Read Bandi LÚU 17 Bible Online

LÚU 17 - Bandi bible

LÚU 17

¹Jísu í mɔ́ɔ ɣɛ volú yélaitii ma, “Faí sítii taá kɛ nuu áá faa ỹɔ́i ɣɛ kɛ tí ɣɛ́ nɔ́ɔ w̃ɛ́ɛ taa ɣɛ. Kɛ́ suu lɔɔ vá ɣɛ́ma ỹɔ́u nuí sí w̃a áá kɛ ngáá háwu faí sítii taa ɣɛ́.

²Maa ɔ́ɔ́ ɣɛ́ nɛ́ɛ́ni tí ndólo wɔtú wála yili maa w̃ɔ́i woló wá, tí píli yívoi wu, í ló mbu, í lɔ́ve sí wa áá kɛ ngáá háwu sítii ti langɔ́ ngáá ngé tí tá yíla kéle tɔ í faa ỹɔ́u ɣɛ.

³Faalɔ, a bɔwɔ́ w̃aah̃ú béle.” Jísu í mɔ́ɔ ɣɛ ti w̃a, “Ná í mbála loú áá faa ỹɔ́u ɣɛ ngáá í ye, nde ma ngáá yí faa ỹɔ́u ɣɛ́a. Aáva ná áá lánga, í nde í w̃á ngáá yí suuhaaló, suuhaaló.

⁴Ná áá faa ỹɔ́u ɣɛ ngáá í ye folo yílangi laa lówah̃u naa héiw̃aa í bɔ́ɔ́ ɣɛ bih̃i ká ka, kɛ́ ná áá vá áá ɣɛ́ í w̃a, ‘Ngí faa ỹɔ́u ɣɛa ngáá í ye,’ súúhaalo.”

⁵Ngalángi géélaitiini ti ɣɛ́i Ndemɔí Jísu w̃a, “Kɛ ngáá háwu ni lángi h̃uu í ɣɛ́ wɔ́ɔ́lɔ.”

⁶Ndemɔí Jísu i ti woo yápoteni, i ɣɛ ti w̃a, “Kɛbei ndangí sí í wú h̃u i ɣɛi wɔɔlɔ kulo kw̃ɛ́ɛ́ bɛ́lɛ í híti mɔ́sita gáálɛi h̃u, wɔ́ɔ́ ɣɛ́ ngulu wála fíli má, ‘Bɔwɔ́ vulukúla mbéi, yí lí yí hí yívoi wu,’ aáva ɔ́ɔ́ ɣɛ.”

⁷Kɛ Jísu i mɔɔ ɣɛa ti w̃a, “Kɛbei náa nduwɔ lopo i ɣɛi wú tá yáa íwaa í bélei vúha, ɔɔ íwaa í wáálaitii maah̃ú belé, ná áá gúla kpeleí h̃u yáá ndé ma ngáá í vá í héi wú laaỹɛ́ ỹanda yílaa?

⁸Kɛmbɛ yáá ndé maa w̃ɔ́i w̃a ngáá í í ỹɛ́ɛ́nii ɣɛ́ kíli batɛ́, í héi, í í w̃áálɛlɛ, ná yáá víla laaỹɛ́ma, í ngí ndái ɣɛ kíli batɛ́, í mɛ, kɛ́lɛi?

⁹Yɛ́i lo sɛ́ɣɛɛ gulamá nduwɔ lopói ná w̃a sí hááw̃a áá ɣɛ kɛ́ni sífaa nɔ́ɔ áá ɣɛ́ sí ɣɛní yáá ɣɛ́ ndéni ma ngáá í kɛ.

¹⁰Ngimɔ́ɔ́ nɔ́ɔ jɔ́ wú na. Ná wáá sí kpɛ́lɛɛ kɛ Ngalá ngáá nde wú w̃a ngáá wú kɛ, kule lɔ nɔ́ɔ wú w̃a wú ɣɛ́ bɔwɔ́ w̃a, ‘Naá kula ɣɛí ngáá ngangímba lúwɔ lopóa. Sí kule í ɣɛ́ngɔ ni w̃a ní kɛ, aá lɔ́ nɔ́ɔ ní kɛngɔ́.’ ”

¹¹Folo yílaa, Jísu i ɣɛi pele h̃u áá lí Jɛlúsɛl̃ɛ taa walái h̃u, i ɣɛi áá lɔ́ve kpóloo Samááliya lataíni ngaa Galéli lataí ti lówah̃u.

¹²Ná í ɣɛ́i áá lɛ́ kokó yílaa nga, tí w̃ɛ́ɛ́ni taá nuu púúngɔ nduwu w̃aa heebɛ́i ỹɔ́u ỹɔ́ungi i ti wa. Tí loní nɔ́ɔ p̃óuma,

¹³tí tóli ngeleya, ti ɣɛ́ ma, “Kawalái Jísu, w̃aanu kái ní w̃a!”

¹⁴Ná Jísu í tí lɔní, i ɣɛi ti w̃a, “A lí wú bɔwɔ́ ɣɛ́ ngáá Ngala sááɣa gula mbélaitii, ti wú hɔ́bɛ.” Aáva ná ti ɣɛ́i peleí h̃u táá li, tí ngátɔi naa ngáá kɛ nduwu w̃aa heebɛ́i ỹɔ́u ỹɔ́ungi ná i walónga ti w̃a.

¹⁵Ti tá yílaa nuu púúngɔi sítiini su, ná í ngatɔ́ni ngáá kɛ i walónga, i yangáimani Jísu yelé, í wáa Ngalá tɛ woo wála h̃u.

¹⁶I liiní, í bé bɔwɔ́ wa, í gúla Jísu gɔwɔ́ wú, í sɛ́ɣɛɛ gulá ma. Siỹɛndópoi sí va í ná ɣɛ́ni, i ɣɛi ngáá sotá, Samááliya w̃ɔ́ɔ i ɣɛi lá.

¹⁷Kɛ Jísu i mɔɔningí wónga, i ɣɛ ta, “Kɛmbɛ nuu púúngɔ lɔ ti wálongɔ? Míl̃inda lɔ táávungɔ vekaítii tí na?

¹⁸Ti tá yiláá bɛ́lɛ nɔ́ ɛ́i belé yangáima kɛ nɔ́ɔ léi sotángi sí yílaa kpé í yangáimangɔ ngáá í Ngalá tɛ?”

¹⁹Kɛ i ɣɛa siỹɛndópoi ná w̃a, “Yooɣé, yí lí! Í lángi í í h̃u, í í wálonga.”

²⁰Folo yílaa, Júsuai sítii taa ɣɛ́ ti w̃a Falósiai ti lɛ́ingaa ti Jísu w̃ɔɔniní ngáá bele hɔwɔ́ lɔ Ngalángi w̃ásandai áá vá vaamá ma. Jísu i ti woo yápoteni, i ɣɛ ti w̃a, “Ngalángi w̃ásandai ɛi va nuu ɔ́ɔ́ tɔ.

²¹Kɛlaa nungáá tɔɔ ɣɛ́ ta, ‘Aá belé tɛ mbéinda’ ɔɔ, ‘Aá belé tɛ múl̃ɔnda,’ bɔw̃álale Ngalángi w̃ásandai lɔ wú líí h̃u.”

²²Kɛ Jísu i ɣɛa volú yélaitii ma, “Táingi lɔɔ vá folóma ma, wáá ɣɛ́ nɔ́ɔ náa léi wú yááh̃u lá nuí síí w̃ɔ́i taa ɣɛ́ ma Nuu Búsa Goo H̃ú Loí hólo yiláá má ná h̃u í ɣɛ́i ngelewu kɛ́ wɔ́i tɔ.

²³Aáva nungái taá ɣɛ́ taa ɣɛ́ wú w̃a, ‘A wɔ́lɛ lɛ́ɛ, laá wúl̃ɔ múl̃ɔnda,’ ɔɔ ti ɣɛ́ ta, ‘Laá béle tɛ mbéinda.’ A waá tó ti wa kɔlí fááw̃a,

²⁴sífaa Nuu Búsa Goo H̃ú Loí vaalaí aa gula ngáá kíya ngele miỹa míỹangi áá ỹanda ɣɛ kpál̃au, folói ná w̃a áá vá vaamá ma.

²⁵Kɛ́ maifɔ́lɔ mbaa ngáá kɛ Nuu Búsa Goo H̃ú Loí í maanɔw̃ɔ́ bíh̃i bih̃i ngeɣé, ná vólu, sí h̃uu yéteyangi h̃úú yélaitii ti bééle mba.

²⁶Kɛ kíya í ɣɛ́i Ngala mɔ́i Nówa ndá yéteyangi h̃u, ngimɔ́ɔ́ nɔ́ɔ jɔ́ áá vá ɣɛ́ma Nuu Búsa Goo H̃ú Loí ndá yéteyangi h̃u íwaa vá vaamá.

²⁷Nówa ndá yéteyangi h̃u, nungáitii ti ɣɛ́i taá laaỹɛ́, tíwaa kpɔle bɔ́le ŋánia bɔle, nyah̃aá tíwaa wála siỹɛngáá yáa, ndoú kɛ́ɛ́ɣɛa tíwaa ndéngaa he siỹɛngáá yɛ, í ló su náa bɛ́lɛ í fólo folói sí w̃a Nówa í lɛ́ɛ́ni kelé ngwálai h̃u. Kɛ njɛhéngi i pekaítii kpɛ́lɛɛ máá bɔ́lenga.

²⁸Ngimɔ́ɔ́ nɔ́ɔ í ɣɛ́i na siỹɛndópoi sí í ɣɛ́i ngáá Ngala mɔ́i tɔ́ɔ ɣɛ́ ma Lɔ́ti ngi ndá yéteyangi h̃u. Nungái ti ɣɛ́i taá laaỹɛ́, tíwaa kpɔle bɔlé ŋánia bɔle, táá ngiya wɔ, táá yawo ɣɛ, táá sii hií ŋánini sí, ná vólu, táá pɛlɛ́ni tó.

²⁹Kɛ́ ná Lɔ́ti í gúlani taí ná h̃uu wá tɔ́ɔ́ náá lolí ngáá Sɔ́dɔu, ngɔmbuíni ngaa kɔtu bandíítii ti híɣei ngeleí ya, tí nungáitii kpɛ́lɛɛ mɔ́ kpái maa lái h̃u.

³⁰Ngimɔ́ɔ́ jɔ́ áa vá ɣɛmá folói sí w̃a Ngalá ngáá va Nuu Búsa Goo H̃ú Loí ɣɛma ngáá nuu kpɛ́lɛɛ ti tɔ.”

³¹Jísu í mɔ́ɔ́ ɣɛ ta, “Folói ná w̃aa vá nuí fíli áá ɣɛ́ ngi vɛ́lɛ gɔma, ngi ỹáákaitii tí mbu, álaa hítɛ ɔ́ɔ́ lí póma. Ngimɔ́ɔ́ nɔ́ɔ jɔ́ nuí áá ɣɛ́ kpaalaí h̃u, álaa yangáima ŋani fíli póma taí h̃u.

³²A gindó sí h̃u í ɣɛi ngáá Lɔ́ti ỹah̃ái!

³³Nuí fíli áá yakpá ngáá í lɛɛh̃úi w̃aah̃ú béle, aa waláma, kɛ́ nuí fíli áá lɛɛh̃úi gúla kɛlɛ́ ma, aa ndɛ́ɛ́h̃u gítei w̃ááhɔlɔ.

³⁴Ngí ndé wú w̃a, kpɔkɔ́i ná, nuu félengɔ taá ɣɛ́ lááni mbete yilángi ya, malékaitii tí ngiláángi yeɣé, tí ngiláángi ló na.

³⁵Nyah̃aá félengɔ, taá ɣɛ́ taa konda híɣa ỹanda yílaa, malékaitii tí ngílaangi yéɣe, tí ngílaangi ló na. [

³⁶Siỹɛ́ félengɔ taá ɣɛ́ kpaalaí h̃u, malékaitii tí ngílaangi yéɣe, tí ngílaangi lo na.]”

³⁷Jísu volú yélaitii tí mɔɔniní, ti ɣɛ́ ma, “Kɛɛɣɛ́, míl̃inda lɔ sí áá vá ɣɛ́ma na?” Jísu i ti woo yápoteni, i ɣɛ ti w̃a, “Mbéi fíli suwa vuw̃ái áá ɣɛ́ na, naa lɔ koɣɛítii taa yátɛ mbá na.”