloí sí í ɣɛ́i ngáá Magadála taí h̃uu w̃ɔ́i i ɣɛi na, ɛ́ɣɛ Jimisíni ngaa Joosɛ́ ti njéé Mɛɛloí. Sálomi bɛ́lɛ i ɣɛi na.

⁴¹Nyah̃ái nátii ti ɣɛ́i hitɛní Jísu volú Galéli, ti ɣɛ́i ngáá Jísu waa bɔ́mba yélaa. Nyah̃aá bíh̃iw̃aa ti ɣɛ́i na ngáá ti ɣɛ́i hitɛní Jísu volú, tí lí Jɛlúsɛl̃ɛ taa walái h̃u.

⁴²Siỹɛndópo yiláá i ɣɛi na, táá ɣɛ́ ma Joosɛ́, i gulaní tái sí h̃u taa naa lolí ngáá Alemátiya. I ɣɛi ngáá Faa H̃úú Haa Lé Mbélaitii ti tá, ngufema í mbɛ, aáva í ɣɛi áá Ngalángi w̃ásandai w̃aalɛ́lɛ. Ná kpindíí í ɣɛ́i áá vɛ́lɛ, i liiní Páilɛɛ yelé ngáá ndiiba, i Jísu vuw̃aí h̃uuhɛ́li ma, sífaa í ɣɛi ngáá Júsuaitii ti Lɛ́ɛ́lɛmbo Ngala Fɛli Fóloi w̃aahéi wó fóloi w̃a.

⁴³

⁴⁴Páilɛɛ gindáá i viliní ná í mɛ́nini ngáá Jísu haangɔ́ɔ́ lé náa. Faalɔ, i Lóómingai ti sóya nuu walaí lólini, í mɔɔní ngáá ná wɔlíí Jísu haangɔ́ áá ɣɛ́ náa lá kíli.

⁴⁵Ná Lóómingai ti sóya nuu walaí í ndéni Páilɛɛ w̃a ngáá kɛ tɔɔỹaá le, Páilɛɛ i Jísu vuw̃aí héni Joosɛ́ yáá.

⁴⁶Joosɛ́ va í kúla wolé pánda yaáni, í Jísu vuw̃ái gúla kulɔ́sii w̃a, í kula wolé pandaí ná yéle mbéle ma, í kpɔ́lu kambái h̃u í ɣɛ́i ngáá kokongí mbɔngɔ́ í ɣɛ́i lá kɔtuí wa. Kɛ i kɔtu walái gilí kílinga, í tíbi kambái la.

⁴⁷Nyah̃ápoi sí tɔ́ɔ́ ɣɛ́ ma Mɛɛloí, Magadála taí h̃uu w̃ɔ́i, ɛ́ɣɛ Joosɛ́ njéé Mɛɛloí, ti ɣɛ́i taá naa belé aáva tí tɔ́ni mbéi ti Jísu bɔluní na.