Read Bandi TI GƐ́Ɛ́ HAÍTII 9 Bible Online

TI GƐ́Ɛ́ HAÍTII 9 - Bandi bible

TI GƐ́Ɛ́ HAÍTII 9

¹Kɛ́ ná h̃u nɛ́nɛ kpɛ́, Sɔ́ɔ i ɣɛi áá ndí ngú ma ngáá ngi lúva vele ỹɔu ỹɔungí ngáá nduwá vúndai Ndemɔí Jísu volú yélaitii su ngáá kɛ aá lɔ́ɔ tí váa. I liiní Ngala sááɣa gula mbélai ti wutúwɔɔ w̃ɔ́ɔ́ walaí yéle,

²í mɔ́ɔ́ni ngáá ná í kɔ́lɔni fé ngeyá ngáá í lí ngáá ti ye Ngala fɛ́li máákpɔ wotaítii mbu ti ɣɛ́i taí ná h̃u taá naa lolí ngáá Damásikɔ, kɛinɔɔ́ ná ɔ́ɔ́ nuu fíli tɔ́ i Jísu Ndá Vélei w̃a ɔ́ɔ́ bɔ́ɔ́ ɣɛ ngáá siỹɛ́ ɔɔ nyah̃á, í ti hóu ngáá pelésina, í lí ngáá ti ye Jɛlúsɛl̃ɛ taa walái h̃u.

³Ná í ɣɛ́i náa bɛɛní Damásikɔ wá siyangí ná h̃u í ɣɛ́i su, ngamá nɔ́ɔ foló hólo ngwála i gulaní ngeleya, í hólo ma.

⁴Kɛ Sɔ́ɔ i h̃undɛngá ndɔwɔlɔ́i wa, í ngoo ỹɛ́ni áá lé ma. Ngoí í léni ma i ɣɛi ngáá sí, “Sɔ́ɔ, Sɔ́ɔ! Ndeé lɔ í kɛ́a yíwaa faa bá nda má?”

⁵Kɛ Sɔ́ɔ i mɔɔningí wónga, i ɣɛ ta, “Ele wáá ngáá í ye, Kawálai?” Kɛ ná i ngoo yápotenga, i ɣɛ ma, “Jísu wáá ngáá ngé, nyɛ́i yíwaa faa bángi lá ma.

⁶Kɛ́ yooɣé náa yí lɛ́ tái sí h̃u, sí va ngí kule í í w̃á ngáá yí kɛ taá nde í w̃á.”

⁷Siỹɛngái sítii ti ɣɛ́i siya polúi h̃u taa Sɔ́ɔni, ti ɣɛ́i lóóni na aáva ngoo fíli aa gulaní ti la tɔɔ́ nde. Tí ngói sí ỹɛ́nini kɛ́ taá nuu fíli tɔ́ni.

⁸Sɔ́ɔ i yooɣéni ndɔwɔlɔ́i wa aáva ná í yaah̃úi w̃ááwoni, aa mɔɔ ɣɛi áá hómbo ɔ́ɔ́ ỹandá fíli tɔ́. Faalɔ, tí sóuni tokoí wa, tí lɛɛ lá Damásikɔ.

⁹Mbolengɔ́ i ɣɛi lá foló sáángɔ hááw̃a, aáva ɛ́i belé ŋani fíli mɛ́ kɛlaa ɔ́ɔ́ ŋani fíli kpɔ́le.

¹⁰Jísu volú w̃ɔ́ɔ yiláa pa tɔ́ Damásikɔ taá ɣɛ́ ma Ananáya. Ananáya i wu sú lɔ́ni, Ndemɔí Jísu í tóli, i ɣɛ ma, “Ananáya!” Ná i ngoo yápoteni, i ɣɛ ma, “Nyá béle tɛ, Kɛɛɣɛ́.”

¹¹Ndemɔí Jísu i ndení ma, i ɣɛ ma, “Lí Júdɔ vɛlɛí lá í peleí sí w̃a taa tolí ngáá Pele H̃úú Vɔɔnangí, yí siỹɛndópo yiláá ŋál̃aa w̃ɔ́ɔ́ni na lɛ́i ndaahéingi í ngáá Sɔ́ɔ í gúlangɔ tái sí h̃u taá tolí ngáá Tásɔɔ. Aá lɔ pɛlɛ́i ná wu áá Ngala fɛ́li.

¹²I wu sú lɔ́ni, í siỹɛndópo yiláá tɔ́ ndaahéingi í ngáá Ananáya, ná í loko vɛ́lɛ ma kɛinɔɔ́ í ỹandá lɔ múl̃ɔ.”

¹³Ananáya i ngoo yápoteni, i ɣɛ ma, “Kɛɛɣɛ́, ngí faa bíh̃iw̃aa ỹɛ́ninga kɔwɔ́ato siỹɛndópoi sí wa ɛ́ɣɛ ỹandái sí kínɛi í seingá í vóngaitii mba Jɛlúsɛl̃ɛ.

¹⁴Aáva i vaangá mbéinda ngáá ngakpá áá gúla Ngala sááɣa gula mbélai ti wutúwɔaitii ngeyá ngáá í nuu fíli sóu áá Ngála fɛ́li í lááheingi h̃u.”

¹⁵Kɛ Ndemɔí Jísu i ɣɛa Ananáya w̃a, “Lí! Ngí lókolonga siỹɛndópoi sí wa ngáá ní yénge mɔɔ ngáá í lí Ísulɔ yeláitii ngelé ɛ́ɣɛ nungáitii sítii taa ngáá Júsua ti w̃ása ngwála walaítii í ndé ti w̃a ti ɣɛ́ kɔlɔ́ ngáá kɛ ele wáá ngáá nge.

¹⁶Nyá lɔ́ɔ kɛ lá ngáá kíya kule í ma í w̃áánɔw̃ɔ fááw̃a.”

¹⁷Kɛ Ananáya i liingá pɛ́lɛi ná la, í lɛ mbu. Kɛ i loko vɛ́lɛnga Sɔ́ɔ w̃a, i ɣɛ ma, “Mu mbálai Sɔ́ɔ, Ndemɔí Jísu lɛ́i í gúlangɔ í yááh̃u pélei w̃a ná yí ɣɛ́ngɔ yáá vá mbéi, aá lɔ í tɔ́vengɔ í yéle kɛinɔɔ́ yí ỹandái lɔ múl̃ɔ, aáva Hɛ́ɛ́ma Ỹínangi aa ɣɛ í vólu.”

¹⁸Ngamá nɔ́ɔ, ŋani tá kulangɔ́ í ɣɛ́i la ngáá nyɛɛ w̃áá gáá i gulaní Sɔ́ɔ yaah̃úi w̃a, í h̃úndɛ. Sɔ́ɔ va i ɣɛi náa mɔ́ɔ áá ỹandá lɔ, í yóóɣe. Aáva i nguyaí w̃ááhɔlɔni náa.

¹⁹Ná í mɛɛní ỹɛ́ni, suu í báni náa múl̃ɔ. Sɔ́ɔ i foló lɛ́ingaa ɣɛ́ni Damásikɔ taa h̃u taá Jísu volú yélaitii.

²⁰Ngamá nɔ́ɔ, kɛ Sɔ́ɔ i pɛlɛngá Ngala ngóó lemá Ngala fɛ́li máákpɔ wotaítii mbu ngáá kɛ Jísu lɔ í ngáá Ngalangí H̃íỹɛndou Loí.

²¹Sítii kínɛi tí ngoo ỹɛ́nini, ti gindáá vílingɔ i ɣɛi la. Kɛ tí mɔɔningí wónga, ti ɣɛ́ ta, “Kɛ́mbɛ siỹɛndópoi sí lɔ í ɣɛ́ngɔ áá faa bá nda sítii ma ti ɣɛ́ngɔ taá Ngala fɛ́li Jísu laahéingi h̃u Jɛlúsɛl̃ɛ? Kɛ́mbɛ i vaangɔ́ mbéinda ngáá í tí hóu, í lí ngáá ti ye Ngalá saáɣa gula mbélai ti wutúwɔaitii ngelé?”

²²Kɛ́ ngakpángi i ɣɛi nɔ́ɔ kélei áá hé Sɔ́ɔ yɛ áa ngákɛ ngi Yála ngoo lendái h̃u Júsuaitii má tí ɣɛ́i Damásikɔ taí h̃u ngáá kɛ Jísu lɔ í ngáá Ngalángi Lókolo Mbá W̃ɔ́i. Aáva ngoo yílaa kéle tɔ aa ɣɛi Júsuaitii nda tɔɔ́ nde.

²³Ná kuu félengɔ í gúlani su, Júsuaitii tí w̃ɛ́ɛ́ni, tí súúbatɛ ngáá ti Sɔ́ɔ vaa.

²⁴Foló bɔngɔ́ kpindí wa, ti ɣɛ́i taa wɔ́lɛ taí w̃aa hásai la tongɔ́ í ɣɛ́i lá ngáá kɔtuí ngáá ti Sɔ́ɔ vaá na. Kɛ́ Sɔ́ɔ i ɣɛi náá faa wɔ́lɔ kɔwɔ́ato ti háá h̃uubatɛngí sí wa.

²⁵Sɔ́ɔ volú yélai tí piliní kambálingi h̃u, tí ngéɣe, tí mbala sasaí búta mái, tí njéi ngáá sasaí vólu véle.

²⁶Kɛ Sɔ́ɔ i liingá Jɛlúsɛl̃ɛ taa h̃u, aáva i ɣɛi loí í báha Jísu volú yélaitii mba. Kɛ́ ti kpɛ́lɛɛ ti ɣɛ́i taa lúwa mba, sífaa taá ɣɛ́i laí lá ngáá kɛ laá lɔ́ ngáá Jísu volú w̃ɔ́ɔ kái kái.

²⁷Kɛ́ siỹɛndópoi sí taa ɣɛ́ ma Bánaba, i liiní lá Ngalángi géélaitii ngelé. Aáva i ndení ti w̃a kíya Sɔ́ɔ í lóngɔ siyangí h̃u Damásikɔ vélei h̃u, í Ndemɔí Jísu lɔngɔ́ ɛ́ɣɛ kíya Ndemɔí Jísu í yɛ́pɛngɔ ngelé. Ná vólu, kíya Sɔ́ɔ í Ngala ngói lengɔ́ Jísu laahéingi h̃u Damásikɔ ndúwa fíli áá ɣɛ́ngɔ su.

²⁸Faalɔ, Sɔ́ɔ i ɣɛi náa Ngalángi géélaitii ndoow̃á áá lɔ́ve tɔvé Jɛlúsɛl̃ɛ faa fíli áa ɣɛi mba aáva áa Ngala ngói le Ndemɔí Jísu laahéingi h̃u ngáá ndiiba.

²⁹I ɣɛi áá yɛ́pɛ, áá w̃aaɣaalí ngáá Júsuai sítii tɔ́ɔ Gilísi woí le. Kɛ́ nátii ti ɣɛ́i taá pele wɔlí mba ngáá tí páa.

³⁰Ná ngi mbála Yalá fɛ́li mbélaitii tí ɣɛ́i faa wɔ́lɔni kɔwɔ́ato faí sí wa, ti lííni la taí sí h̃u taá naa lolí ngáá Sɛsɛ́liya, tí tɔ́ve taí sí h̃u taa náa lolí ngáá Tásɔɔ.

³¹Aáva Ngala fɛ́li mbélaitii kpɛ́lɛɛ ti ɣɛ́i Judíya lataí h̃u ɛ́ɣɛ Galéli lataí h̃u ɛ́ɣɛ Samááliya lataí h̃u, ti ɣɛ́i náa ndiilɛí h̃u. Ti h̃úú í báni, aáva Hɛ́ɛ́ma Ỹínangi í nduwúh̃ulɛni ngáá ti ye ti yangí ɣɛ wɔɔlɔ. Aáva tí lɛɛh̃úitii suuhíyani Ndemɔí Ngalángi lúwamba h̃u.

³²Ná Pítɛ í ɣɛ́i áá lɔve tɔvé ndɔwɔlɔ́i h̃u, i liiní ngáá í laalí Ngalángi vóngaitii ma Léda taí h̃u.

³³Naa lɔ í siỹɛndópo yiláá mááleni na mɛŋɛl̃ɛ́ngɔ taa ɣɛ́ ma Íniyɔ. Aáva i ɣɛi náa kɛí lááni mbeteí yá ngáá fowó ngwáhakpangɔ.

³⁴Kɛ Pítɛ i ɣɛa ma, “Íniyɔ, Jísu Kílisitii i í wálonga. Faalɔ, yooɣé, yí í lááw̃ai yátɛ mba.” Ngamá nɔ́ɔ, kɛ Íniyɔ i yooɣénga.

³⁵Sítii kínɛi ti ɣɛ́i Léda taa h̃u ɛ́ɣɛ Síyɛl̃ɔ lataí h̃u, tí tɔ́ni sí í ɣɛ́ni. Aáva ti láni ngáá Ndemɔí Jísu.

³⁶Táingi ná h̃uu vá, nyah̃ápo yiláá taa ɣɛ́ ma Tabíta, ti mɔ́ɔ́ ɣɛ ma Dɔ́ka Gilísi woí h̃u, ná wúi wáá ngáá ndɔpá í ngáá Jísu volú w̃ɔ́i ta aá lɔ́ ngáá taí sí h̃uu w̃ɔ́ɔ́ taa náá lolí ngáá Jɔ́pa. Nyah̃ápoi sí ɛ́i belé bɔ́lɔ ngáá faa bɔ́wɔ ɣɛndáá, aáva i ɣɛi áá bɔ́ nyaani yélaitii mba.

³⁷Nyah̃ápoi sí i heebɛní, í há. Aáva tí ngi vúw̃ai w̃ááw̃uỹani, tí nda kɔlɔ́ɔ vele lomuí tá h̃u ngeleya pɛ́lɛi h̃u.

³⁸Jɔ́pa w̃aa áá gooh̃á Léda wá. Faalɔ, ná Jísu volú yélaitii tí mɛ́nini ngáá kɛ Pítɛ i ɣɛi Léda, tí siỹɛ félengɔ lɔvení ngelé ngáá keelá kɛinɔɔ́ nátii tí maanɛ́ɛ́nɛ ngáá í máa hulá taá tiyéni ti vá.

³⁹Pítɛ i toní keeláitii mba, taá tiyéi tí vá. Ná tí fóloni Jɔ́pa, tí lɛ́ɛ́ni ngáá Pítɛ ngeleya pɛ́lɛi h̃u mbéi nyah̃ápoi vúw̃ai í ɣɛ́i lááni na. Ponyah̃áitii kpɛ́lɛɛ ti ɣɛ́i Pítɛ w̃ááyele mbélengɔ táá wɔ́lɔ, táá ndomangáitii kɛ la ɛ́ɣɛ ndoma mááh̃u lómangitii Dɔ́ka í ti bátɛni naa h̃u í ɣɛ́i ndɛɛh̃ú h̃u.

⁴⁰Kɛ Pítɛ i ti kpɛ́lɛɛ kúlaa lómui ná h̃uu wá, í hítɛ wumbú ya, í Ngala fɛ́li. Kɛ i vótenga nyah̃ápoi ná yéle saangɔ́ í ɣɛ́i lá, i ɣɛ ma, “Tabíta, yooɣé!” Kɛ ná i yaah̃uí w̃ááwonga, í Pítɛ lɔ. Kɛ i wuyoɣénga, í héi.

⁴¹Kɛ Pítɛ i nyah̃ápoi hóunga tokoí wa, í bɔ́ mba ná í wúyoɣe, í lo gɔwɔ́ ya. Kɛ Pítɛ í Ngalángi vóngaitii tolínga ɛ́ɣɛ ponyah̃áitii tiyɛ́i tiyá bɛ́lɛ tí ɣɛi ngáá Ngala fɛ́li mbélai tí ta, í nyáh̃apoi lókola ti yaá fulúngɔ.

⁴²Faí sí w̃áá woo í híya hiyáni kpɛ́lɛɛ Jɔ́pa aáva nuu bíh̃iw̃aa tí láni ngáá Ndemɔí Jísu.

⁴³Pítɛ i kuu félengɔ ɣɛ́i Jɔ́pa suwa gɔlɔ́ bátɛ mɔ́i gɔwɔ́ w̃a tɔ́ɔ ɣɛ́ ma Sáimɔ.