Read Bandi TI GƐ́Ɛ́ HAÍTII 21 Bible Online

TI GƐ́Ɛ́ HAÍTII 21 - Bandi bible

TI GƐ́Ɛ́ HAÍTII 21

¹Ná ni hɛ́lini naá tiyéni, ni híɣeni naá na, ni víli kelé ngwálai h̃u, ní li tííŋ taa walái sí h̃u taa náá lolí ngáá Kɔ́si. Maa yélei ná í wóni, kɛ ní liingá Lósi taa walái h̃u. Ná ni gúlani na, ní liiní Pátala taa walái h̃u.

²Ní kelé ngwála lɔní áá lí Fɔnísiya lataí h̃u, aáva ni vílini su, ní pɛlɛ liimá.

³Ní ndɔwɔlɔ́i ná h̃uulɔní taa náá lolí ngáá Sáipulɔ, ni yéini náa ngáá naa w̃áa heɣá h̃u veleí, ní lí Síliya lɔwɔlɔí h̃u. Ní hítɛni taa walái ná h̃u taa naa lolí ngáá Táya. Naa lɔ ti ɣɛ́i taá vá kasɔ́itii kuláma na keléngi ná h̃u ni ɣɛ́i su.

⁴Ná ní Jísu volú yélaitii tɔní na, ní fólo ngɔ́felangɔ ɣéni na ti loow̃á. Hɛ́ɛ́ma Ỹínangi w̃aa véle w̃a, tí ndéni Pɔ́ɔ w̃a ngáá álaa ndi ngu ma ngáá siyangí í ɣɛ́i su áá lí Jɛlúsɛl̃ɛ.

⁵Kɛ́ ná ni líi hɔwɔ́i í fóloni ma, ni gúlani naa wa ní ndi ngu ma ngáá ni líi velé. Jísu volú yélaitii kpɛ́lɛɛ kpahangɔ́ ti ỹáh̃aitii mba taá ti léngaitii, tí ni gúyapeleni, ti gúla ngáá ni ye taí ná wa. Aáva ná ní foloní yívoi la, ní wumbú hítɛni, ní Ngala fɛ́li.

⁶Ná ni vílani hɛlimá naá tiyéni, ní lɛɛní naá kelé ngwálai h̃u tiyá vá tí yangáima ti vɛ́lɛitii nda.

⁷Ní ndíi ngú ma ngáá ni híyangi naa gúla Táya taí h̃uu wá, ní lí ni hítɛ Putɔ́leme taa walái h̃u. Naa lɔ ní ndáalima woní na Ngala fɛ́li mbélaitii ma. Aáva ní folo yílaa kɛ́ni na ti loow̃á.

⁸Ná ngele í wóni, ni gúlani tái ná h̃uu wá aáva ní fóloni Sɛsɛ́liya taa h̃u, ní li Félepi vɛ́lɛi la lɛ́i í ɣɛ́i ngáá Ngala ngóó le mɔ́i. Félepii sí va tɔ í ɣɛ́i ngáá nuu ngɔ́felangɔi ti tá yílaa Ngala fɛ́li mbélai ti ɣɛ́i Jɛlúsɛl̃ɛ tí lókoloni tí wa ngáá kpɔmba yélaa.

⁹Félepi ỹáh̃alou lengaa nááningɔi ti ɣɛ́i ngáá Ngalá ndaa háá lé mbélaa. Aáva taá ɣɛi siỹɛ́ mbɛ.

¹⁰Ná ni ɣɛ́i náa kuu ɣɛ́i ti loow̃á féle, Ngalá ndaa háá lé mɔ́ɔ yiláá sí taa ɣɛ́ ma Agábɔ, i gulaní Judíya lataí h̃u, í vá.

¹¹Ná í vááni ni yelé, i kula hakpái ná yéɣeni Pɔ́ɔ ɔ́ɔ́ gilí liih̃ú, í bɔwɔ́ lokoí h̃uu yíli la taá gɔwɔ́itii. Kɛ i ndengá, i ɣɛ ta, “Hɛ́ɛ́ma Ỹínangi i ndengɔ́ ngáá kɛ ngimɔ́ɔ́ Júsuaitii tí Jɛlúsɛl̃ɛ táá vá ndiih̃u yilíngi sí w̃ɔ́i yílima. Ná vólu, tí tokola sítii ngeyá taa ngáá Júsua.”

¹²Ná ni sí ỹɛ́nini, niỹɛ́i kínɛi ni ɣɛ́i na, ni Pɔ́ɔ w̃aanɛ́ɛ́nɛni ngáá álaa lí Jɛlúsɛl̃ɛ.

¹³Kɛ Pɔ́ɔ i ni woo yápotenga, i ɣɛ ni w̃a, “Ndeé le wúwaa wɔ́lɔ, wáá ndiiỹaaní víli má? Aa nɔ́ɔ léi ngáá ngíli fááw̃a, kɛ́ mááhei wóngɔɔ lé sáá haá ɣéle tɔ ma Jɛlúsɛl̃ɛ Ndemɔí Jísu haaw̃a.”

¹⁴Ná ni bááh̃aani maanɛ́ɛ́nɛma, ní béni mba aáva ní ndé ma, ni ɣɛ́ ma, “Bɛlɛ́ Ndemɔí Ngalángi ndái í ndo ma.”

¹⁵Ná sí í gúlani su, ní w̃aahéi wóni, ní lí Jɛlúsɛl̃ɛ.

¹⁶Jísu volú yelaí ti lɛ́ingaa sítii ti ɣɛ́i ngáá Sɛsɛ́liya yélaitii, tí ni gúyapeleni, tí va ngáá ni ye Minásɔ vɛlɛí lá mbéi ní ɣɛ́i naa vá lóma na. Minásɔi sí vá i ɣɛi ngáá Sáipulɔ lɔwɔlɔí h̃uu w̃ɔ́ɔ́. Aáva i ngáá Jísu volú w̃ɔ́i ta wɔ́lɔ kpɔ́lɔɔ.

¹⁷Ná ní folóni Jɛlúsɛl̃ɛ, Ngala fɛ́li mbélaitii tí lókoheini ni wu ngáá kooh̃unɛ́ɛ́.

¹⁸Ná ngele í wóni, naa Pɔ́ɔni ní liiní ngáá ní Jimisí lɔ́, aáva Ngala fɛ́li mbélai ti géle ɣele mbeláitii kpɛ́lɛɛ ti ɣɛ́i na.

¹⁹Pɔ́ɔ i ndaalima wóni ti w̃a, aáva í polu haa léngi kpɛ́lɛɛ mbó ti w̃a kɔwɔ́ato sí wa Ngalá ngi ɣɛ́i kɛní sítii ndiiwáá taa ngáá Júsua ngengengí sí w̃aa véle w̃á laa Pɔ́ɔ í ɣɛ́i áá mbo.

²⁰Ná ti sí ỹɛ́nini, tí Ngalá ndaaw̃áálɛni. Kɛ tí ndengá Pɔ́ɔ w̃a, ti ɣɛ́ ma, “Mu mbálai, yá bútei yá lɔɔ́ naa lɔ kíya a mu mbála Júsuai bih̃íw̃aa ti lánga ngáá Jísu. Aáva ti kpɛ́lɛɛ ti golóngɔɔ lé ngwala Ngala sávai wu.

²¹Aáva ti mɛningá ngáá kɛ yá lɔ́ɔ Júsuaitii kpɛ́lɛɛ kálambo tiyɛ́i ti héini sítii ndiiwáá taa ngáá Júsua ngáá tí vólu yáfe savaítii mba Ngalá ngí féni Muusé yáá. Yá lɔɔ nde múl̃ɔ ti w̃a ngáá tálaa ti léngaitii tɔve pɛlɛ́ vólu kɛlaa tɔɔ híya ngáá mu ndá híya veleí a mú máálengɔ mu káwalani ngeyá.

²²Maa áá ɣɛ́ nɛɛni a mú péle wɔlí fái sí wa, sífaa tɔɔỹáá hááw̃a, tiyá lɔɔ vá mɛnimá ngáá kɛ yí vaangá.

²³Faalɔ, sí ɣɛ náa nde í w̃á. Siỹɛngáá nááningɔ lɔ mbéinda ti ngáá a mu tá tí kɛ́lɛ ngeɣénga Ngalá ngéya.

²⁴Baha siỹɛngái sítii mba faí sítii su táá vá kɛ́ma ngáá kɛinɔɔ́ kpaloí[7] í gúla ti wa. Aáva sí fíli ngi háá áá ɣɛ́ lói ti wa, yí fe ná ná áá ɣɛ́, taá ti wúngitii ngóle náa. Ná ɣɛ́ngɔ, nungáitii kpɛ́lɛɛ taá ɣɛ kɔlɔ́ ngáá kɛ sí kínɛi tí mɛningɔ́ kɔwɔ́ato í wá, laá lɔ ngáá ndɛɛ́ fó fo, kɛ́ aá ɣéle, ya bútei yá lɔɔ híya ngáá savaítii Ngalá ngí féni Muusé yáá.

²⁵Kɛ́ sítii taa ngáá Júsua ti vílinga Ngalá fɛ́lindai h̃u, sí ní suubátɛngɔ, ní maa gɔ́lɔ vɔnɛngá ti yelé ngáá tálaa mɛɛní fíli mɛ́ sí nungáá taa ɣɛ́ féni kɔɔ kɔɔ́ ŋániai yɛ taa ti yeɣé ngáá ngalángaa. Ná vólu múl̃ɔ, tálaa ŋááw̃ɔ ỹɛ. Tálaa suwa fíli mɛ́ tɛi ɣɛ́ mbólo láá léveni ɔ́ɔ́ ɣɛ́a ha. Ti gúla kɔlɔsiyá mbóndaa h̃u.”

²⁶Ná maa yélei ná í wóni, Pɔ́ɔ i nuu nááningɔi nátii ngeɣení, í báha ti wa, tí kpaloí gúla ti wa. I liiní náa Hɛ́ɛ́ma Yála Pɛlɛí góvii h̃u ngáá í nde folói kpalo gulá fái ti wa kpɛ́lɛɛ í ɣɛ́i aa vá vílama. Aáva maa hááɣaitii tɔ́ɔ́ kúla náa ti yilá ngíla p̃ɛ́ɛ́ faaw̃a.

²⁷Ná náa fólo ngɔ́felangɔi í ɣɛ́i náa áá víla, Júsuaitii ti lɛ́ingaa sítii ti gúlani Ésiya lataí h̃u, ti Pɔ́ɔ lɔní Hɛ́ɛ́ma Yála Pɛ́lɛi góvii h̃u. Tí faŋaí liiwúúlɛni, ti Pɔ́ɔ hóu.

²⁸Ti ɣɛ́i taá woo gúla, táá ɣɛ́ ta, “Mu mbála Ísulɔ yeláitii, a bɔ́ ni wa kái! Siỹɛndópoi sí lɔ áá nungáitii kálambo ỹandá fíli ngáá kalambongí sí áá pele w̃a kɔwɔ́ato Ísulɔ yeláitii a mu wa kpahangɔ́ mu hávaitii mba taá mu Hɛ́ɛ́ma Yála Pɛ́lɛi sí. Kɛ́ í síɣe féyaa ná wa, i vaangá ngáá nungáá taa ngáá Júsua Hɛ́ɛ́ma Yála Pɛ́lɛi góvii h̃u, í kpalo vɛ́lɛ naa wa.”

²⁹Ti sí léni bɔw̃álale ti ɣɛ́i Túlofimɔ lɔní lɛ́i í ɣɛ́i ngáá Ɛ́fɛsɔ w̃ɔí Pɔ́ɔ volú Jɛlúsɛl̃ɛ. Faalɔ, tí gísiya naá la ngáá kɛ Pɔ́ɔ i liingɔ́ lá Hɛ́ɛ́ma Yála Pɛ́lɛi góvii h̃u.

³⁰Taa walái ná h̃uu yélaitii kpɛ́lɛɛ ti wúyoɣeni yéɣesesei, táá gúla kovíi kpɛ́lɛɛ sú táá vá ngáá viliỹɛ́. Ti Pɔ́ɔ houní, tí kpókpo ti gúla lá Hɛ́ɛ́ma Yála Pɛ́lɛi góvii h̃uu wá. Ngamá nɔ́ɔ kɛ tí kóngitii ndaabɔ́lu kpɔlúnga.

³¹Ná náa ti ɣɛ́i tí paa, kɛ Lóómi hoyaítii ti w̃ááh̃u w̃ɔ́ɔ walaí i mɛningá ngáá kɛ kpɔɔlɔ wála gulangɔ́ɔ́ lé Jɛlúsɛl̃ɛ taa h̃u kpɛ́lɛɛ.

³²Ngaah̃ú w̃a nɔ́ɔ, kɛ i sóya nuu wala wala lɛingáá yéɣenga ti ɣɛ́i mbu ɛ́ɣɛ sóyaa lɛingáá, ti yéi ngáá viliỹɛ́ faŋaí h̃u. Ná nungái sítii ti Lóómi sóya nuu walaí lɔ́ni taá ngi hóyaitii táá vá, tí béni náa Pɔ́ɔ levendái wa.

³³Maa hóya nuu walaí ná i vaaní náa, í Pɔ́ɔ hóu, í nde ngáá tí píli njɔlɔwɔ félengɔ ya. Kɛ i mɔɔni mbónga, i ɣɛ ta, “Ele wáá ngáá siỹɛndópoi sí? Ndeé lɔ í kɛ́ngɔ?”

³⁴Nungáá lɛingáá ti ɣɛ́i faŋaí ná h̃u tí woo gúlani ngáá faa véka, ti lɛ́ingaa táá woo gúla ngáá peka. Aáva ná i kɛní Lóómi hoyaí ti w̃ááh̃u w̃ɔ́ɔ́ walaí ná ɛ́i belé kindaa levé sɔlɔ faí sí h̃u, bɔw̃álale sɔɔlɛ léé lee lɔ nɔ́ɔ í ɣɛ́i na. Faalɔ, i ndení ngáá ti lí ngáá Pɔ́ɔ sóya baikií h̃u.

³⁵Ná Pɔ́ɔ í fóloni sitɛ́pii h̃u í ɣɛ́i baikií wa, faŋaí lápi gilíi yangí ɣɛ́i wɔɔlɔ ngwala. I kɛní sóyaitii tí lɛ ngáá Pɔ́ɔ.

³⁶Faŋaí ná í ɣɛ́i Pɔ́ɔ volú, tí ndií ngu ma ngáá woo gúlandaa, táá ɣɛ́ ta, “A paa!”

³⁷Ná sóyaitii ti ɣɛ́i náa ti lí ngáá Pɔ́ɔ sóya baikií h̃u, kɛ Pɔ́ɔ i sóyaitii ti w̃ááh̃u w̃ɔ́ɔ́ walaí w̃ɔ́ɔ́ninga, i ɣɛ ma, “Yáá lúw̃a ma ngáá ngí faa tá le í w̃a?” Kɛ ná i ngoo yápotenga, i ɣɛ ma, “Mɛimaa yáá Gilísi woí lé!

³⁸Kɛ yálaa le yɔ́ɔ́ ɣɛ ngáá Íjepi w̃ɔí na ku tá gúlangɔ w̃a náá sú yí ndapi laalɛ́ni gɔ́mɛtii wu aáva yí li ngáá nuu tásu nááningɔ ngaalaí h̃u ti ngáá kɔɔwɔ́ mbélaa?”

³⁹Kɛ Pɔ́ɔ i ngoo yápotenga, i ɣɛ ma, “Nyá lɔ ngáá Júsu w̃ɔɔ. Ngí gúlangɔ Tásɔɔ í tátai sí h̃u taa naa lolí ngáá Silísiya. Nyá lɔ ngáá ngangímba láá wála h̃uu w̃ɔ́ɔ. Faalɔ, yí velení kái, bɛlɛ́ ngí yɛ́pɛ nungáitii ngele.”

⁴⁰Ná i lúw̃ani ma ngáá Pɔ́ɔ í yɛ́pɛ, Pɔ́ɔ i loní sitɛ́pii ya, i loko ɣɛ mɛ́mɛ ngáá faŋaí ngáá tí w̃aa ɣɛ ló. Ná ti kpɛ́lɛɛ tí w̃aa ɣɛní ló, i yɛpɛní ti yelé Híbulu woí h̃u, i ɣɛ ta,