Read Bandi MÁI 9 Bible Online

MÁI 9 - Bandi bible

MÁI 9

¹Kɛ Jísu i mɔɔ ɣɛa ti w̃a, “Ngí tɔɔỹái le wú w̃á, wú lɛ́ingaa wú lóóni mbéi, wɔ́i sáa w̃ááhɔlɔ í ló su kpóloo wú Ngalángi yákpa masandaí h̃úú lɔ.”

²Ná foló ngɔ́hitangɔ í gúlani su, Jísu i Pítɛ yéɣeni ɛ́ɣɛ Jimisí ɛ́ɣɛ Njɔú í lí ngáá ti ye ngihé góóh̃a wála wu mba. Naa lɔ tiyá léé léé ti ɣɛ́i na. Naa vá tɔ Jísu w̃aa í lóvini ná ti gakála.

³Ngi gúlaitii ti wóleni fó fó ti wuu áá hólo í lɔ́ve hɛ́mgbɛ wólengi wa.

⁴Kɛ Muuséni ngaa Iláija ti gúlanga ti yaah̃ú tíwaa yɛ́pɛ Jísu yelé.

⁵Kɛ Pítɛ í ɣɛ́a Jísu w̃a, “Kaamɔ́ɔ́, pangɔ́ɔ́ lé a mu haáw̃a ngáá a mu ɣɛ́ mbéinda. Bɛlɛ́ ní kpabá sáángɔ lo, ngilángi aa ɣɛ í hááw̃a, ngilángi i Muusé haaw̃a, ná vólu, ngilángi i Iláija haaw̃a.”

⁶Pítɛ aa ɣɛi kɔlɔ́ sí áá nde bɔw̃álale nduwái i ɣɛi su ngwala taá ngí mbála félengɔitii.

⁷Kɛ njɛ bilíí i vaangá í tí w̃áábɔlu, kɛ ngoí tá i gulangá njɛ bilíí ná h̃u. Ngoí ná i ɣɛi ngáá sí, “Sí lɔ í ngáá ní H̃íỹɛndou Loí ndóngɔ lá. A wolílo ndaa wóó w̃á.”

⁸Ngamá nɔ́ɔ, kɛ Jísu volú yélaa sáángɔi nátiini tí w̃áábelenga kɛ́ taá mɔ́ɔ nuu fíli tɔ́ni kɛ léi Jísu nɔ́ɔ mɔ́ɔ́.

⁹Ná Jísuni ngaa polú yélai nátii ti ɣɛ́i taa híɣe ngihéi wa, Jísu i ti laahíni, i ɣɛ ti w̃a, “Sí wú suulɔngɔ́, a waá nde nuu fíli má í ló su nuí síí w̃ɔ́i taa ɣɛ́ ma Nuu Búsa Goo H̃ú Loí í yóóɣe sái h̃u.”

¹⁰Faalɔ, tí maa hái gɛ́ɛ́lɛni wá, tíwaa yɛ́pɛ ỹɔw̃ɔ́ ỹɔ́w̃ɔ yéle ngáá bɛɛ́ lɔ í ngáá mbuyoɣe saa h̃úi h̃úúgulamai.

¹¹Kɛ ti Jísu w̃ɔɔningá, ti ɣɛ́ ma, “Ndeénii le kaamɔítiini Ngala sávai hááw̃a ti ɣɛ́ kɛ Iláija hése aa va Ngalángi Lókolo Mbá W̃ɔ́i ɔ́ɔ́ ɣɛ́a va?”

¹²Kɛ Jísu i ti woo yápotenga, i ɣɛ ti w̃a, “Tɔɔỹaá hááw̃a, Iláija lɔɔ vá vaamá hése, í ŋanií kpɛ́lɛɛ kɛ́ kíli batɛ́. Kɛ ndeénii lé hɔ́ɔ pɔnɛngɔ́ Ngalá Kɔ́lɔi h̃u ngáá kɛ Nuu Búsa Goo H̃ú Loí í maanɔw̃ɔ́ bih̃íngɔ w̃ááhɔlɔ, ná vólu, ti bééle mba?

¹³Kɛ́ ngí nde wú w̃á, Iláija i vaangá kílii, aáva sí fíli í ti liivóni, tí kpɛ́lɛɛ kɛ́nga lá, kíya nɔ́ɔ pɔnɛngɔ́ Ngala Kɔ́lɔi h̃u kɔwɔ́ato mba.”

¹⁴Ná Jísuni ngaa polú yélaa sáángɔi ti lííni polú yélaa vekaítii ngéle, tí faŋa walá lɔ́ni ɛ́ɣɛ kaamɔítii Ngala sávai hááw̃a ti Jísu volú yélaitii maayelé mbélengɔ, tíwaa ti w̃ááɣaali.

¹⁵Ná nɔ́ɔ léi nungáitii ti Jísu lɔní, i gɔɔlaní tí wa ngwala. Kɛ tí liingá ngáá viliỹɛ́ ngáá ti há ma.

¹⁶Kɛ Jísu i ti w̃ɔ́ɔ́ninga, i ɣɛ ti w̃a, “Ndee w̃ááɣaali lɔ wáá kula ngáá ti ye?”

¹⁷Kɛ siỹɛndópo yiláá í ɣɛ́i faŋaí liiwáá i Jísu woo yápotenga, i ɣɛ ma, “Kaamɔ́ɔ́, ngí váángɔ ngáá ní h̃íỹɛndou loí í yéle. Ỹína nyɔí lɔ í polú. I kɛngá ngáá háwu ɛi bɔɔlɔ́.

¹⁸Ná áá víli su, aa kula ndɔwɔlɔ́i wa, fuuléngi íwaa gúla nda, íwaa laangɔ́lu yá mɛ́, aa ba nɔ́ɔ kpé. Ngí ndéngɔ í vólu yélaitii ma ngáá ti ỹína nyɔí sí léve polú, kɛ́ taá hómbongɔ.”

¹⁹Kɛ Jísu i ɣɛ́a ti w̃a, “Wá, nda tálai lɔ í wú h̃ú sí h̃úú yéteyangi h̃úú yélaitii! Táingi bɛ́ɛ lɔ náa ngáá kɛ wú lííwaa wɔ́ɔ́ ɣɛ́a faí sítii ngátɔ mba? A vá ngáá siỹɛndóu loí ngéle.”

²⁰Kɛ tí vaangá lá ngelé. Ná ỹína nyɔí í ngátɔni ngáá Jísu le, ngamá nɔ́ɔ kɛ ỹína nyɔí ná i mɔɔ kulangá ndɔwɔlɔ́i wa, áá w̃aa gilí kíli, fuuléngi íwaa gúla nda.

²¹Kɛ Jísu i siỹɛndóu loí kɛ́ɛ́ɣɛ w̃ɔ́ɔ́ninga, i ɣɛ ma, “Bele hɔwɔ́ lɔ́ seebɛí sí í vɛ́lɛngɔ mba?” Siỹɛndópoi i Jísu woo yápoteni, i ɣɛ ma, “Í séi ngi lópo gúlo hɔwɔ w̃a.

²²Seebɛí sí aa kula hɔ́wɔ fíli ngɔmbuí ya ɔɔ njɛí wu kɛinɔɔ́ í páa. Kɛ́ ná wɔ́lii yáá hómbo, ni yaah̃ú w̃ááw̃aanu hóu kái, yí bɔ́ ní wa.”

²³Kɛ Jísu i ɣɛa siỹɛndópoi w̃a, “Ndeénii le yáá ɣɛ́ má, ‘Ná wɔ́lii yáá hómbo?’ Nuí áá lá ngáá Ngalá, faa fíli áa na áá bááh̃aa ɣɛ má maa w̃ɔ́i yɛ.”

²⁴Ngamá nɔ́ɔ, kɛ siỹɛndópoi i woo gúlanga gbél̃eiŋ, i ɣɛ ma, “Ndangí lɔ́ sú. Kɛ́ bɔ́ mbá kái ní lángi h̃úú í ɣɛ́ wɔ́ɔ́lɔ.”

²⁵Ná Jísu í tɔ́ni ngáá kɛ faŋaí lɔ́ɔ tí w̃áá laahé, i ndení ỹína nyɔí w̃a, i ɣɛ ma, “Yɛ́i yí ngáá ỹína nyɔí yáá kɛ ngáá háwu nuí wóli h̃úi í hítɛnga, ná vólu, í bááh̃aa bɔɔlɔ́ma, léve siỹɛndóu loí sí volú, kúnafɔ yálaa múl̃ɔ vɛlɛ́ pólu.”

²⁶Ỹína nyɔí i siỹɛndóu loí bɛ́lini ngáá ngakpá, í kɛ́ ngáá háwu ná í bái ngeleya. I levéni náa maa h̃íỹɛndou loí vólu. Siỹɛndóu loí ɣɛ́ kíli gulangɔ́ i ɣɛi nɔ́ɔ lá ngáá nuu háángɔ. Faalɔ, ti bíh̃iw̃aa tí ɣɛ́i ta, “Saangɔ́ɔ́ le.”

²⁷Kɛ́ Jísu i lokolaní maa h̃íỹɛndou lói yáa, í bɔ́ mba, ná í yóóɣe, í lo. Aáva mbalóngɔ i ɣɛi náá la.

²⁸Ná Jísu í lɛ́ɛ́ni pɛlɛ́i wu, kɛ polú yélaitii tí líínga ngelé tiyá léé léé, tí mɔ́ɔ́ni, ti ɣɛ́ ma, “Ndeénii le naa hómbongɔ nɔ́ɔ ỹína nyɔí léve siỹɛndóu loí vólu?”

²⁹Kɛ Jísu i ti woo yápotenga, i ɣɛ ti w̃a, “Kɛ léi Ngala fɛ́lindai áá ỹína nyɔu laalií sí léve nuu vólu.”

³⁰Kɛ Jísuni ngaa polú yélaitii ti gúlanga náá wa tí lí, ti lɔ́ve Galéli lataí h̃u. Jísu aa ɣɛi loí nuu fíli ɔ́ɔ́ ɣɛ́ kɔ́lɔ mbéi tí ɣɛ́i na,

³¹bɔw̃álale i ɣɛi áá vólu yélaitii kalámbo. I ɣɛi áá ɣɛ́ ti w̃a, “Tiyá lɔ́ɔ́ va nuí síí w̃ɔ́i taa ɣɛ́ ma Nuu Búsa Goo H̃ú Loí lokolevéma nungáá w̃a, aáva tiyá lɔ́ɔ va paamá. Kɛ́ ná fólo félengɔ áá gúla su sawa kélei w̃a, aa yooɣé sái h̃u.”

³²Kɛ́ sí Jísu í ndéni polú yélai taá ɣɛ́i ngatɔ́ni mba aáva tíwaa lúwa ngáá tí mɔɔní kɔwɔ́ato mba.

³³Kɛ Jísuni ngaa polú yélaitii tí fólonga Kapɛ́ɛ́niya taa h̃u. Ná í ɣɛ́i pɛlɛ́i wu, kɛ i ti w̃ɔ́ɔ́ninga, i ɣɛ ti w̃a, “Ndee w̃ááɣaali lɔ wú ɣɛ́ngɔ wáá kula peleí h̃u?”

³⁴Kɛ́ taá ta fíli ndéni, bɔw̃álale ti ɣɛ́i taá ỹɔw̃ɔ́ ỹɔ́w̃ɔ w̃aaɣaalí peleí h̃u ngáá ele lɔ í ngáá ngakpa mɔ́ɔ́ walaí tí h̃u.

³⁵Kɛ Jísu i heingá í tí lolí, i ɣɛ ti w̃a, “Ná wú tá fíli áá ɣɛ́ lói í ɣɛ́ ngáá ngakpa mɔ́ɔ́ wala wú lííwaa, kɛ maa w̃ɔ́i aa bɔwɔ́ wu nga njéi, í ɣɛ́ ngáá mɔl̃ɛ́ w̃ɔ́i wú kpɛ́lɛɛ fááw̃a.”

³⁶Kɛ Jísu i ndopo gúlo houngá toko wa í váa lá, í to ti liiwáá, í ngeɣé, í séi loko h̃u, i ɣɛ ti w̃a,

³⁷“Nuí fíli áá ló ngáá ngé aáva í lókohei ndopo gúlo laalií sí tá yiláá kéle tɔ mbu ndongí hááw̃a í su ngáá ngé, kɛ maa w̃ɔ́i i lokohéinga mbú. Nuí fíli pá áá lokohéi mbú, kɛ nyá láá le nɔ́ɔ ɔ́ɔ́ ɣɛ́ lokohéni mbú, kɛ́ Ngalá lɛ́i í tɔ́vengɔ laá lɔ áá ɣɛ́ lokohéini mbu.”

³⁸Jísu volú w̃ɔ́i sí taa ɣɛ́ ma Njɔú i yɛpɛní, i ɣɛ Jísu w̃a, “Kaamɔ́ɔ́, ní siỹɛ ndópo yiláá tɔ́ngɔ íwaa ỹína nyɔítii téve nungáitii polú í lááheingi h̃u. Kɛ́ ní ndéngɔ ma ngáá í bé ná wa sífaa aa ngáá a mu ta.”

³⁹Kɛ Jísu i ɣɛa ta, “A waá ndé ma ngáá í bé ná wa. Nuu fíli ɛi káámaa haa ɣɛ ndááheingi h̃u, maa w̃ɔ́i ɔ́ɔ́ ló na ɔ́ɔ́ ngoo ỹɔ́u le kɔwɔ́ato mbá.

⁴⁰Sífaa nuí fíli ɛ́i ɣɛ́ hílini ngáá mu ye, kɛ aá lɔ a mu hááw̃a.”

⁴¹Jísu í mɔ́ɔ ɣɛ ti w̃a, “Ngí tɔɔỹái le wú w̃á, nuí fíli áá kpɔle yɛ́ lɛ́ingɔ hé wú yɛ́ sífaa wú ngáá pólu yélaa, kɛ maa w̃ɔ́i í kulasuunúma w̃aahɔ́lɔ.”

⁴²Kɛ Jísu i mɔɔ ɣɛa ta, “Sítii ti langɔ́ ngáá ngé, í li bɛ́lɛ í to ndopo gúlo gulóaitii mba, nuí fíli áá kɛ ngáá háwu ti tá yílaa í faa ỹɔ́u ɣɛ, maa ɔ́ɔ́ ɣɛ́ nɛ́ɛ́ni tí ndólo wɔtú wála yili maa w̃ɔ́i woló wá, tí píli yívoi wu, í ló mbu.

⁴³Faalɔ, ná í lókoi áá kɛ ngáá háwu yí faa ỹɔ́u ɣɛ, tevé mbá, yí pilí. Maanɛ́ɛ́ngɔɔ lé yí víli kúnafɔ lɛ́ɛ́h̃ui h̃u ngáá nɔɔnɔ, í lɔ́ve sí wa í lúwui yafɔ́ningɔ áá ló aáva yí li njahááma wɔ́mbui h̃u ɛ́i há kúnafɔ. [

⁴⁴‘Kpelií ɛ́i há kúnafɔ naa lɔ áá nungái mɛ na. Ngɔmbuí va áá tí w̃ɔ ɛi ha kúnafɔ.’]

⁴⁵Ná vólu, ná í gɔ́wɔ yílaangi áá kɛ ngáá háwu yí faa ỹɔ́u ɣɛ, tevé mba, yí pilí. Maanɛ́ɛ́ngɔɔ lé yí víli kúnafɔ lɛ́ɛ́h̃ui h̃u ngáá nɔɔnɔ, í lɔ́ve sí wa í yafɔ́ningɔ áá ló aáva Ngalá ngi í lɔ́ve njahááma, mbéi [

⁴⁶‘Kpelií ɛ́i há kúnafɔ áá nungái mɛ í na. Ngɔmbuí vá áá tí w̃ɔ ɛ́i ha kúnafɔ.’]”

⁴⁷Jísu í mɔ́ɔ́ ɣɛ ti w̃a, “Ná í yááh̃ui áá kɛ ngáá háwu yí faa ỹɔ́u ɣɛ, kulá na, yí pilí. Maanɛ́ɛ́ngɔɔ lé yí wála Ngalángi w̃ásandai wu ngáá í yááh̃u yílaangi ɛ́i ɣɛ́ na í lɔ́ve sí wá í yáfɔningɔ áá ló aáva Ngalá ngí í lɔ́ve njahááma,

⁴⁸mbéi ‘Kpelií ɛ́i há kúnafɔ áá núngai mɛ í na. Ngɔmbuí va áá tí w̃ɔ ɛi ha kúnafɔ.’

⁴⁹Sífaa ngɔmbuí lɔɔ vá vúma nuu kpɛ́lɛɛ ma kíya nuu áá kpoloí vu mɛɛníí wa.”

⁵⁰Jísu í mɔ́ɔ́ ɣɛ ta, “Kpoloí lɔ́ ngáá ngangímba gɔ́li, kɛ́ ná ngi yéelei áá gúla mba, aa ɣéle kɛ́ náá áá mɔ́ɔ ɣɛ yeelení? Wú mbála lopolái í ɣɛ́ ngáá kpolo ɣɛ kíli wú lówah̃u, wú ɣɛ́ ndííhei h̃u ngáá ỹɔw̃ɔ́ ỹɔ́w̃ɔ.”