Read Bandi TI GƐ́Ɛ́ HAÍTII 2 Bible Online

TI GƐ́Ɛ́ HAÍTII 2 - Bandi bible

TI GƐ́Ɛ́ HAÍTII 2

¹Júsuai ti hóloi sí taá tóli ngáá Pɛnɛkɔ́sii ná í fóloni ma, folói na sítii kínɛi ti langɔ́ í ɣɛ́i la ngáá Jísu, ti yatɛ́ngɔ í ɣɛi lá mba ỹanda yílaa.

²Ngamá nɔ́ɔ́, kɛ tí ŋani tá h̃uumɛ́ninga kíya nɔ́ɔ fɛfɛ ngákpangɔ wála áá ɣɛ́ na aáva áá gulá ngeleya. Suungí í héi pɛlɛ́i ná kpɛ́lɛɛ mbú ti ɣɛ́i héini na.

³Kɛ tí ŋani tá lɔngá kulangɔ́ ngáá ngɔmbu hó kɛ kíli. Maa wɔ́lingi ná yángi wɔ́lɛ wɔlɛ́ma, tí yéi yéi ti w̃a ngáá ngilá ngíla.

⁴Ngalángi Hɛ́ɛ́ma Ỹínangi i yeiní ti kpɛ́lɛɛ má aáva tí tɔkúla héini naa ngáá yɛpɛndáá híí woo vekaítii su kíya nɔɔ́ Hɛ́ɛ́ma Ỹínangi ɔ́ɔ́ maa yákpangi he ti yilá ngíla mbɛ́.

⁵Ná h̃úu vá Júsuaitii Ngala ndúwambai í ɣɛ́i ti h̃u tiyɛ́i ti gúlani ndɔwɔlɔ́ vékaitii kpɛ́lɛɛ sú tí ngeleí sí wu, ti ɣɛ́i Jɛlúsɛl̃ɛ ná h̃u fái sí í ɣɛ́ni.

⁶Ná tí nungái sɔɔlɛ wói sí ỹɛ́nini, faŋaí yángi lɛ́i mba ỹanda yílaa ti gindáá vílingɔ, bɔw̃álale ti Jísu volú yélai nátii ngoo ỹɛ́nini tíwaa yɛ́pɛ nungáitii ti yilá ngíla p̃ɛ́ɛ́ ti híí woítii su tɔ́ɔ́ nde.

⁷Faŋaí loní nɔ́ɔ kindaa vilíngi sí h̃u, kɛ faŋaí sí h̃u yélaitii tiyá tɔ taá mɔɔni mbó, táa ɣɛ́ ta, “Kɛ́mbɛ siỹɛngái sítii kpɛ́lɛɛ tíwaa njɛpɛí sítii pu tiyá lɔ ngáá Galéli yelaa?

⁸Kɛ ndeé lɔ náá í kɛ́nga ni yilá ngílangi p̃ɛ́ɛ́ náa ni híí woítii mɛni siỹɛngái sítii táá ti le?

⁹Aáva ni gúlangɔ mbéitii taá náitii tolí ngáá Pátiya, Médiya, Ila, Mɛsɛpɔtémiya, Judíya, Kapadósiya, Pɔ́tɔ, Ésiya,

¹⁰Felíjiya, P̃ɛɛfíliya, Íjepi, ɛ́ɣɛ tataí nátii su ti Lébiya lɔwɔlɔí h̃u sí áá lí ngáá Saílini taa walái h̃uu véle. Ná vólu, ni lɛ́ingaa niỹá lɔ ngáá sei heí mbélaa ni gúlangɔ Lóómi.

¹¹Ni lɛ́ingaa ni gúlangɔ Kíliti ɛ́ɣɛ Aléébiya. Ni lɛ́ingaa niỹá lɔ ngáá Júsua. Ni lɛ́ingaa va naa ngáá Júsua, kɛ́ ni lókoheingɔɔ lé Ngala sávaitii mbu í féni. Kɛ́ na fíli su, ni kpɛ́lɛɛ niỹá lɔɔ́ nungái sítii ngoo ỹɛ́ni tíwaa yɛ́pɛ ni híí woítii su bɛ́kpɛ kɔwɔ́ato faa wála wálaitii mba Ngala ngi kɛ́nga!”

¹²Ti gindáá vílingɔ i ɣɛi lá, tí ɣɛ́ wu nga wúúle, aáva ti ɣɛ́i náa taá ỹɔw̃ɔ́ ỹɔ́w̃ɔ w̃ɔɔní, táá ɣɛ́ ta, “Fái sí wuí wa ngáá bɛɛ́?”

¹³Ná fíli su, ti lɛ́ingaa ti ɣɛ́i taá ngɛlɛ́ gúla Jísu volú yélai nátii su, táá ɣɛ́ ta, “Ndɔí lɔ ngwala kpɔlengɔ́ ti yɛ.”

¹⁴Kɛ Ngalángi gééla púúngɔ maah̃úú félengɔitii su, sí tɔ́ɔ ɣɛ ma Pítɛ i wuyoɣénga, í ló taa púúngɔ maah̃úú yilángaa vékaitii. Kɛ i pɛlɛngá yɛpɛmá faŋaí yelé, áá ɣɛ ta, “Mu mbála Júsuaitii ɛ́ɣɛ wɛ́i kínɛi wú Jɛlúsɛl̃ɛ taa h̃u, a bɛlɛ́ ngí fái sí vólui h̃úúɣɛ ngáá wú ye. Faalɔ, a wolílo pánda vanda fái sí w̃a ngáá nde.

¹⁵Ndóngɔɔ lé ngí ndé wú w̃á ngáá kɛ ndɔɔ hoú láa le nɔ́ɔ ɣɛ́ sú kɛ kíya í wú gí ma. Laa lɔ nɛ́nɛ nɔ́ɔ ngáá ngele holó.

¹⁶Kɛ́ sí áá híya, laá lɔ Ngalá ndaa háá lé mɔ́i Jówɛ í ndéni,

¹⁷i ɣɛ ta, ‘Ngakɛɛlɛ́ fóloitii ma, Ngalá ngí ndéni ngáá kɛ laá lɔ́ɔ kɛ ngáá háwu ngi Hɛ́ɛ́ma Ỹínangi i ɣɛ́ nuí kpɛ́lɛɛ pólu. Laáva wú h̃íỹɛndou lengáitii ɛ́ɣɛ wú ỹáh̃alou lengáitii taá ɣɛ́ ngáá Ngalá ndaa háá lé mbélaa, ná vólu, Ngalá ngáá kɛ ngáá háwu wú h̃íỹɛ ndakpangáitii taá ɣɛ taá wú sú lɔ ɛ́ɣɛ wú káwalani taá ɣɛ taá siŋal̃áitii mbo.

¹⁸Ngalá ngí ndení múl̃ɔ ngáá ngi lúwɔ lopoáitii kéle tɔ, siỹɛ́ kpɔ́ngɔ nyáh̃a wa, aá lɔɔ́ kɛ ngáá háwu ngi Hɛ́ɛ́ma Ỹínangi í ɣɛ ti volú fóloi nátii ma. Aáva taá ɣɛ ngáá ndaa háá lé mbélaa.

¹⁹Ná vólu, aá lɔɔ vá káámaa haítii ngakɛ́ma ngeleí ya ɛ́ɣɛ kindaa vilí fáitii ngelewu. Maa háitii taá ɣɛ ngáá ŋaaw̃ɔí ɛ́ɣɛ ngɔmbuí ɛ́ɣɛ nduulu yambɔ́ɔ́lɔngɔ wála.

²⁰Folói aa vote ngáá kpindíi aáva ngalúngi aa biỹá kíya nɔ́ɔ́ ŋaaw̃ɔ ɣɛ kíli. Ná lɔɔ ɣɛ́ p̃ɛ́ɛ́ Ndemɔí hólo w̃aanɛ́ɛ́ngɔ wálai ɔ́ɔ́ ɣɛ́a foló ma.

²¹Laáva nuí fíli áá Ndemɔí Ngála maalolí kpɔmba hááw̃a, ngumáá áá wo.’ ”

²²Kɛ Pítɛ í mɔ́ɔ ndengá, i ɣɛ ta, “A wolílo sí w̃a, Ísulɔ yelaítii. Jísui sí í ngáá Násɔlɛ taí h̃uu w̃ɔ́i, laá lɔ í ngáá nuí Ngalá ngí tɔvengɔ́ wú yéle aáva i ngakɛ́ngɔ ngáá wú ye ngáá ngakpa fáá walaítii ɛ́ɣɛ káámaa haítii í ɣɛ́i áá kɛ taá kindaa vilí fáitii Ngalángi yákpangi h̃u. Aáva wú faa wɔ́lɔ kɔwɔ́ato faí sítii mba.

²³Ngalá ngí ɣɛi faa wɔ́lɔ mba, ná vólu, ngi háá h̃uubatɛngi ɣɛi lá ngáá í Jísu he wú yáá aáva faa ỹɔ́u yélaitii tí bɔ́ni wú wá wú paa ngáá kpakpángi wú mbóni lá kulɔ́sii w̃a, í ló na, í há.

²⁴Kɛ́ Ngalá ngi mbuyoɣéni sái h̃u í ngumááwo nduwu ya fuulɛ́i yaá, bɔw̃álale aa ɣɛi ngáá solowo fáá ngáá sái yákpangi ɔ́ɔ́ bá ma.”

²⁵Kɛ Pítɛ í mɔ́ɔ ɣɛa ta, “Masangí Deevé i yɛpɛní kɔwɔ́ato Jísu wa, i ɣɛ ta, ‘Ngí Ndémɔi lɔní gakála hɔ́wɔ fíli. Aáva sífaa i ndóów̃a, ngɛ́i líka vóma.

²⁶Faalɔ, ndííyanɛɛngɔɔ lé aáva sí fíli ngáá ndé aa ɣɛ ngáá kooh̃unɛ́ɛ́ má ɛ́ɣɛ múl̃ɔ kítomai lɔ na, ná fíli su ngɔ́ɔ́ va haamá,

²⁷bɔw̃álale yɛ́i yí ngáá Ngalá, yɛí bééle mbá kámbai h̃u kɛlaa yɔ́ɔ́ bé í Hɛ́ɛ́ma W̃ɔ́i ná wa ɔ́ɔ́ lúúla.

²⁸Yí ndɛɛh̃u gíte veleítii ngakɛ́nga ngáá ngé aáva ní góóh̃unɛi h̃uu áá ɣɛ́ wɔ́ɔ́lɔ ngwala sífaa yá lɔ ndóów̃a.’ ”

²⁹Pítɛ i ndií ngú ma, i ɣɛ ta, “Mu mbálangaa, ngáá ndé wú w̃á kpál̃au ngáá a mu káwala Masangí Deevé i haaní, tí kpɔ́lu, aáva ngi gámbai lɔ mbéi hááwɔ hóloi w̃a.

³⁰Kɛ́ Másangi Deevé í ɣɛ́i ngáá Ngalá ndaa háá lé mɔ́ɔ aáva i ɣɛi kɔlɔ́ ngáá kɛ Ngalá ngí kuulóngɔ, í kɛ́lɛ ngeɣé ngéya ngáá laá lɔɔ vá laá Deevé ngi létɔi ta héima laá Deevé vóma masandái h̃u.

³¹Ngalá ngí ngákɛni ngáá Masangí Deevé ngáá sí í ɣɛ́i áá vá ɣɛ́ma naa wutúwɔ. Aáva i yɛpɛní kɔwɔ́ato Ngalángi Lókolo Mbá W̃ɔ́i wuyoɣéndai wa sái h̃u ngáá kɛ Ngalá ngɛ́i beele mba kambái h̃u kɛlaa ɔ́ɔ́ lúúla.

³²Ngalá ngí Jísui sí wúyoɣenga saí h̃u aáva a mu kpɛ́lɛɛ a muỹá lɔ ngáá maahéélea.

³³Ngalá ngí séinga ngufema ỹándai kpéla ngi w̃ásandai h̃u. I Hɛ́ɛ́ma Ỹínangi w̃ááhɔlɔnga áá gúla Kɛɛɣɛí Ngalá ngéya. Hɛ́ɛ́ma Ỹínangi sí vá tɔ́ Ngalá ngí maagúúlo mbongɔ́. Ná vólu, sí naá wú waa mɛni náa nde ɛ́ɣɛ sí wúwaa naa lɔ náa kɛ, maa Hɛ́ɛ́ma Ỹínangi lɔ náá í ní volú.

³⁴Sífaa Masangí Deevé áá lɛ́ɛ́ni ngelegóóh̃u kɛ kíya Jísu í lɛ́ɛ́ni ngelegóóh̃u. Kɛ́ ná fíli su, i ndení, i ɣɛ ta, ‘Ndemɔí Ngalá ngí ndení Ndémɔi w̃a, i ɣɛ ma, héi ngufema ỹándai kpéla ní w̃ásandai h̃u

³⁵í ló su kpóloo ngí í wááhilima yélaitii kɛ ngáá í gɔ́wɔ lóów̃aa wɔ́lingaa.’ ”

³⁶Pítɛ í ndíí ngu ma, i ɣɛ ta, “Faalɔ, Ísulɔ yélaitii kpɛ́lɛɛ, a ɣɛ́ fái sí wɔ́lɔ kpál̃au ngáá kɛ Jísui sí wú kpakpáni kulɔ́sii w̃a, Ngalá ngí kɛngá ngáá ngi Lókolo Mbá W̃ɔ́i ɛ́ɣɛ mu Lemɔ́i.”

³⁷Ná nungáitii ti sí ỹɛ́nini, i ti liiỹáánii. Kɛ tí ndéa Ngalángi geelaí Pítɛ w̃á ɛ́ɣɛ Ngalángi gééla vekaítii, ti ɣɛ́ ta, “Mu mbálangaa, bɛɛ́ lɔ náa naá kɛ?”

³⁸Kɛ Pítɛ i ti woo yápotenga, i ɣɛ ti w̃a, “A volú yafé wú háá ỹɔítii mba, wú ngúyai w̃ááhɔlɔ wú yíla ngíla fíli Jísu Kílisitii laahéingi h̃u kɛinɔɔ́ wú háá ỹɔítii suuhaa í ló. Aáva wáá Hɛ́ɛ́ma Ỹínangi w̃ááhɔlɔ náa ngáá fembɛ wɔ́lingi.

³⁹Kuulóngi sí lɔ na wú hááw̃a ɛ́ɣɛ wú léngaitii ɛ́ɣɛ sítii kpɛ́lɛɛ ti w̃áá gooh̃ángɔ. Na waa ngáá, sítii nɔ́ɔ kpɛ́lɛɛ Ndemɔí a mu Yálangi áá vá ti lolíma.”

⁴⁰Pítɛ í ti laahíni ngáá ngoo véka bíh̃i bih̃i. Ná vólu, i ti lɛnɛ́ni, i ɣɛ ti w̃a, “A bɔwɔ́ w̃ááɣawo faa bámai sí yáa íwaa vá vááma nyaama yéteyangi sí h̃u.”

⁴¹Sítii pa tí lókoheini ngi gééla woí sí wu, ti ɣɛ́i ngáá nuu tásu sáángɔ ỹɔ́kɔ aáva tí ngúyai wóni ngáá ti ye, ti báha Ngala fɛ́li mbélaitii mba naa hɔwɔ́.

⁴²Tí hɛmbɛ́ kpɛ́lɛɛ púni Ngalángi géélaitii ti gálambongi h̃u ɛ́ɣɛ ti w̃aakpɔ́ndai mba ỹanda yílaa ɛ́ɣɛ Ngala fɛ́li ndááỹɛngi wóndai taa Ngala fɛ́lindai h̃u.

⁴³Ngalángi géélaitii ti káámaa haa bih̃íw̃aa ɣɛ́ni ɛ́ɣɛ kindaa vilí fáitii. Sí vá i kɛ́ni ngáá háwu nuí kpɛ́lɛɛ suulaa í hé ngáá nduwái.

⁴⁴Aáva sítii kínɛi ti langɔ́ í ɣɛ́i la ngáá Jísu ti bɔngɔ́ i ɣɛi lá yaá haa w̃a ti yaá haítii kpɛ́lɛɛ pá i ɣɛi su yíla.

⁴⁵Ti síí híí fíli máá híyani í ɣɛ́i ngáá ti yaá wɔ́lingaa tí maa gápangaitii ngakɔ́lɛ wɔlɛ́ lowah̃u. Aáva tɔ́ɔ fe nuí fíli ngéya kɛ kíya maa w̃ɔ́i beɣéngɔ ɔ́ɔ́ ɣɛ́ la.

⁴⁶Tí ndíi ngú ma ngáá w̃ɛɛ́ndaa Hɛ́ɛ́ma Yála Pɛ́lɛi góvii h̃u foló fíli má. Tɔ́ɔ́ w̃ɛ́ɛ́ ti vɛ́lɛitii nda bɛ́kpɛ, tí lááỹɛ ỹanda yílaa ndiiwolé w̃ááh̃u ɛ́ɣɛ kooh̃unɛ́ɛ́ h̃u.

⁴⁷Ti ɣɛ́i taá Ngála ndaaw̃áálɛ ti kpɛ́lɛɛ, ná vólu, nungáá vékaitii kpɛ́lɛɛ táa gooh̃unɛ́ɛ́ ti gɛɛhɔ́ pándaitii faaw̃a. Aáva ngele fíli ɔ́ɔ́ wó Ndemɔí ɔ́ɔ́ ta báha sítii mba ti wumááwongɔ í ɣɛ́i lá.