Read Bandi NJƆÚ 20 Bible Online

NJƆÚ 20 - Bandi bible

NJƆÚ 20

¹Ná í ɣɛ́i ngáá Tɛnɛ́mai ngelesú bíndi, Mɛɛloí í ɣɛ́i ngáá Magadála taí h̃u w̃ɔ́i i liiní koko kambái ŋál̃a, í tɔ ngáá kɛ kɔtuí í ɣɛ́ngɔ kambái la sɛkpɛ́ngɔ i ɣɛi la.

²Faalɔ, í liiní ngáá viliỹɛ́ mbéinda Sáimɔ Pítɛni ngaa Jísu volú w̃ɔ́ɔ́ vekaí ná Jísu í ɣɛ́i loí la ngwala tí ɣɛ́i na, i ɣɛ ti w̃a, “Tí Ndemɔí Jísu gulangá mbéinda kpɔlungɔ́ í ɣɛ́ngɔ la na. Mbéinda va ti lííngɔ lá na, naá naa wɔlɔ́.”

³Kɛ́ Pítɛ ɛ́ɣɛ Jísu volú w̃ɔ́ɔ́ vekaí ná tí pele hóunga ngáá ti lí kambái ná ŋál̃aa.

⁴Tí félengɔ tí ɣɛ́i taa víliỹɛ kɛ́ Jísu volú w̃ɔ́ɔ́ vekaí ná vá i viliỹɛ́i í lɔ́ve Pítɛ wa, faale, laá hése i folóni maa gámbai la.

⁵Kɛ i wu máá laa, í wɔ́lɛ kambái h̃u, í kulaí ná lɔ́ ti ɣɛ́i Jísu bɔluní su. Kɛ́ áa walaní maa wóko kambái h̃u.

⁶Sáimɔ Pítɛ va lɛ́i í ɣɛ́i polú, kɛ i vaangá, í wála nɔ́ɔ ngamá kokongí h̃u, i kulaí ná lɔ vúúni na.

⁷I mɔɔ kula vékai sí lɔ́ni ngilingɔ́ í ɣɛ́i la Jísu wungí w̃a, í lááni fokóngɔ. Aáva taá ɣɛi lái ỹanda yílaa taa kula wolé pándai mbelé mbélengɔ í ɣɛ́i lá Jísu w̃a.

⁸Kɛ Jísu volú w̃ɔ́ɔ́ vekaí ná í folóni hése kambái la, laá bɛ́lɛ kɛ i walangá, í náá lɔ, laáva í lá la.

⁹Kɛ́ ná fíli su, taá ɣɛ́i nɛ́nɛ kpɛ́ Ngala Kɔ́lɔi sí laa wói yatɔ́ni mba i ndéni ngáá kɛ Jísu áa yooɣé saí h̃u.

¹⁰Kɛ Jísu volú yélaitii ti yangáimanga ti góviitii su.

¹¹Mɛɛloí laá i ɣɛi lói kambái la, íwaa wɔ́lɔ. Ná í ɣɛ́i áá wɔ́lɔ, i wu máá laí ngáá í wɔ́lɛ kambái h̃u.

¹²Kɛ i maléka félengɔ lɔ́nga, ti w̃ááyilingɔ ngáá kúla woléngi, ti héini mbéinda ti ɣɛ́i Jísu vuw̃aí laí na. Ngiláángi i ɣɛi héi Jísu wu kɔlɔ́ɔ veleí, pekaí i héi ngáá kɔwɔ́ héɣa h̃ú vélei.

¹³Kɛ nátii ti mɔɔningá, ti ɣɛ́ ma, “Mu mbálai, ndeénii le yíwaa wɔ́lɔ?” I ti woo yápoteni, i ɣɛ ta, “Ti Ndémɔi Jísu vuw̃aí gúlanga mbéi wa, nyáá va ngáá kɔ́lɔ mbéinda tí lííngɔ lá na.”

¹⁴Ná í sí léni, kɛ i votengá, í Jísu lɔ lóóni, kɛ́ aa ɣɛi kɔlɔ́ ngáá Jísu le.

¹⁵Kɛ Jísu i mɔɔninga, i ɣɛ ma, “Mu mbálai, ndeé wɔlɔ́ lɔ yíwaa mbo? Ele lɔ yíwaa kɔlí?” Kɛ́ i ɣɛi Mɛɛloí gi má ngáá kɛ kpelé w̃ɔ́i le, kɛ i ɣɛa Jísu w̃a, “Kawálai, ná yáá ɣɛ ngeɣéa mbéi, nde má mbéinda yáá ɣɛ lííngɔ la na, kɛinɔɔ́ ngí lí na ngí ngeɣé.”

¹⁶Kɛ Jísu i ɣɛa ma, “Mɛɛloí!” Kɛ Mɛɛloí i votengá Jísu wa, i ɣɛ ma Híbulu wói h̃u, “Láboni!” Ná wúi waa ngáá Kaamɔ́ɔ́.

¹⁷Jísu i ɣɛi ma, “Yaa hóu mbá yɔ́ɔ́ kpá mbéinda sífaa, ngáá nɛ́ɛ́ yangáimai ní Kɛ́ɛ́ɣɛ yelé. Kɛ́ aá ɣéle, lí ni mbálangaitii ngelé, yí nde ti w̃a ngáá kɛ nyá lɔ́ɔ yangáima ní Kɛ́ɛ́ɣɛ yelé, lɛ́i í ngáá wú Kɛ́ɛ́ɣɛi, ní Yálangi, lɛ́i í ngáá wú Yálangi.”

¹⁸Kɛ Mɛɛloí Magadála tai h̃u w̃ɔi i liingá, í nde Jísu vólu yélaitii ma, i ɣɛ ta, “Ngí Ndemɔí Jísu lɔngá.” Ná vólu, í mɔ́ɔ́ Jísu woo vili ngói le ti w̃a.

¹⁹Ná í ɣɛ́i ngáá Tɛnɛ́mai kpindíi, Jísu volú yélai ti yatɛ́ngɔ i ɣɛi lá mba pɛlɛ́i wu sɔwɔ́ngitii pilingɔ́ ti yɛ, sífaa, ti ɣɛi taa lúwa Júsuai ti wútuwɔaitii mba. Kɛ Jísu i vaangá, í lo ti liiwáá, í laalí ti w̃a,

²⁰í lokoítii ngakɛ́ ngáá ti ye ɛ́ɣɛ kaká yángi. Jísu volú yélai pa ti góóh̃unɛɛngɔ í ɣɛ́i la í lɔ́ve kɛɛh̃ú ma ná tí yaah̃ú laí Ndemɔí Jísu w̃a.

²¹Ná Jísu i mɔ́ɔ laalíni ti w̃a, kɛ i ɣɛ́a ta, “Kíya nɔ́ɔ ní Kɛ́ɛ́ɣɛ í tɔ́vengɔ, ngimɔ́ɔ́ nɔ́ɔ nyá bɛ́lɛ ngáá wú lɔ́ve.”

²²Kɛ i laa hɛ́fɛngi vungá ti w̃a, i ɣɛ ti w̃a, “A Hɛ́ɛ́ma Ỹínangi w̃aahɔ́lɔ.

²³Ná wáá nuu fíli ngi háá ỹɔítii súúhaalo, ti h̃úúhaa áá lo, kɛ́ ná wɔ́i ɣɛ ti h̃úúhaaloni, ti h̃úúhaa ɛ́i lo.”

²⁴Jísu volú yélaa púúngɔ maah̃úú félengɔitii ti tá yiláá sí tɔ́ɔ́ ɣɛ́ ma Tɔmɔsí lɛ́i mɔ́ɔ́ tɔ́ɔ́ ɣɛ ma Heelangí aa ɣɛi na ná h̃u Jísu í vááni ngi mbálangai ngele.

²⁵Ná ná í gúlani su, kɛ Jísu volú yélai nátii tí ndengá Tɔmɔsí ɣélei w̃a, ti ɣɛ́ ma, “Ní Ndemɔí Jísu lɔngá.” Tɔmɔsí va i ti woo yápotei, i ɣɛ ti w̃a, “Kɛ léi ngí lɔ́ndima vongí lɔ ngeyáitii ngí lúba naítii mba, ná vólu, ngí lúba kaká yángi wa ti ɣɛ́i kputái na ngáá kpalái, kɛ́ ná láá le, ngɛ́i lá lá.”

²⁶Ná ndɔwɔ́ yiláa ngi gulaní su mɔ́ɔ naa w̃a, Jísu volú yélaitii ti yatɛ́ngɔ i ɣɛ́i lá mba ỹanda yílaa pɛlɛ́i wu. Tɔmɔsí bɛ́lɛ i ɣɛi na aáva ti ɣɛ́i sɔwɔ́ngitii piliní su ti w̃aala. Kɛ́ ná fíli su, Jísu i gulaní nɔ́ɔ, í ló ti liiwáá, i laalí ti w̃a.

²⁷Kɛ i ɣɛa Tɔmɔsí w̃a, “Loko beɣái lúba lɛ́ɛ ngéyaitii mba, ná vólu, yí lúba kaká yángi wa, yí bé náa nda tálai wa, ndangí í ɣɛ í h̃u.”

²⁸Kɛ Tɔmɔsí í Jísu woo yápotenga, i ɣɛ ma, “Yá lɔ yí ngáá Ndémɔi ɛ́ɣɛ ní Yálangi!”

²⁹Kɛ Jísu i ɣɛa ma, “Yí laa lá sífaa, yí tɔ́nga, kɛ́ aa lɔ ngáá faa vánda sítii fááw̃a taá nɛ́ɛ́ tɔ́ni aáva ti langɔ́ la.”

³⁰Jísu i káámaa haa bih̃i bih̃i kɛní volú yélaitii ngaah̃ú w̃a. Maa hái nátii kɔlɔ vɔ́nɛngɔ laa le kɔwɔ́ato ti wa kɔlɔí sí h̃u.

³¹Kɛ́ sítii pɔ́nɛngɔɔ lé nɔ́ɔ ngáá wú lá lá ngáá Jísu lɔ í ngáá Ngalángi Lokoló Mbá W̃ɔ́i lɛ́i í ngáa Ngalángi H̃íỹɛndou Loí. Aáva ná ndángi ná áá ɣɛ wú h̃u, wáá ndɛ́ɛ́h̃u gítei w̃aahɔ́lɔ laá máa véle w̃a.