Read Bandi LÚU 14 Bible Online

LÚU 14 - Bandi bible

LÚU 14

¹Júsuai ti Lɛ́ɛ́lɛmbo Ngála Fɛli Fólo yiláá má, Júsuai sítii taa ɣɛ́ ti w̃a Falósiai ti tá yiláá í ɣɛ́i ngáá nuu wála, i Jísu lolíni ngi vɛ́lɛi la ngáá tí laaỹɛ́ ỹanda yílaa. Kɛ́ nungái sítii pa ti ɣɛ́i na, ti ɣɛ́i taa Jísu ya sɔ́bɛ ngáá pangɔ́.

²Siỹɛndópo yiláá pá i ɣɛi lói Jísu gakála fe fé séébɛi i mba.

³Kɛ Jísu i Falósiaitii mɔɔningá ɛ́ɣɛ kaamɔítiini Ngala sávai hááw̃a, i ɣɛ ti w̃a, “Aa lɔ́ pele w̃a savaí h̃u ngáá nuu í nuu wálo Ndɛɛlɛmbó Ngála Fɛli Fóloi w̃á baa aa pele w̃a?”

⁴Kɛ́ ti tá fíli taá bɔɔlɔ́ni. Jísu va i siỹɛndópoi ná hóuni í mbaló í bé mba ná í li.

⁵Kɛ Jísu i mɔɔ ti w̃ɔ́ɔ́ninga, i ɣɛ ti w̃a, “Na ndoú ɔɔ nika ɔ́ɔ́ ɣɛ́ wú tá yáa, í víli njɛlowá wu Ndɛɛlɛmbó Ngála Fɛli Fóloi w̃a, maa w̃ɔ́i ɛi kulá ná ngamá?”

⁶Kɛ́ faa fíli aa ɣɛi ti la tɔɔ́ nde.

⁷Ná Jísu í ngátɔni mba ngáá kɛ nungáitii ti ɣɛ́i héi ngufema ỹándaitii, faanɛ́ɛ́ngi sí lɔ í séini tí yɛ.

⁸I ɣɛi ti w̃a, “Ná nuu áá í lóli nyah̃á wɔlí kúú w̃a, yaa héi ngufema ỹánda bɔwɔ́ yɛ. Sífaa nuí sí tɔvengɔ́ áá ɣɛ́ la í wá, tɛingaa taá ɣɛ́ tolíni laá bɛ́lɛ.

⁹Ná ná áá ɣɛ́, sota kɛɛɣɛí áá ɣɛ́ wú héi h̃u félengɔ lolíni, aa va i ɣɛ í w̃á, ‘Mu mbálai, í bɔ́kpɔngi hé siỹɛndópoi sí yaá.’ Kɛ yáa vá i wúfengɔ aa ɣɛ náa lá ngáá yí héi ngufema lála ỹándai.

¹⁰Kɛ́ ná nuu áá ɣɛ́ í lolíni ỹánda, héi ngufema lála ỹándai, kɛinɔɔ́ na maa w̃ɔ́i aa vá, áá ɣɛ í w̃á, ‘Mu mbálai gula míl̃anda, yí lɛ́ seiw̃áa vándai.’ Kɛ ngufema vá mil̃á áá ɣɛ́ héni í yɛ́ í mbála hotángaitii kpɛ́lɛɛ ngaah̃ú.

¹¹Sífaa nuí fíli áá bɔ́wɔ haa lɛ́nga Ngalá ngáá ngu nga njéi, kɛ́ nuí áá bɔ́wɔ wu nganjéi Ngalá ngáá ngu mbúyoɣe.”

¹²Kɛ Jísu i ɣɛa siỹɛndópoi sí w̃a í ɣɛ́i tolíni, “Ná yáá mɛɛni wála yilí ngáá yí nungáá lolí ma, yaa í mbálangaitii tolí ná, yaa í ndéɣeaitii tolí na, yaa í létɔaitii tolí na kɛlaa í mbála batɛ́ yélaitii wú kovíi h̃ú wáá tiyéni. Ná yáa ná ɣɛ, tɛingaa tiyá bɛ́lɛ taa í lóli tá w̃a aáva í háa bɔwɔí h̃uulóóngɔ aa ɣɛ ngáá ná.

¹³Kɛ́ ná yáá mɛɛni wála yilí ngáá yí nungáá lolí ma, nyaani yélaitii tolí, yí nɔɔnɔ yélaitii tolí, yí mɛŋɛl̃ɛ́ yélaitii tolí ɛ́ɣɛ mbole yeláitiini.

¹⁴Aáva aa ɣɛ ngáá faa vánda í háaw̃a. Kíya bɛ́lɛ tɛi hómbo tɔɔ́ suulóo, suu áá lóo í w̃á ná sítii ti ngáá telembo mbélaa Ngalá ngaah̃ú taa yóóɣe sái h̃u.”

¹⁵Sítii ti ɣɛ́i héini táa Jísuni mɛɛní ỹɛmái ná ti tá yílaa í ngoí sí ỹɛ́nini, kɛ i ɣɛa Jísu w̃a, “Aa lɔ ngáá faa vánda nuí sí hááw̃a áá vá mɛɛní ỹɛmá kooh̃unɛ́ɛ́ lááỹɛ mbomái Ngalángi w̃ásandai h̃u.”

¹⁶Kɛ Jísu i faanɛ́ɛ́ngi sí héinga, i ɣɛ ta, “Siỹɛndópo yiláá tɔ́ í ɣɛ́i na, i ɣɛi áá mɛɛni wála ɣɛ kíli batɛ́ kooh̃unɛ́ɛ́ lááỹɛ mbo fááw̃a aáva i woo vílini nuu bíh̃iw̃aa yelé ngáá ti vá na.

¹⁷Ná mɛɛníí ná ỹɛ táingi í folóni ma, i ngi bɔ́ilopoi ta yiláá tɔ́veni sítiini ngelé í ɣɛ́i woo vílini ti yelé ngáá í ndé ti w̃a, i ɣɛ ta, ‘A váa náá, mɛɛníí kpɛ́lɛɛ kɛ kíli batɛngɔ́ɔ́ lé náa.’

¹⁸Kɛ́ ti yilá ngíla kpɛ́lɛɛ tí pɛlɛní wooh̃úgulama. Hésendaa w̃ɔí i ɣɛi ta, ‘Ngí kpáála yaánga nɔ́ɔ h̃íí féyaa, kɛ ngí li ngí tɔ, faalɔ, nde í káámɔɔ w̃a ngáá í hakɛ́to mbɛ́ kái.’

¹⁹Féle kélei bɛ́lɛ nɔ́ i ɣɛ ta, ‘Ngí nika púúngɔ yaánga nɔ́ɔ h̃íí féyaa, aáva nyá lɔ́ náa pele h̃u ngáá ngí lí ngí tí hɔ́bɛ, faalɔ, nde í káámɔɔ w̃a ngáá í hakɛ́to mbɛ́ kái.’

²⁰Ti háwa kélei bɛ́lɛ i ɣɛ ta, ‘Ngí ní héi ỹah̃ái wɔlínga nɔ́ɔ h̃íi féyaa, faalɔ, ngɛ́i vá.’

²¹Kɛ bɔ́ilopoi ná i yangáimanga aáva sí kpɛ́lɛɛ í híyani í súú ɣɛ ngáá ngi núu walaí. Kɛ ngi núu walaí ná i luungá í ndé ngi bɔ́ilopoi ná w̃a, i ɣɛ ma, ‘Lí fála fala ngití walaitii nga ɛ́ɣɛ kovíítii su yí ndé nyaani yélaitii ma ɛ́ɣɛ nɔɔnɔ yelaítii ma ɛ́ɣɛ mbole yeláitii ma ɛ́ɣɛ mɛŋɛl̃ɛ́ yélaitii ma ngáá ti vá.’

²²Ná bɔ́ilopoi ná í yangáimani, kɛ i ɣɛa ngí núu walaí w̃a, ‘Kawalái, sí yí ndengɔ́ má ngí kɛngá, kɛ́ seiw̃áa bih̃íw̃aa lɔ nɛ́nɛ na nungáá taá na.’

²³Kɛ ngi núu walaí í ɣɛa ma, ‘Lí pele walá wálaitii ma ɛ́ɣɛ ndɔbɔ veléitii ma yí kpá nungáitii ma ngáá kule ti vá kɛinɔɔ́ ní vɛ́lɛi wuu laa í hé.

²⁴Ngí nde í w̃á, sítiini ngí ɣɛ́ngɔ ɣɛi ti lolíni hése, ti tá yiláá kéle tɔ ɛi hitɛ ní ỹɛ́ɛni sí tá ya!’ ”

²⁵Faŋa walá i ɣɛi Jísu volú táá lí, kɛ i voteá tí wa i ɣɛ ti w̃a.

²⁶“Nuu fíli ɛ́i va ngéle ɔ́ɔ́ ɣɛ́ ngáá pólu w̃ɔ́ɔ́ kɛ léi maa w̃ɔ́i í gísiɣe ngi kɛ́ɛ́ɣɛni ngaa ngi njéé volú, ɛ́ɣɛ ngi ỹáh̃ani ngaa ngi léngaitii, ɛ́ɣɛ ngi ndéɣeni ngaa ngi ndíyangaitii ɛ́ɣɛ ngi héélaitii. Ná vólu, í gísiɣe bɔwɔ́ lɛɛh̃úi gele tɔ polú. Kɛ́ ná láá lé, ɛi ɣɛ ngáá pólu w̃ɔ́ɔ.

²⁷Aáva nuí fíli ɛ́i ɣɛ́ w̃aahéi wóni ngáá ɔ́ɔ́ ha fááw̃a, ɔ́ɔ́ í hítɛ pólu, ɛi ɣɛ ngáá pólu w̃ɔ́ɔ.”

²⁸Jísu í mɔ́ɔ ɣɛ ta, “Ná náa wú tá yílaa áá ɣɛ́ lói í pɛlɛ́ ló, maa w̃ɔ́i ɛi hei ɔ́ɔ́ ngakúla mba í tɔ ná wɔ́li naholó lɔ́ ngeyá ngáá áá kulaɣɛ pɛlɛ́i ná lo fááw̃a?

²⁹Sífaa ná áá pɛlɛí hítɛ í baah̃áa ngukúla má, sítii kínɛi taá tɔ, taá ɣɛ́ taá ngɛlɛ́ gúla su.

³⁰Taá ɣɛ taá ɣɛ́ ta, ‘Siỹɛndópoi sí í pɛlɛí londáá lɔkúla héingɔ, kɛ́ aa hombongɔ́ ɔ́ɔ́ ngukúla.’ ”

³¹Jísu í mɔ́ɔ́ ɣɛ ta, “Ná náa masa ngwála yiláá táa ɣɛ́ taa li kɔɔ wɔ́ma taá masa ngwála véka, ɛi hei hése ɔ́ɔ́ gisíya nga ngáá pangɔ́ ngáá ná wɔ́lii nuu tásu púúngɔitii tí ngeyá taá hómbo tí lápi ngáá masangí sí núu tasu puu félengɔi í ngeyá?

³²Ná aáva áá ɣɛ́ kɔlɔ́ ngáá ɛi hombó, ti lowah̃u wooh̃ángɔ aa lo nɔ́ɔ p̃óu í nungáá lɔ́ve masa ngwála vékai ná yelé ngáá tí ndówah̃u batɛ́ wó.

³³Ngimɔ́ɔ́ nɔ́ɔ jɔ́ í ná, wú tá fíli su, nuí ɛ́i ɣɛ́ gíkulai sí kpɛ́lɛɛ sú áá ɣɛ́ ngeyá, maa w̃ɔɔ́ ɛi ɣɛ ngáá pólu w̃ɔ́ɔ.”

³⁴Jísu í mɔ́ɔ ɣɛ ta, “Kpoloí lɔ ngáá ngangímba gɔ́li, kɛ́ ná ngi yéélei áá gúla mba, aa ɣelé kɛ náa áá mɔ́ɔ ɣɛ yéélei?

³⁵Nga ngɛ́i mɔ́ɔ ɣɛ maa bóloi wa ngáá nuu ɔ́ɔ́ faa fíli kɛ́ la aáva taa pilí yáa. Nuí fíli faa ỹɛ́ni ngóli áá ɣɛ́ ngu mba, í fái sí yéɣe ngáá hɛmbɛ́ fíli.”