Read Bandi NJƆÚ 10 Bible Online

NJƆÚ 10 - Bandi bible

NJƆÚ 10

¹Jísu i faanɛ́ɛ́ seini, i ɣɛ ta, “Ngí tɔɔỹái le wú w̃á, kpakií sí mbaalaítii taa ɣɛ́ su, nuí ɛ́i víli maa bákii h̃u ngáá ndaa vélei, kɛ́ aá ɣéle í víli su ngáá pele veká fíli, kɛ maa w̃ɔ́i lɔ ngáá ŋuỹá w̃ɔ́ɔ́. Ná vólu, aá lɔ́ mɔ́ɔ́ ngáá kpundɛ ma w̃ɔ́ɔ́ nungáá w̃a ti wɔ́lingaitii kula fááw̃a ti yaá.

²Kɛ́ nuí sí áá víli su ngáá maa bákii laa vélei, kɛ maa w̃ɔ́i lɔ í ngáá mbaalaítii maah̃ú béle mɔ́i.

³Mbaala bakíí laa w̃ááh̃u belé mɔ́i aa kpakií laawó mbɛ, mbaalaítii pa taá ngoo ỹɛ́ni tí ɣɛ́ kɔlɔ́. Aáva aa ti yilá ngíla fíli tolí ngáá ti laahéingitii, í gúla ngáá ti yé.

⁴Ná áá ɣɛ naá gulaní ngáá ngi wáálaitii kpɛ́lɛɛ, aa lo ti wutúwɔ, ngi waalaítii pa taá tó mba bɔw̃álale tí ngoí wɔlɔ́.

⁵Kɛ́ tɛí hítɛ nuu véka fíli pólu, aá ɣéle p̃ɛ́ɛ́ taá víliỹɛ nuu fíli mbá ɛ́i ɣɛ́ ngáá ti w̃ááh̃u belé mɔ́ɔ́, bɔw̃álale tɛí ɣɛ́ maa w̃ɔ́i woí wɔlɔ́.”

⁶Jísu i faanɛ́ɛ́ngi sí héini nungáitii ma, kɛ́ ná fíli su, taá ɣɛi polú hái kái kái kɔlɔ́ sí i ɣɛí loí í ngákɛ ngáá ti ye.

⁷Faalɔ, Jísu i mɔɔ ndení ti w̃a, i ɣɛ ta, “Ngí tɔ́ɔ́ỹai le wú w̃a, nyá lɔ ngí ngáá mbaala bakíí laabɔ́lungi.

⁸Sítii kínɛi wɔ́lɔ tɔ́ɔ́ vá ngelewu í lóngɔ su ngí váánga táá kula ngáá tiyá lɔ ngaa mbaala w̃aah̃u belé mbélaa tiyá lɔ́ ngáá ŋuỹá yélaa, ná vólu, tiyá lɔ́ ngáá kpundɛ ma yélaa nungáá w̃a ngáá tí wɔ́lingai kulá fááw̃a ti yaá. Kɛ́ mbaalaítii taá ɣɛi taá wolílo ti w̃a.

⁹Nyá lɔ ngí ngáá mbaala bakíí laabɔ́lungi. Nuí fíli áá lɛ́ ngéle pélei, maa w̃ɔ́i w̃aawalóngɔ aa ɣɛ́ la aáva aa lɛ, í gúla, í lí í ndaaỹɛ mbo.

¹⁰Ŋuỹa w̃ɔ́i aa va nɔ́ɔ́ ngáá kɛinɔɔ́ í ŋuỹá wó ɛ́ɣɛ ná láá le, í nuu váá ɛ́ɣɛ í nuu ɣɛ́ kíli ỹaaní. Kɛ́ ngí váanga ngáá tí ndɛɛh̃u gítei w̃aahɔ́lɔ, aáva tí maahɔ́lɔ gítei ngáá ngambɔ́ɔ́lɔngɔ kɛɛlɛ́ ngálaa ɣɛ́ mba.

¹¹Nyá lɔ ngí ngáá mbaala w̃ááh̃u belé mɔ́ɔ vandaí. Mbaala w̃ááh̃u belé mɔ́ɔ́ vandaí aa lɛɛh̃úi gúla kɛlɛ́ma mbaalaítii mbɛ.

¹²Nuí sí taa ɣɛ́ taá páva ngáá í mbaalaítii mááh̃u belé, laa ɛi ɣɛ́ lá ɔ́ɔ́ ɣɛ́ ngáá mbaala w̃ááh̃u belé mɔ́i ngi ndá ɔ́ɔ́ ɣɛ ngáá ti ye. Ná áá fulá húwa lɔ áá vá, aa mbaalaítii ndo, í lí ngáá viliỹɛ́. Fulá húwai ná aa va náá í mbaalaítii katá, í tí h̃úúvaha.

¹³Aa viliỹɛ bɔw̃álale aá lɔɔ́ mbaalaítii maah̃ú belé nɔ́ɔ pava haaw̃a léi kɛ́ ɛi ɣɛ beɣéi ti haáw̃a.

¹⁴Nyá lɔ ngí ngáá mbaala w̃ááh̃u béle mɔ́ɔ vandaí. Kíya nɔ́ɔ Kɛɛɣɛi Ngalá ngí kɔ́lɔ ele wáá ngáá ngé aáva nyá bɛ́lɛ nɔ ngí kɔ́lɔ ele wáá ngáá laa, ngimɔ́ɔ́ ngí ní wáálaitii kɔ́lɔ, tiyá bɛ́lɛ ti kɔ́lɔ. Aáva ngí lɛɛh̃úi gúlangɔ kɛlɛma mbaalaítii faaw̃a.

¹⁵

¹⁶Mbaala vekáá lɔ́ ngéya taá mbaala bɔ́ngi sí h̃u. Kɛ ngí vá ngáá ti ye tiyá bɛ́lɛ, aáva taá wólilo má. Ti kpɛ́lɛɛ pá taá bɔ́ naa su tí ɣɛ́ ngáá mbaala bɔ́ ngiláá, tí ɣɛ́ mbaala w̃ááh̃u belé mɔ́ɔ́ yiláa mbú.

¹⁷Háwui í kɛ́nga ni Kɛ́ɛ́ɣɛ longɔ́ ngáá ngé aá waa ngáá ngí lɛ́ɛ́h̃ui gúlanga kɛlɛ́ma ngáá kɛinɔɔ́ ngí mɔ́ɔ ngeɣé volú.

¹⁸Nuu fíli aa na ngáá ɔ́ɔ́ kula ngeyá kɛ́ ngáá kula kɛlɛma ngáá wumáá. Ngakpá tɔ́ ngéya ngáá ngi kula kɛlɛ́ma, ngakpá ngí ngéya ngáá ngí ngeɣé múl̃ɔ volú. Sí lɔ ní Kɛ́ɛ́ɣɛ i ndéngɔ ma ngáá ngí kɛ.”

¹⁹Ná Jísu í faí sítii ndení, Júsuai ti yangí mɔ́ɔ́ wɔlɛí ma.

²⁰Ti bih̃íw̃aa ti ɣɛ́i taa ɣɛ́ ta, “Ỹína nyɔí lɔ́ polú. Ná vólu, kpolówangɔɔ lé. Ndeénii le wúwaa wolílo ndaa wóó w̃a?”

²¹Kɛ́ ná fíli su, ti lɛ́ingaa ti ɣɛ́i taa ɣɛ́ ta, “Nuí ỹína nyɔu áá ɣɛ́ polú, maa w̃ɔ́i ɛi faí sítii nde siỹɛndópoi sí íwaa nde. Aá ɣéle kɛ náa nuí ỹína nyɔí áá ɣɛ́ polú í hómbo í mbóle yeláá yaah̃ú híɣe ma?”

²²Kuí sí taá kúya kɔɔlɛ́ váá l̃aíngi h̃u Jɛlúsɛl̃ɛ taa walái h̃u ti gindó fááw̃a ná h̃uu w̃a ti Hɛ́ɛ́ma Yála Pɛ́lɛi laawói, maa gúi wúyandai i ɣɛ́i naa fóloni ma.

²³Maa gúi w̃aah̃u lɔ́ Jísu í ɣɛ́i áá lɔ́ve tɔvé kpóloo pɛ́lɛ hása walaí sí h̃u tɔ́ɔ́ tolí ngáá Sɔ́lɔmɔ Vɛlɛ Hasaí Hɛ́ɛ́ma Yála Pɛ́lɛi góvii h̃u.

²⁴Kɛ Júsuaitii tí maayelé mbélenga, ti ɣɛ́ ma, “Ní gúla ná kindáá vilíngi sí h̃u yí ngákɛ gíte ngáá ni ye kpésekele, ni ɣɛ́ kɔlɔ́ ná wɔ́li yá lɔ́ yáá ɣɛ́ ngáá Ngalángi Lókolo Mbá W̃ɔ́i.”

²⁵Jísu í ti woo yápoteni, i ɣɛ ti w̃a, “Ngí ndengá wú w̃a kílii kɛ́ wáá loí wɔ́ɔ́ lá ngáá ngé. Káámaa haí sítii ngí ti ɣɛngɔ́ ní Kɛ́ɛ́ɣɛ Ngalángi yákpangi w̃áá véle w̃a tiyá lɔ́ taá ngakɛ́ kpál̃au ngáá kɛ ele wáá ngáá ngé.

²⁶Kɛ́ wáá laí la bɔw̃álale ní wáála bɔngí ta láá ngáá wú ye.

²⁷Ní wáálaitii taá wolílo ngói w̃a, ngí ti wɔlɔ́ aáva taá hítɛ pólu.

²⁸Ngáá kúnafɔ lɛ́ɛ́h̃ui he ti yaá tɛí ha, aáva nuu fíli pa ɛi ti gúla ngéya.

²⁹Ní Kɛ́ɛ́ɣɛ vá í ti hengá ngéya, tɔvengɔ́ɔ́ lé nuí kpɛ́lɛɛ mbá, faalɔ, nuu fíli ɛi ti gúla ní Kɛ́ɛ́ɣɛ yaá.

³⁰Naa ní Kɛ́ɛ́ɣɛ ni ɣɛ kíli i yíla kpé.”

³¹Júsuai tí ɣɛ́i lóóni na, kɛ tí mɔ́ɔ́ kɔtu yeɣé ngéɣenga ngáá tí ló sɔɔmá la ti paa.

³²Jísu í mɔ́ɔ ɣɛ ta, “Ngí káámaa haa bih̃íw̃aa ɣɛ́a áá gúla Kɛɛɣɛí Ngalá ngeyá, káámaa haí sítii su, ngi bɛ́ɣele lɔ wáá ɣɛ́ wú páá faaw̃a ngáá sɔ́ɔ́ndaa?”

³³Tí ngoo yápoteni, ti ɣɛ́ ma, “Faa vánda ɣɛ fáá laa le í yɛ́ ɔ́ɔ́ kɛ nɔ́ɔ ɣɛ́ ni í váá ngáá í hɔ́ɔ́ndaa ngáá kɔtu, kɛ́ sífaa yíwaa tɛɣɛsu gúla ngáá Ngalá. Nuu búsa waa nɔ́ɔ́ ngáá í ye, yíwaa ɣɛ́ yí kula ngáá yá lɔ́ ngáá Ngalá.”

³⁴Jísu í ti woo yápoteni, i ɣɛ ta, “Pɔnɛngɔ́ɔ́ lé wú bɔ́wɔ bɔ́wɔ hávai h̃u ngáá sí Ngalá ngi ɣɛ́ngɔ ta, ‘Wá lɔ́ ngáá ngalángaa.’

³⁵Nungái sítiini Ngalá ngɔ́ɔ́ ngi gééla woí lɔ́ve ngáá ti ye, laá gíte ɔ́ɔ́ nátii tolí ngáá ngalá, aá vá mú suuwɔlɔ́ ngáá Ngalá ndaa wói lɔ́ ngáá tɔɔỹaá kúnafɔ.

³⁶Nyá ní ndái laá, Kɛɛɣɛí Ngalá tɔ í lókolongɔ mbá, í tɔ́ve ngelewu. Ná ná áá ɣɛ́, kɛ ndeé lɔ́ náá hɔ́ɔ́ í kɛ́nga wáá nde ngáá kɛ nyá lɔɔ́ tɛɣɛsu gúla la, baa sífaa náá ngí ɣɛ́a ta nyá lɔ́ ngí ngáá Ngalángi H̃íỹɛndou Loí?

³⁷A waa lá ngáá ngé ná wɔ́lii ngɛ́i ɣɛ ngáá ní Kɛ́ɛ́ɣɛ Ngalángi yéngengi wo.

³⁸Kɛ́ ná ngáá ɣɛ́ ngáá ti wo, kíya bɛ́lɛ wáá lái ngáá ngé, kɛ a lá hɔ́ɔ́ ngáá káámaa háitii ngí ti ɣɛa. Kɛinɔɔ́ wú ngátɔ mba kpál̃au ngáá kɛ naa ní Kɛ́ɛ́ɣɛ ni ɣɛ kíli i yíla kpé pele kpɛ́lɛɛ sú.”

³⁹Ti ɣɛ́i náá múl̃ɔ tí sóu, kɛ́ i laní nɔɔ́ ti yaá láávɛɛ, í li.

⁴⁰Kɛ Jísu i yangáimanga, í njɛí ná levé taá tolí ngáá Jɔ́ɔ́dɛ, í lí mbéi Njɔú í ɣɛ́i wɔ́lɔ áá ngúyai wo na. Naa lɔ náa i ɣɛi na.

⁴¹Nuu bíh̃iw̃aa vá tí liiní Jísu yelé na. Ti ɣɛ́i taá ndé ỹɔw̃ɔ́ ỹɔ́w̃ɔ w̃a táa ɣɛ ta, “Ngúya Wó Mɔ́i Njɔú áá káámaa haa fíli kɛ́ni kɛ́ faí kpɛ́lɛɛ í ndéni kɔwɔ́ato Jísu wa, kpɛ́lɛɛ aá lɔ ngáá tɔɔỹaá.”

⁴²Aáva nuu bíh̃iw̃aa tí láni ngáá Jísu ỹandái na.