Read Bandi LÚU 20 Bible Online

LÚU 20 - Bandi bible

LÚU 20

¹Folo yílaa ná Jísu í ɣɛ́i áá nungáitii kalámbo Hɛ́ɛ́ma Yála Pɛlɛí góvii h̃u, áá keela woó vándai le ti w̃a, Ngala sááɣa gula mbélai ti wútuwɔaitii ɛ́ɣɛ kaamɔítiini Ngala sávai hááw̃a, í báha náa kele ɣelé mbélaitii mba tí vááni Jísu yelé.

²Kɛ ti ɣɛ́a ma, “Ngakpángi híí bɛɛ́ lɔ í í yáa yíwaa faí sítiini kɛ? Ele vá tɔ í maa yákpangi sí héngɔ í yáa?”

³Kɛ́ Jísu í ti woo yápoteni, i ɣɛ ti w̃a, “Nyá bɛ́lɛ nyá lɔ́ɔ wú w̃ɔ́ɔ́ni ngáá mɔɔni ngílaa, a nde lɛ́ɛ má,

⁴nguyaí Njɔú í ɣɛ́i áá mbo, ngi yákpangi i gulaní Ngalá ngeyá baa nuu búsa yáa?”

⁵Kɛ tí ndengá ỹɔw̃ɔ́ ỹɔ́w̃ɔ lówah̃u, taá ɣɛ́ ta, “Ná a maa ɣɛ́ ta, ‘I gulaní Ngalá ngeyá,’ aa mu w̃ɔ́ɔ́ni, i ɣɛ ta, ‘Kɛ ndeénii le hɔ́ɔ wáá láni ngáá Njɔú?’

⁶Kɛ́ ná mɔ́ɔ́ a maa ɣɛ́ ta, ‘I gulaní nuu búsa yáa,’ nungáitii taá ló a mu hɔ́ɔ́ma a mú ha, bɔw̃álale ti kpɛ́lɛɛ ti langɔ́ɔ́ lé lá ngáá kɛ Njɔú í ɣɛ́i ngáá Ngalá ndaa háá lé mɔ́ɔ.”

⁷Faalɔ, ti Jísu woo yápoteni, ti ɣɛ́ ma, “Náa kɔ́lɔ mbéi í gúlani na.”

⁸Kɛ Jísu i ɣɛa ti w̃a, “Kɛ nyá bɛ́lɛ ngɛ́i nde hɔ́ɔ́ wú w̃a ngakpángi sí í ngéya ngíwaa fái sítii kɛ ma.”

⁹Kɛ Jísu i faanɛ́ɛ́ngi sí héinga nungáitii mbɛ, i ɣɛ ta, “Siỹɛndópoi lɔ wɔ́lɔ í ɣɛ́i na, i kpelé laní i sí ŋaníi hí mba taá tóli ngáá gilépii, í maa bélei he kpelé híŋa mbélaitii ngeyá siŋa h̃u, í yóóɣe, í lí siya má táiŋ suugooh̃ángɔ hááw̃a.

¹⁰Ná gilépii gula sɔ́wɔi í fóloni ma, kɛ kpelé w̃ɔ́i i ngi yénge mɔí ta yílaa tɔ́venga na ngáá ná táa kula, tí kɔ́lɛ, tí ngí ndái he ngi yénge mɔ́i yaá, í váa la ngelé. Kɛ́ kpelé híŋa mbélai nátiini tí ngenge mɔ́i ná léveni, tí tɔ́ve, í lí ngáá yaá ỹaáka.

¹¹Kɛ kpelé w̃ɔ́i í mɔ́ɔ ngenge mɔ́ɔ veka lɔvengá, kɛ́ ná bɛ́lɛ nɔ tí ndevení, tí suuhóu kíli ỹɔu wo, tí tɔ́ve, í lí ngáá yaá ỹáaka.

¹²Kɛ kpelé w̃ɔ́i i mɔɔ ngenge mɔ́i hawa kélei lɔ́venga, kɛ́ kpelé híŋa mbélaitii tí ỹánda héini ná wa, tí kúla kpéle h̃u wá, tí píli.

¹³Kɛ kpelé w̃ɔ́i i ɣɛa ta, ‘Ndeé lɔ náa ngáá kɛ? Sí h̃úi laá, ní h̃íỹɛndou loí lɔ́ ngíwaa tɔve ndóngɔ la, tɛingaa taá wúfe ma.’

¹⁴Kɛ́ na kpéle híŋa mbélaitii tí tɔ́ni, ti ɣɛ́i ỹɔw̃ɔ́ ỹɔ́w̃ɔ w̃a, ‘Sí lɔ́ áá vá poŋaníaitii maahɔ́lɔma ná ngi kɛ́ɛ́ɣɛ áá ha, a vá, a mú pa, poŋaníaitii taá ɣɛ́ náa ngáá a mu ndá.’

¹⁵Faalɔ, ti gúlani ngáá kpelé w̃ɔ́i lói kpeléi h̃uu wá, tí páa.” Kɛ Jísu i mɔɔningí wónga, i ɣɛ ta, “Na kpelé w̃ɔ́i sí áá vá, ndeé lɔ́ áá kɛ ngáá kpelé híŋa mbélai sítiini?

¹⁶Aa vá, i kpelé híŋa mbélai nátiini paa, í kpélei he kpelé híŋa mbélaa vekaa yaá siŋa h̃u.” Kɛ́ ná nungáitii ti fái sí ỹɛ́nini, ti ɣɛ́i ta, “Í lí p̃óu, ná w̃aa hái ɛi ɣɛ p̃ɛ́ɛ́.”

¹⁷Kɛ Jísu i ti belénga tííŋ, í tí w̃ɔ́ɔ́ni, i ɣɛ ta, “Sí pɔnɛngɔ́ Ngala Kɔ́lɔi h̃u kɛ bɛɛ́ lɔ́ hɔ́ɔ áá ɣɛ́ ngáá polúi? Ngáá sí í ɣɛ́ngɔ ta, ‘Kɔtuí sí pɛlɛ́ ló mbélai ti bééleni mba í ɣɛ́i ti gi má nga ngáá mba, laá lɔ́ náa í ɣɛ́a ngáá ngangímba wɔ́tui pɛlɛ́i lo fááw̃a, í lɔ́ve kɔtu vekái kpɛ́lɛɛ mbá.’

¹⁸Nuí fíli pá áá h̃úndɛ kɔtuí ná w̃a, maa w̃ɔ́ɔ aa bulú kpúlu su. Kɛ́ ná maa wɔ́tui va áá h̃úndɛ nuu fíli má, aa maa w̃ɔ́ɔ́ vulɔ́ púlɔ!”

¹⁹Kaamɔítiini Ngala sávai hááw̃a ɛ́ɣɛ Ngala sááɣa gula mbélai ti wútuwɔaitii ti ɣɛ́i taá pele wɔlí mbá ngáá ti Jísu hou ngamá bɔw̃álale ti ɣɛ́i kɔlɔ́ ngáá kɛ i faanɛ́ɛ́ngi sí héingɔ ti yɛ. Kɛ́ ti ɣɛ́i taa lúwa nungáitii mbá.

²⁰Faalɔ, ti ɣɛ́i náa taá Jísu yasɔ́bɛ ngáá pangɔ́. Tí ngasɔ́bɛ mbélaitii tí lɛ́ingaa lɔ́veni nátii tí yɛ́i tí kulaí ngáá kɛ tiyá lɔ́ ngáá nuu vándaa. Ti gingí i ɣɛi na ngáá ti Jísu hóu ndaa wóó wá ngáá tí tɔ́ve Lóómi gɔ́mɛti nuu walaí yéle.

²¹Faalɔ, ngásɔbɛ mbélaitii ti Jísu w̃ɔɔniní, ti ɣɛ́ ma, “Kaamɔ́ɔ́, ní kɔ́lɔ ngáá sí yáá ndé, ná vólu, kalambongí yáa mbo ngáá nungáitii aa ɣɛ pele w̃a. Ná vólu, yɛ́i nuu yéɣe kɛ kíli h̃u. Kɛ́ yáá kalambongí wó ngáá Ngalángi lɔ́ɔ́ỹaa veleí.

²²Faalɔ, ni longɔ́ɔ́ le ní ɣɛ́ kɔ́lɔ ná wɔ́lii aá lɔ́ pele w̃a Ngala sávai h̃u ngáá ní páva he Lóómi Lɔwɔlɔ́ W̃asa Ngwalaí yáa baa aa pele w̃a?”

²³Kɛ́ Jísu i ɣɛi ti háá h̃uubatɛngí wɔ́lɔ. Faalɔ, i ɣɛi ti w̃a,

²⁴“A kápangi ɣɛ́ lɛ́ɛ ngí tɔ.” Kɛ i ti w̃ɔ́ɔ́ninga, i ɣɛ ta, “Ele hootó lɔ́, ná vólu, ele laahéi tɔ́ í kápangi sí w̃a?” Kɛ ti Jísu woo yápotenga, ti ɣɛ́ ma, “Lóómi Lɔwɔlɔ́ W̃ása Ngwalaí.”

²⁵Kɛ Jísu i ɣɛa ti w̃a, “Sí hɔ́ɔ í Lóómi Lɔwɔlɔ́ W̃asa Ngwalaí hááw̃a, a fe Lóómi Lɔwɔlɔ́ W̃asa Ngwalaí yáa. Sí va í na Ngalá fááw̃a wú fé Ngalá, ngeyá.”

²⁶Taá hómboni tɔɔ Jísu hou ndaa wóó wá nungáitii kákala. Aáva ti gindáá vílingɔ i ɣɛi lá ngáá ngoo yapoténgi í féni ti yaá ngáá taá hómboni tɔɔ́ faa fíli ndé.

²⁷Júsuai sítii taa ɣɛ́ ti w̃a Sájusiaitii tiyɛ́i taa ɣɛ́i laní ngáá mbuyoɣe saa h̃ú hái tí lɛ́ingaa tí liiní Jísu yelé ngáá tí mɔ́ɔ́ni.

²⁸Ti ɣɛ́i Jísu w̃a, “Kaamɔ́ɔ́, Muusé í sáva vɔ́nɛngɔ mu haáw̃a ngáá ná siỹɛ́ ngɛ́i ɣɛ ndóu léni í ló su í há, kɛ ngi ndéɣei ɔɔ ngi ndíyai í ponyah̃ái ná yéɣe kɛinɔɔ́ tí ndengáá le siỹɛ́ngi ná yɛ áá ɣɛ́ náa haaní.

²⁹Ná ná áá ɣɛ, njee koo h̃u ngɔ́felangɔ lɔ wɔ́lɔ ti ɣɛ́i na, ti ngáá siỹɛngáá. Kɛ ti ndíya wálai i nyah̃ái héinga kɛ́ taá ndóu léni taá nyah̃ái na í ló su í há.

³⁰Kɛ kpelaa gélei i ponyah̃ái ná yéɣenga, kɛ́ taá ndóu léni í ló su laá bɛ́lɛ í há.

³¹Kɛ ná bélaa gélei bɛ́lɛ i ponyah̃ái ná yeɣénga, kɛ́ taá ndóu léni taá láa í ló su í há. Ngimɔ́ɔ́ í ɣɛ́i ngáá ti kpɛ́lɛɛ.

³²Ngapúmai tɛ́ɛ́lɛ, kɛ nyah̃ápoi bɛ́lɛ i haangá.

³³Ná ná áá ɣɛ, ná saa yeláitii taa yóóɣe sái h̃u, ti ngɔ́felangɔ h̃u ele lɔ ngi ỹáh̃a aa ɣɛ́ la, sífaa i walaí ti ngɔ́felangɔ kpɛ́lɛɛ ngéya?”

³⁴Kɛ Jísu i ti woo yápotenga, i ɣɛ ti w̃a, “Sí h̃úu yéteyangi h̃u, siỹɛngáitii tiyá lɔ́ɔ nyah̃a héi, nyah̃áitii pa táa wála kɛmbɛ h̃u.

³⁵Kɛ́ sítii Ngalá ngí ɣɛ́ngɔ ta ti gúla ɣɛngɔ́ɔ́ lé ngáá nungáá ti yóóɣe fááw̃a sái h̃u ngáá ná taa há, ná taa ɣɛ́ ɣɛi vaaní vólu ndɛɛh̃úi h̃u, siỹɛ́ kpɔ́ngɔ nyah̃á wá, siỹɛ́ ngɛ́i nyah̃a héi kɛlaa nyah̃á ɔ́ɔ́ wála kɛmbɛ h̃u.

³⁶Aáva tɛí mɔ́ɔ ha kúnafɔ, sífaa taá ɣɛ́ náa ngáá malékaitii kɛ kíli. Taá ɣɛ́ ngáá Ngalángi léngaitii sífaa taá ɣɛ́ yooɣéni sái h̃u.

³⁷Muusé bútei i ngakɛ́ni kpál̃au ngáá kɛ saa yeláitii taá yooɣé sái h̃u ná í kɔ́lɔi vɔ́nɛni kɔwɔ́ato ndɔbɔí wá í ɣɛ́i áá w̃ɔ́, ngáá mbéi í pɔnɛngɔ́ na, i ɣɛ ta, ‘Ndemɔí Ngala tɔ í ngáá Ngalángi Lébilah̃au haaw̃a taa Áise ɛ́ɣɛ Jékɔ.’

³⁸Aa ngáá Ngalá sítiini faaw̃a ti háángɔ, kɛ́ laá lɔ́ ngáá Ngalá sítiini faaw̃a tí ndɛɛh̃ú h̃ú, bɔw̃álale nuu kpɛ́lɛɛ tɔ́ ndɛ́ɛ́h̃u h̃u ngaah̃ú.”

³⁹Kaamɔítiini tɛingáá Ngala sávai hááw̃a, ti Jísu woo yápoteni, ti ɣɛ́ ma, “Laá gíte w̃ul̃á yí ndénga ngáá tɔɔỹaá, Kaamɔ́ɔ́.”

⁴⁰Nuu fíli pá aa mɔɔ kɔvɔ́ni ɔ́ɔ́ Jísu w̃ɔɔní ngáá faa fíli.

⁴¹Kɛ Jísu i ɣɛa ti w̃a, “Kɛ ndeénii le hɔ́ɔ́ nungáitii ti ɣɛ́ngɔ ta, ‘Ngalángi Lókolo Mba W̃ɔ́i lɔ i ngáá Masangí Deevé láála loí’?

⁴²Deevé bútei vá í ndéni Ngala Fɛ́li Ngúle Gɔlɔí h̃u ngáá sí, í ɣɛ́i ta, ‘Ndemɔí Ngalá i ndení Ndémɔi w̃a, i ɣɛ ma, Hei nguféma ỹándai kpélaa ní w̃ásandai h̃u

⁴³í ló su kpóloo ngí í wááhilima yélaitii kɛ ngáá í gɔ́wɔ lóów̃aa wɔ́lingaa.’ ”

⁴⁴Jísu í mɔ́ɔ ɣɛ ta, “Ná Deevé bútei áá Ngalángi Lókolo Mbá W̃ɔ́i lóli ngáá Ndémɔi, kɛ aa ɣele ɣɛ́ náa ngáá Deevé láála lóu?”

⁴⁵Ná nungáitii kpɛ́lɛɛ ti ɣɛ́i taá wolílo, kɛ Jísu i ɣɛa volú yeláitii ma,

⁴⁶“A w̃aah̃ú béle ngáá kaamɔítiini Ngala sávai hááw̃a. Tí lói ngáá lɔvé tɔvendáá ti lóma kooh̃aítii su kɛinɔɔ́ nungáá yááh̃u í ɣɛ́ ti wa. Ɛ́ɣɛ mɔ́ɔ tí lói ngáá nungáá taa ɣɛ́a laalí ti w̃a ngufema h̃ú lííwa wála walaítii. Ná vólu, tí lói ngáá heindáá ngufema ỹándaitii Ngala fɛ́li máákpɔ wotaítii mbu. Ɛ́ɣɛ múl̃ɔ tí lói ngáá heindáá ngufema ỹándaitii ná táa w̃ɛ́ɛ́ kpɔ sú ndaaỹɛ́ mbóma.

⁴⁷Nungái sítii pa tɔ nɔ́ɔ mɔ́ɔ taá ponyah̃áitii ti vɛ́lɛitii kula ti yaá ti kɛ ngáá vo, tí pɛ́lɛ bɔwɔ́ gulamá ngáá nuu vándaa nungáitii ngaah̃ú ngáá ti Yála fɛlindái taá súúɣɛ gooh̃á. Kɛ́ nuu láálii sítii pa faa bángi áá va láma ti w̃a, aa lɔve nungáá vékaitii ti ndái wa.”