Read Bandi TI GƐ́Ɛ́ HAÍTII 19 Bible Online

TI GƐ́Ɛ́ HAÍTII 19 - Bandi bible

TI GƐ́Ɛ́ HAÍTII 19

¹Ná h̃u Apólo í ɣɛ́i Kɔ́l̃e taa h̃u, Pɔ́ɔ i kɔndíngi h̃u vélei yeɣéni áá lí ngáá Galésiya lataí h̃uu véle ɛ́ɣɛ Felíjiya lataí h̃u í ló su í fólo Ɛ́fɛsɔ taí h̃u. Naa lɔ í Jísu volú yélaitii tɛingáá w̃ááleni na.

²Pɔ́ɔ i ti w̃ɔ́ɔ́nini, i ɣɛi ti w̃a, “Wú Hɛ́ɛ́ma Ỹínangi w̃aahɔ́lɔngɔ ná h̃u wú vótengɔ Jísu wa?” Nátii tí ngoo yápoteni, ti ɣɛ ma, “Nápa naá nɛ́ɛ́ mɛniní ngáá Hɛ́ɛ́ma Ỹína tɔ na.”

³Kɛ i mɔɔ ti w̃ɔ́ɔ́ninga, i ɣɛ ti w̃a, “Kɛ ngúyai híí bɛ ɣéle lɔ náá hɔ́ɔ́ wú maahɔ́lɔngɔ?” Kɛ nátii ti ɣɛ́a ma, “Ngúyai sí Njɔú ɔ́ɔ́ mbo laá lɔ ní mááhɔlɔngɔ.”

⁴Kɛ Pɔ́ɔ i ɣɛa ti w̃a, “Ngúyai sí Njɔú í mbóni i ɣɛi na ngáá nungáitii tí vólu yáfe ti híya velé ỹɔ́u ỹɔungáitii mba. Njɔú í ndéni nungáitii ma ngáá ti lá ngáá nuí sí í ɣɛ́i áá vá laá Njɔú vólu véle. Kɛ ná w̃aa w̃ɔ́i va i ɣɛi ngáá Jísu.”

⁵Ná nungáitii ti sí ỹɛ́nini, ti ngúyai w̃ááhɔlɔni Ndemɔí Jísu laahéingi h̃u.

⁶Ná Pɔ́ɔ í loko vɛ́lɛni ti w̃a, Hɛ́ɛ́ma Ỹínangi i vuní ti h̃u, aáva ti pɛlɛní naá yɛpɛmá híí woo vekaní su, táa Ngalángi gééla woí le.

⁷Sítii pa ti ɣɛ́i na, ti ɣɛ́i ngáá nuu púúngɔ maah̃úú félengɔ vóto.

⁸Pɔ́ɔ ɔ́ɔ́ lí náa Júsuaitii ti Yála fɛli máákpɔ wotaí wu áá yɛ́pɛ na ngáá ndiibá. I ɣɛi na ngalú sáángɔ hááw̃a táá maaɣaalíi gúla taa Júsuaitii. Ɔ́ɔ́ ɣɛ́ áá yɛ́pɛ ti liítii pote fááw̃a Ngalángi w̃ásandai wa.

⁹Kɛ́ ná fíli su, ti lɛ́ingaa taá lókoheini tɔɔỹái wu kɛlaa tɔɔ́ lá la. Kɛ́ ti ngoo ỹɔ́u ỹɔungaa lení ma kɔwɔ́ato Ndemɔí Jísu Nda Vélei wa kpɔngí ná gakála ti ɣɛ́i na. Faalɔ, Pɔ́ɔ i gulaní naa wa taá pólu yélaitii, tí lí taa tiyéi lómu walaí sí h̃u í ɣɛ́i pɛlɛ́ wálai sí wu, siỹɛndópoi ná taa ɣɛ́ ma Telánɔ ɔ́ɔ́ yɛ́pɛ na nungáitii ngelé. Naa vá tɔ ɔ́ɔ́ yɛpɛ na tí yelé hɔ́wɔ fíli.

¹⁰Faí sí i ndií ngu ma fowó félengɔ laa lówah̃u, laáva i kɛní Júsuai sítii ɛ́ɣɛ Gilísiai sítii ti ɣɛ́i Ésiya lataí ná h̃u tí Ndemɔí Jísu laa wói ỹɛ́nini.

¹¹Ngalá ngí kɛ́ni ngáá háwu Pɔ́ɔ í kindáá vilí fáá wala wálani kɛ ti yakpángɔ wála í ɣɛ́i lá.

¹²Ndaa baléngaitii ɛ́ɣɛ ndoma mááh̃u gúlaitii[5] Pɔ́ɔ ɔ́ɔ́ ngilí w̃a, tɔ́ɔ́ ti yeɣé tí lí ngáá ti ye seebɛ yélaitii ngelé, aáva ti héébɛitii tí waló ɛ́ɣɛ ỹína ỹɔu ỹɔngáitii tí levé ti volú.

¹³Júsuaitii tɛingáá sítii ti ɣɛ́i taa lɔ́ve ngáá ỹína ỹɔítii tevé nungáitii polú, tiyá bɛ́lɛ ti ɣɛ́i loní tí kɔvɔ́ ngáá táá ɣɛ́a Ndemɔí Jísu laahéingi lolí sítii ma ỹína nyɔítii tɔ́ɔ́ ɣɛ́ ti volú kɛinɔɔ́ ná í léve ti vólu. Tɔ́ɔ́ ɣɛ́ ta, “Jísui sí Pɔ́ɔ áá ngi háá le, ndaahéingi h̃u, ngí nde í w̃á, ỹína nyɔí yí léve nuí sí volú.”

¹⁴Júsuaitii ti Yála saaɣa gula mbélai ti wutúwɔɔ w̃ɔ́i sí tɔ́ɔ́ ɣɛ́ ma Síkiva, ngimɔ́ɔ́ ngi h̃íỹɛndou lou ngɔ́felangɔi ti ɣɛ́i taá kɛ.

¹⁵Kɛ́ ỹína nyɔí i ɣɛi ti w̃a, “Ngí Jísu wɔlɔ́ taá Pɔ́ɔ, kɛ́ ele wáa ngáá wú ye?”

¹⁶Siỹɛndópoi ỹína nyɔí í ɣɛ́i polú, kɛ i bundɛngá ti w̃a, í hómbo ti kpɛ́lɛɛ má. I loní ti léve kíli ỹɔu womá í ló su ti víliỹɛ ti gúla pɛlɛ́i wuu wá ngáá busa ŋaaw̃ɔ áá gúla ti wa.

¹⁷Ná Júsuai sítii ɛ́ɣɛ Gilísiai sítii ti ɣɛ́i Ɛ́fɛsɔ taí h̃u tí fái sí ỹɛ́nini, nduwá wála i vuní ti h̃u aáva ngufema wála i ɣɛi náa Ndemɔí Jísu laahéingi w̃a.

¹⁸Ti bíh̃iw̃aa va ti lángɔ í ɣɛ́i lá ngáá Jísu, tí vááni, tí lo liiwáá wála, ti gáhe ngáá ti háá ỹɔítii.

¹⁹Súkɛ gula mbélai ti bih̃íw̃aa tí vaaní ngáá ti húkɛ gula gɔ́lɔitii kpɛ́lɛɛ, tí tí yatɛ́ mba ỹanda yílaa tí ti w̃ɔ nungáitii kpɛ́lɛɛ ngááh̃u. Aáva ti súkɛ gula gɔ́lɔi nátii kpɛ́lɛɛ tí tí w̃ɔ́ni, tí tí h̃ɔ́w̃ɔi baɣaní, aáva i ɣɛi ngáá kaní kóle tásu púú ndɔ́ɔ́lungɔ[6].

²⁰Ná vá tɔ í kɛ́ni naá ngáá háwu Ndemɔí Ngalá ndaa wói í hiyá hiyáni hááli haali, maa hái ya ngí ba.

²¹Ná sítii kpɛ́lɛɛ ti ɣɛ́i náa ɣɛní, Pɔ́ɔ i kpatɛní naá gi má ngáá í lɔ́ve kpóloo Mɛsedóniya lataí h̃u ɛ́ɣɛ Akáya lataí h̃u ngáá í lí Jɛlúsɛl̃ɛ. Kɛ i ndengá, i ɣɛ ta, “Ná náa ngáá ɣɛ́ ɣɛi folóni na, kɛ ngí lí Lóómi taa h̃u.”

²²I volú bɔ́mba yélaa félengɔ lɔvení Mɛsedóniya lataí h̃u. Kpɔmba yélai nátii ti laahéingai ti ɣɛ́i ngáá Tímoti ɛ́ɣɛ Ilásitɔ. Laá Pɔ́ɔ i kuu ɣɛ́i féle Ésiya lataí h̃u nɛ́nɛ.

²³Ná h̃uu lɔ́ kpɔɔlɔ wála í gúlani Ɛ́fɛsɔ taí h̃u kɔwɔ́ato Ngala fɛ́li pélei sí wa taá tolí ngáá Ndemɔí Jísu Nda Vélei.

²⁴Ngɛi mɔ́ɔ́ yílaa sí taa ɣɛ́ ma Damítiyɔ, i ɣɛi áá ŋani vandá vandaítii kpatɛ́ ngáá kɔlu woléngi sí kpatɛ ngeyá yálangi sí yɛ í ngáá nyah̃a taa ɣɛ́ ma Átimi kulangɔ́ ngáá ngi vɛ́lɛi. Damítiyɔi sí va, i kɛní ngáá háwu sítii tɔ́ɔ́ ngɛingái sítii mbo mbɛ táa yaá hɔ́lɔ ngwala.

²⁵Damítiyɔ i ngɛi mbélai sítii kpɛ́lɛɛ ngátɛni mba ỹandá yiláá taá nungáá vekaí sítii ti yenge tokoí í ɣɛ́i gulaní ngáá wee, i ɣɛ ta, “Mu mbálangaa, kɛmbɛ wú kɔlɔ́ ngáá kɛ ngenge tókoi sí lɔ a maá ŋani hɔ́lɔ su?

²⁶Aáva wú mɛningá ngáá kɛ siỹɛndópoi sí taá ɣɛ́ ma Pɔ́ɔ i nuu bíh̃iw̃aa liivótenga, í ti híɣe ti híya veléitii mba mbéi Ɛ́fɛsɔ taí h̃u. Aa gɛɛlɛngɔ́ nɔ́ɔ mbéi yílaa wa kɛ́ í lí náa nɔ́ɔ Ésiya lataí sí h̃u kpɛ́lɛɛ, i nungáitii ndiivótenga, í ti híɣe ti híya veléitii kái kái mba. Aá lɔɔ́ nde ngáá kpatɛ ngeyá yálangai sítii nuu áá kpatɛ́, ngalá fíli táá ngáá ti ye.

²⁷Faa báma lɔɔ ɣɛ́ í lá a mu yáwo ɣɛndái sí w̃a, ndaaheí nyɔ́u í vɛ́lɛ mba. Ná vólu, faa báma lɔɔ ɣɛ́ í lá ngala ngwálai Átimi hɛli pɛ́lɛi wuu w̃a, sífaa báá fíli ɛi ɣɛ fɛli pɛ́lɛi wúú w̃á. Aáva nungáitii tí taí sítii su ti Ésiya lataí sí kpɛ́lɛɛ sú í báha náa ngetéyangi sí h̃uu yélaitii mba, tɛí mɔ́ɔ́ fɛli.”

²⁸Ná nungái nátii ti sí ỹɛ́nini, ti liiyáw̃al̃angɔ i ɣɛi la, tí pɛlɛ woo gúlama, táá ɣɛ́ ta, “Átimi lɔ ngwala yakpangɔ Ɛ́fɛsɔ taí h̃u.”

²⁹Kɛ nungái kpɛ́lɛɛ taa walái ná h̃u ti ɣɛ́a wu nga wúúlee ngáá kpɔɔlɔ wálai sí í ɣɛ́i gulaní. Kɛ maa núngai nátii ti Gééyɔ houngá taá Alesitáákɔ tiyɛ́i ti ɣɛ́i ngáá Pɔ́ɔ híya polu yeláitii ti gúlani Mɛsedóniya lataí h̃u. Tí liiní ngáá ti ye ngáá piliỹɛ́ wála ỹandái ná tɔ́ɔ́ w̃aakpɔ́ na.

³⁰Pɔ́ɔ i ɣɛi loní í gúla faŋaí gakála, kɛ́ Jísu volú yelaítii tɛ́i belé kɛ ɔ́ɔ́ gúla.

³¹Ná vólu múl̃ɔ, tataí ná h̃u núú wala wala lɛingáá tiyɛ́i ti ɣɛ́i ngáá Pɔ́ɔ mbálangaa, tí woo vílini ngelé, táa maanɛ́ɛ́nɛ ngáá á láa kɔvɔ́ p̃ɛ́ɛ́ ngáá ɔ́ɔ́ lí maakpɔ́ womái ná ngáá í yɛ́pɛ nungáitii ngelé.

³²Faŋaí i ɣɛi nɔ́ɔ múkumaka aáva taá mɔ́ɔ ɣɛi ngoo yiláá su. Ti lɛ́ingaa ti ɣɛ́i táá woo gúla ngáá faa véka, ti lɛ́ingaa táá woo gúla ngáá peka. Ti bih̃íw̃aa taá ɣɛi kɔlɔ́ p̃ɛ́ɛ́ sí ti ɣɛ́i na faaw̃a.

³³Júsuaitii tí Alɛsáánda lukpení veleí la. Aáva faŋaí ná h̃úu yélaitii ti lɛ́ingaa ti ɣɛ́i taá nde ma ngáá sí kule i ma ngáá í kɛ. Aáva i loko ɣɛí ngáá ti ye mɛ́mɛ ngáá tí w̃aa ɣɛ ló kɛinɔɔ́ í gɔ́sɔ nungáitii kakála.

³⁴Kɛ́ ná tí ngatɔ́ni ngáá kɛ laá lɔ ngáá Júsu w̃ɔɔ, ti kpɛ́lɛɛ tí woo gúlani w̃ɔl̃íma ngáá ngoo yílaa háwa félengɔ laa lówah̃u táá ɣɛ́ ta, “Átimi lɔ ngwala yakpangɔ Ɛ́fɛsɔ taí h̃u.”

³⁵Kɛ kɔlɔ vɔ́nɛ mɔ́i taa walái ná hááw̃a i faŋaí ná ya njéinga, i ɣɛ ti w̃a, “Ɛ́fɛsɔ yeláitii, kɛmbɛ nuí kpɛ́lɛɛ tí faa wɔ́lɔ mba ngáá kɛ Ɛ́fɛsɔ taa walái sí h̃úu lɔ í ngáá ngala ngwálai Átimi laa w̃áá vɛ́lɛ mái? Kɛmbɛ mbéinda lɔ ngi hɛ́ɛ́ma wɔ́tui í gúlani ngelegóóh̃u í h̃úndɛ na?

³⁶Faalɔ, ná maaɣaalí w̃áá áá tɔɔỹáá haí sítii mba, maa áá ɣɛ nɛɛni wú w̃aa ɣɛ ló, wálaa faa fíli kɛ́ ngáá kpɛlí.

³⁷Wú vaá ngáá siỹɛngái sítii mbéi kɛ kíya bɛ́lɛ aa ngáá ŋuỹá tɔɔ ɣɛ́ mbongɔ́ mu yála fɛli pɛ́lɛitii mbu kɛlaa tɔɔ ɣɛ́ tɛɣɛsu gúlangɔ ngáá Átimi.

³⁸Kɛ́ ná faa báálɛ áá ɣɛ́ Damítiyɔ taá ngi mbála yengé mbeláitii ki ma nuu fíli fááw̃a, taá li, tí mah̃abéhe mbo sífaa kóótiitii ndaawóngɔɔ le aáva masangáitii tiyá lɔ na.

³⁹Kɛ́ ná wɔ́li faa véka fíli áá ɣɛ́ na ngáá wú lóngɔ wú ndaa gúla, kɛ maa áá ɣɛ́ nɛɛni kpɔngí w̃ɛ́ɛ́ ma, í lé ngáá sava veleí.

⁴⁰Kɛ kíya naá maa hái sí í na, tɛingaa faa bá tɔɔ vá lamá mu w̃a kpɔɔlɔ wálai sí hááw̃a í wónga hááwɔ. Ná ná va ngáá ɣɛ́, mɔí hómbo mɔɔ́ háwu ɣɛ kpɔɔlɔ wálai sí hááw̃a sífaa mbuu fíli áá mba.”

⁴¹Ná í vílani fái sí lemá, i ndení naá nungáitii ma ngáá ti lí aáva nátii tí lí.