Read Bandi TI GƐ́Ɛ́ HAÍTII 25 Bible Online

TI GƐ́Ɛ́ HAÍTII 25 - Bandi bible

TI GƐ́Ɛ́ HAÍTII 25

¹Ná Masangí Fɛ́sitɔ í ɣɛ́i náá kɛní ngáá foló félengɔ tataí ná h̃u í ɣɛ́i náá w̃aah̃u ngáá masangí, ngi hóloi hawa kélei w̃a i gulaní Sɛsɛ́liya wa, í lí Jɛlúsɛl̃ɛ.

²Naa lɔ Ngala sááɣa gula mbélai ti wutúwɔaitii ɛ́ɣɛ ngutuwɔ́aitii Júsuai su tí vaaní na ngelé aáva tí faí sítii suuɣɛní lá ti ɣɛ́i pɛlɛní Pɔ́ɔ wa. Tí Masangí Fɛ́sitɔ w̃aanɛ́ɛ́nɛni

³ngáá í faa bɔ́wɔ ɣɛ ti yɛ ngáá í keelá ló Pɔ́ɔ wa í vá Jɛlúsɛl̃ɛ, sífaa ti ɣɛ́i náá nungáá héini tuwɔ ngáá tí paa peleí h̃u.

⁴Kɛ Masangí Fɛ́sitɔ i ti woo yápotenga, i ɣɛ ti w̃a, “Pɔ́ɔ lɔ sou sú Sɛsɛ́liya. Nyá bútei nyá lɔɔ vá liimá na h̃umbuwa.

⁵Faalɔ, bɛlɛ́ wú wútuwɔaitii ti lɛ́ingaa tí tó mbá, ni lí, tí faítii pɛlɛ́ mba ná wɔ́lii áá ɣɛ́ faa ỹɔú fíli kɛ́ngɔ ngáá wú ye.”

⁶Ná naa í ɣɛ́i kɛní Jɛlúsɛl̃ɛ ngáá foló púúngɔ ỹɔ́kɔ i liiní náa Sɛsɛ́liya. Foló vékai w̃a, i faa lengí lɔ́kula héini náa aáva í ndení ngáá ti vá ngáá Pɔ́ɔ kakála.

⁷Ná Pɔ́ɔ í vááni, Júsuai sítii ti gúlani Jɛlúsɛl̃ɛ tí maayelé mbéleni. Tí faa wála wála bih̃íw̃aa vɛ́lɛ mba sí tiyá gíte tɛ́i belé hééle gulá mba.

⁸Kɛ́ Pɔ́ɔ i bɔwɔ́ w̃aa haa léni, i ɣɛ ta, “Ngáá faa fíli kɛ́ngɔ nyɔúngɔ ɔ́ɔ́ ɣɛ́ la kɔwɔ́ato Júsuai ti hávai wa ɔɔ kɔwɔ́ato Hɛ́ɛ́ma Yála Pɛ́lɛi wa, kɛlaa Lóómi Lɔwɔlɔ W̃asa Ngwalaí wa.”

⁹Kɛ́ Masangí Fɛ́sitɔ va ndongɔ́ i ɣɛi lá í Júsuaitii ti liivó fáá ɣɛ. Faalɔ, i Pɔ́ɔ w̃ɔɔniní, i ɣɛ ma, “Yáá luw̃á ma ɣéle ngáá yí lí Jɛlúsɛl̃ɛ ngáá faí sítii tí pɛlɛngɔ́ í wá wú maa bɔ́ɔ́lɔi lé na kákala?”

¹⁰Kɛ Pɔ́ɔ i ngoo yápotenga, i ɣɛ ma, “Nyá lɔ náá lóóni Lóómi Lɔwɔlɔ́ W̃ása Ngwalaí góótii h̃u mbéi kule í ma ní gɔ́sɔngi waa í léve na. Ngáá nɛ́ɛ faa fíli kɛ́ni áá pele w̃a ngáá Júsuaitii kɛ kíya yá gítei yí suuwɔlɔ́ kpál̃au.

¹¹Ná múl̃ɔ wɔ́lii ngɛ́i ɣɛ́ veléni faa fíli fááw̃a ngáá ɣɛ́ kɛngɔ́ kule áá ɣɛ́ má ngí saa w̃ááhɔlɔ faaw̃a, ngɛ́i léle haalaí wa. Kɛ́ ná wɔ́lii faí sítii Júsuaitii tí pɛ́lɛngɔ mbá tɛ́i ɣɛ́ ngáá tɔɔỹaá, kɛ ɛi ɣɛ́ pele w̃a saavaí h̃u ngáá nuu fíli ɔ́ɔ́ tɔ́ve ti yelé. Faalɔ, bɛlɛ́ Lóómi Lɔwɔlɔ́ W̃ása Ngwalaí í ní bɔ́ɔ́lɔi lé.”

¹²Kɛ́ ná Masangí Fɛ́sitɔ laahi mbeláitii tí wu sítɛni ma, i ɣɛi Pɔ́ɔ w̃a, “Ná yí ɣɛ́ í lóngɔɔ lé Lóómi Lɔwɔlɔ́ W̃ása Ngwalaí í í bɔ́ɔ́lɔi lé, ngeléngi lɔ yáá lí na.”

¹³Ná kuu félengɔ í gúlani su, Bɛnííni ngaa Masangí Agílepa tí vaaní Sɛsɛ́liya ngáá tí ngákɛ ngáá Masangí Fɛ́sitɔ ngaa paalaí w̃aanɛ́ɛ́ngɔɔ lé, tí laalí ma.

¹⁴Kɛ́ ná ti ɣɛ́i taa vá kuu félengɔ ɣɛmá na, Masangí Fɛ́sitɔ i yɛpɛní Masangí Agílepa yelé kɔwɔ́ato Pɔ́ɔni ti háá lengí wa, i ɣɛ ma, “Siỹɛ ngílaa tɔ́ mbéinda Masangí Fílesi i ndoní pelésinalai h̃u í gúla masandái h̃u.

¹⁵Ná ngí lííni Jɛlúsɛl̃ɛ, Ngala sááɣa gula mbélai ti wutúwɔaitii Júsuaitii su ɛ́ɣɛ Júsuai ti géle ɣele mbelaítii tí vaaní tí faa bíh̃iw̃aa vɛ́lɛ siỹɛ́ngi ná wa, ná vólu, ti mɔ́ɔ́ nde má ngáá ngí péle lála.

¹⁶Kɛ́ ngí ndéni ti w̃a ngáá kɛ aa ngáá Lóómingaitii ni ndá lúva vele ngáá nɔɔ́ nuu lókoleve, kɛ́ kɛ naá ngi lɔ́ɔ́ỹai he ngeyá ngáá í bɔ́wɔ w̃aaɣáwo sítii ngeyá taa ɣɛ́ faa vɛ́lɛni mba.

¹⁷Ná naá tiyéni ni vááni mbéinda, ngáá kpɔɔlɔ́i w̃áa holó lííni. Kɛ́ ngí kóótii lɔkúla héini folo vékai w̃a, aáva ngí ndé tí va ngáá maa h̃íỹɛndopoi Pɔ́ɔ kóótii h̃u.

¹⁸Ná ngi háá vɛlɛ mba yélaitii ti wúyoɣeni ngáá ti yɛ́pɛ, taá faí sítii ta fíli pɛ́lɛni mba kíngi í ɣɛ́i mba.

¹⁹Kɛ́ laá ɣéle, tí w̃aaɣaalíni ngáá Pɔ́ɔ faa lɛ́ingaa h̃u kɔwɔ́ato tiyá gítei ti Yála fɛli kílii wa, ná vólu, kɔwɔ́ato siỹɛndópo yiláá mbá saangɔ́ ndaahéingi í ɣɛ́i ngáá Jísu lɛ́i Pɔ́ɔ í ɣɛ́ngɔ ta laá lɔ ndɛɛh̃ú h̃u.

²⁰Kíndaa vílingɔ i ɣɛi lá ngáá kɛ kíya ngáá faí sítii suu haa lé. Faalɔ, ngí ndéni Pɔ́ɔ w̃a ngáá ná wɔ́lii áá ɣɛ́ loí í lí Jɛlúsɛl̃ɛ í kɔsɔ́ngi gúla na kɔwɔ́ato faí sítii mba tí pɛlɛngɔ́ mba.

²¹Kɛ́ ná Pɔ́ɔ í ndéni ngáá kɛ ndongɔ́ɔ́ le Lóómi Lɔwɔlɔ́ W̃ása Ngwalaí í ngi bɔ́ɔ́lɔi le, aáva aa ɣɛ loí í ló gɔ́mɛtii lóko h̃u, nyá bɛ́lɛ pa ngí ndéni naá sóyaitii ma ngáá í ló ti lóko h̃u í ló su ngí tɔve Lóómi Lɔwɔlɔ́ W̃ása Ngwalaí yelé.”

²²Kɛ Masangí Agílepa i ɣɛa Masangí Fɛ́sitɔ w̃a, “Nyá bútei sí ngáá ɣɛ loí ngí siỹɛndópoi sí laa wóó ỹɛ́ni.” Kɛ ná i ngoo yápotenga, i ɣɛ má, “Ná áá ɣɛ́ ngáá díína, yáá ngoo ỹɛ́ni náá.”

²³Maa yélei ná í wóni, nungáitii ti Bɛnííni ngaa Masangí Agílepa mbɛlɛhéini bútei ngwala ngáá sí tí kɛ́ni ti yɛ. Tí lɛɛní maakpɔ hóu pɛlɛ́i ná wu taá sóyaitii ti núú wala walaítii í báha náá ngutuwɔ́aitii mba taa walái ná h̃u. Kɛ Masangí Fɛ́sitɔ i ndengá tí va ngáá Pɔ́ɔ.

²⁴Kɛ Masangí Fɛ́sitɔ i ɣɛa ta, “Masangí Agílepa ɛ́ɣɛ wɛ́i kínɛi a maa wúyeni a mu mbéi, siỹɛndópoi sí wú waá tɔ, Júsuaitii kínɛi tí kɛ́ɛ́hɔ púngɔ túwɔ taí sí h̃u ɛ́ɣɛ Jɛlúsɛl̃ɛ, táa woo gúla ngáá kule áá ma ɔ́ɔ́ ló ndɛɛh̃ú h̃u múl̃ɔ.

²⁵Ngí ngátɔngɔ mba ngáá kɛ aa faa fíli kɛ́ngɔ kule ɔ́ɔ́ ɣɛ́ ma í saa w̃ááhɔlɔ faaw̃a. Kɛ́ sífaa i ɣɛ Lóómi Lɔwɔlɔ́ W̃ása Ngwalaí í ngi bɔ́ɔ́lɔi le, faalɔ, ngí kpatɛngɔ́ gi má ngáá ngí tɔve Lóómi taa walái h̃u.

²⁶Kɛ́ ngoo áá ndá téɣele ngáá ngɔ́ɔ́ pɔnɛ Lóómi Lɔwɔlɔ́ W̃ása Ngwálai yelé kɔwɔ́ato siỹɛndópoi sí wa. Faalɔ, ngí vaangá lá wú kpɛ́lɛɛ kákala ngungí nda mɛ́ɛ í w̃á, Masangí Agílepa, kɛinɔɔ́ faa h̃uu haa léngi sí h̃u faa í ɣɛ́ na téɣele ngáá pɔnɛ kɔwɔ́ato mba.

²⁷Aá lɔ kí ma ngáá kɛ aa pele w̃a ngáá nuu í pelésina lɔve ná nuu ɛ́i ɣɛ́ ngi háá ỹaaningí téɣele kɛ́ni taa ɣɛ́ pɛlɛí mba.”