Read Bandi NJƆÚ 21 Bible Online

NJƆÚ 21 - Bandi bible

NJƆÚ 21

¹Ná sí i gulaní su, Jísu i mɔɔ gulaí volú yélaitii ngááh̃u. I vaaní ti yelé njɛ wálai sí béla taa tolí ngáá Tebɛliyɔ. Maa hái híya velé lɔ ngáá sí.

²Jísu volú yélaa lɛingáá ti yatɛ́ngɔ í ɣɛ́i la mba ỹanda yílaa. Sítii pa ti ɣɛ́i na ti laahéingitii ti ɣɛ́i ngáá, Sáimɔ Pítɛ ɛ́ɣɛ Tɔmɔsí lɛ́i tɔ́ɔ́ tolí ngáá Heelangí ɛ́ɣɛ Natáániyɔ lɛ́i í gúlani Kéna taí h̃u í Galéli lataí h̃u ɛ́ɣɛ Sɛ́bɛdi h̃iỹɛndou lengáitii ɛ́ɣɛ Jísu volú yélaa vekaa félengɔitii.

³Kɛ Sáimɔ Pítɛ i ɣɛa pekaítii ma, “Nyá lɔɔ lí ngí nyɛɛ mbɛ.” Tiyá bɛ́lɛ ti ɣɛ́ ma, “Niỹá lɔɔ́ to í wa.” Kɛ tí liingá tí víli kelengí h̃u njɛí ya, kɛ́ taá nyɛɛ fíli sóuni kpɔkɔ́i na.

⁴Ngelendáá lɛtɛngí kɛ Jísu i vaá, í lo maa yɛ́ wálai laa bákala su, kɛ́ polú yélaitii taá ɣɛ́i kɔlɔ́ ngáá kɛ Jísu le.

⁵Kɛ i ti lolínga, i ɣɛ ti w̃a, “Mu mbálangaa, wú nyɛɛ hóunga?” Tí ngoo yápote, ti ɣɛ́ ma, “Naá nɛ́ɛ ŋani fíli sóuni.”

⁶Kɛ i ɣɛa ti w̃a, “A wú wów̃ai víli ngáá yisa h̃u vélei aáva wáá nyɛɛ hóu su.” Kɛ nátii pa tí tí wów̃ai vílinga ngáá naa véle, aáva taá mɔ́ɔ́ hombói tɔɔ́ mbow̃aí lalá keléngi h̃u bɔw̃álale ngwala laahéngɔ i ɣɛi la ngáá nyɛí.

⁷Jísu volú w̃ɔ́i ná Jísu í ɣɛ́i loí la ngwala, i ɣɛi Pítɛ w̃a, “Ndemɔí Jísu le.” Ná Sáimɔ Pítɛ í mɛniní ngáá kɛ Ndemɔí Jísu i ɣɛi la, kɛ i ngi lóma maah̃u lómangi vúnga w̃a bɔw̃álale kulangɔ́ i ɣɛi lá ma, i víli naá njɛí ya.

⁸Jísu volú yelaa vekaítii ti toní mba keléngi h̃u, táá váá mbow̃aí lála ndaahéngɔ ngáá nyɛí sífaa ti w̃áá áá ɣɛi gooh̃á kaséngi wa, i ɣɛ́i nɔ́ɔ ngáá kɔwɔ ya hɔ́ndɔ sáángɔ nyɔkɔ́ bɛ́lɛ.

⁹Na ti fóloni kaséngi ya, ti bile lɛ́ingaa lɔ́i na, tí nyɛi lɔ lái ngɔmbu lekái ya.

¹⁰Kɛ Jísu i ɣɛa ti w̃a, “A vá ngáá nyɛí ta wú sóungɔ kíya suu í na.”

¹¹Kɛ Sáimɔ Pítɛ i lɛɛngá keléngi h̃u, í mbow̃aí lála kaséngi ya. Ndaahéngɔ ngáá nyɛɛ walá wála hɔ́ndɔ ngiláá puu ndɔ́ɔ́lungɔ maah̃úú sáwa. Kíya bɛ́lɛ ti bih̃íngɔ wala i ɣɛi lá, mbow̃aí aa waliní.

¹²Kɛ Jísu i ɣɛa ti w̃a, “A vá, a mú laaỹɛ́.” Maa lííba ngáá heí ti tá yílaa kéle tɔ mbɛ ɔ́ɔ́ mɔɔní ɔ́ɔ́ ɣɛ́ ma, “Ele wáá ngáá í ye,” bɔw̃álale ti ɣɛ́i nɔ́ɔ kɔlɔ́ ngáá Ndemɔí Jísu ɣɛi la.

¹³Kɛ Jísu i liingá, í biléi yeɣé, í fé ti yaá, í mɔ́ɔ́ nyɛí bɛ́lɛ ngéɣe, í fe ti yaá.

¹⁴Jísu gulalaí volú yélaitii ngááh̃u sawa kélei ɣɛi ngáá sí mbuyoɣéngɔi w̃a saí h̃u.

¹⁵Ná naá ti ɣɛ́i viláni ndaa ỹɛ́ngi woma, kɛ Jísu i Sáimɔ Pítɛ w̃ɔɔningá, í ɣɛ ma, “Njɔú h̃íỹɛndou loí Sáimɔ, í lóngɔɔ lé ngáá ngé í lɔ́ve ndóngi wa sítii kpɛ́lɛɛ ti su ngáá ngé?” Ná i ɣɛ ma, “Eeí, Kɛɛɣɛ́, yí kɔlɔ́ ngáá ndóngɔɔ lé ngáá í ye.” Jísu i ɣɛ ma, “Pólu yélaitii maah̃ú béle kíya mbaala w̃ááh̃u béle mɔ́i áá ngi wáálaitii mááh̃u béle.”

¹⁶Naa héiw̃aa héle kélei i ɣɛi ngáá sí náa Jísu í mɔ́ɔ́nini í ɣɛ́i ma, “Njɔú h̃íỹɛndou loí Sáimɔ, í lóngɔɔ lé ngáá ngé?” Ná í ngoo yápote, i ɣɛ ma, “Eeí, Kɛɛɣɛ́, yí kɔlɔ́ ngáá ndóngɔɔ lé ngáá í ye.” Kɛ Jísu i ɣɛa ma, “Pólu yélaitii maah̃ú béle kíya mbaala w̃ááh̃u béle mɔ́i áá ngí wáálaitii maah̃ú béle.”

¹⁷Naa héiw̃aa hawa kélei i ɣɛi náá ngáá sí Jísu í mɔ́ɔ́ mɔɔniní, i ɣɛ ma, “Njɔú h̃íỹɛndou loí Sáimɔ, í lóngɔɔ lé ngáá ngé?” Kɛ Pítɛ í w̃aaw̃áánunga bɔw̃álale naa héiw̃aa i ɣɛi náá sáwa Jísu íwaa mɔɔní nɔ́ɔ kélei ngáá ná wɔlí Pítɛ lóngɔ i ɣɛi lá lá. Faalɔ, Pítɛ í ngoo yápoteni náa, i ɣɛ ma, “Kɛɛɣɛ́, yí faa kpɛ́lɛɛ kɔ́lɔ, yí kɔlɔ́ nɔ́ɔ ngáá ndóngɔɔ lé ngáá í ye!” Kɛ Jísu i mɔɔ ɣɛa ma, “Pólu yélaitii maah̃ú béle kíya mbaala w̃ááh̃u béle mɔ́i áá ngi wáálaitii maah̃ú béle.”

¹⁸Kɛ Jísu i mɔɔ ɣɛa Pítɛ w̃a, “Ngí tɔɔỹái le í w̃a, ná yí ɣɛ́i ngáá tɛɛniiná yɔ́ɔ́ bɔwɔ́ w̃aayíli, yí li mbéi fíli yɔ́ɔ́ ɣɛ́ loí yí lí na. Kɛ́ ná yáá bókolo, yáá lokoí h̃uuhulómbo, nuu véka í í bɛ́tii yíli, í li ngáá í ye mbéi yɛ́i ɣɛ́ lói yɔ́ɔ́ lí na.”

¹⁹Jísu va i faí sí léni ngáá í ngakɛ́ kíya Pítɛ í ɣɛ́i áá va haamá. Ná vólu, kíya maa sái ná í kɛ́ngɔ ngáá háwu Ngala ngi ngufema w̃ááhɔlɔ. Kɛ Jísu í ɣɛa Pítɛ w̃a, “Hitɛ pólu!”

²⁰Pítɛ i wɔ́lɛni náa vólu í Jísu volú w̃ɔ́ɔ́ vekaí ná lɔ áá va lɛ́i Jísu longɔ́ í ɣɛ́i lá ngwala. Laá lɔ í wú pɛlɛni Jísu wa i mɔ́ɔ́ni ná h̃u ti ɣɛ́i taá laaỹɛ́, í ɣɛ ma, “Kɛɛɣɛ́, ele lɔ íwaa vá í lókolevema?”

²¹Laá lɔ ná Pítɛ í wɔ́lɛi vólu í tɔní, í mɔɔningí wóni ngáá Jísu, i ɣɛ ta, “Kɛɛɣɛ́, siỹɛndópoi sí va?”

²²Jísu i ngoo yápoteni, i ɣɛ ma, “Ná ngáá ɣɛ loí í ló ndɛɛh̃ú h̃u í lo su ngí va, ndeé lɔ áá í nda víli ná h̃u? Í ndái waa ngáá kɛ yí hítɛ pólu.”

²³Í séi sí wa, tɛ́ɣɛ tɛɣɛ́ ngói ɣɛi su Jísu volú yélai ndiiwáá ngáá kɛ Jísu volú w̃ɔ́i ná aa vaamá haamá. Kɛ́ Jísu va aa ndení ngáá ná aa vaamá haamá. Sí í ndení i ɣɛi ngáá sí, í ɣɛ́i ta, “Ná ngáá ɣɛ loi í ló ndɛɛh̃ú h̃u í ló su ngí va, ndeé lɔ áá í nda víli ná h̃u?”

²⁴Jísu volú w̃ɔ́i sí va tɔ í faa léngɔ kɔwɔ́ato faí sítii mba, ná volú, í tí vɔ́nɛ. Aáva ní súúwɔlɔ ngáá faí sítii í ndéngɔ, tɔɔỹaá wáá ngáá ti ye.

²⁵Aáva faa bíh̃i bih̃i tɔ́ na múl̃ɔ Jísu i ti ɣɛní. Bele ti yilá ngílangi kpɛ́lɛɛ pɔnɛngɔ́ i ɣɛi la, ndángɔɔ lé lá ngáá kɔlɔí nungái tɔ́ɔ́ ɣɛ́ pɔnɛí, pumáá ɛ́i belé hɔ́lɔ ngeleí sí wu kínɛi.