Read Bandi LÓÓMI 10 Bible Online

LÓÓMI 10 - Bandi bible

LÓÓMI 10

¹Mu mbála Yalá fɛ́li mbélai, ndíívo fáá wálai ɛ́ɣɛ ní Yála fɛli ngói Ngalá ngéle aá wáa ngáá ní vóngai, Ísulɔ yeláitii tí ngumaawóngi w̃ááhɔlɔ.

²Ngáá maa gití léve ngáá ti longɔ́ɔ́ lé ngáá Ngalá kɛ́ táa ngátɔngɔ mbá ngáá sí nuu áá kɛ áá ɣɛ́ ngáá telembo mɔ́ɔ Ngalá ngááh̃u. Faalɔ, kíya Ngalá ngáá nuu yéɣe ngáá telembo mɔ́ɔ ti lélenga ná wa, kɛ́ tiyá ɣéle táá yakpá ngáá ti ɣɛ́ ngáá telembo mbélaa ti bɔwɔ́ híya vele h̃ú.

⁴Nuu híyalai ngáá savaí ngáá kɛinɔɔ́ nuu í ɣɛ́ ngáá telembo mɔ́ɔ Ngala ngaah̃ú, Kílisitii i ná bɛ́nga nga ngáá kɛinɔɔ́ Ngála ngí nuu yéɣe ngáá telembo mɔ́ɔ ndangí w̃aa véle w̃a nuu áá ɣɛ́ su la.

⁵Muusé i ndeí wɔ́lɔ ngáá nuu áá ɣɛ́ ngáá telembo mɔɔ Ngalá ngaah̃ú ná áá gólo Ngala sávai wu. Naa h̃u lɔ́ í pɔ́nɛi ngáá nuu fíli áá gólo sávai wu, maa w̃ɔ́i aa ɣɛ́ ndɛɛh̃ú gítei h̃u savái w̃áa véle w̃a.

⁶Kɛ́ sí Ngala Kɔ́lɔi í ndéngɔ kɔwɔ́ato sí wa nuu áá ɣɛ́ ngáá telembo mɔ́ɔ Ngala ngaah̃ú ndangí w̃aa véle w̃a aá waa ngáá sí, “Yálaa bɔwɔ́ w̃ɔ́ɔ́ni ngáá, ‘Ele lɔ́ náá áá lɛ́ ngelegóóh̃u?’ ” Ná wúi wáá ngáá, “Ele lɔ́ áa lɛ́ ngelegóóh̃u i vá ngáá Kílisitii ngelewu?”

⁷“Yálaa ndé mɔ́ɔ yɔ́ɔ ɣɛ́ ta, ‘Ele lɔ náa áá yéi ndɔwɔlɔ́i wuu véle?’ ” Ná wúi wáá ngáá, “Ele lɔ́ áá yéi ndɔwɔlɔ́i wu í Kílisitii gúla saa yélai ti ỹándai?”

⁸Pɔnɛngɔ́ɔ́ lé Ngala Kɔ́lɔi h̃ú, sí vá pɔnɛngɔ́ aá wáa ngáá sí, “Ngalángi gééla woí i fóloa í w̃a, aa lɔ́ í gí ma aáva yáá hómbo yí nde.” Ná wáa ngáá kalambongí kɔwɔ́ato ndangí wa níwaa mbó ngáá wú yé.

⁹Faalɔ, ná yɛ́i ɣɛ kaa pɛ́lɛi ma kɛ́ áá ɣéle yí nde ngáá Jísu lɔ í ngáá Ndemɔí aáva yí lá la ngáá líí kpɛ́lɛɛ ngáá Ngalá ngi mbuyoɣéni sái h̃u, yáá ngumaawóngi w̃ááhɔlɔ.

¹⁰Ná maa lá lá mú lií h̃u, kɛ Ngalá ngáá mú yeɣé ngáá telembo mbélaa aáva ná mɔ́i ɣɛ́ kaa pɛ́lɛi ma kɛ́ mú ndé, áá mú wúmaawo.

¹¹Pɔnɛngɔ́ɔ́ lé Ngala Kɔ́lɔi h̃u ngáá nuí fíli áá lá lá, kitomái ná ɛi ỹaaní kúnafɔ.

¹²Bele pa maa w̃ɔ́ɔ́ aa ɣɛ ngáá Júsu w̃ɔɔ ɔɔ ɛi ɣɛ ngáá Júsu w̃ɔɔ, a mu Lemɔ́i i yíla nɔ́ɔ aáva kulangɔ́ɔ́ lé gíte fó fóndei kɛ́lɛma kpɔmba hááw̃a nuu fíli mbɛ́ áá mɔ́ɔ́ni kpɔmba hááw̃a,

¹³kíya nɔ́ɔ pɔnɛngɔ́ Ngala Kɔ́lɔi h̃u, sí vá pɔnɛngɔ́ aá waa ngáá sí, “Nuí fíli áá Ndemɔí Ngalá maalolí kpɔmba hááw̃a, ngumaa áá wó.”

¹⁴Kɛ́ nungáá táa ɣéle Ndemɔí Ngalá mááloli náa kpɔmba hááw̃a ná tɛ́i ɣɛ́ lái ngáá Ndemɔí gíte? Aáva taá ɣéle la náa lá ná tɛ́i ɣɛ́ faa ỹɛ́ni kɔwɔ́ato mba? Aáva taa ɣele faa ỹɛ́ni kɔwɔ́ato mba ná nuu ɛ́i ɣɛ́ ndéni ti w̃a?

¹⁵Aáva áá ɣéle lé náá ti w̃a ná núngaa lɔ́vengɔ ɛ́i ɣɛ́ la ngáá tí lí ti nde ti w̃a? Pɔnɛngɔ́ɔ́ lé Ngala Kɔ́lɔi h̃ú, sí vá pɔnɛngɔ́ aá wáá ngáá sí, “Aá lɔ́ ngáá faá w̃aanɛ́ɛ́ngɔ ngwala ngáá sítii taa ɣɛ́ taa vá ngáá tí Ngala kééla woo vándai lé.”

¹⁶Kɛ́ ná fíli sú, nuu kpɛ́lɛɛ táá le tɔ́ɔ ɣɛ́ lánga ngáá keela woó vándai sí, kíya nɔ́ɔ Ngalá ndaa háá lé mɔ́i Aisáya í ndéni, i ɣɛ ta, “Ndemɔí Ngála, ele lɔ náa gíte í láa ngáá sí ní ndéngɔ?”

¹⁷Nda ngɛ́i ɣɛ́ nuu fíli su ná ɛ́i ɣɛ́ nɛ́nɛ keela wói sí ỹɛ́nini kɔwɔ́ato Kílisitii wa aáva kɛ tí ndé p̃ɛ́ɛ́ nuu ɔ́ɔ́ ɣɛ́a mɛni.

¹⁸Kɛ́ ngáá ndéma ngáá kɛ Ísulɔ yélaitii taá nɛ́ɛ́ keela wói sí ỹɛ́nini. Séimil̃a p̃ɛ́ɛ́, pɔnɛngɔ́ɔ́ lé Ngala Kɔ́lɔi h̃u, sí vá pɔnɛngɔ́ aá wáá ngáá sí, “Keela wói sí i foloní ỹánda kpɛ́lɛɛ kpɛ́lɛɛ ngelewu, ti ndéi nuu kpɛ́lɛɛ má ngélewu.”

¹⁹Aáva ngáá ndéma ngáá kɛ Ísulɔ yeláitii taá kééla wói sí yátɔi mba. Hése, Muusé i ndéni ngáá Ndemɔí Ngalá ngí ɣɛngɔ ta, “Nyáá ngáá kɛ́ ngáá háwu wú nungái sítii máálolo gúla ti ngáá tamál̃a mbélaa. Ngáá kɛ ngáá háwu wú lúúngɔ í ɣɛ́ la nungáá yáá taa ngáá faa yátɔ mba mbélaa.”

²⁰Aáva, nduwá fíli áá ɣɛi Aisáya h̃u ná í ndéni ngáá Ndemɔí Ngalá ngí ɣɛngɔ ta, “Nungái sítii taa ɣɛ́ngɔ taa kɔ́li tí tɔ́nga. Ngí bɔwɔ́ ɣɛ́a ngáá nungáá taa ɣɛ́ngɔ taa mááw̃ɔɔni mbó.”

²¹Sí lɔ́ Ngalá ngí ndéni kɔwɔ́ato Ísulɔ yeláitii mba, i ɣɛi ta, “Toko h̃ú húlombongɔɔ lé hɔ́wɔ fíli nungái sítii fááw̃a taa kólo lála gúla ngáá ngé, ti mɔ́ɔ́ lo ndáá wú.”