Read Bandi TI GƐ́Ɛ́ HAÍTII 12 Bible Online

TI GƐ́Ɛ́ HAÍTII 12 - Bandi bible

TI GƐ́Ɛ́ HAÍTII 12

¹I ɣɛi ngáá táingi sí laa lówah̃u Masangí Hɛ́lɔdi í pɛlɛí faa bá lamá Ngala fɛ́li mbélaitii tɛingáá w̃a.

²I ndení ngáá tí Njɔú ndíyai Jimisí váa ngáá mboɣá hɔ́kpɔi.

³Ná í tɔní ngáá kɛ Jimisí váándai i Júsuaitii ndiilángɔ, i ndiiní ngu ma ngáá sí í Pítɛ bɛ́lɛ nɔ́ sóuni. Faí sí vá i hiyaní Júsuai ti gúi sí w̃ááh̃u taá tóli ngáá Kúi Maa Bilé Ɛ́i Lɛ́ Nga.

⁴Ná í sóuni, i piliní kpindi vɛlɛ́i wu, í tokolevé sóya guuwu hei h̃ú nááningɔ w̃a ngáá tí maah̃ú belé kuuwu veléi w̃a bɛ́kpɛ. Kuuwu yílaa fíli su, sóya nááningɔ lɔ ɔ́ɔ́ ɣɛ́ su. Masangí Hɛ́lɔdi i ɣɛi ndaí gi su ngáá í vá ngáá Pítɛ kpɔ ndííwaa kɔsɔ́ fááw̃a ná Júsuai ti gúi taá tolí ngáá Ngumaawó Kúi ɔ́ɔ gúla su.

⁵Faalɔ, Pítɛ i ɣɛi kpindi vɛlɛ́i wu, kɛ́ Ngala fɛ́li mbélaitii ti ɣɛ́i taá Ngala fɛ́li mbɛ ngáá lií kpɛ́lɛɛ.

⁶Kpindíi ná naá ngele ɔ́ɔ wó, Masangí Hɛ́lɔdi ɔ́ɔ́ ɣɛ́a va ngáá Pítɛ kɔsɔ́ fááw̃a, Pítɛ i ɣɛ́i nyii h̃u sóya félengɔ lówah̃u njɔlɔwɔ félengɔ i mba. Ná vólu, sóyaitii ti ɣɛ́i kpindi vɛlɛ́i la tíwaa naa w̃ááh̃u béle.

⁷Ngamá nɔ́ɔ, Ndemɔí Ngalángi w̃áleka i gulaní Pítɛ yááh̃u kpindi vɛlɛ́i wu, í naa ɣɛ kpál̃au, í Pítɛ w̃ááleve, í ɣɛ ma, “Wuyoɣé bála bala!” Kɛ njɔlɔwɔítii ti gúlanga Pítɛ lokoítii su yɔ́ɔ́lɛɛ.

⁸Kɛ málekai i ɣɛa ma, “Í gúlaitii pu w̃a, yí í gɔ́ɔ́vai wála.” Kɛ Pítɛ í nátii kɛngá. Malékai í mɔ́ɔ́ ɣɛ ma, “Í lóma maah̃u lómangi yeɣé, yí pú w̃a, yí hítɛ pólu.”

⁹Kɛ Pítɛ i tongá mba, ti gúla kpindi vɛlɛ́i wuu wá. Kɛ́ aa ɣɛi Pítɛ gi ma ngáá sí malékai í ɣɛ́i áá kɛ, i ɣɛi ngáá faa íwaa ɣɛ́ gíte. I ɣɛ́i ki má ngáá kɛ faa wúl̃a nɔ́ɔ í ɣɛ́i áá gúla ngaah̃ú nyii lɔ́vemai laa lówah̃u la.

¹⁰Ti lɔ́veni hésendaa hoya guuwuí w̃a, ti lɔ́ve múl̃ɔ fele kélei w̃a, tí foló sasaí la ndaabɔ́lungɔ í ɣɛ́i la ngáá kɔluí áá lí ngáá taa h̃uu véle. Kɛ ndaa í wónga bɔwɔ́ yɛ, ti lɔ́ve. Ná malékai í kuya peléni, ngamá nɔ́ɔ kɛ malékai i ndongá na, í lí.

¹¹Kɛ Pítɛ i vaá h̃u, i ɣɛ ta, “Ngí kɔlɔ́ náa ngáá kɛ tɔɔỹáá kái kái té ngáá kɛ Ndemɔí Ngalá i ngi w̃álekai lɔ́vengɔ ngáá í vá, í mááwalo Hɛ́lɔdi yakpangí yaá ɛ́ɣɛ sí kínɛi Júsuaitii ti ɣɛ́ngɔ taá gisíya lá ngáá ti kɛ́ ngáá ngé.”

¹²Ná Pítɛ í maa hái yatɔ́ni mba kpál̃au, i liiní Njɔú Máa njéé Mɛɛloí vɛ́lɛi la, mbéi nuu bih̃íw̃aa ti w̃áákpɔngɔ í ɣɛ́i lá mba na táa Ngala fɛ́li.

¹³Kɛ Pítɛ i ngitíí ya péle wongí laa lúbanga, aáva nyah̃a lóu yiláá ngi ɣɛi na tɔ́ɔ́ ɣɛ́ ma Lodɔ, i ɣɛi ngáá kpɔmba w̃ɔ́ɔ́, i vaaní kóngi la ngáá í ngoo yapóte mbó ngáá nuí ná í ɣɛ́i kóngi la.

¹⁴Ná í ɣɛ́i kɔlɔ́ ngáá kɛ Pítɛ wóó le, kooh̃unɛ́ɛ́ngɔ i ɣɛi lá ngwala. Kɛ i yangáimanga aa mɔ́ɔ ɣɛi pɛlɛ́i laawóni. Kɛ i woo lɛ́nga ngeleya, i ɣɛ ta, “Pítɛ béle lóóni pɛlɛ́i la!”

¹⁵Kɛ nungái nátii tí ɣɛ́a ma, “Í gíngi aa í w̃a.” Kɛ́ ná í laa bákpai mba ngáá kɛ tɔɔỹáá le, kɛ nátii tí ndengá, ti ɣɛ́ ta, “Kɛ hɔɔ́ aa ɣɛ ngáá Pítɛ vólu w̃áleka.”

¹⁶Kɛ́ Pítɛ i ndiiní ngu ma ngáá kóngi laa lúbandaa. Aáva ná tí ndaawoní, tí tɔ, i gɔɔlaní ti wa.

¹⁷Kɛ Pítɛ loko ɣɛa ngáá ti ye mɛ́mɛ ngáá tí w̃áá ɣɛ ló. Laáva i suugúlani náa ti w̃a kɛ kíya Ndemɔí Ngalá ngí kulangɔ́ kpindi vɛlɛ́i wu. Kɛ i ɣɛa ta, “A faí sí le Jimisí w̃á taá mu mbála Yalá fɛ́li mbeláá vekaítii.” Kɛ i gulangá naa wa, í li ỹanda véka.

¹⁸Ná í ɣɛ́i ngáá ngelendái, nduwá wála i ɣɛi sóyaitii su aáva ti gindáá vílingɔ. Ti ɣɛ́i náa taa ɣɛ́ ta, “Ndeé lɔ ɔ́ɔ́ ɣɛ́ ɣɛ́a ngáá Pítɛ?”

¹⁹Kɛ Masangí Hɛ́lɔdi i ndengá ngáá tí yaah̃ú híya ngáá Pítɛ ngáá pangɔ́ búte. Kɛ́ tí kɔliní ká ká, taá tɔní. Kɛ i sóyaitii tólinga sítii Pítɛ í ɣɛ́i ti lóko h̃u kpindi vɛlɛ́i wu, í ti w̃ɔ́ɔ́ni mɔɔní. Ná vólu, í nde ngáá tí maa hóyai nátii paa. Ná ná í gúlani su, Hɛ́lɔdi i gulaní naa Judíya lataí h̃uu wá, í li Sɛsɛ́liya taa h̃u, í lo na kuu félengɔ hááw̃a gíte.

²⁰Masangí Hɛ́lɔdi liiyaw̃ál̃angɔ i ɣɛi lá taa walái sítii taa ti lolí ngáá Táya ɛ́ɣɛ Sáidɔ suu yélaitii ma. Faalɔ, nátii tí yatɛ́ni mba ỹandá yílaa ngáá ti lí, tí yɛ́pɛ ngelé. Kɛ́ tí liiní hése, ti yɛ́pɛ Bilásita yelé í ɣɛ́i ngáá nuu wála masangí wa, ngáá í báha ti wa ti lí. Tí liiní náa ɣéla masangí yéle ndowah̃u batɛ́i hááw̃a, sífaa masangí ndá lɔ́wɔlɔi h̃úu lɔ́ ti laaỹɛ́ɛ́nii ɔ́ɔ́ gúla na.

²¹Folói sí tí fái sí léi ma, Hɛ́lɔdi i ngi w̃ása ndoma ngwalaí vúni w̃a, í li, í héi ngi w̃ása kpɔkpɔngí ya, í yɛ́pɛ nungáitii ngelé.

²²Ti woo gúlani, táá ɣɛ́ ta, “Ngalángi ta[2] lɔ ngáá sí, nuu búsa laa le ɔ́ɔ́ ɣɛ́ áá yɛ́pɛ.”

²³Ngamá nɔ́ɔ, kɛ Ndemɔí Ngalángi w̃áleka i faa bá ngwala langá Hɛ́lɔdi w̃a sífaa aa ɣɛí áá Ndemɔí Ngalá ndaaw̃áálɛ. Aáva kpeliáitii tí vuní mba, í há.

²⁴Kɛ́ Ngalá ndaa wói i ndiiní ngú ma ngáá nga ngáá ɣɛ́ wɔɔlɔ aáva áá híya híya su.

²⁵Ná Bánabani ngaa Sɔ́ɔ ti vílani ti yénge ngí wóma ti ɣɛ́i liíni faaw̃a, tí gúlani Jɛlúsɛl̃ɛ wá, tí yangáima. Ti yangáima w̃aí, tí Njɔú Máa bahaní ti wa, taá tiyéi tí lí.