Read Bandi TI GƐ́Ɛ́ HAÍTII 16 Bible Online

TI GƐ́Ɛ́ HAÍTII 16 - Bandi bible

TI GƐ́Ɛ́ HAÍTII 16

¹Kɛ Pɔ́ɔ i liingá Dɛ́bi taa h̃u, i gúla na, í lí Lésitula taa h̃u. Naa lɔ í Jísu volú w̃ɔ́ɔ́ yiláá mááleni na taa ɣɛ́ ma Tímoti. Tímoti sí ngi njéé i ɣɛi ngáá Júsu w̃ɔɔ aáva ndangɔ́ ngáá Jísu. Kɛ́ Tímoti kɛ́ɛ́ɣɛ i ɣɛi ngáá Gilísi w̃ɔɔ.

²Ngala fɛ́li mbélaitii ti ɣɛ́i Lésitula ɛ́ɣɛ Ekóniya taa h̃u, ti yɛ́pɛni kɔwɔ́ato Tímoti wa ngáá pangɔ́.

³Pɔ́ɔ i ɣɛi loí í ngeɣé taá laá ti lí siyangí w̃a. Faalɔ, i tɔvení pɛ́lɛ vólu, bɔw̃álale Júsuaitii ti ɣɛ́i héini tataí ná h̃u, ti ɣɛ́i faa wɔ́lɔ mba ngáá kɛ Tímoti ngi kɛ́ɛ́ɣɛ lɔ ngáá Gilísi w̃ɔɔ.

⁴Kɛ kíya fíli tɔ́ɔ́ lɛ́ taítii su, tɔ́ɔ́ savaítii nde nungáitii ma ngáá ti gólo mbu. Savaí sítii ngi ɣɛi ngáá sí Ngalángi géélaitii taá kele ɣelé mbélaitii Ngala fɛ́li mbélaitii faaw̃a tí kpátɛni Jɛlúsɛl̃ɛ.

⁵Faalɔ, Ngala fɛ́li mbélaitii ti h̃úú í ɣɛ́i áá ba ti lángitii su, aáva ngele fíli ɔ́ɔ wó, ta ɔ́ɔ́ báha ti wa.

⁶Pɔ́ɔni ngaa ngi híya polu yeláitii ti lɔ́ve tɔvéni tataí sítii su taa ti lolí ngáá Felíjiya ɛ́ɣɛ Galésiya, bɔw̃álale Hɛ́ɛ́ma Ỹínangi aa kɛní tɔɔ́ Ngalá ndaa wói le Ésiya lataí h̃u.

⁷Ná tí vááni Mésiya bandoí w̃a, tí yakpáni ngáá ti lɛ́ Bɛtíniya lataí h̃u. Kɛ́ Jísu Ỹínangi aa kɛní tɔɔ́ lɛ́ na.

⁸Faalɔ, ti lɔ́veni Mésiya lataí h̃uu w̃á, ti li Túlowa taa h̃u.

⁹Pɔ́ɔ i geluní kpindíi ná, i Mɛsedóniya lataí h̃u h̃íỹɛndopo yiláá tɔ́ lóóni áa maanɛ́ɛ́nɛ, áá ɣɛ́ ma, “Vá Mɛsedóniya lataí h̃u, yí bɔ́ ni wa.”

¹⁰Ná fái sí í gúlani su, ni[4] wúyoɣeni náa ngamá ní pele hóu ngáá liilaá Mɛsedóniya. Ní ndení naá ngáá kɛ Ngalá tɔ í ni lolíngɔ na ngáá ni Ngalángi gééla woo vandaí le ti w̃a.

¹¹Ná ni gúlani Túlowa wa, ní liiní yívoi la, ni víli na keléngi h̃u ní li tííŋ ỹandái ná naa w̃ááyele mbélengɔ ngáá njɛí, taa tolí ngáá Samɔtíle. Ná ngele vekái í wóni, ní liiní naá Niyapóle taa h̃u.

¹²Ná ni gúlani naa wa, ní liiní Félepa taa h̃u mbéi Lóómingai ti ɣɛ́i naa loní. Aáva laá lɔ í ɣɛ́i maifɔ́lɔ tíngi h̃u Mɛsedóniya lataí ná h̃u. Aáva ní foló lɛ́ingaa ɣɛ́ni na.

¹³Ná í ɣɛ́i ngáá Ndɛ́ɛ́lɛmbo Ngála Fɛ́li Fóloi w̃a, ni gúlani taí wá, ní li njɛí la mbéi í ɣɛ́i ni gi má ngáá Ngala fɛ́li máá lɔ́ na. Ni héini, ní tɔ́kula héi ngáá yɛpɛndáá nyah̃áitii ngelé ti yatɛ́ngɔ í ɣɛi la mba na.

¹⁴Nyah̃ái nátii su ti ɣɛ́i taá wolílo, nyah̃ápo yiláá i ɣɛí na taa ɣɛ́ ma Lédiya. Laáva nyah̃ápoi sí i ɣɛi ngáá kula biỹa maa híya mɔ́ɔ. I gulaní taa walái ná h̃u taa tolí ngáá Tayatálɔ. Aáva i ɣɛi laní ngáá Ngala. Ndemɔí Ngalá i ki mái laawóni kɛinɔɔ́ í wolílo keela woí sí w̃a Pɔ́ɔ í ɣɛ́i áá nde.

¹⁵Ná í nguyaí w̃aahɔ́lɔni taá ngi vɛ́lɛ lowaí wúu yélaitii, i ni lolíni ngi vɛ́lɛi wu, i ɣɛ ni w̃a, “Ná wáá ɣɛ́ ngéɣengɔ ngáá kɛ Ngala fɛ́li mɔ́ɔ waa ngáá ngé Ndemɔí Jísu w̃aa véle w̃á, a vá wú ɣɛ́ ní vɛ́lɛi wu.” Aáva, i ni gi mái vóteni, ní lí.

¹⁶I ɣɛi ngáá hɔ́wɔ ta, ná ni ɣɛ́i naa lií ỹandái ná í ɣɛ́i ngáá Ngala fɛ́li mái, kɛ ní w̃ɛɛ́nga naá nduwɔ lopó ỹah̃álou yiláá lɛí ỹína nyɔí í ɣɛ́i polú sí ɔ́ɔ́ kɛ ngáá háwu nyah̃alói ná í sítii nde tɔ́ɔ́ ɣɛ́ taa vá ɣɛ́ma. I ɣɛi áá naholó bíh̃iw̃aa w̃aahɔlɔ ngi wú su lɔngí h̃u sítii mbɛ í ɣɛ́i ti wu ngáá nduwɔ lopó.

¹⁷Nyah̃alói sí i hitɛní ni volú naá Pɔ́ɔni áá woo lɛ́, áá ɣɛ́ ta, “Siỹɛngái sítii tiyá lɔ ngáá Ngutuwɔ́ Yála Ngwalaí yénge mbelaa. Tiyá lɔ táa yɛ́pɛ wú yéle kɔwɔ́ato peleí wa nuu áá ngumaawóngi w̃ááhɔlɔ la!”

¹⁸Nyah̃alói i ɣɛi nɔ́ɔ kélei ni volú foló bíh̃ingɔ hááw̃a aa ngoo yílaangi sí le. Ngapúmai náa, Pɔ́ɔ lií i ɣɛ́i náa súpulu sɛpɛlɛ́ koo h̃u, kɛ i votengá, í nde ỹína ỹɔí w̃a, i ɣɛ ma, “Jísu Kílisitii laahéingi h̃u, ngí ndengá í w̃á ngáá yí léve nyah̃alói sí vólu.” Ngamá nɔ́ɔ, kɛ ỹína ỹɔ́i i levénga nyah̃alói volú.

¹⁹Sítii nyah̃alói sí í ɣɛ́i ti wu ngáá nduwɔ lopó, ná tí ngátɔni ngáá kɛ ti náholo hɔ́lɔ pélei ti gitóngɔ í ɣɛ́i lá mba maa í levénga, ti Pɔ́ɔni ngaa Sáilɔ houní, tí kpá tí w̃a ngáá kule, tí lí ngáá ti ye ngití wálai ya masangái ngelé ti gɔsɔ́ fááw̃a.

²⁰Tí lííni ngáá ti ye masangái ngelé, ti ɣɛ́ masangái ma, “Siỹɛngái sítii tɔ ngáá Júsua, aáva tí vaá kpɔɔlɔ wála laa lévema mu lái h̃u.

²¹Ná wáá ngáá kalambongí táá mbo aa pele w̃a mu hávai h̃u ngáá tɔɔ́ mbo. Kule áá mu w̃a muỹɛ́i mu ngáá Lóómingai mɔɔ́ lokohéi mbu kɛlaa mɔɔ híya lá.”

²²Faŋaí i bahaí nungái sítii mba táa Pɔ́ɔni ngaa Sáilɔ wu ndɔmbú fái sí h̃u. Masangái tí ndéni sóyaitii ma ngáá ti Pɔ́ɔni ngaa Sáilɔ w̃aagúla, tí tí léve.

²³Ná tí tí léveni pánda vanda, tí tí vílini náa kpindi vɛlɛ́i wu. Masangái tí ndéni kpindi vɛlɛ́ w̃ááh̃u béle mɔ́i w̃á ngáá ngaah̃ú í ɣɛ́ gíte ti wa ngáá pangɔ́.

²⁴Ná ti ná léni kpindi vɛlɛ́ w̃ááh̃u belé mɔ́i w̃a, i Pɔ́ɔni piliní lííwaa lómui h̃u í ɣɛ́i kpindi vɛlɛ́i ná wu, í ti víli kpeléwɔi ya.

²⁵Kuyá liiwái i ɣɛi nɔ́ɔ áá foló ma, kɛ Pɔ́ɔni ngaa Sáilɔ tiyá tɔ taá Ngala fɛ́li táa Ngalá ngúleitii sɔɔlɛ́. Aáva pelésina vekaítii ti ɣɛ́i taá wolílo ti w̃a.

²⁶Ngamá nɔ́ɔ, kɛ ndɔwɔlɔí laa tɔ́ áá bɛ́li kpíli bili ngwala ngáá pɛlɛ́ gɔ́wɔi ɣéle tɔ íwaa bɛ́li. Ngaah̃ú w̃a nɔ́ɔ, kɛ kóngitii kpɛ́lɛɛ ti laa í wongá aáva njɔlɔwɔítii ti ɣɛ́i pelésinaitii mba kpɛ́lɛɛ i gula kuláni í vú.

²⁷Kɛ kpindi vɛlɛ́ w̃ááh̃u béle mɔ́i i wuyoɣénga, aáva ná í tɔ́ni kpindi vɛlɛ́i laa góngitii ndaawó ndááwongɔ, i ngi wóɣai lálani taangí ya ngáá í bɔwɔ́ váa, bɔw̃álale i ɣɛi ki má ngáá kɛ pelésinaitii ti lɔ́ɔ́wunga.

²⁸Kɛ́ Pɔ́ɔ i woo gúlani, i ɣɛ ma, “Yaá ỹanda héi bɔwɔ́ wa. Ni kpɛ́lɛɛ niỹá lɔ mbéi!”

²⁹Kɛ kpindi vɛlɛ́ w̃ááh̃u belé mɔ́i i lámbo maalólinga, í wála kpindi vɛlɛ́i wu ngáá viliỹɛ́, í h̃úndɛ Pɔ́ɔni ngaa Sáilɔ gakála suu áa bɛ́li.

³⁰Kɛ i gulangá ngáá ti ye ngitíí ya, í ti w̃ɔ́ɔ́ni, i ɣɛ ti w̃a, “Ní káwalani, ndeé lɔ kule í ma ngáá ngí kɛ ngí ngumaawóngi w̃ááhɔlɔ?”

³¹Kɛ nátii tí ngoo yápotenga, ti ɣɛ́ má, “Lá ngáá Ndemɔí Jísu aáva yáá ngumaawóngi w̃ááhɔlɔ, wáá í vɛ́lɛ lowa wuu yélaitii.”

³²Kɛ tí keela wói lengá ma taá ngi vɛ́lɛ lowa wuu yélaitii kpɛ́lɛɛ kɔwɔ́ato Ndemɔí Jísu wa.

³³Táingi ná kái káima kpíndii ná, kpindi vɛlɛ́ w̃ááh̃u béle mɔ́i i liiní ngáá ti ye, í ti válaitii ngangúya. Ngamá nɔ́ɔ, laá p̃ɛ́ɛ́ ɛ́ɣɛ ngi vɛ́lɛ lowa wuu yélaitii kpɛ́lɛɛ ti nguyaí w̃ááhɔlɔni.

³⁴Kpindi vɛlɛ́ w̃ááh̃u béle mɔ́i i liiní ngáá ti ye ngi vɛ́lɛi wu, í mɛɛní gúla kɛlɛ́ma ti yɛ. Aáva ngi vɛ́lɛ lowa wuu yélaitii kpɛ́lɛɛ ti góóh̃unɛɛngɔ i ɣɛi la ngwála bɔw̃álale ti ɣɛ́i náa laí ngáá Ngalá.

³⁵Ná ngele í wóni, kɛ masangái tí bɔ́ilopoai tɔvengá kpindi vɛlɛ́ w̃ááh̃u béle mɔ́i yelé ngáá tí nde ma ngáá í lókogula siỹɛngái nátii su.

³⁶Kpindi vɛlɛ́ w̃ááh̃u belé mɔ́i i ndení náa Pɔ́ɔ w̃a, i ɣɛ ma, “Masangáitii tí ndengá má ngáá ngí lókogula náá wú h̃ú wáá Sáilɔ. Faalɔ, faa áá mɔɔ wú wa, a lí náa. A lí ndiilɛí h̃u!”

³⁷Kɛ́ Pɔ́ɔ i ndení bɔ́ilopoai ma, i ɣɛ ti w̃a, “Taá ni gɔsɔ́ngɔ aáva tí ni léve kpɔ ndííwaa kíya bɛ́lɛ ni ngáá Lóómingaa, ná vólu, tí ni víli kpindi vɛlɛ́i wu. Sí h̃uu lɔ náa ti longɔ́ tí bé ni wa ndɔɔwu h̃ú? Aa pele w̃a! Bɛlɛ́ masangái kíte, ti vá, tí ni gúla.”

³⁸Bɔ́ilopoai ti sí lení masangái ma. Aáva ná masangái ti sí ỹɛ́nini ngáá kɛ Pɔ́ɔni ngaa Sáilɔ tiyá lɔ ngáá Lóómingaa, ti h̃úú í bɛ́lini.

³⁹Tí vááni, ti Pɔ́ɔni ngaa Sáilɔ w̃aanɛ́ɛ́nɛ, tí tí gúla kpindi vɛlɛ́i wu, tí nde ti w̃a ngáá ti gúla taí ná wa.

⁴⁰Ná Pɔ́ɔni ngaa Sáilɔ ti gúlani kpindi vɛlɛ́i wu, tí liiní náa Lédiya vɛ́lɛi wu, tí tí mbála Yalá fɛli mbélaitii maalé na, aáva tí nduwúh̃ulɛni ngáá ti ye, ná vólu, ti gúlani naa wa, tí lí.