Read Bandi LÚU 3 Bible Online

LÚU 3 - Bandi bible

LÚU 3

¹Ná h̃u siỹɛndópoi sí tɔ́ɔ ɣɛ́ má Tebɛliyɔ í ɣɛ́i ngáá Lóómi Lɔwɔlɔ́ W̃asa Ngwalaí, ngi hówo púúngɔ maah̃úú ndɔ́ɔ́lungɔi h̃u ngi w̃ásandai h̃u, Ngalá ngí yɛpɛní Sakaláya h̃iỹɛndou loí Njɔú yéle ngaalaí h̃u. Naa h̃uu lɔ siỹɛndópoi sí tɔ́ɔ ɣɛ́ ma P̃ɔ́tiyɔ Páilɛɛ í ɣɛ́i ngáá gɔ́mɛti nuu walaí tataí sí h̃u taá náá lolí ngáá Judíya, Hɛ́lɔdi í ngáá masangí tataí ná h̃u taá náá lolí ngáá Galéli. Ngi ndéɣe Félepi va i ɣɛi tataí sítii maah̃u taá naitii tolí ngáá Étuliya ɛ́ɣɛ Tulákɔnitɛ. Siỹɛndópoi sí bɛ́lɛ pá tɔ́ɔ ɣɛ́ ma Lesániya i ɣɛi tataí sí w̃ááh̃u taá náá lolí ngáá Abeléni. Ánasi ɛ́ɣɛ Káyafani tɔ ti ɣɛ́i ngáá Ngala sááɣa gula mbélai ti wutúwɔɔ w̃ɔ́ɔ wala walaítii.

³Naa h̃uu vá tɔ Njɔú í ɣɛ́i áá lɔ́ve tɔvé hááli hááli njɛí ná taá tolí ngáá Jɔ́ɔ́dɛ Yɛí maa látai h̃u. I ɣɛi áá Ngalángi géela woí le nungáitiini ma ngáá kɛ tí volú yáfe ti háá ỹɔítii mba, ti ngúyai w̃aahɔ́lɔ ti háá ỹɔítii suuhaaló fááw̃a Ngalá mbɛ.

⁴Faa vɔnɛ́ngɔɔ lé kɔwɔ́ato maa hái wa Ngalá ndaa háá lé mɔ́i Aisáya gɔlɔí h̃u ngáá sí í ɣɛ́ngɔ ta, “Nuu tá lɔɔ woo ngúla ngaalaí h̃u, íwaa ɣɛ́ ta, ‘A peleí ɣɛ́ kíli batɛ́ Ndemɔí hááw̃a, wú pɔɔná mbɛ.

⁵Kpondɔ́ngi fíli kɛ suulaa í hé, aáva ngihé ngwala fíli ɛ́ɣɛ ngihé kúlo fíli kɛ ti yangí í la tí ɣɛ́ ngáá nɛw̃ɔ. Pele h̃úúhei hei máitii kɛ ti h̃úú í ɣɛ́ vɔɔnáni, aáva pele boɣíla kpoɣila maítii kɛ ti w̃áá í ɣɛ́ bongóni.

⁶Aáva nuu kpɛ́lɛɛ taá tɔ kíya Ngalá ngáá núu wúmaawo.’ ”

⁷Faŋa walá i ɣɛi áá lí Njɔú yéle ngáá í ngúyai wo ngáá ti ye. Kɛ́ i ɣɛi ti w̃a, “Wɛ́i wú ngáá kaaliá ɣɛ kíli, ele lɔ í ɣɛ́ngɔ wú w̃a wáá hómbo wú w̃áávela faa bámai wa Ngalá ngáá vá ndáma faa ỹɔ́u yélai ma?

⁸A luva veléitii kɛ náa pele w̃a sí áá ngákɛ ngáá nungáitii ngáá wú vólu yáfenga wú háá ỹɔítii mba. Ná vólu, a waa pɛlɛ gisíyama ngáá wáá w̃áávela maa háá bamaí wa sífaa nɔ́ɔ wú ngáá Lébilah̃au laalá lengaa. Ngí tɔɔỹái le wú w̃á, Ngalá ngáá hombó í kɔtuí sítiini pote ngáá ndengáá Lébilah̃au yɛ.

⁹Ngalángi gɔ́sɔngi ɣɛ kíli gulangɔ́ɔ́ lé ngáá koonɔ́ngi sí í ngulúitii ti hápeitii mba náa tevé fááw̃a. Nguluí fíli pá ngi wá pánda ɛ́i ɣɛ́ heiní ngá, taá tevé mba tí pilí ngɔmbuí ya.”

¹⁰Kɛ faŋaí i Njɔú wɔ́ɔ́ninga, ti ɣɛ́ ma, “Kɛ bɛɛ́ lɔ náa hɔ́ɔ́ kule í ní w̃a ngáá ní kɛ?”

¹¹Kɛ Njɔú í ti woo yápotenga, i ɣɛ ti w̃a, “Nuí fíli ndoma ngáá ɣɛ́ ngeyá féle, kɛ í ngilángi hé nuí sí yáa ta fíli ɛ́i ɣɛ́ ngeyá. Nuí vá mɛɛní áá ɣɛ́ ngeyá, laá bɛ́lɛ nɔ́ í ngákɔlɛ.”

¹²Pava gula mbélaa lɛingáá tí liiní Njɔú yéle ngáá í nguyaí wó ngáá ti ye. Kɛ́ aáva tí Njɔú w̃ɔ́ɔ́nini, ti ɣɛ́ ma, “Kaamɔ́ɔ́, bɛɛ́ lɔ kulé í ni w̃a ngáá ní kɛ́?”

¹³Njɔú í tí woo yápoteni, i ɣɛ ti w̃a, “A wáa naholó fíli kulá nuu yáa ɔ́ɔ́ lɔ́ve sí wá kule áá ɣɛ́ ma wú kula ti yaá.”

¹⁴Kɛ sóyaitii tɛingáá tí Njɔú w̃ɔ́ɔ́ninga, ti ɣɛ́ ma, “Niỹá va, bɛɛ́ lɔ kule í ni w̃a ngáá ní kɛ?” Njɔú í tí woo yápoteni, i ɣɛ ti w̃a, “Kúnafɔ a wáa náholo gúla nuu yáa ngáá ngakpá aáva a waá ndɛɛ vɛ́lɛ nuu wá, ná vólu, wú pávai taá fe wú yáa, í wú lííla.”

¹⁵Nungáitii ti gitómaitii ti ɣɛ́i wɔɔlɔ ngwala. Ti ɣɛ́i taá gisíya ngáá ná wɔ́lii Njɔú lɔ áá ɣɛ́ ngáá Ngalángi Lókolo Mbá W̃ɔ́i.

¹⁶Kɛ́ Njɔú i ɣɛi ti kpɛ́lɛɛ má, “Ngáá nguyaí wó ngáá wú yé ngáá njɛí, kɛ́ nuí sí áá vá vaamá, ngakpángɔɔ lé í lɔ́ve mbá, ngáá kulaɣɛí p̃ɛ́ɛ́ ngáá nuú ngi gɔ́ɔ́vai ɣéle tɔ ndaa húlo fááw̃a. Aa nguyaí wo ngáá wú ye ngáá Hɛ́ɛ́ma Ỹínangi ɛ́ɣɛ ngɔmbuí.

¹⁷Ngi gɔ́sɔ mbaalévendai ɣɛ kíli gulangɔ́ɔ́ lé ngáá nuí sí áá ngí wíítii yatɛ́ mba tevé sɔ́wɔi w̃a. Aa ngi wíítii kpɛ́lɛɛ pu ngi wótai h̃u, aáva ná áá ngandíɣa í kpɛkpɛlɛ, í wííti gɛhɛ́i yándɔɔlɔ, í wííti gaangí w̃ɔ ngáá ngɔmbuí sí ɛ́i há kúnafɔ.”

¹⁸Njɔú í nduwúh̃ulɛni ngáá nungáitii ngáá ngoo véka bíh̃i bih̃i. Ná vólu, íwaa Ngalángi gééla woo vandaí lé tí w̃a.

¹⁹Kɛ́ Njɔú í ndéni Masangí Hɛ́lɔdi w̃a ngáá kɛ i faa ỹɔ́u ɣɛ́a bɔw̃álale lɛ́i í ngáá Hɛ́lɔdi i bɔwɔ́ ndéɣei ỹáh̃ai Hɛlɔ́diya yeɣéni ngáá ngi ỹáh̃a. Ná vólu mɔ́ɔ, Njɔú í Hɛ́lɔdi haa ỹɔu veka bih̃i bih̃ingáitii ndéni ma í ɣɛ́i kɛní.

²⁰Faa ỹɔ́i kínɛi Masangí Hɛ́lɔdi í kɛ́ni, i ta báhani mba ngáá Njɔú vílindai kpindi vɛlɛ́i wu.

²¹Kɛ́ tɔ́ɔ́ ɣɛ́ p̃ɛ́ɛ́ tí Njɔú víli kpindi vɛ́lɛi wu, Njɔú í ɣɛ́i náá nungáitii kpɛ́lɛɛ nguyaí, kɛ i Jísu bɛ́lɛ nɔ́ ngúyanga. Aáva Jísu í lói nɔ́ɔ Ngala fɛ́li má, kɛ ngeleí laa í wónga,

²²Hɛ́ɛ́ma Ỹínangi í yéi, í héi ma. Kpatɛ gilíí gúlangɔ i ɣɛi lá ngáá poovóó. Kɛ ngoo tá í gulangá ngelegóóh̃u, ngoí ná vá i ɣɛi ngáá sí, “Yá lɔ yí ngáá ní H̃íỹɛndou Loí, ndóngɔ ngáá í ye. Yá lɔ́ ndíílɛingɔ tɔ́ í hááw̃a.”

²³Jísu buteí i ɣɛi náa kɛní ngáá fowó vúu sáángɔ ná í ngi Yála ngéngengi lɔ́kula héini. I ɣɛi nungáitii kí má ngáá kɛ Jísu lɔ ngáá Joosɛ́ h̃íỹɛndou lou. Joosɛ́i sí ngi kɛ́ɛ́ɣɛ í ɣɛ́i ngáá Hɛ́li.

²⁴Hɛ́li va i ɣɛ́i ngáá Mátati h̃íỹɛndou loí. Mátati va i ɣɛi ngáá Lívai h̃íỹɛndou loí. Lívai va i ɣɛ́i ngáá Mɛlɛ́ki h̃íỹɛndou loí. Mɛlɛ́ki va i ɣɛi ngáá Jána h̃íỹɛndou loí. Jána va i ɣɛi ngáá Joosɛ́ h̃íỹɛndou loí.

²⁵Joosɛ́ vá i ɣɛi ngáá Matátiya h̃íỹɛndou loí. Matátiya va i ɣɛi ngáá Éémɔ h̃íỹɛndou loí. Éémɔ va i ɣɛi ngáá Néh̃ɛ h̃íỹɛndou loí. Néh̃ɛ va i ɣɛi ngáá Ɛ́sili h̃íỹɛndou loí. Ɛ́sili va i ɣɛi ngáá Nágai h̃íỹɛndou loí.

²⁶Nágai va i ɣɛi ngáá Máfi h̃íỹɛndou loí. Máfi va i ɣɛi ngáá Matátiya h̃íỹɛndou loí. Matátiya va i ɣɛi ngáá Sɛ́me h̃íỹɛndou loí. Sɛ́me i ɣɛi ngáá Joosɛ́ɛ h̃íỹɛndou loí. Joosɛ́ɛ vá i ɣɛi ngáá Jóda h̃íỹɛndou loí.

²⁷Jóda va i ɣɛi ngáá Jowánɔ h̃íỹɛndou loí. Jowánɔ va i ɣɛi ngáá Lísɔ h̃íỹɛndou loí. Lísɔ va i ɣɛi ngáá Selɔ́bɔbɔ h̃íỹɛndou loí. Selɔ́bɔbɔ va i ɣɛi ngáá Síyatiyɔ h̃íỹɛndou loí. Síyatiyɔ va i ɣɛi ngáá Nɛ́li h̃íỹɛndou loí.

²⁸Nɛ́li vá i ɣɛi ngáá Mɛlɛ́ki h̃íỹɛndou loí. Mɛlɛ́ki va i ɣɛi ngáá Ádi h̃íỹɛndou loí. Ádi va i ɣɛi ngáá Kósa h̃íỹɛndou loí. Kósa va i ɣɛi ngáá Ɛmáda h̃íỹɛndou loí. Ɛmáda va i ɣɛi ngáá Ɛ́ɛ h̃íỹɛndou loí.

²⁹Ɛ́ɛ va i ɣɛi ngáá Jásuwa h̃íỹɛndou loí. Jásuwa va i ɣɛi ngáá Ɛlíyɛsɛ h̃íỹɛndou loí. Ɛlíyɛsɛ va i ɣɛi ngáá Jɔ́l̃e h̃íỹɛndou loí. Jɔ́l̃e va i ɣɛi ngáá Mátati h̃íỹɛndou loí. Mátati va i ɣɛi ngáá Lívai h̃íỹɛndou loí.

³⁰Lívai va i ɣɛi ngáá Símiyɔ h̃íỹɛndou loí. Símiyɔ va i ɣɛi ngáá Júda h̃íỹɛndou loí. Júda va i ɣɛi ngáá Joosɛ́ h̃íỹɛndou loí. Joosɛ́ va i ɣɛi ngáá Jónɔ h̃íỹɛndou loí. Jónɔ va i ɣɛi ngáá Ɛláyake h̃íỹɛndou loí.

³¹Ɛláyake va i ɣɛi ngáá Mɛ́liya h̃íỹɛndou loí. Mɛ́liya va i ɣɛi ngáá Mɛ́na h̃íỹɛndou loí. Mɛ́na va i ɣɛi ngáá Matáta h̃íỹɛndou loí. Matáta va i ɣɛi ngáá Néta h̃íỹɛndou loí. Néta va i ɣɛi ngáá Deevé h̃íỹɛndou loí.

³²Deevé va i ɣɛi ngáá Jɛɛ́se h̃íỹɛndou loí. Jɛɛ́se va i ɣɛi ngáá Óbɛ h̃íỹɛndou loí. Óbɛ va i ɣɛi ngáá Bówɛ h̃íỹɛndou loí. Bówɛ va i ɣɛi ngáá Sálumɔ h̃íỹɛndou loí. Sálumɔ va i ɣɛi ngáá Náásɔ h̃íỹɛndou loí.

³³Náásɔ va i ɣɛi ngáá Amínada h̃íỹɛndou loí. Amínada va i ɣɛi ngáá L̃áa h̃íỹɛndou loí. L̃áa va i ɣɛi ngáá Hɛ́sulɔ h̃íỹɛndou loí. Hɛ́sulɔ va i ɣɛi ngáá Pɛ́lɛsi h̃íỹɛndou loí. Pɛ́lɛsi va i ɣɛi ngáá Júdɔ h̃íỹɛndou loí.

³⁴Júdɔ va i ɣɛi ngáá Jékɔ h̃íỹɛndou loí. Jékɔ va i ɣɛi ngáá Áise h̃íỹɛndou loí. Áise va i ɣɛi ngáá Lébilah̃au h̃íỹɛndou loí. Lébilah̃au va i ɣɛi ngáá Tɛ́lɔ h̃íỹɛndou loí. Tɛ́lɔ va i ɣɛi ngáá Néhɔ h̃íỹɛndou loí.

³⁵Néhɔ va i ɣɛi ngáá Sɛ́lu h̃íỹɛndou loí. Sɛ́lu va i ɣɛi ngáá Léyu h̃íỹɛndou loí. Léyu va i ɣɛi ngáá Pɛlɛ h̃íỹɛndou loí. Pɛlɛ va i ɣɛi ngáá Ííbɛ h̃íỹɛndou loí. Ííbɛ va i ɣɛi ngáá Síyɛla h̃íỹɛndou loí.

³⁶Síyɛla va i ɣɛi ngáá Kiŋa h̃íỹɛndou loí. Kiŋa va i ɣɛi ngáá Áfasa h̃íỹɛndou loí. Áfasa va i ɣɛi ngáá Sɛ́mi h̃íỹɛndou loí. Sɛ́mi va i ɣɛi ngáá Nówa h̃íỹɛndou loí. Nówa va i ɣɛi ngáá Lémɛ h̃íỹɛndou loí.

³⁷Lémɛ va i ɣɛi ngáá Mɛtúsila h̃íỹɛndou loí. Mɛtúsila va i ɣɛi ngáá Íínɔ h̃íỹɛndou loí. Íínɔ va i ɣɛi ngáá Jɛ́ɛ́lɔdi h̃íỹɛndou loí. Jɛ́ɛ́lɔdi va i ɣɛi ngáá Mahálaliyɔ h̃íỹɛndou loí. Mahálaliyɔ va i ɣɛi ngáá Kiŋa h̃íỹɛndou loí.

³⁸Kiŋa va i ɣɛi ngáá Íínɔsi h̃íỹɛndou loí. Íínɔsi va i ɣɛi ngáá Sɛtí h̃íỹɛndou loí. Sɛtí va i ɣɛi ngáá Ádau h̃íỹɛndou loí. Ádau va i ɣɛi ngáá Ngalángi h̃íỹɛndou loí.