Read Bandi NJƆÚ 19 Bible Online

NJƆÚ 19 - Bandi bible

NJƆÚ 19

¹Kɛ Páilɛɛ i ndengá ngi hóyaitii ma ngáá ti Jísu leve ngáá nyɔ́ungɔ.

²Kɛ sóyaitii tí masa mbɔ́ɔ́lɔi bátɛnga ngáá ngali ngáli sapeí, tí njéi Jísu wu mba. Kɛ tí kula biỹángi vúnga ma.

³Tɔ́ɔ́ lɛ́ nɔ́ɔ lá wúú ti ɣɛ́ ma, “Í lɛ́ɛ́h̃ui h̃uu í ɣɛ́ góóh̃a, Júsuai ti W̃ása Ngwalaí,” tí ngolí h̃u bóólɛ.

⁴Kɛ Páilɛɛ í mɔ́ɔ́ gula ngitíí ya Júsuaitii ngelé, i ɣɛ ti w̃a, “A wolílo! Aá béle tɛ ngíwaa váá lá wú yéle kɛinɔɔ́ wá búte wú tɔ wú ɣɛ́ kɔlɔ́ ngáá kɛ ngáá tɔngɔ́ pelé lálangɔ ɔ́ɔ́ ɣɛ la faa ỹɔ́u hááw̃a.”

⁵Ná Jísu i gulaní ngitíí ya, kula biỹángi ma taá ngalí ngáli masa mbɔɔlɔí, kɛ Páilɛɛ i ɣɛa nungáitii ma, “Wú núi belé tɛ.”

⁶Ná Ngala sááɣa gula mbélai ti wútuwɔaitii ɛ́ɣɛ Hɛ́ɛ́ma Yála Pɛ́lɛi w̃aah̃ú béle mbélaitii ti Jísu lɔní, kɛ tiyá tɔ́ taá wóó gúla, táá ɣɛ́ ta, “Kpakpá kúlɔsii w̃a! Kpakpá kúlɔsii w̃a, í ló na í há!” Kɛ Páilɛɛ i ɣɛa ti w̃a, “Wá ɣéle a lii lá wú kpakpá kúlɔsii w̃a, sífaa ngáá tɔ́ngɔ pelé lálangɔ ɔ́ɔ́ ɣɛ́ la faa ỹɔ́u hááw̃a.”

⁷Kɛ́ Júsuai ti ɣɛ́i ma, “Kpéle! Sava lɔ́ ni yaá aáva savaí ná i ndengɔ́ ngáá kɛ siỹɛndópoi sí í sáá w̃ááhɔlɔ, bɔw̃álale i bɔwɔ́ yeɣéngɔ ngáá Ngalángi H̃íỹɛndou Loí.”

⁸Ná Páilɛɛ í ngói sí ỹɛniní tí ndéni, laá ɣéle p̃ɛ́ɛ́ nduwá wála i vuní náa su.

⁹Kɛ i mɔ́ɔ́ yangáimanga pɛ́lɛi wu, í Jísu w̃ɔɔní, i ɣɛ ma, “Míl̃inda w̃ɔ́ɔ́ waa ngáá í ye?” Kɛ́ Jísu va aa ngoo yapoté fíli féni.

¹⁰Kɛ Páilɛɛ í mɔ́ɔ́ ɣɛa ma, “Yí lélenga yɛpɛ fááw̃a ngéle? Yáá kɔ́lɔ ngáá ngakpá tɔ ngéya ngáá ngáá hómbo ngí kɛ ngáá háwu í wúmaa í wó faí sí h̃u, ɔɔ ná láá le, ngí kɛ ngáá háwu ti í bákpa kúlɔsii w̃a yí ló na yí há?”

¹¹Kɛ Jísu i ngoo yápotenga, i ɣɛ ma, “Ngakpá fíli aa í yáá mááh̃u, ná wɔ́lii ɛ́i ɣɛ́ gulangɔ́ Ngalá ngeyá ɔ́ɔ́ hé í yáá. Faalɔ, nuí sí í tókolevengɔ í w̃a, maa w̃ɔ́i ɣéle ngi háa ỹɔí h̃uu í wɔ́ɔ́lɔ í ndái wa.”

¹²Ná Páilɛɛ í ngoí sítii mɛniní i ɣɛi náá áá pele wɔlí mba ngáá í kɛ ngáá háwu Jísu wumáá í wó fái sí h̃u. Kɛ́ Júsuai ti ɣɛ́i taá wóó gúla, táá ɣɛ́ ta, “Ná yáá kɛ ngáá háwu siỹɛndópoi sí wumáá áá wó fái sí h̃u, ná ná áá ɣɛ, kɛ yáá ngáá Lóómi Lɔwɔlɔ́ W̃ása Ngwalaí mbála lopó, sífaa nuí fíli áá bɔwɔ́ yeɣé ngáá aá lɔ́ ngáá masa ngwála kɛ maa w̃ɔ́i i longá Lóómi Lɔwɔlɔ́ W̃ása Ngwalaí laa wú.”

¹³Ná Páilɛɛ í ngói sítiini mɛniní, kɛ i gulaa ngáá Jísu ngitíí ya. Laá Páilɛɛ i li í héi ngi w̃ása kpɔkpɔngí yá mbéi taa náá lolí ngáá Kɔtu Hɛvɛ́ Ỹándai. Nái vá tɔ taá tolí ngáá Gabatɔ Híbulu wói h̃u.

¹⁴I ɣɛi náá ngáá foló yákpangɔ vóto, folói ná va tɔ Júsuaitii tɔ́ɔ́ w̃aahéi wo ngele vékai náa hááw̃a í ɣɛ́i áá vá womá, ti Ngumaawó Kúi wúya. Kɛ Páilɛɛ i ɣɛa Júsuaitii ma, “Wú w̃ása ngwalaí lɔ ngáá sí.”

¹⁵Kɛ tiyá tɔ́ mɔ́ɔ́ taá wóó gúla, táá ɣɛ́ ta, “A lii lá! A lii lá! Wú kakpá kúlɔsii w̃a í ló na, í há!” Páilɛɛ í ti w̃ɔ́ɔ́ni, i ɣɛ ta, “Wú lóngɔɔ lé ngí wú w̃ása ngwalaí váa kulɔ́sii w̃a?” Kɛ Ngala sááɣa gula mbélai ti wútuwɔaitii tí ngoo yápotenga, ti ɣɛ́ ma, “Masa ngwála véka fíli aa ní yaá Lóómi Lɔwɔlɔ W̃asa Ngwalaí vólu.”

¹⁶Kɛ Páilɛɛ i Jísu lokolevénga ti w̃a ngáá tí kpakpá kúlɔsii w̃a. Faalɔ, sóyaitii ti Jísu houni.

¹⁷Jísu gíte i kulɔ́sii ná yéɣeni náa ti ɣɛ́i taa vá kpakpáma ma, ti gúla taa walái h̃uu wa í ló su tí fólo ỹandái ta taa naa lolí ngáá Ngu Kokó Ỹándai. Naí vá tɔ taá tóli ngáá Gɔgɔ́ta Híbulu woí h̃u.

¹⁸Naa lɔ tí kpakpáni ná kulɔ́sii w̃a. Ti mɔ́ɔ́ siỹɛngáá vékaa félengɔ bakpáni kulɔ́siitii ma kooɣaká félengɔi w̃a, laa i lííwai.

¹⁹Kɛ Páilɛɛ va i ndengá tí kɔlɔ guló vɔ́nɛ tí pɛlɛ Jísu gulɔsií wu kɔlɔɔ́ véle. Sí pɔnɛngɔ́ í ɣɛ́i la aá lɔ ngáá sí, “Násɔlɛ w̃ɔ́i Jísu lɔ ngáá sí. Laá lɔ́ í ngáá Júsuaitii ti W̃ása Ngwalaí.”

²⁰Maa gɔ́lɔi sí va pɔnɛngɔ́ í ɣɛ́i lá híí woo sáángɔi sítii su, Híbulu woí, Láti woí, ɛ́ɣɛ Gilísi woí. Júsua bíh̃iw̃aa ti kɔlɔí sí galáni bɔw̃álale mbéinda tí Jísu bakpái ná naa w̃áá áá ɣɛ́i gooh̃á taa walái wa.

²¹Kɛ Ngala sááɣa gula mbélai ti wútuwɔaitii Júsuaitii fááw̃a tí ndénga Páilɛɛ w̃a múl̃ɔ, ti ɣɛ́ ma, “Yaá kɔ́lɔi sí vɔ́nɛ ngáá Júsuai ti Wása Ngwalaí lɔ, kɛ́ aá ɣéle, pɔ́nɛ ngáá siỹɛndópoi sí lɔ í ɣɛ́ngɔ ta aá lɔ́ ngáá Masa Júsuaitii fááw̃a.”

²²Kɛ Páilɛɛ i ɣɛa ti w̃a, “Sí ngí pɔ́nɛnga, laá lɔ́ í ma.”

²³Ná sóyaitii ti vílani Jísu bakpáma kulɔ́sii w̃a, kɛ tí ngi gúlaitii ngeɣéa tí kɔ́lɛ su ngáá seiw̃aá nááningɔ tí ngakɔ́lɛ wɔlɛ́ wa bɛ́kpɛ. Ndoma mbúú lómangi lɔ nɔ́ɔ léi í lói. Ndoma mbúú lómangi sí va, sɔlɔ́ pó fíli áá ɣɛ́i mba, fɛlɛngɔ́ i ɣɛi nɔ́ɔ la ngáá kula hakpá yiláa í séi kɔlɔɔ́ veleí í fólo kɔwɔ́ yángi.

²⁴Kɛ sóyaitii tí ndengá ỹɔw̃ɔ́ ỹɔ́w̃ɔ w̃a, ti ɣɛ́ ta, “A málaa mbalínga, kɛ́ aá ɣéle, a mú falá kúla ma mú tɔ nuí áá maahɔ́lɔ.” Faí sí vá i ɣɛí kɛinɔɔ́ sí pɔnɛngɔ́i Ngala Kɔ́lɔi h̃u í hítɛ nga, sí va pɔnɛngɔ́i aá lɔ́ ngáá sí, “Tí ní gúlaitii ngakɔ́lɛ wɔlɛ́ni wa, tí pɛ́lɛ fála kúlama ní gúlai w̃a.” Maa hái sí vá tɔ nɔ́ɔ́ jɔ́ sóyaitii tí kɛ́ni.

²⁵Nyah̃á lɛ́ingaa ti ɣɛ́i lóóni kulɔ́sii sí béla Jísu bakpángɔ í ɣɛ́i lá ma. Sítii pa ti ɣɛ́i na ti ɣɛ́i ngáá Jísu njéé ɛ́ɣɛ ngi njéé ndéɣei, Kúlopa ỹah̃aí Mɛɛloí ɛ́ɣɛ Mɛɛloí vekaí í ɣɛ́i ngáá Magadála taí h̃u w̃ɔ́i.

²⁶Kɛ Jísu i ngi njéé lɔngá lóóni, í mɔ́ɔ́ volú w̃ɔ́i sí lɔ́ laá Jísu í ɣɛ́i loní la ngwala. Faalɔ, i ɣɛi náa ngi njéé w̃a, “Ndéé, siỹɛ́ngi sí yeɣé nɔ́ɔ ngáá í bɔ́wɔ bɔ́wɔ góó h̃u lóu.”

²⁷Kɛ i mɔɔ ɣɛa volú w̃ɔ́i ná bɛ́lɛ ma, “Nyah̃ápoi sí yeɣé nɔ́ɔ ngáá í bɔwɔ́ bɔ́wɔ njée.” Aáva í síɣe naa táingi ná w̃a, Jísu volú w̃ɔ́i ná i Jísu njéé yeɣéni náá, í lii lá ngi vɛ́lɛ lowaí wu.

²⁸Jísu i ɣɛi nɔ́ɔ kɔlɔ́ ngáá sí kínɛi í ɣɛ́i vaaní kɛ́ fááw̃a ngeleí sí wu, kpɛ́lɛɛ ngú kúlangɔ i ɣɛi náá la. Kɛ i ndengá, i ɣɛ ta, “Njɛ w̃ɔníí lɔ má.” Aáva i sí léni kɛinɔɔ́ sí pɔnɛngɔí Ngala Kɔ́lɔi h̃u í hítɛ nga.

²⁹Nyaaká ta i ɣɛi ná ndaahéngɔ ngáá ndɔɔ labái. Tí ŋáni ta yeɣéni kɛngɔ́ nyɔ́ɔ́h̃u ti njéi ndɔɔ labái ná wu, tí ngíli ŋani ta ya taa tolí ngáá héésɔi, tí maa ndɔ́i lɛ́ lá í fólo Jísu la.

³⁰Kɛ Jísu va i maa lɔ́i h̃ɔ́fɔlɛnga su, i ɣɛ ta, “Faí sí kpɛ́lɛɛ ngúngi gúlanga.” Í wu máa hítɛ, í ha.

³¹Kɛ Júsuai ti wútuwɔai tí líínga, tí ndé Páilɛɛ w̃a ngáá ná í kɛ kái tí nungái nátiini kpalái yalé ngále[12] ti ɣɛi kulɔ́sii w̃a. Ná vólu, tí tí vúw̃aitii kula kulɔ́siitii ma, bɔw̃álale Ndɔwɔ́ Wála Hóloi i ɣɛi ngáá ná aáva taá ɣɛ́i loí puw̃áitii tɔɔ ló kulɔ́siitii ma ngele vekái ɔ́ɔ́ wó í ɣɛ́i ngáá Ndɛɛlɛmbó Ngála Fɛli Fóloi. Aáva Ndɛɛlɛmbó Ngála Fɛli Fóloi ná kái kái i ɣɛi ngáá Ngala fɛ́li fólo wala léélaa.

³²Faalɔ, sóyaitii tí lííni naá, tí nuu félengɔitii kpaláitii ngalé bɛ́kpɛ tiyɛ́i ti bakpángɔ í ɣɛ́i la kulɔ́siitii ma Jísu gaká félengɔi w̃a.

³³Kɛ́ ná tí folóni Jísu w̃a, kɛ tí tɔ́nga ngáá saangɔ́ i ɣɛi náá la kílii. Faalɔ, taá mɔ́ɔ́ kpaláitii ngáleni.

³⁴Kɛ́ ná fíli su, sóyai ti tá yílaa i ngi bálai wálani Jísu gaká ya í kputá. Ngamá nɔ́ɔ, kɛ ŋaaw̃ɔini ngaa njɛí ti gúlanga na.

³⁵Aáva siỹɛ́ngi sí í náá lɔní í faa lénga kɔwɔ́ato mba laáva ngí háá le ngói lɔ ngáá tɔɔỹaá. Aáva i suuwɔlɔ́ ngáá sí í ndéngɔ tɔɔỹaá lé laáva i hééle woí sí léngɔ ngáá wá bɛ́lɛ wú la la.

³⁶Faí sítii pa ti híyani kɛinɔɔ́ sí pɔ́nɛngɔ Ngala Kɔ́lɔi h̃u ti hítɛ nga ngáá sí í ɣɛ́i ta, “Kaalɛ́i ta yiláa kéle tɔ aa vaamá yálema.”

³⁷Í mɔ́ɔ́ ɣɛ ta, “Nungái taa ɣɛ taa nuí síí w̃ɔ́i belé tí kpútangɔ ngáá kpalái.”

³⁸Ná fái sí í gúlani su, siỹɛndópoi ná tɔ́ɔ́ ɣɛ́ ma Joosɛ́ í ɣɛ́i ngáá Alemátiya taa h̃u w̃ɔ́ɔ, i liiní í Jísu vuw̃aí h̃úúhɛli Páilɛɛ w̃a. Joosɛ́ va i ɣɛi ngáá Jísu volú w̃ɔ́ɔ́ ndɔɔwu h̃ú, bɔw̃álale i ɣɛi áá lúwa Júsuai ti wútuwɔaitii mba. Páilɛɛ luw̃áni ma ngáá Joosɛ́ í li í Jísu vuw̃aí yéɣe.

³⁹Siỹɛndópoi sí tɔ́ɔ́ ɣɛ́ ma Nekodímɔ í lííni wɔ́lɔ hɔ́wɔ ta Jísu yelé ngáá kpindíi, i bahaní náa Joosɛ́ wa ngáá tí lí Jísu bɔluma. Sɛ́ndi wulɔ ta i ɣɛi ngeyá míí kíli i ɣɛi ngáá p̃áu hɔ́ndɔ ngilaa kɛɣɛ́laa. Sí félengɔi tɔ́ɔ́ supu ti sɛ́ndi wulɔí ná bátɛ la ti laahéingaitii ti ɣɛ́i ngáá mɛ́i ɛ́ɣɛ aloi.

⁴⁰Ti félengɔ ti Jísu vuw̃aí yéɣeni náa, tí maayelé mbéle ngáá kula wóle pándaitii ti ɣɛ́i sɛ́ndi wulɔí vúi su sífaa, Júsuai tí nda vúw̃a bɔ́lu kíli í ɣɛ́i ngáá na.

⁴¹Ỹandái mbéi va ti ɣɛ́i Jísu bakpái na kulɔ́sii w̃a kpelé ta i ɣɛi na. Kpeléi ná h̃uu vá tɔ kambá níína í ɣɛ́i na í ɣɛ́i ngáa kokongí táa nɛ́ɛ́ ɣɛi nuu fíli kpɔ́lui su.

⁴²Maa yélei lɔ í ɣɛ́i áá va womá ɔ́ɔ́ ɣɛ ngáá Júsuai ti Lɛ́ɛ́lɛmbo Ngála Fɛli Fóloi, aáva maa gámbai w̃aa áá ɣɛi gooh̃á maa ỹándai ná wa ti ɣɛ́i na. Faalɔ, ti Jísu bɔluní nɔ́ɔ su.