Read Bandi TI GƐ́Ɛ́ HAÍTII 26 Bible Online

TI GƐ́Ɛ́ HAÍTII 26 - Bandi bible

TI GƐ́Ɛ́ HAÍTII 26

¹Kɛ Masangí Agílepa i ɣɛa Pɔ́ɔ w̃a, “Yɛpɛ náa bɔwɔ́ hááw̃a.” Faalɔ, Pɔ́ɔ i lokoí lɛni ngeleya, í pɛlɛ kɔsɔ́ngi gúlama.

²I ɣɛi Masangí Agílepa w̃a, “Ngí faí sí yeɣénga ngáá ngu ndaa nɛɛ́ nyá bútei fááw̃a ngáá sí í kɛngá ngí lóóni mbéi í gákala hááwɔ ngáá ngí ní gɔ́sɔngi gúla kɔwɔ́ato faí sítii kínɛi mbá Júsuaitii tí pɛlɛngɔ́ mbá.

³Kóóh̃unɛɛngɔ gíte le, bɔw̃álale yí Júsuaitii túva veléitii kpɛ́lɛɛ kɔ́lɔ kpál̃au ɛ́ɣɛ faí sítii ni woo yá fáhangɔ ma kɔwɔ́ato ti wa. Faalɔ, yí veléni kái, soú w̃a yí wolílo sí w̃a ngáá vá ndemá.”

⁴Í mɔ́ɔ́ ɣɛ ta, “Júsuaitii kpɛ́lɛɛ tí kɔlɔ́ kɛ kíya ngí ɣɛ́i na í séi ná h̃uu w̃a ngí ɣɛ́i ngáá ndopo gúlo. Í séi ná h̃uu w̃a ngí ɣɛ́i ní lɔ́wɔlɔi h̃u ɛ́ɣɛ ná h̃u ngí ɣɛ́i Jɛlúsɛl̃ɛ.

⁵Kavíte wɔ́lɔ kpɔ́lɔɔ ti ɣɛ́i kɔ́lɔ aáva ná taa ló taá ndé ngáá kɛ ná áá ɣɛ́ ngáá tɔɔỹáá veleí kái kái má ni ndá Yála fɛlindái h̃u kɛ kíya Falósiaitii tíwaa híya ngáá savaí tííŋ nɔ́ɔ ngimɔ́ɔ́ ngí ɣɛ́ngɔ na.

⁶Aáva nyá lɔ hááwɔ lóóni mbéinda kɔsɔ́ nga sífaa, kítomai í ngáá kuulóngi sí Ngalá ngí mbóni ngáá ni káwalani.

⁷Niỹɛ́i ni ngáá Júsuai ni niỹa lɔ ngáá nde kpambi púúngɔ maah̃úú félengɔ, kuulongí sí lɔ́ í ngáá ni gitómai ni Yála fɛlindái h̃u kpindí bɔ́ngɔ fólo wa. Masangí Agílepa, kitomái sí lɔ í kɛ́nga Júsuaitii táá faa vɛ́lɛ mbá.

⁸Ndeé lɔ náá bútei í kɛ́nga wú kpɛ́lɛɛ wáá bááh̃aa la má la ngáá kɛ Ngalá ngáá saa yeláitii mbuyoɣé sái h̃u?”

⁹Í mɔ́ɔ́ ɣɛ ti w̃a, “Nyá bɛ́lɛ i ɣɛi kí ma búte ngáá kɛ ngí faa kpɛ́lɛɛ kɛ́ ngɔ́ɔ́ hómbo ngí kɛ kɛinɔɔ́ Násɔlɛ w̃ɔ́i Jísu haí í víla.

¹⁰Aáva ná va tɔ nɔ́ɔ ngí kɛní jɔ́ Jɛlúsɛl̃ɛ. Ngala sááɣa gula mbélai ti wutúwɔaitii tí ngakpá féni ngéya ngáá ngí Ngalángi vóngaitii kpih̃íw̃aa víli kpindi vɛlɛ́ wu. Ná laáva tɔ́ɔ ɣɛ́a ti tá váa, nyá bɛ́lɛ ngɔ́ɔ́ lúw̃a ma ngáá í ɣɛ́.

¹¹Kuu bíh̃iw̃aa hááw̃a, ngí lɔ́ve tɔvéni Ngala fɛ́li máákpɔ wotaítii mbu ngáá faa bá nda ti w̃a, ná vólu, ngáá kpa ti w̃a ngáá kule ngáá ti volu yafé Jísu wa. Ní líí ỹɔí ti haáw̃a i kɛní ngáá háwu ngí li taa walá wála vekaítii su ngáá ngí faa bá ndá ti w̃a.”

¹²Kɛ Pɔ́ɔ i mɔɔ ɣɛa ta, “Maa híyangi tá yiláá sú, ngí ɣɛ́i ngáá lí Damásikɔ ngáá ngakpángi Ngala sááɣa gula mbélai ti wutúwɔaitii tí féni ngéya ɛ́ɣɛ sí tí ndéni má ngáá ngí kɛ.

¹³Ná í ɣɛ́i ngáá foló yákpangɔi w̃a kínɛi, Masangí Agílepa, kɛ kíya nɔ́ɔ ngí ɣɛ́i peleí w̃a ngáá lí, ngí folo hólongi lɔ́ni nɔ́ɔ í gúla ngeleyá áá hólo i lɔ́ve folói wa. I ɣɛi áá hólo má naa ní híya polu yeláitii.

¹⁴Ni kpɛ́lɛɛ ni gúlani ndɔwɔlɔí wa aáva ngí ngoo tá ỹɛ́nini Híbulu woí h̃u, áá ɣɛ́ má, ‘Sɔ́ɔ! Sɔ́ɔ! Ndeé le yíwaa faa bá nda má? Naa bangɔ́ɔ́ le ngáá yí bɔtái sei ngulú yákulangɔ ya, sífaa yáá ɣɛ nɔ́ɔ yáá ỹanda héi bɔwɔ́ wa.’

¹⁵Kɛ ngí mɔɔningí wongá, ngí ɣɛ́ ta, ‘Ele wáa ngáá í ye, Kawálai?’ Kɛ ngoí ná i ɣɛ́a ta, ‘Nyá Jísu le Násɔlɛ taí h̃uu w̃ɔ́i nyɛ́i yíwaa faa bángi lá ma.

¹⁶Yooɣé náa, yí ló. Ngí gúlanga í yááh̃u ngáá ngí lokolo í wá ngáá ní yénge mɔɔ. Ná vólu, sí yí tɔngá háá kɔwɔ́ato mbá ɛ́ɣɛ sí ngáá vá ngakɛ́ma ngáá í ye yí ti le nungáá veka w̃a.

¹⁷Ngáá kɛ ngáá háwu í w̃áa í waló í vóngaitii ngeyá taá sítii taa ngáá Júsua. Nyá ngáá í lɔ́ve ti yelé,

¹⁸yí kɛ ngáá háwu ti yaah̃ú w̃áá í wó, ti vólu yáfe sítii mba ti gúlangɔ ngáá kpindí h̃ú háa, ti vóte sítii mba ti ngáá faí sítii ti w̃áá áá ɣɛ́ kpál̃au. Ná vólu, tí gúla Setána yákpangi wu, ti ɣɛ́ Ngalángi yákpangi wu, ná vólu, ti lángi w̃aa véle w̃a tí su ngáá ngé, ti ɣɛ́ sítii ndiiwáá Ngalá ngi ti ɣɛ kíli batɛngá bɔwɔ́ hááw̃a ɛ́ɣɛ ti háá ỹɔítii suuhaa í ló.’ ”

¹⁹Pɔ́ɔ i ndiní ngu ma, i ɣɛ ta, “Faalɔ, Masangí Agílepa, ngáá koló lála gúlani ngáá ngoí ná í léni má í gúlani ngeleí ya naa h̃u faí ná í ɣɛ́ni ngáá ngé.

²⁰Aáva ngí Ngala ngói lení hése sítii ma tí Damásikɔ, ná vólu, Jɛlúsɛl̃ɛ, ná vólu, Judíya lataí kpɛ́lɛɛ sú, ná vólu, ngí mɔ́ɔ́ nde sítii ma taa ngáá Júsua tiyá bɛ́lɛ. Ngɔ́ɔ́ nde ngáá kɛ ti vólu yáfe ti háá ỹɔítii mba, ti héle Ngalá mba, aáva tí lúva veléitii kɛ pele w̃a sí áá ngakɛ́ ngáá kɛ ti gúlanga faa ỹɔ́i h̃u.

²¹Ná lɔ í kɛngɔ́ Júsuaitii ti sóuni Hɛ́ɛ́ma Yála Pɛlɛí góvii h̃u ti ɣɛ́ ti páa.

²²Kɛ́ Ngalá ngí longá bɔmá mbá í ló su í fólo hááwɔ holoí kái kái má. Faalɔ, nyá lɔ hááwɔ lóóni mbéinda ngáá tɔɔỹáá wói le wú kpɛ́lɛɛ má tɔ́iŋ kpéi wɛ́i wú ngáá tɔwɔ́ mba yélaa ɛ́ɣɛ tɔwɔ́ mba lála yélaa. Ngáá faa fíli ndéma í gúla sí vólu Ngalá ndaa háá lé mbélaitii taá Muuséni tí ndéni ngáá aá lɔɔ vá ɣɛ́ma.

²³Ná wáá ngáá, sí tí ndéni ngáá kɛ taá Ngalángi Lókolo Mbá W̃ɔ́i vaa. Aáva laá lɔ í ngáá hése ndáá w̃ɔɔ áá vá wuyoɣéma sái h̃u, aáva aa ngumaawóngi w̃aa hehe wo ngi vóngaitiini ma ɛ́ɣɛ sítii taa ngáá Júsua kɛ kíya nɔ́ɔ folo hólongi áá kpindíi h̃úú ɣɛ kpál̃au.”

²⁴Ná Pɔ́ɔ í fóloni mbéi kpéi ngi gɔ́sɔngi h̃u, Fɛ́sitɔ i viliní ndaa wóó h̃ú, í woo gúla, i ɣɛ ma, “Í gíngi aa í w̃á, Pɔ́ɔ, í gɔ́lɔ galándaa walaí sí lɔ í í ɣɛ́nga tími tamá.”

²⁵Kɛ Pɔ́ɔ i ngoo yápotenga, i ɣɛ ma, “Ngí ndé í wúfemai h̃u kɛ́ngɔ laa le tími tamá, Masangí Fɛ́sitɔ. Ngoí sí ngáá nde aá lɔ í ngáá tɔɔỹáá, aáva kele ɣelé tɔ́ su.

²⁶Masangí Agílepa gɔ́ɔ́la mba h̃ú háá laa ngáá faí sítii. Aáva ngáá yɛ́pɛ ngelé nduwá fíli aa sú. Ní kɔ́lɔ ngáá faí sítii taá ngáá ndɔɔwu h̃ú háa, bɔw̃álale taá hiyangɔ́ sɔ́ku su.

²⁷Masangí Agílepa, í lángɔɔ lé ɣéle ngáá ngoí sítii Ngalá ndaa háá lé mbélaitii tí pɔnɛní? Ngí kɔlɔ́ ngáá í lángɔɔ le lá.”

²⁸Kɛ Masangí Agílepa i ɣɛa Pɔ́ɔ w̃a, “Aá lɔ í gí ma ngáá kɛ kuu h̃úú lukpuí sí laa lówah̃u yáá hómbo yí ndíí vóte ngí ɣɛ ngáá Kílisitii núi ta?”

²⁹Kɛ Pɔ́ɔ i ngoo yápotenga, i ɣɛ ma, “Suu í ɣɛ́ lukpú ɔɔ suu í ɣɛ gooh̃á, í yílaa faa laa le nɔ́ɔ léi, kɛ́ nyáá ngáá Ngala fɛ́li ngáá kɛinɔɔ́ nungáitii kínɛi táá wolílo má hááwɔ, ti ɣɛ́ kɛ kíya ngí na. Ngáá ɣɛi wú ɣɛ́ njɔlɔwɔ ya kɛ kíya ngí na.”

³⁰Masangí Agílepa í báha náa Masangí Fɛ́sitɔ wa ɛ́ɣɛ Bɛníí í báha náa sítii mba ti ɣɛ́i héini taá tiyéi, tí wúyoɣeni,

³¹ti gúla kóótii h̃u táá yɛ́pɛ ỹɔw̃ɔ́ ỹɔ́w̃ɔ yéle, táá ɣɛ́ ta, “Siỹɛndópoi sí aa faa ỹɔ́u fíli kɛ́ngɔ ngáá kule ɔ́ɔ́ ɣɛ́ ma ɔ́ɔ́ ɣɛ́ pelésinalaa h̃u kɛlaa ɔ́ɔ́ saa w̃ááhɔlɔ faaw̃a.”

³²Kɛ Masangí Agílepa i ɣɛa Masangí Fɛ́sitɔ w̃a, “Siỹɛndópoi sí ɔ́ɔ́ ɣɛ́ ɣɛi náa gulaní pelésinalai h̃u faa fíli ɛ́i belé ɣɛ múl̃ɔ mba kɛ bele aa ɣɛi ta Lóómi Lɔwɔlɔ́ W̃ása Ngwalaí í ngí bɔ́ɔ́lɔi le.”