Read Bandi NJƆÚ 2 Bible Online

NJƆÚ 2 - Bandi bible

NJƆÚ 2

¹Na foló félengɔ i gúlani su, sawa kélei w̃a, nyah̃á wɔ́li kúu wuyandáá i ɣɛi taí sí h̃u taa naa lolí ngáá Kéna, Galéli lataí h̃u. Jísu njéé va i ɣɛi na.

²Jísuni ngaa polú yélai bɛ́lɛ nɔ ti ɣɛ́i ti lolí nyah̃á wɔlí kuí ná w̃a.

³Ná naá ndɔí kpɛ́lɛɛ í ɣɛ́i vílani, kɛ Jísu njéé i vaangá ngelé, i ɣɛ ma, “Ndɔí kpɛ́lɛɛ i vilánga.”

⁴Jísu i ɣɛ ma, “Yálaa síya velé ɣɛ ngáá nge ndée, ní táingi aa nɛɛ folói ma.”

⁵Kɛ Jísu njée va i ndengá ndɔɔ yakɔ́lɛ wɔlɛ mbélai ma, i ɣɛ ta, “Sí fíli Jísu áá ndé wú w̃a ngáá wú kɛ, a kɛ.”

⁶Júsuai tí Yála fɛli kílii h̃u, savaitii tí ɣɛi na bɛ́kpɛ ti yaa kíya tɔ́ɔ́ nguyaí wo. Maa háwui ná hááw̃a, fɛí sí tɔ́ɔ́ kpatɛ́ ngáá kɔtuí njɛ vú fááw̃a su ti ɣɛ́i na wɔhíta, ti wɔ́lɔ wɔ́lɔngɔ. Ngiláángi fíli, tɛingaa libijɔúŋ nááningɔ ɔ́ɔ́ ndɔ́ɔ́lungɔ lɔ ɔ́ɔ́ vú su.

⁷Kɛ Jísu i ɣɛa ndɔɔ yakɔ́lɛ wɔlɛ́ mbélai ma, “A fɛí sítii ndaahé ngáá njɛí.” Nátii pa tí fɛítii ndaahéi náa ngáá njɛí nɛ́ki nɛ́ki.

⁸I mɔ́ɔ́ ndení ti w̃a, i ɣɛ ta, “A ta wulí náa, wú líí la kuu wúya ngéngengi wutúwɔɔ w̃ɔ́i yelé.” Nátii pa ti híyai ngáá ndaa woo.

⁹Njɛí ná i ɣɛi náa vótei ngáá ndɔí. Ná maa gúú wuya ngénge ngutúwɔɔ w̃ɔ́i í kpélei, aa ɣɛi maa ndɔ́i híɣe w̃aa wɔ́lɔ, kɛ́ ndɔɔ yakɔ́lɛ wɔlɛ́ mbélai ti ɣɛ́i kɔlɔ́ bɔw̃álale tiyá lɔ́ ti ɣɛ́i maa njɛ́i wulíi. Kɛ ngenge ngútuwɔɔ w̃ɔ́i i nyah̃á wɔ́li mɔ́i lolínga,

¹⁰í yɛ́pɛ ngelé i ɣɛ ma, “Nuu áá va ngáá ndɔí sí hése pangɔ ná naá nungái taa ɣɛ́ ndɔí bɔ́lei ká ká, nuu áá vá náá ngáá ndɔí sí ngakpangɔ́ ɛ́i ɣɛ́ la. Kɛ́ yí ndɔɔ vandái lónga vólo h̃u í ló su sí h̃uí í fólo!”

¹¹Jísu i maa gáámaa haí ɣɛ́ni Kéna taí h̃u, Galéli lataí h̃u. Laá vá tɔ i ɣɛi ngáá hésendaa gaamaa haa í kɛ́ni. Naa lɔ í ngi yákpangi yaah̃u ɣɛ́i ná. Faalɔ, polú yélaitii tí laní la.

¹²Ná naá faí sí i gulaní su, kɛ Jísuni ngaa polú yélaitii ɛ́ɣɛ ngi njéé ɛ́ɣɛ ngi ndéɣeaitii tí liingá Kapɛ́ɛ́niya taí h̃u. Naa vá tɔ tí nyii félengɔ wói na.

¹³Júsuai ti gúi sí taa ɣɛ́ ma Ngumaawó Kúi, i ɣɛi náá bɛɛní mba, kɛ Jísu i liingá Jɛlúsɛl̃ɛ taa walái h̃u.

¹⁴Naa lɔ í nungáá w̃áálei na Hɛ́ɛ́ma Yála Pɛ́lɛi góvii h̃u táá toŋaníaitii maa híya na, nikaní, mbaalaní ɛ́ɣɛ poovóóngaitii. Ná vólu, kápa sinji mbélaa ti ɣɛ́i ná, tíwaa kápangai sinji hinjí.

¹⁵Faalɔ, i ngisa kɔ́ngitii kpatɛní ngáá kpámgbai, í toŋaníaitii kpɛ́lɛɛ kúla naa wa ngáá ti bɛndáá, sítii ti ɣɛ́i ngáá mbaala ɛ́ɣɛ nikaítii. Í mɔ́ɔ́ kápa sinji mbélai ti lééveitii tóka lóka, ti gápangaitii tí váha fáha.

¹⁶Sítii ti ɣɛ́i taá poovóóngai maa híya kɛ i ndéa gíte ti w̃a kpáŋ, i ɣɛ ta, “A ti gúla mbéi wa! A waa ní Kɛ́ɛ́ɣɛ Ngalángi vɛ́lɛi ɣɛ́ ngáá ndɔwɔ́ bála nga!”

¹⁷Kɛ́ Jísu volú yélai ti giséingɔ i ɣɛi lá sí w̃a í ngáá Ngala Kɔlɔ́ vɔnɛngɔ́i aáva tɔ ngáá sí, “Í vɛ́lɛi háa wala vilingɔ́ lé ndíí vólu, aa ɣɛ áá mɔ́ kíya kpéiŋ ngɔmbu í na.”

¹⁸Kɛ ngutuwɔ́ yélai ti Júsuaitii su tí lía Jísu yelé, ti mɔɔní, ti ɣɛ́ ma, “Káámaa haí bɛɛ́ lɔ́ náa yáá kɛ áá ngákɛ ngáá ni ye ngáá kɛ faí sí yí kɛ́ngɔ, aá lɔ́ pele w̃a ngáá yí kɛ?”

¹⁹Kɛ Jísu i ti woo yápotenga, i ɣɛ ta, “A Hɛ́ɛ́ma Yála Pɛ́lɛi sí woló, aáva ngáá to volú foló sáángɔ laa lówah̃u.”

²⁰Tí ngoo yápoteni, ti ɣɛ́ ma, “Ti Hɛ́ɛ́ma Yála Pɛ́lɛi sí lóngɔ fowó vúú nááningɔ maah̃úú ngɔ́hitangɔ laa lówah̃u. Aá lɔ yí ɣɛ́ yáá to volú foló sáángɔ laa lówah̃u nɔ́ɔ?”

²¹Kɛ́ aáva Hɛ́ɛ́ma Yála Pɛ́lɛi kái kái Jísu í ɣɛ́i áá yɛ́pɛ mba, i ɣɛi ngáá kpɔwɔ́ bɔ́wɔ búsai.

²²Ná va tɔ i kɛ́ni ná í wuyoɣéi saí h̃u, polú yélai tí gingí lói su ngáá ɔ́ɔ́ ɣɛ́ áá sí le. Faalɔ, tí láni ngáá Ngalá Kɔ́lɔ vɔnɛngɔ́i ɛ́ɣɛ sí Jísu ɔ́ɔ́ ɣɛ́ áá nde.

²³Ná h̃u Jísu í ɣɛ́i Jɛlúsɛl̃ɛ taa walaí h̃u Júsuai ti Wumááwo Kúi ná h̃u, nuu bíh̃iw̃aa ti láni lá ná tí tɔ́ni áá káámaa haítii kɛ.

²⁴Kɛ́ Jísu aa ɣɛi laní ngáá ti ye ɔ́ɔ́ bɔwɔ́ gula kɛlɛ́ma ti yɛ sífaa i nuu kpɛ́lɛɛ kí ma haa wɔ́lɔ.

²⁵Nuu ɛ́i belé lo mɔ́ɔ́ faa léma ma kɔwɔ́ato nuu véka wa bɔw̃álale i ɣɛi nungái ndií h̃uu haítii kɔlɔ́.