Read Bandi MÁI 2 Bible Online

MÁI 2 - Bandi bible

MÁI 2

¹Ná kuu félengɔ í gúlani su, Jísu i mɔɔ yangáimani Kapɛ́ɛ́niya taa h̃u. Kɛ nungáitii tí mɛningá ngáá Jísu i vaangá pɛlɛ́i la.

²Faalɔ, nuu bíh̃i bíh̃i tí yátɛni mba ná ngáá ỹandá fíli aa loní. Kóngi bélaa ɣéle tɔ ngitíí ya toow̃aá áá ɣɛi na. Laáva i ɣɛi áá Ngala ngói le ti w̃a.

³Aáva siỹɛngáá lɛingáá ti ɣɛ́i taa vá ngáá mɛŋɛl̃ɛ́ h̃íỹɛndopo yiláá Jísu yelé. I ɣɛi siỹɛngáá nááningɔ yaá.

⁴Kɛ́ ná taá pele fíli sɔ́lɔni tɔɔ́ fólo lá Jísu w̃a kɔwɔ́ato faŋaí wá í ɣɛ́i na, tí pɛ́lɛi gɔmái butáni Jísu w̃aah̃úi kái kái. Ná tí naa butáni, tí mɛŋɛl̃ɛ́ w̃ɔ́i yeɣéni, i lááni sakálangi w̃a, tí njéi Jísu gakála.

⁵Ná Jísu í nungái sítii ti lángi h̃ɔ́ingi lɔ́ni í ɣɛ́i ti h̃u, i ɣɛi mɛŋɛl̃ɛ́ w̃ɔ́i w̃a, “Mu mbálai, í háá ỹɔítii suuhaa í lónga.”

⁶Kaamɔítiini tɛingáá Ngala sávai hááw̃a, ti ɣɛ́i héini na, táa nde gi má, tíwaa ɣɛ́ ta,

⁷“Ndeénii le siỹɛndópoi sí íwaa yɛ́pɛ h̃íí na? Aá lɔ́ɔ tɛɣɛsu gúla ngáá Ngalá. Nuu fíli ɛi faa ỹɔ́u h̃úúhaalo kɛ léi Ngála.”

⁸Ngamá nɔ́ɔ, Jísu i ɣɛi kɔlɔ́ sí ti ɣɛ́i taá gísiya la. Kɛ i ɣɛa ti w̃a, “Ndeénii le wáá gisíya ngáá faí nátiini?

⁹Bɛɛ́ lɔ́ ndendáá áá báni mɛŋɛl̃ɛ́ w̃ɔ́i w̃a, sí nuu áá ɣɛ́ ma, ‘Í háá ỹɔítii suuhaa í lónga’ baa sí nuu áá ɣɛ́ ma, ‘Yooɣé, yí í hákalangi yéɣe yí híya’?”

¹⁰Jísu í mɔ́ɔ́ ɣɛ ti w̃a, “Kɛ́ nyáá ngáá ngákɛ ngáá wú ye ngáá kɛ ngakpá tɔ nuí síí w̃ɔ́i yaá taa ɣɛ́ ma Nuu Búsa Goo H̃ú Lói ngeleí sí wú ngáá í faa ỹɔ́itii suuhaaló.” Faalɔ, i ɣɛi mɛŋɛl̃ɛ́ w̃ɔ́i w̃a,

¹¹“Ngí ndé í w̃a, yooɣé, yí í hákalangi yéɣe, yí lí í vɛ́lɛ la!”

¹²Mɛŋɛl̃ɛ́ w̃ɔ́i i yooɣéni, í ngi hákalangi yeɣé, í híya ti kpɛ́lɛɛ ngááh̃u. Maa hái i ti kpɛ́lɛɛ kíndaa vílini. Faalɔ, tí Ngala tɛ́ni, tíwaa ɣɛ́ ta, “Nápa naá nɛ́ɛ́ sí tá ŋál̃aa lɔní.”

¹³Ná vólu, Jísu i liiní múl̃ɔ njɛí sí la taa tolí ngáá Galéli Yɛ Walaí. Faŋa walá i liiní na ngelé, laáva í pɛ́lɛ ti galámboma.

¹⁴Ná í ɣɛ́i áá lɔ́ve kpóloo, i pava gani kula mɔ́ɔ lɔní, sí í ɣɛ́i ngáá Áfiyɔ h̃iỹɛndou loí tɔ́ɔ́ ɣɛ́ ma Lívai. Lívai i ɣɛi héini pava gula máá ỹandaí. Kɛ Jísu i ɣɛa ma, “Hitɛ pólu!” Kɛ Lívai va i yooɣénga, í hítɛ polú.

¹⁵Ná Jísu í ɣɛ́i áá mɛɛníí ỹɛ Lívai vɛlɛí wu, pava gani kula mbélaa bih̃íw̃aa ɛ́ɣɛ faa ỹɔ́u yélaitii, ti ɣɛ́i taá laaỹɛ́ ỹanda yílaa taa Jísuni ɛ́ɣɛ Jísu volú yélaitii, sífaa tí ɣɛ́i bih̃í ti hítɛni polú.

¹⁶Júsuai sítii taa ɣɛ́ ti w̃a Falósiai tiyɛ́i ti ɣɛ́i ngáá kaamɔítii Ngala sávai hááw̃a, ná tí tɔ́ni Jísuni ngaa pava gani kula mbélaitii ɛ́ɣɛ faa ỹɔ́u yélaitii táá laaỹɛ́ ỹanda yílaa, ti Jísu vólu yeláitii mɔɔniní, ti ɣɛ́ tí w̃a, “Ndeénii le wú káámɔɔ áá báha pava gula mbélaitii ɛ́ɣɛ faa ỹɔu yélaitii mba tíwaa laaỹɛ́ ỹanda yílaa?”

¹⁷Ná Jísu í sí ỹɛ́nini, i ɣɛi ti w̃a, “Sítii ti luwú h̃u wúyangɔ, ti beɣéngɔ ɛi ɣɛ lá salé gúla mɔ́ɔ w̃a, kɛ nɔ́ɔ sítii ti héébɛngɔ, tiyá lɔ ti beɣéngɔ áá ɣɛ́ lá salé gúla mɔ́ɔ́ w̃a. Ngáá vaangɔ́ sítii faaw̃a ti ngáá telembo mbélaa, kɛ́ ngí vaangɔ́ sítii faaw̃a ti ngáa faa ỹɔ́u yélaa.”

¹⁸I ɣɛi ngáá hɔ́wɔ ta, Nguya Wo Mɔ́i Njɔú vólu yélaitii ɛ́ɣɛ Júsuai sítii taa ɣɛ́ ti w̃a Falósiai ti volú yélaitii ti ɣɛ́i taa súngi hóu. Kɛ nungáá lɛ́ingaa tí váánga, ti Jísu w̃ɔɔní, ti ɣɛ́ ma, “Ndeénii le Nguya Wo Mɔ́i Njɔú vólu yélaitii ɛ́ɣɛ Falósiai ti volú yélaitii taa súngi hóu, kɛ́ í vólu yélaitii tɛi sú sóu?”

¹⁹Jísu i ti woo yápoteni, i ɣɛ ti w̃a, “Aa ɣelé kɛ́ náá nyah̃á wɔ́li sótangaitii ti sú sóu ná nyah̃á wɔ́li mɔ́i áá ɣɛ́ ti loow̃á? Tɛi ná ɣɛ́ ná nɔ́ɔ léi áá ɣɛ́ ti loow̃á.

²⁰Kɛ́ táingi lɔɔ vá vaamá taa nyah̃á wɔ́li mɔ́i gúla ti yaá, aáva folói ná lɔ taa súngi hóu.”

²¹Jísu í mɔ́ɔ ɣɛ ti w̃a, “Nuu fíli ɛi jogbo pɔ́lɔ bu pɛ́lɛ ngáá kula lukpú níína. Ná áá ná ɣɛ́, kula niinái aa lɛ́ h̃u, í ỹándaa haɣángɔi ná h̃úú ɣɛ́ wɔ́ɔ́lɔ í lɔ́ve hése keleí wa.

²²Ngimɔ́ɔ́ nɔ́ɔ nuu ɛ́i fuulé ndɔ́ɔ́ níína vu njeé kɔ́lɔ h̃u taá kpatɛ́ ngáá sáni, pɔlɔngɔ́ áá ɣɛ́ la. Ná nuu áá ná ɣɛ, fuulé ndɔ́i aa njeé kɔ́lɔi wáli, aáva ndɔíni ngaa njeé kɔ́lɔ háningi taá ỹááni. Aa pele w̃a. Kɛ́ aá ɣéle, aa fuulé ndɔ́ɔ́ níínai vú njeé kɔ́lɔ háni níínai h̃u.”

²³Ndɛɛlɛmbó Ngála Fɛli Fólo yiláa má, Jísu i ɣɛi áá híya kpaalaí h̃u taá polú yélaitii. Sí singɔ́ í ɣɛ́i la kpaalaí ná h̃u tɔ́ɔ́ tolí ngáá wíítii. Kɛ polú yélaitii tí pɛ́lɛnga ngi wángi gúlama nga, tíwaa mɛ.

²⁴Kɛ Júsuai sítii taa ɣɛ́ ti w̃a Falósiai ti ɣɛ́a Jísu w̃a, “Tɔ lɛ́ɛ. Ndeénii le í vólu yélaitii tíwaa sí ɣɛ́ áá péle w̃a ngáá nuu ɔ́ɔ́ kɛ Ndɛɛlɛmbó Ngála Fɛli Fóloi w̃á?”

²⁵Kɛ Jísu i ti woo yápotenga, i ɣɛ ti w̃a, “Nápa wáá nɛ́ɛ faa gálani kɔwɔ́ato sí wa Masangí Deevé í kɛ́ni ná ndɔlɛí í ɣɛ́i ma taá ngi híya polu yeláitii aáva mɛɛní áá ɣɛ́i ti yaá tɔɔ́ mɛ?

²⁶I lɛɛní Ngala fɛ́li pɛ́lɛi wu, í biléi sí yéɣe í ɣɛ́i ngáá Ngala kɔ́ngi, í mɛ, í tá he ngi híya polu yeláitii ngeyá? Aáva i ɣɛi Ngala sávai h̃ú ngáá kule áá ɣɛ́i nuu fíli má ɔ́ɔ́ biléi ná ỹɛ kɛ léi Ngala sááɣa gula mbélaitii. Ná h̃uu vá Abáyɔtɔ lɔ í ɣɛ́i ngáá Ngala sááɣa gula mbélai ti wutúwɔɔ w̃ɔ́ɔ́ walaí.”

²⁷Jísu woo yápumai, i ɣɛi ta, “Ndɛɛlɛmbó Ngála Fɛli Fóloi bátɛngɔɔ lé nuu búsa hááw̃a, kɛ́ nuu búsai bátɛngɔɔ láá le Ndɛɛlɛmbó Ngála Fɛli Fóloi hááw̃a.

²⁸Faalɔ, nuí síí w̃ɔ́i taa ɣɛ́ ma Nuu Búsa Goo H̃ú Loi aá lɔ ndehé í Ndɛɛlɛmbó Ngála Fɛli Fóloi w̃a.”