Read Bandi TI GƐ́Ɛ́ HAÍTII 14 Bible Online

TI GƐ́Ɛ́ HAÍTII 14 - Bandi bible

TI GƐ́Ɛ́ HAÍTII 14

¹Ná Pɔ́ɔni ngaa Bánaba ti ɣɛ́i Ekóniya taa h̃u, faa yílaa kpéngi lɔ nɔ́ɔ múl̃ɔ í híyani na. Tí liiní Júsuaitii ti Yála fɛ́li máákpɔ wotaí wu, tí Ngalángi gééla woí h̃úúɣɛ na ngáá pangɔ́ ngwala. I kɛní nuu bíh̃i bih̃i Júsuaitii su taá sítii taa ngáá Júsua ti vóte Ndemɔí Jísu wa.

²Kɛ́ Júsuai sítii kínɛi taá ɣɛ́i kɛí tɔɔ lá ngáá keela woí sí Pɔ́ɔni ngaa Bánaba ti ɣɛ́i ndení, ti sítii taa ngaa Júsua loni faa ỹɔ́u ɣɛ́ fááw̃a, ná vólu, tí tí wú su ỹáánini Pɔ́ɔni ngaa Bánaba haaw̃a.

³Kɛ́ ná h̃u Pɔ́ɔni ngaa Bánaba tí kuu ɣɛ́i na féle táa Ndemɔí Jísu haí h̃úúɣɛ ngáá ndiibá. Jísu vá i kɛní ngáá háwu ngángi ɣɛ kpál̃au ngáá kɛ ti gééla woí kɔwɔ́ato ngi háá bɔwɔí wa, aá lɔ ngáá tɔɔỹáá ngáá sí í ngakpá féni ti yaá kááma haítii ɛ́ɣɛ kindaa víli fáitii kɛ fááw̃a.

⁴Nungáitii kínɛi ti ɣɛ́i taa walái ná h̃u, ti wɔ́lɛni su féle. Kaka yílaangi i ɣɛi Júsuaitii ngelé péle, pekaítii pa ti ɣɛ́i Pɔ́ɔni ngaa Bánaba yelé péle.

⁵Kɛ Júsuai ɛ́ɣɛ sítii taa ngáá Júsua í báha náa Júsuai ti wútuwɔaitii mba, tí suubátɛni naá ngáá tí faa bá nda ti w̃a, ná vólu, tí tí váa ngáá ti hɔ́ɔ́ndai ngáá kɔtu.

⁶Kɛ́ ná nátii tí faa wɔ́lɔni fái sí wa, ti vélani, tí lí Lekóniya lataí w̃aa láa wala walaí nátii su taa ti lolí ngáá Lésitula ɛ́ɣɛ Dɛ́bi í báha náa naa béla látaitii suu wá.

⁷Aáva tí ndíi ngu ma ngáá keela woó vándai léndai ỹandái sítii.

⁸Siỹɛndópo yiláá ngí ɣɛ́i na Lésitula taa h̃u nɔɔnɔngɔ́ ngáá gɔwɔ́ w̃áá véle. Tí ndéni nɔɔnɔngɔ́ aáva nápa aa ɣɛi nɛ́nɛ hiyaní gɔwɔ́ yá.

⁹Ngolílongɔ i ɣɛi lá Pɔ́ɔ w̃a naa h̃u Pɔ́ɔ í ɣɛ́i áá njɛpɛí vú. Pɔ́ɔ i wɔlɛní maa h̃íỹɛndopoi ná yaah̃ú tííŋ, í tɔ ngáá kɛ nda tɔ́ siỹɛndópoi sí h̃u ngáá aa waló.

¹⁰Kɛ Pɔ́ɔ i woo gúla, i ɣɛ ma, “Yooɣé, yí ló gɔwɔ́ ya!” Ngáma nɔ́ɔ́ kɛ siỹɛndópoi i howangá, í ló, í pɛlɛ hiyamá.

¹¹Ná faŋaí í sí ŋál̃aa lɔní Pɔ́ɔ í kɛ́ni, tí báini ngeleya Lekóniya hii woí h̃u, táá ɣɛ́ ta, “Ngalángaitii ti vótenga ngáá nuu búsa, tí vá a mu yelé.”

¹²Kɛ tí ti yálangaitii ndaahéingai pɛlɛngá Bánabani ngaa Pɔ́ɔ wa. Ti ɣɛ́i Bánaba w̃a Súu, ti ɣɛ́ Pɔ́ɔ w̃a Hɛ́mi[3], bɔw̃álale laá lɔ í njɛpɛí vuní.

¹³Ngalángi sí va taa ɣɛ́ ma Súu lɛ́i fɛli pɛ́lɛi w̃aa í ɣɛ́i gooh̃áni Lésitula taa h̃uu wa kulo, kɛ ngi hááɣa gula mɔ́i i vaá ngáá nika hináitii, fuláwaitii ti hɛ́lɛ sɛ́lɛni ti wa kpákii lá, sífaa laá p̃ɛ́ɛ́ ɛ́ɣɛ faŋaí ti ɣɛ́i loí tí té he ngáá saáɣa wɔlingáa Pɔ́ɔni ngaa Bánaba yaa.

¹⁴Ná Bánabani ngaa Pɔ́ɔ tí fái sí w̃aa woo ỹɛ́nini, tí w̃áágulaitii mbali walíni w̃a ngáá tí ngakɛ́ ngáá kɛ ná aa pele w̃a, tí lí ngáá viliỹɛ́ faŋaí liiwáá táa woo gúla, taa ɣɛ́ ta,

¹⁵“Mu mbálangaa, ndeé lɔ wúwaa sí ɣɛ́ ma? Niỹá bɛ́lɛ nɔ niỹá lɔ nɔ́ɔ́ ngáá nuu búsa, aáva niỹá lɔɔ vá ngáá keela woó vandaí wú yéle náa nde wú w̃a ngáá wú volú yafé ngambalámba wɔ́lingai sítii mba, wú vóte Ngalángi sí wa ndɛɛh̃úi í su lɛ́i i ngeleíni ngaa ndɔwɔlɔí sí bátɛngɔ ɛ́ɣɛ yívoi kpahangɔ́ sítii kínɛi mbá tí tí h̃u.

¹⁶Wɔ́lɔ wɔ́lɔmai h̃u, Ngalá ngí bení nuí kpɛ́lɛɛ mbá tí lí ngáá liivó péleitii.

¹⁷Kɛ́ ná h̃u fíli, aa bení fái sítii kɛ́ma taá ngákɛ ngáá mu ye ngáá kɛ ele wáá ngáá laá. Kɛ́ laá vá i faa bɔ́wɔ ɣɛ́a wú yɛ́ ngáá njɛí áá mba áa híɣe ngeleya. Ná vólu, aa síi hií ŋániitii mba wú yɛ́ ti wa táingitii ma bɛ́kpɛ. Í mɔ́ɔ mɛɛní bih̃íw̃aa he wú yáá, í wú líitii suulaahé ngáá kooh̃unɛ́ɛ́.”

¹⁸Kɛ kíya bɛ́lɛ ti ɣɛ́i taá ngoí sítii nde, faa í bɔ́luni ti la ngáá tí faŋaí h̃uuhóu kɛinɔɔ́ nátii tálaa ti yeɣé ngáá ngalángaa tɔɔ́ saáɣa gúla ti yelé.

¹⁹Kɛ Júsuaitii ti lɛ́ingaa ti gúlanga Átiyɔ taa h̃u í Pesedíya lataí h̃u ɛ́ɣɛ Ekóniya taí h̃u tí va, tí faŋaí wu póte wa. Aáva ti Pɔ́ɔ hɔɔ hɔɔ́ni ngáá kɔtuítii, tí kpokpó tí kulá taa walái ná wa. I ɣɛi ti gi má ngáá Pɔ́ɔ i ɣɛi náá haaní.

²⁰Kɛ́ ná Jísu volú yélaitii tí w̃aakpɔí ma, i yooɣéni, í yangáima taí ná h̃u. Folo vékai w̃a, taá Bánaba tí liiní Dɛ́bi taa h̃u.

²¹Pɔ́ɔni ngaa Bánaba tí keela woó vándai lení Dɛ́bi taa h̃u aáva tí nuu bih̃íw̃aa w̃ááhɔlɔni nái tí ɣɛ ngáá Jísu volú yélaa. Kɛ tí yangáimanga Lésitula ɛ́ɣɛ Ekóniya ɛ́ɣɛ Átiyɔ í Pesedíya lataí h̃u.

²²Ti ɣɛ́i taá kɛ ngáá háwu nungáitii ti h̃úú áa bá ti lángitii sú Jísu haaw̃a. Ná vólu, táá nduwúh̃ulɛ ngáá ti ye ngáá ti ló ti lángitii su kpáŋ. Tí ndéni ti w̃a, ti ɣɛ́ ta, “Kɛ a maá lɔve faa bámaitii su kɛinɔɔ́ a mu wála Ngalángi w̃ásandai wu.”

²³Pɔ́ɔni ngaa Bánaba tí lokoloní kele ɣelé mbélaitii mba Ngalá fɛ́li gúuwutii ngila ngíla fíli fááw̃a. Tí ti gáihani Ndemɔí Ngalá ma lɛ́i ti langɔ́ í ɣɛ́i lá la. Tí ti gáihani ma ngáá Ngalá fɛ́lindaa taá sú sóundaa.

²⁴Ná ti vílani lɔve tɔvé ma kpóloo Pesedíya lataí h̃u, tí vááni náa P̃ɛɛfíliya lataí h̃u.

²⁵Aáva ná tí keela woó lení Pɛ́ga taa h̃u, ti yéini náa Atáliya taa h̃u.

²⁶Ná ti gúlani Atáliya wa, ti vílini keléngi h̃u, tí yangáima Átiyɔ taa h̃u mbéi ti ɣɛ́i ti gáihani ná Ngalá ma ngi háá bɔwɔ h̃u ngengengí sí hááw̃a ti ɣɛ́i náa ngu kúlani.

²⁷Ná tí fóloni na, tí Ngala fɛ́li mbélaitii maakpɔ́ni mba ỹandáa yiláá tí volú haa lé ti w̃a ngáá sí kpɛ́lɛɛ Ngalá ngi kɛngá tiyá ti w̃áa véle w̃á ɛ́ɣɛ múl̃ɔ kíya í kɛ́a ngáá háwu sítii taa ngáá Júsua tíwaa lá ngáá Ngalá.

²⁸Aáva Pɔ́ɔni ngaa Bánaba tí kuu ɣɛ́i féle gíte taí ná h̃u taa Jísu volú yélaitii.