Read Bandi LÚU 10 Bible Online

LÚU 10 - Bandi bible

LÚU 10

¹Ná sí í gúlani su, Ndemɔí Jísu i lokoloní nuu vúú ngɔ́felangɔ maah̃úú félengɔ vékaa wa, í tí lɔ́ve wutúwɔ ngáá felé féle taa fíli su ɛ́ɣɛ ỹandá fíli í ɣɛ́i náa áá va liimá na.

²Tɔɔ ɣɛ́ p̃ɛ́ɛ́ ti lí i ndení tí w̃a, i ɣɛ ta, “Sii hií ŋáni hítingɔi h̃úú wɔ́ɔ́lɔngɔɔ lé kɛ́ kula mbélaitii taá bíh̃i. Faalɔ, a Ndemɔí Ngalá mɔ́ɔ́ni lɛ́i ngi ndá í ngáá sii hií ŋáni í kula mbélaa lɔve ngi báálai h̃u sitingɔ́ náa.

³A lí, nyáá ngáá wú lɔ́ve kíya nɔ́ɔ mbaalaní taa ɣɛ́ na fulá húwaa liiwáá.

⁴A waá kaní ngándɔɔlɔ nyááka yeɣé kɛlaa wɔ́ɔ́ síya bɛ́bɛ ngéɣe kɛlaa wɔ́ɔ́ kɔɔva vekáá yeɣé. Nuu álaa víli wú gɔ́wɔ h̃u ngáá njɛpɛ h̃úúgooh̃a peleí h̃u.

⁵Ná wáá lɛ́ pɛlɛ́ fíli mbú, a ɣɛ́ ta hése, ‘Ngalángi hɛ́ɛ́ i ɣɛ pɛlɛ́i sí w̃a.’

⁶Ná nuu fíli áá ɣɛ́ na áá lókohei sɛí ná wu, aa w̃ɔ́ maa w̃ɔ́i w̃a. Kɛ́ ná nuu fíli ɛ́i ɣɛ́ na ɔ́ɔ́ lókohei sɛí ná wu, maa hɛ́i aa yangáima wú w̃a.

⁷A ló pɛlɛ́i ná wu, mɛɛní fíli taá fe wú yáa, wú mɛ. Kpɔle wɔlíngi fíli taá fe wú yaa, wú kpɔ́le. Sífaa kɛ ngenge mɔ́i í ngi pávai w̃aahɔ́lɔ. Wálaa ỹiiw̃áá w̃aalóvi taa yílaangi h̃u.”

⁸“Ná wáá lɛ taa fíli su, laáva tí lokohéi wú wú, sí fíli taá séi wú gákala mɛɛní h̃u a mɛ.

⁹A seebɛ yelái sítii mbaló taa ɣɛ́ na, wú ndé nungáitii ma, wú ɣɛ ta, ‘Ngalángi w̃ásandai bɛ́ɛ́ngɔɔ lé náa wú wa.’

¹⁰Kɛ́ ná wáá lɛ́ taa fíli su aáva tɛ́i ɣɛ lokohéini wú wú, a lí wú ló ti lái liiwáá wú ɣɛ́ ta,

¹¹‘Wú lái h̃uu húfulengi géle tɔ í bángɔ ni gɔwɔ́i ya, ní kpɛ́kpɛlɛngɔ nga, ngáá wú ɣɛ́ kɔlɔ́ ngáá kɛ wú ndái aa pele w̃a. Kɛ́ ná fíli su, a giséi sí w̃a ngáá kɛ Ngalángi w̃ásandai bɛ́ɛ́ngɔɔ lé náa wú wa.’ ”

¹²Jísu í mɔ́ɔ ɣɛ ti w̃a, “Nyá lɔ́ɔ nde wú w̃a ngáá kɛ suu áá ɣɛ́ ỹɔ́u maa lái h̃uu yélai ma í lɔ́ve Sɔ́dɔu taí h̃u yélai mba Ngalángi gɔ́sɔ foloí w̃a.”

¹³Jísu í mɔ́ɔ ɣɛ ta, “Wɛ́i wú taí sítii su taá naitii tolí ngáá Kɔ́lasi ɛ́ɣɛ Bɛsééda, suu lɔɔ vá ɣɛ́ma ỹɔ́u wú w̃a ngwala. Sífaa káámaa haí sítiini ngí tí ɣɛ́ngɔ wú yááh̃u w̃a kɛbei ngí ɣɛ́i kɛní taí sítiini su taá naitii tolí ngáá Táya ɛ́ɣɛ Sáidɔ, bele wɔ́lɔ kpɔ́lɔɔ naa yélaitii tí w̃ááyilinga ngáá kúlai kpatɛngɔ ngáá njée kpélengi ngáá ɔ́ɔ́ ngákɛ ngáá kɛ ti w̃aaw̃áánungɔɔ lé ngwala tí háá ỹɔítii faaw̃a, tí volú yáfe ti wa lííwaa wála.

¹⁴Kɛ́ suu lɔɔ vá ɣɛ́ma ỹɔu wú w̃a í lɔ́ve sítii mba ti ɣɛ́i Táyani ngaa Sɔ́dɔu Ngalángi gɔ́sɔ foloí w̃a.

¹⁵Wɛ́i vangí wú ngáá Kapɛ́ɛ́niya taa h̃u yélaitiini, aa lɔ wú gí ma wú wú nga tɔ́ɔ́ yóóɣe í lɛ́ í to ngeleí wa? Kpéle, wú wú nga tɔ́ɔ́ yeí ndɔwɔlɔ́i wa fáli.”

¹⁶Jísu í mɔ́ɔ ɣɛi volú yélaitii ma, “Nuí fíli áá wolílo wú láá woo w̃a, kɛ i wolílonga ndáá woo w̃a. Nuí va áá léle wú wa, kɛ i lelengá mbá. Nuí fíli pá áá léle mbá, kɛ i lelengá nuí síí w̃ɔ́i wa í tɔ́vengɔ.”

¹⁷Nuu vúú ngɔ́felangɔ maah̃úú félengɔitii tí yángaimani ngáá kooh̃unɛ́ɛ́ wála. Kɛ ti ɣɛ́a Jísu w̃a, “Kaamɔ́ɔ́, ỹína nyɔítiini kele tɔ tí gólongɔ ni yɛ ná nɔ́ɔ́ yɛ́pɛ ti yelé í lááheingi h̃u.”

¹⁸Kɛ Jísu i ti woo yápotenga, i ɣɛ ti w̃a, “Ngí Setána lɔngɔ́ í híɣe ngelegóóh̃u, í gúla ndɔwɔlɔ́i wa kíya nɔ́ɔ ngele míỹa miỹa ngí na.

¹⁹Ngí ngakpá fénga wú yáá ngáá wú gɔwɔ́ ló kaali hulá húlangaitii ɛ́ɣɛ nyakúgaaliaitii ma. Ná vólu, wú yákpangi í lɔ́ve wú wáá hílima w̃ɔ́i Setána ndái wa. Ŋani fíli ɛi ỹanda héi wú wa.

²⁰Kɛ́ ná fíli su, a waá gooh̃unɛ́ɛ ngáá sífaa sí fíli wáá nde ỹína nyɔítii ma taá kɛ. Kɛ́ wá ɣéle, a gooh̃unɛ́ɛ sífaa wá lɔ́ náá kpaɣaí sí h̃u nungái sítii ndiiwáá táá ɣɛ́ ngelegóóh̃u.”

²¹Taíngi ná h̃u kái kái pa, Jísu lií h̃uulaahéngɔ i ɣɛi lá ngáá ndiilɛí Hɛ́ɛ́ma Ỹínangi yákpangi h̃u. Kɛ i ɣɛa ta, “Kɛɛɣɛ́ Ngála, yɛ́i yí ngáá Ndemɔí faa kpɛ́lɛɛ mááh̃u ngelewu, ngí sɛ́ɣɛɛ gula í w̃a bɔw̃álale yí fái sítii ndɔɔwungá nungái sítii mba ti gí máá gúlangɔ ɛ́ɣɛ sítiini tí faa gálangɔ, kɛ́ yí ngakɛ́ngɔ kpál̃au ngáá sítii taá faa gálangɔ. Tɔɔỹaá le, Kɛɛɣɛ́ Ngalá, aá lɔ ngáá í líívo fáa aáva í í góóh̃unɛɛngɔ ngáá yí fái sítii kɛ h̃íí na.”

²²Jísu i mɔ́ɔ ɣɛ ta, “Ní Kɛ́ɛ́ɣɛ i ŋani kpɛ́lɛɛ fénga ngéya. Nuú fíli pá aa Ngalángi H̃íỹɛndou Loí wɔ́lɔ kɛ léi Kɛɛɣɛí. Nuu fíli pa aa Kɛɛɣɛí wɔ́lɔ kɛ léi ngi H̃íỹɛndou Loí ɛ́ɣɛ sítiini ngi H̃íỹɛndou Loí áá lókolo ti wa ngáá í Kɛɛɣɛí Ngalá kɛ ngáá ti ye kpál̃au.”

²³Kɛ Jísu i votengá volú yélaitiini mba ná ti w̃áágelesangɔ í ɣɛ́i la i ɣɛ ti w̃a, “Ngí tɔɔỹái le wú w̃a, aá lɔ́ ngáá faa vánda wú hááw̃a wɛ́i waa fái sítii tɔ, wú ngátɔ mba. Sífaa Ngalá ndaa háá lé mbélaa bih̃íw̃aa ɛ́ɣɛ masa ngwála wálaitii ti ɣɛ́i loní tí fái sítiini tɔ wú wáa ti lɔ, kɛ́ taá ti lɔní. Ná vólu, tí ɣɛ́i loní tí fái sítiini mɛni, wúwaa ti ỹɛ́ni, kɛ́ taá ti ỹɛ́nini.”

²⁴

²⁵I ɣɛi ngáá folo yílaa, kɛ kaamɔí ta Ngala sávai hááw̃a i yooɣénga ngáá í Jísu h̃uugɔvɔ́. Faalɔ, i mɔɔniní, i ɣɛ ma, “Kaamɔ́ɔ́, ndeé lɔ́ kule í má ngí kɛ ngɔ́ɔ́ ɣɛ́a kúnafɔ lɛ́ɛ́h̃ui w̃aahɔ́lɔ?”

²⁶Kɛ Jísu i ngoo yápotenga, i ɣɛ ma, “Bɛɛ́ lɔ pɔnɛngɔ́ Ngalángi hávai h̃u? Yáá ɣéle suu haa lé?”

²⁷Kaamɔí ná Ngala sávai hááw̃a i Jísu woo yápoteni, i ɣɛ ma, “ ‘Kɛ yí ló ngáá Ndemɔí í Yálangi ngáá í líi kpɛ́lɛɛ ɛ́ɣɛ í lɛ́ɛ́h̃ui kpɛ́lɛɛ ɛ́ɣɛ gí mái kpɛ́lɛɛ í lɔ́ve ŋani kpɛ́lɛɛ mbá í lóngɔ áá ɣɛ́ lá la.’ Ná vólu, ‘Yí ló ngáá í mbála nuú búsaitii kíya í lóngɔ ngáá bɔwɔ́.’ ”

²⁸Kɛ Jísu i ngoo yápotenga, i ɣɛ ma, “Yí mɔ́ɔ́ningi yápotenga ngáá pangɔ́ ɛ́ɣɛ ngáá tɔɔỹaá. Sítii kɛ aáva yáá kúnafɔ lɛ́ɛ́h̃ui w̃aahɔ́lɔ.”

²⁹Kɛ́ siỹɛndópoi ná i ɣɛi loí í lɔwɔ́ yákpatɛ. Faalɔ, i Jísu w̃ɔɔniní múl̃ɔ, i ɣɛ ma, “Elení tɔ ti ngáá ní mbála nuú búsaitii yí tí w̃a?”

³⁰Kɛ Jísu í faanɛ́ɛ́ngi sí héinga mbɛ, i ɣɛ ma, “Siỹɛndópo yiláá tɔ́ í ɣɛ́i na, i gulaní Jɛlúsɛl̃ɛ áá li Jɛlóko taa h̃u. Ŋuỹá yélaitii tí souní peleí h̃u, tí ngi gúlaitii kulá ma, tí ndéve, tí ndo na saangɔ́ vóto, tí li.

³¹Kɛ i bɛngá má ngáá Ngala sááɣa gula mɔ́ɔ́ yiláá íwaa lí nɔ́ɔ ngáá peleí ná jɔ́. Ná í siỹɛndópoi ná lɔní lááni, i peleí léveni kaká vékai w̃a, í lɔ́ve ma.

³²Ngimɔ́ɔ́ nɔ́ɔ jɔ́ siỹɛndópo yiláá i ɣɛ́i áá yénge Hɛ́ɛ́ma Yála Pɛ́lɛi wu í kɛ́ni. Ná í folóni maa ỹándai i siỹɛndópoi ná lɔní lááni, laá bɛ́lɛ i peleí levéni kaká vékai w̃a, í lɔ́ve ma.

³³Ná ná í gúlani su, nungái sítiini taa ɣɛ́ ti w̃a Samááliyangaitii ti tá yílaa i ɣɛi siya sú peleí ná w̃a. Kɛ́ ná í folóni siỹɛndópoi ná w̃a, i tɔní, maaw̃áánu í sou.

³⁴Faalɔ i liiní ngelé, í sále vu ngi válai ya, í ngá ngíli. Kɛ i ngeɣénga, í sei bɔwɔ́ hoohaalengí gɔ́ma, í lii lá sóta pɛ́lɛi wu, í maah̃ú béle.

³⁵Foló vékai w̃a, i kaní tɛ́ingaa gulaní kpɔ́wɔ yihɛí h̃u, í fé sotá pɛ́lɛ w̃ááh̃u belé mɔ́i yaá, i ɣɛ ma, ‘Siỹɛndópoi sí w̃aah̃ú belé, ná vólu, ná yáá kani péka fíli máá híya faaw̃a, ná ngáá ɣɛ́ yangáimani, ngáá í ndái he í yáa volú.’ ”

³⁶Kɛ Jísu i ɣɛa ma, “Nuu sáángɔi sítii su í gí má, ele lɔ í ɣɛ́i ngáá siỹɛndópoi ná ŋuỹá yélaitii tí ndéveni ngi mbála?”

³⁷Kaamɔí ná Ngala sávai hááw̃a i Jísu woo yápoteni, i ɣɛ ma, “Nuí sí í siỹɛndópoi ná yaah̃ú w̃ááw̃aanu hóuni.” Kɛ Jísu i ndengá ma, i ɣɛ ma, “Lí, yá bɛ́lɛ nɔ́ í híya veléi í ɣɛ́ vaí kíya siỹɛndópoi náa ndái í na.”

³⁸Ná Jísuni ngaa polú yélaitii ti ɣɛ́i peleí h̃u táá li, tí folóni taa yílaa su mbéi nyah̃ápo yiláá í na taa ɣɛ ma Mááta. I ndení Jísu w̃a ngáá í laayéi kɔwɔ́ w̃a.

³⁹Nyah̃ápoi sí ngi ndéɣei i na taa ɣɛ́ ma Mɛɛloí. Ná Ndemɔí Jísu í ɣɛ́i áá kalambongí wo, Mɛɛloí í ɣɛ́i héini kɔwɔ́ wú, íwaa wolílo ma.

⁴⁰Kɛ́ Mááta yááh̃u aa ɣɛi na kɔwɔ́ato kpombengí wa nga kpíh̃ingɔ í ɣɛ́i la ngeyá mɛɛníi ɣɛ kíli batɛ́ fááw̃a. Faalɔ, i liiní Jísu yelé, í mɔ́ɔ́ni, i ɣɛ ma, “Kɛɛɣɛ́, yáá béɣei ngáá kɛ ní ndéɣe i ndónga kpombengí ya ngílangɔ kpé, í va mbéinda? Nde ma í bɔ́ mbá!”

⁴¹Ndemɔí Jísu i Mááta wóó yápoteni, i ɣɛ ma, “Mááta, í lííhɛlɛngɔɔ lé, ná vólu, í ɣɛ́ngɔ wu nga wúúlee ngáá faa bíh̃iw̃aa.

⁴²Kɛ́ fái i yíla nɔ́ɔ kpé kule í ma í ɣɛ. Sí vá í ngáá fái sí kule í ma í ɣɛ́ aá lɔ Mɛɛloí í ngeɣénga aáva nuu fíli ɛi kulá ngeyá.”