Read Bandi NJƆÚ 4 Bible Online

NJƆÚ 4 - Bandi bible

NJƆÚ 4

¹Kɛ Júsuai sítii taa ɣɛ́ ti w̃a Falósiai tí mɛ́ninga ngáá Jísu lɔɔ́ nuu bíh̃iw̃aa w̃ááhɔlɔ áá nguyaí wó ngáá ti ye áá ti ɣɛ́ ngáá volú yélaa, í lɔ́ve Njɔú wa.

²Kɛ́ aáva Jísu gítei aa nguya woí ngáá nuu fíli kɛ léi polú yélai ti ɣɛ́i taá nguyaí wo ngáá nungái.

³Aáva ná Jísu i faí sítii mɛniní nungái ti ɣɛ́i taá nde kɔwɔ́ato mba, i gulaní Judíya lataí h̃úú wa í yángaima mɔ́ɔ́ Galéli lataí h̃u.

⁴Ndiiw̃ái Galéli, i lɔvení ngáá Samááliya lataí h̃úu véle.

⁵I folói taí ta h̃u taa tolí ngáá Séka, Samááliya lataí h̃u. Naa vá ngaa ɣɛi gooh̃á ndɔwɔlɔ́i sí wa Jékɔ í fɛ́ni ngi lóu Joosɛ́ yɛ wɔ́lɔ.

⁶Njɛlowái ná í ɣɛ́i wɔ́lɔ ngáá Jékɔ ndá, i ɣɛi na. Jísu va kpɔlɔ́ngɔ i ɣɛi náá la siyangí yáa, kɛ i heingá maa yɛ́lowai béla. I ɣɛi náá ngáá foló yákpangɔ.

⁷Samááliya ỹah̃ápo yiláá i vaaní ngáá í njɛ wulí maa yɛ́lowai h̃u, Jísu va í fɛ́li njɛí h̃u, i ɣɛ ma “Yɛ́i kɔ́ kái ngáá njɛ ngí kpɔ́le?”

⁸Naa laa lówah̃u va, Jísu volú yélai ti ɣɛ́i liiní taí h̃u ngáá tí mɛɛní yaá.

⁹Nyah̃ápoi í ngoo yápoteni, i ɣɛ ma, “Yá lɔ ngáá Júsu w̃ɔɔ, nyáá va ngí ngáá Samááliya w̃ɔɔ, aa ɣelé kɛ naa yáá mɔ́ɔ́ni kpɔle yɛ́ hááw̃a?” Háwui í kɛ́ni nyah̃ápoi í sí léi ma, i ɣɛi ngáa, Júsuai ɛ́ɣɛ Samááliyangai taá ɣɛi bɔí yaá haa w̃a.

¹⁰Kɛ Jísu i ngoo yápotenga, i ɣɛ ma, “Bele yí ɣɛ́i Ngalá fémbɛ wɔlíngi wɔlɔ́ ɛ́ɣɛ nuí sí íwaa í w̃ɔ́ɔ́ni kpɔ́le yɛ́i hááw̃a yɔ́ɔ́ ɣɛ́ ɣɛi maa w̃ɔ́i w̃ɔ́ɔ́nini aáva ɔ́ɔ́ ndɛɛh̃ú w̃aahɔ́lɔ njɛ́i he í yáá.”

¹¹Nyah̃ápoi i ngoo yápoteni, i ɣɛ ma, “Kawálai, ŋani fíli aa í yáá yɔ́ɔ́ njɛ wúli la, bɔ́ki aa í yáá aáva njɛlowái suuhulungɔ́ɔ́ lé. Míl̃inda lɔ́ naa yáá ndɛɛh̃ú w̃aahɔ́lɔ njɛ́i sí hɔ́lɔ na?

¹²Baa í lɔ́vengɔɔ lé ni káwala Jékɔ wa lɛ́i í njɛlowái sí hengɔ́ ni yaá, laáva laá bútei i ta bɔ́leni wɔ́lɔ, í báha náá bɛ́lɛ ngi h̃íỹɛndou lengáitii mba ɛ́ɣɛ ngi lóŋaniaitii kpɛ́lɛɛ?”

¹³Jísu va i ngoo yápoteni náa, i ɣɛ ta, “Nuí fíli áá njɛí sí bɔ́le í njɛ lowái sí h̃u, njɛ w̃ɔníi aa mɔ́ɔ maa w̃ɔ́i hóu.

¹⁴Kɛ́ nuí fíli áá njɛí sí bɔ́le ngáá fe ngeyá, njɛ w̃ɔní ɛi mɔɔ maa w̃ɔ́i hóu kúnafɔ, laáva aa kúnafɔ lɛ́ɛ́h̃ui he mbɛ. Tɔɔỹáá hááw̃a njɛí sí ngáá fé maa w̃ɔ́i yaá aa ɣɛ maa w̃ɔ́i h̃u ngáá njɛí sí ɣɛ kíli áá gúla ndɔwɔlɔ́i wu púi púi.”

¹⁵Kɛ nyah̃ápoi i Jísu woo yápotenga, i ɣɛ ma, “Kawálai, kɔ́ ná ngáá maa yɛ́i! Ngáá kúnafɔ njɛ w̃ɔní ɛ́i mɔ́ɔ sóu, kɛlaa ngɔ́ɔ́ ló vaamá mbéi njɛ wúli fááw̃a.”

¹⁶Kɛ Jísu i ɣɛa ma, “Lí, yí í h̃íỹɛngi lolí, yí mɔ́ɔ́ va volú.”

¹⁷Nyah̃ápoi í ngoo yápoteni, i ɣɛ ma, “Siỹɛ́ ngaa mbɛ.” Jísu va ngi ɣɛ ma, “Tɔɔỹái w̃ul̃á yí ndengɔ́ ngáá siỹɛ́ ngáá í yɛ.

¹⁸Naa héiw̃aa i ɣɛa lɔɔ́lu yí waa wála kɛmbɛheí h̃ú ɛ́i ndóma. Aáva siỹɛ́ngi sí ɣéle tɔ yí ngeyá h̃íí féa, í h̃íỹɛ taa le. Sí yí ndéngɔ aá lɔ́ ngáá tɔɔỹaá.”

¹⁹Kɛ nyah̃ápoi bɛ́lɛ i ɣɛa Jísu w̃a, “Kawálai, ngí ngatɔ́nga mba ngáá yá lɔ́ ngáá Ngalá ndaa háá lé mɔ́ɔ.

²⁰Ni kawálani wɔ́lɔ tɔ́ɔ́ Ngala fɛ́lɛ ngihéi[3] sí h̃u kɛ́ wá Júsuai wú ɣɛ́ mbéi kule í nuu w̃a nuu í ɣɛ́ áá Ngala fɛ́li na, naa wáá ngáá Jɛlúsɛl̃ɛ.”

²¹Kɛ Jísu i ɣɛa ma, “Nyah̃ápoi, la gíte ngáá sí, ná waa ngáá naa hɔwɔ́i lɔɔ vá fóloma ma ngáá wɔ́i mɔ́ɔ́ ɣɛ wáá Kɛɛɣɛí Ngalángi hɛ́li ngihéi sí ɣéle tɔ su kɛlaa Jɛlúsɛl̃ɛ.

²²Wɔ́i wu ngáá Samááliyangaitii Ngalángi sí wúwaa fɛ́li wáá kɔ́lɔ ele gíte wáá ngáá laá. Kɛ́ niỹɛ́i ni ngáá Júsuaitii ní Ngalángi sí wɔlɔ́ níwaa fɛli bɔw̃álale nuu búsaa ngumaawóngi w̃ááhɔlɔngɔ niỹɛ́i ni ngáá Júsuaitii ni w̃áá véle w̃a.

²³Kɛ́ laáva naa hɔwɔ́i lɔɔ vá fóloma ma aáva i folónga naá ma kílii ngáá nungái sítii taá Ngalángi hɛ́li ngáá tɔɔỹaá veleí tiyá lɔɔ vá ɣɛmá taá Kɛɛɣɛí Ngalángi hɛ́li ngi Hɛ́ɛ́ma Ỹínangi yákpangi w̃aa véle w̃a ɛ́ɣɛ tɔɔỹaá veleí w̃a. Sífaa Ngalá fɛ́li mbélaa laaliai sítii tɔ Kɛɛɣɛí Ngalá ngíwaa ti wɔlí.

²⁴Ngalá kulangɔ́ɔ́ le ngáá ỹína aáva sítii taá fɛ́li kɛ tí fɛ́li Hɛ́ɛ́ma Ỹínangi yákpangi w̃aa véle w̃a ɛ́ɣɛ tɔɔỹaá veleí w̃a.”

²⁵Kɛ nyah̃ápoi i ɣɛ́a ta, “Ngí suuwɔlɔ́ ngáá Ngalángi Lókolo Mbá W̃ɔ́i lɛí taá tolí ngáá Kílisitii aá lɔɔ vá vaamá, aáva ná áá vá aa faí kpɛ́lɛɛ ngákɛ kpál̃au ní yaa.”

²⁶Jísu va í ngoo yápote, i ɣɛ ma, “Nyɛ́i ngíwaa yɛ́pɛ í yéle maa w̃ɔ́i waa ngáá ngé.”

²⁷Naa laa lówah̃u nɔ́ɔ kɛ Jísu volú yélaitii tí yángaimanga aáva i gɔɔ́lani ti wa ná tí tɔ́ni íwaa yɛ́pɛ nyah̃á yelé. Sífaa nyah̃ápoi ná i ɣɛ́i ngáá Samááliya w̃ɔɔ aáva taa ɣɛ́i bɔí faaw̃á taá tiyéni. Kɛ́ ti tá fíli taa Jísu w̃ɔɔniní, tɔɔ ɣɛ́ ma, “Ndeé lɔ í lóngɔ la nyah̃ápoi sí yaá?” ɔɔ, “Ndeé le yíwaa yɛ́pɛ ngelé?”

²⁸Kɛ nyah̃ápoi i ngi yɛ wúli nyáákai ná loá na, í yángaima taí h̃u, i ɣɛ nungáitii ma,

²⁹“A vá lɛ́ɛ́, wú siỹɛndópoi sí lɔ lɛí sí kpɛ́lɛɛ wɔlɔ́ ngí kɛ́a i ndengɔ́ má. Baa laá ɔ́ɔ́ ɣɛ́ la yɛ́ɛ́ ɔ́ɔ́ ɣɛ́ ngáá Ngalángi Lókolo Mbá W̃ɔ́i?”

³⁰Faalɔ, nungái ti gulaní taí wa táá lí Jísu yelé.

³¹Naa laa lówah̃u kɛ polú yélai tí pɛ́lɛnga maanɛ́ɛ́nɛma táá ɣɛ́ ma, “Kaamɔ́ɔ́, mɛɛní ỹɛ.”

³²Kɛ́ Í ɣɛi ta, “Mɛɛní lɔ́ na ngáá mɛ wáá faa wɔ́lɔ kɔwɔ́ato mba.”

³³Kɛ polú yélai tí pɛ́lɛnga yɛ́pɛma ỹɔw̃ɔ́ ỹɔ́w̃ɔ yelé táá ɣɛ́ ta, “Baa nuu ɔ́ɔ́ ɣɛ́ yɛ́ɛ́ vaangɔ́ ngelé ngáá mɛɛní?”

³⁴Í mɔ́ɔ́ ɣɛ ti w̃a, “Ní ỹɛ́ɛ́nii wáá ngáá nuí sí í tɔ́vengɔ ngí gólo mbɛ ndiivó fái ɣɛndái h̃u. Ná vólu, ngí víla ngi yéngengi sí wóma í féngɔ ngéya.

³⁵Kɛ́mbɛ nuu áá ndé, nuu ɣɛ́ ta, ‘I longá naá ngáá ngalú nááningɔ kɛ sii hií ŋáni gúla sɔ́wɔi i folóa ma,’ kɛ́lɛi? Kɛ́ ngí ndé wú w̃á, a wu mbúyoɣe lɛ́ɛ́ wú síí hii ŋániitii tɔ ti gúla sɔ́wɔi í folónga naá ma.

³⁶Sii hií ŋáni gúla mɔ́i lɔɔ́ ngi pávai w̃aahɔ́lɔ naa aáva aá lɔɔ́ ngi híí hii ŋaníí yatɛ́ mba kúnafɔ lɛɛh̃uí hááw̃a, kɛinɔɔ́ síí hii ŋáni hí mɔ́i ɛ́ɣɛ síí hii ŋáni gúla mɔ́i ti báha su tí kóóh̃unɛɛ gúla.

³⁷Faalɔ, faí sí nungái taá nde, aá lɔ ngáá tɔɔỹaá, ngáá sí taa ɣɛ́ ta, ‘Nuu yílaangi aa li í sii hií ŋáni hi, pekaí lí í kúla.’

³⁸Ngí wú lɔ́venga ngáá wú lí sii hií ŋáni gúlama wáá w̃ɔ́l̃ɛngɔ ma. Nungáá vekaa tí mɔl̃ɛ́ bangɔ́i wongá, wáá va wú lí wú gúlah̃uunuma ti w̃ɔl̃ɛ́ vóngi h̃u.”

³⁹Ná náa Samááliyangai ti vááni Jísu yelé, ti ɣɛ́i taá maanɛ́ɛ́nɛ ngáá í ló ti loow̃á, sífaa ti bih̃íw̃aa tí laní ngáá Jísu kɔwɔ́ato nɔ́ɔ sí wa nyah̃ápoi í ndéi ti w̃a, i ɣɛ́ ta, “Sí kpɛ́lɛɛ wɔlɔ́ ngí kɛ́a i ndengɔ́ má.” Aáva Jísu i foló félengɔ ɣɛ́i na ti loow̃a.

⁴⁰

⁴¹Aáva nuu bíh̃iw̃aa tí mɔ́ɔ lái la kɔwɔ́ato nɔ́ɔ sí wa í ɣɛ́i áá ndé ti w̃a.

⁴²Kɛ tí ndengá nyah̃ápoi w̃a, ti ɣɛ́ ma, “Ni la sáwui ngáá Jísu áá ngáá sí hááw̃a yí ndéngɔ ni w̃a, kɛ́ sífaa niỹá gíte ní ngoo ỹɛ́ninga aáva ní kɔlɔ́ ngáá laá kái kái tɔ í ngáá ngeléi sí wuu yélai Ngumááwo Mɔ́i.”

⁴³Ná naa Jísu i foló félengɔ ɣɛi na, kɛ i hiɣénga na, í lí Galéli lataí h̃u.

⁴⁴Aáva laa bútei i ɣɛi náá ndení, i ɣɛ ta, “Ngufema áá Ngalá ndaa háa lé mɔ́ɔ́ yɛ kpɔwɔ́ bɔ́wɔ lɔwɔlɔí h̃u.”

⁴⁵Ná Jísu i lɛ́ɛ́ni Galéli, maa nungáitii tí lókohei mbu ngáá pángɔ bɔw̃álale tiyá gíte ti ɣɛ́i lií Jɛlúsɛl̃ɛ taa h̃u Júsuai ti gúi ná wúya fááw̃a taa ɣɛ́ ma Ngumaawó Kúi, aáva tí naa lɔní faí kínɛi í kɛ́ni maa gúi ná wúya taíngi h̃u.

⁴⁶Ná í ɣɛ́i Galéli í mɔɔ liiní Kéna taí h̃u volú ti héi heí ma mbéinda í ɣɛ́i njɛí vótei na ngáá ndɔí. Aáva gɔ́mɛti nuu walaí ta ngi h̃íỹɛndou loí i ɣɛ́i lááni ngáá séébɛ taí sí h̃u taa tolí ngáá Kapɛ́ɛ́niya.

⁴⁷Ná maa h̃íỹɛndopoi í mɛ́nini ngáá Jísu i hiɣénga Judíya lataí h̃u, í vá Galéli lataí h̃u, kɛ i liingá ngelé ngáá í Jísu w̃aanɛ́ɛ́nɛ ngáá ná í va, í ngi h̃íỹɛndou loí wálo í ɣɛí náá saa lowá la.

⁴⁸Kɛ Jísu i ɣɛa siỹɛndópoi w̃a, “Kɛ léi wú káámaa haa w̃aanɛ́ɛ́nɛɛngaa lɔ tí ɣɛ, kɛ́ ná laa le, nda ngí ɣɛ́ wú h̃u.”

⁴⁹Siỹɛndópoi i ɣɛ Jísu w̃a, “Káwalai, vá naá mu lí, ɔ́ɔ́ ló su ní h̃íỹɛndou lói ɔ́ɔ́ ha.”

⁵⁰Jísu i ngoo yápoteni, i ɣɛ ma, “Lí, í lói luwú h̃u lɔɔ wúya.” Siỹɛndópoi va i laní ngáá Jísu laa wói, faale, i yangáimai.

⁵¹Ná nuu wálai ná í ɣɛ́i áá yangáima, i loí nɔ́ɔ peleí h̃u, ngi yénge mbelaí tí ndaaw̃ɛ́ɛ́, ti ɣɛ́ ma, “Í h̃íỹɛndou loí luwú h̃u i wuyangá!”

⁵²Kɛ i ti w̃ɔ́ɔ́ninga ngáá táingi nduwú h̃u í wúyai. Nátii ti ngoo yápoteni, ti ɣɛ́ ma, “Ndúwu h̃u í wúyai bééngi w̃a na folói í hélei kínɛi.”

⁵³Kɛ siỹɛndópoi í ngatɔ́nga mba ngáá kɛ táingi ná kái kái ma i ɣɛ́i la Jísu í ɣɛ́i ma, “Í lói luwú h̃u lɔɔ wúya.” Faalɔ, laá ɛ́ɣɛ ngi vɛ́lɛ wuu yélai kpɛ́lɛɛ tí láni ngáá Jísu.

⁵⁴Faí sí lɔ i ɣɛi ngáá káámaa haí hele kélei Jísu í kɛ́ni ná í gúlai Judíya í va Galéli.