Read Bandi TI GƐ́Ɛ́ HAÍTII 23 Bible Online

TI GƐ́Ɛ́ HAÍTII 23 - Bandi bible

TI GƐ́Ɛ́ HAÍTII 23

¹Kɛ Pɔ́ɔ í Faa H̃úú Haa Lé Mbélaitii kpelengá tííŋ, i ɣɛ ta, “Mu mbálangaa, kíya ngí ní lɛ́ɛ́h̃ui h̃uuhíyanga í ló su í fólo hááwɔ holoí w̃a, ki máá ɣɛ́ngɔɔ lé kpál̃au Ngalá ngaah̃ú.”

²Naa h̃u nɔ́ɔ kínɛi, Ngala sááɣa gula mbélai ti wutúwɔɔ w̃ɔ́ɔ́ walaí taá tolí ngáá Ananáya, i ndení sítii ma ti ɣɛ́i lóóni Pɔ́ɔ bela ngáá ti ndaa bóólɛ.

³Kɛ́ Pɔ́ɔ i ngoo yápoteni, i ɣɛ ma, “Ngalá ngaa í bóólɛ. Í gúlangɔɔ lé ngáá pɛlɛ́i w̃á ngohó wólengi híyangɔ áá ɣɛ lá ma! Yá lɔ héi míl̃anda ngáá yí kɔ́sɔ savaí w̃aa véle w̃á aáva yá bútei yí wa savaí ỹááni ngáá sí yíwaa nde ngáá ti ndáá bóólɛ!”

⁴Sítii ti ɣɛ́i lóóni Pɔ́ɔ bela, tí ndení, ti ɣɛ́ ta, “Ndeé le yíwaa Ngala sááɣa gula mbélai ti wutúwɔɔ w̃ɔ́ɔ́ walaí yɛ́ɛ́li?”

⁵Kɛ Pɔ́ɔ i ti woo yápotenga, i ɣɛ ta, “Mu mbálangaa, ngáá ɣɛ́ngɔ kɔlɔ́ ngáá kɛ laá lɔ í ngáá Ngala sááɣa gula mbélai ti wutúwɔɔ w̃ɔ́ɔ́ walaí. Sí pɔnɛngɔ́i Ngala Kɔ́lɔi h̃u aá lɔ ngáá sí, ‘Yaá ngoo ỹɔ́u le kɔwɔ́ato í vóngaitii ti wútuwɔɔ w̃ɔ́i wa.’ ”

⁶Kɛ́ ná Pɔ́ɔ í ngátɔni mba ngáá kɛ ti lɛ́ingaa ti ɣɛ́i ngáá Júsuai sítii taa ɣɛ́ ti w̃a Sájusiaitii, pekaítii taa ɣɛ́ ti w̃a Falósiai, kɛ i woo lɛ́nga faa h̃úú haa lemái na, i ɣɛ ta, “Mu mbálangaa, nyá lɔ ngáá Falósi w̃ɔɔ, aáva Falósi w̃ɔɔ goo h̃ú loú wáá ngáá ngé. Nyá lɔ lóóni mbéinda kɔ́sɔma, bɔw̃álale kítomai waa ngáá nuu wúyoɣendai saí h̃u.”

⁷Ná Pɔ́ɔ í ngoí sí léni, kɛ ndaahasá i lɔkúla héinga Falósiaitii ndowah̃u taá Sájusiaitii. Aáva ti bɔ́ngi ná ti ɣɛ́i su, i wɔlɛní su féle.

⁸Sájusiaitii taá ɣɛ́i laní lá ngáá kɛ nuu áá wuyoɣé sái h̃u, ná vólu, taá ɣɛ́i laní lá ngáá kɛ malékaitii tiyá lɔ na kɛlaa ngafuw̃ángai. Kɛ́ Falósiaitii ti ɣɛ́i laní ngáá nátii kpɛ́lɛɛ.

⁹Kɛ́ maa hái ná i ɣɛi náa ngáá sɔɔlɛ wála léé lée. Kɛ́ kaamɔítii Ngala sávai hááw̃a sítii ti ɣɛ́i ngáá Falósiaitii ti lɛ́ingaa tí wúyoɣeni, táá maaɣaalí gúla bútei ngwala, táá ɣɛ́ ta, “Naá nɛ́ɛ́ siỹɛndópoi sí háá ỹaani fíli tɔ́ni. Ná náa hɔ́ɔ wɔ́li áá ɣɛ́ ngáá maléka ɔɔ ná láá lé í ɣɛ ngáá ngafuw̃ángi tá lɔ áá ɣɛ́ yɛ́pɛngɔ ngelé.”

¹⁰Ná naa kpɔɔlɔ́i sí h̃uu í ɣɛ́i náa wɔɔlɔ ngwala, sóyaitii ti w̃ááh̃u w̃ɔ́ɔ walaí ɣéle tɔ, i ɣɛi náa áá lúwa, bɔw̃álale i ɣɛi áá gisíya ngáá tɔ́ɔ́ belé Pɔ́ɔ wali walínga. Faalɔ, i ndení ngi hóyaitii ma ngáá ti yéi na nungáitii ngelé, ti Pɔ́ɔ gulá ti yaá ngáá ngakpá, ti váá la sóya baikií h̃u.

¹¹Kpindi vékai w̃a, Ndemɔí i vaaní, i lo Pɔ́ɔ bela, i ɣɛ ma, “Ndi ngu ma ngáá í lííbangi. Kɛ kíya nɔ́ɔ yí yɛ́pɛnga kɔwɔ́ato mbá Jɛlúsɛl̃ɛ kɛ yáá li Lóómi bɛ́lɛ nɔ, yí yɛ́pɛ na kɔwɔ́ato mbá.”

¹²Ngelendáá vekaí w̃á, Júsuaitii tí w̃ɛ́ɛ́ni ỹandá yiláá tí suubatɛ́ mbo, ti kɛ́lɛ ngeɣé Ngalá ngéya ngáá tálaa mɛɛní fíli mɛ́ kɛlaa tɔɔ́ ŋani fíli kpɔ́le í ló su kpóloo ti Pɔ́ɔ vaa.

¹³Siỹɛngái sítii ti ɣɛ́i lɔvení nuu vúú nááningɔ wa ti ɣɛ́i Pɔ́ɔ w̃aa bɔ séini ngáá tí paa.

¹⁴Tí liiní Ngala sááɣa gula mbélai ti wútuwɔaitii ngelé ɛ́ɣɛ Júsuai ti géle ɣele mbélai, ti ɣɛ́ ti w̃a, “Ní luw̃ángɔ ma kéle kéle kɛ́lɛ maah̃u ngáá ni tá fíli nálaa nɛ́ɛ́ mɛɛní fíli mɛ́ í ló su kpóloo ni Pɔ́ɔ vaa.

¹⁵Faalɔ, wáá le p̃ɛ́ɛ́ ɛ́ɣɛ Faa H̃úú Haa Lé Mbélaitii, á woo víli Lóómi hóyai ti w̃ááh̃u w̃ɔ́ɔ́ walaí yéle ngáá ti vá ngáá Pɔ́ɔ wú yéle. A maa hái gúla nɔ́ɔ́ ngáá wú lóngɔɔ le wú tɔɔỹáá hái kái kái kɔ́lɔ kɔwɔ́ato mbaa hái wa. Aáva ni w̃ááhei wóngɔ aa ɣɛ náa lá ngáá ɔ́ɔ́ ɣɛ́ p̃ɛ́ɛ́ í foló mbéinda naá paa.”

¹⁶Kɛ́ ná Pɔ́ɔ héélai h̃íỹɛndou loí í faa h̃uubatɛ́ngi sí ỹɛ́nini, i liiní sóya baikií h̃u, í nde Pɔ́ɔ w̃a.

¹⁷Kɛ Pɔ́ɔ i sóya nuu wala yiláá tólinga, i ɣɛ ná w̃a, “Lí lɛ́ɛ kái ngáá siỹɛndóu lói sí wú w̃ááh̃u w̃ɔ́ɔ́ walaí yéle. Njɛpɛ lɔ nda ngáá í súúɣɛ lá.”

¹⁸Ná vá ngí lii la ti w̃ááh̃u w̃ɔ́ɔ́ walaí yéle, i ɣɛ ma, “Pɔ́ɔi sí í ngáá pelésina, laá lɔ í tólingɔ, í ndé má ngáá ngí vá ngáá siỹɛndóu loí sí í yéle, sífaa ngoo lɔ́ nda ngáá í nde í w̃a.”

¹⁹Kɛ ná i siỹɛndóu loí hóunga tokoí wa taá laá tí lahiyá ma kulo. Kɛ i siỹɛndóu loí w̃ɔ́ɔ́ninga, i ɣɛ ma, “Ndeé lɔ í lóngɔ yí nde má?”

²⁰Kɛ siỹɛndóu loí i ndengá ma, i ɣɛ ma, “Júsuai ti wutúwɔai tí faa h̃úúbatɛnga ngáá tí nde í w̃á yí vá ngáá Pɔ́ɔ Faa H̃úú Haa Lé Mbélaitii kakála díína aáva taá maa hái gúla nɔ́ɔ ngáá kɛ ti longɔ́ɔ́ le tí tɔɔỹáá hái kái kái kɔ́lɔ kɔwɔ́ato mbaa hái wa.

²¹Faalɔ, yaá lúw̃a ma ti yɛ, bɔw̃álale ti lɔ́vengɔɔ lé nuu vúú nááningɔ wa ti héini Pɔ́ɔ luwɔ ngáá tí paa. Tí maa gɛ́lɛ ngeɣéngɔ ngáá tálaa mɛɛní fíli mɛ́ kɛlaa tɔɔ́ ŋani fíli kpɔ́le í ló su kpóloo ti Pɔ́ɔ vaa. Ti ɣɛ kíli batɛngɔ́ɔ́ lé náa aáva tiyá lɔ́ɔ naa w̃áálɛlɛ háa ngáá ti í gí maa haa lɔ́ kɔwɔ́ato maa hái wa.”

²²Kɛ sóyai ti w̃ááh̃u w̃ɔ́ɔ́ walaí ná i ndengá siỹɛndóu loí w̃á ngáá í lí. Ná vólu, i ndaahíni, i ɣɛ ma, “Yálaa nde nuu fíli má ngáá yí fái sí h̃úúɣɛnga ngáá ngé.”

²³Kɛ sóyai ti w̃ááh̃u w̃ɔ́ɔ́ walaí i ngi hóya nuu wala wala félengɔ lolínga, i ɣɛ ti w̃a, “A nde sóya hɔ́ndɔ félengɔ w̃a ngáá tí w̃aahéi wó, ti báha sóya vúu ngɔ́felangɔ wa soo híya mbélaitii su ɛ́ɣɛ sóya hɔ́ndɔ félengɔ kpalá víli mbélaitii su ngáá ná sɛ́i áá ɣɛ́ ngáá kó sou sɔ́wɔ w̃a kpéi hááwɔ kpɔkɔ́, wáá tiyéni wú lí Sɛsɛ́liya.

²⁴A soítii tɛingáá he Pɔ́ɔ yaá kɛinɔɔ́ wú foló lá lɛ́i lɛ́i Masangí Fílesi w̃á.”

²⁵I kɔlɔ vɔ́nɛni, aáva suu haí i ɣɛi ngáá sí i púni su, i ɣɛ ta,

²⁶“Nyɛ́i ngí ngáá Kulɔ́diyasi Lésiya, ngí há í w̃á Masangí Fílesi yɛ́i ngufema wála í í yɛ.

²⁷Júsuaitii ti ɣɛ́ngɔ siỹɛndópoi sí hóuni aáva ti ɣɛ́i náa tí paa. Kɛ́ ngí yéini na ngáá ní hóyaitii aáva ní kulá ti yaá, sífaa ngí ngatɔ́ngɔ mba ngáá kɛ aá lɔ ngáá Lóómi lɔwɔlɔí h̃uu lé ndóu.

²⁸Ngí ɣɛ́ngɔ loí ngí ɣɛ́ kɔ́lɔ ngáá kɛ ndeé lɔ í kɛngá tíwaa faa vɛ́lɛ mba. Faalɔ, ngí liiní lá ti Háá H̃uu Haa Lé Mbélaitii ngelé.

²⁹Kɛ́ ngí ngátɔngɔ mba ngáá kɛ faí tí pɛlɛngɔ́ mba, i liingɔ́ í tó ti hávai wa. Kɛ́ taá faa fíli pɛ́lɛngɔ mba ngáá kule ɔ́ɔ́ ɣɛ́ ma ɔ́ɔ́ saa w̃ááhɔlɔ ɔɔ ná láá lé ɔ́ɔ́ ɣɛ́ kpindi vɛlɛ́ wu maa haaw̃a.

³⁰Ná tí faa léngɔ ma kɔwɔ́ato siỹɛndópoi sí w̃aa bɔ séindai wá ngáá tí paa, ngí tɔvengá í yéle ngáma. Ngí mɔ́ɔ ndengɔ́ ngi háá vɛlɛ mba yélaitii ma ngáá ti vá tí ngi háá ỹaaningí h̃úúɣɛ ngáá í ye tí pɛlɛngɔ́ mba.”

³¹Faalɔ, sóyaitii ti híyani ngáá sí ti w̃ááh̃u w̃ɔ́ɔ́ walaí í ndéni ti w̃a. Ti Pɔ́ɔ yeɣéni, tí lii lá ngáá kpindíi kélei keleí taí sí h̃u taa naa lolí ngáá Atipáte.

³²Folo vékai w̃á, sóyai sítii ti ɣɛ́i ta híya gɔwɔ́ w̃á, tí yangáimani náa sóya baikií h̃u. Sítii pa ti ɣɛ́i soítii kɔma, tí loní naá kpóloo Pɔ́ɔ wa tí lii lá.

³³Ná sóyaitii tí fóloni Sɛsɛ́liya, tí kɔlɔí sí wálani Masangí Fílesi yaá ti Pɔ́ɔ bɛ́lɛ nɔ́ ndáá hítima.

³⁴Masangí i kɔlɔí galáni kpóloo, í mɔɔni mbó ngáá tataí sí Pɔ́ɔ í ɣɛ́i ngáá suu w̃ɔ́ɔ́. Ná naa í ɣɛ́i faa wɔ́lɔ mba ngáá kɛ Pɔ́ɔ lɔ ngáá Silísiya lataí h̃uu w̃ɔ́ɔ́,

³⁵i ɣɛ́i ta, “Nyáá ngaa vá í bɔ́ɔ́lɔi léma ná í háá vɛlɛ mba yélaitii taa ɣɛ́ vaaní.” Kɛ i mɔɔ ndengá ngáá ti ɣɛ́ taa Pɔ́ɔ w̃aah̃ú belé masa pɛ́lɛ wálai sí wu Hɛ́lɔdi í ɣɛ́i wɔ́lɔ ngáá masa í tóni.