Read Bandi LÓÓMI 14 Bible Online

LÓÓMI 14 - Bandi bible

LÓÓMI 14

¹Sítiini kínɛi taa ɣɛ́ ngáá Ndemɔí Jísu volu yeláitii a waayaa lokohéi ti wu í lí bɛ́lɛ í tó sítii mba taá nɛ́ɛ́ laí ngáá Ndemɔí Jísu ngáá pangɔ́. Wálaa tí h̃úúhandɛ ngáá sífaa nɔ́ɔ kíya wú gisíyai áá ɣɛ́ na kɔwɔ́ato faa lɛ́ingaa wa bɛ́kpɛ ti ndái aa h̃íí na.

²Nungáá lɛ́ingaa ti ndá gísiya h̃u ti bɔ́ɔ́ mɛɛní fíli mɛ aá lɔ́ pele w̃a. Ti lɛ́ingaa va tiyɛ́i ti h̃uu áá nɛ́ɛ́ baí Ngala fái h̃u, aa ɣɛ ti gi má ngáá sí nɔ́ɔ lé kule í núú w̃a núú mɛ tiyá waa ngáá hakpá túfaitii.

³Kɛ́ wálaa, wálaa nungáá vékaa waaléve ngáá taá véleni ngáá sífaa taá mɛ́ɛ́ni lɛ́ingaa ỹɛ́ bɛ́kpɛ ɔɔ ná láá le tɛí mɛ́ɛ́ni lɛ́ingaa ỹɛ́ bɛ́kpɛ sífaa, Ngalá ngáá lokohéi ti wú bɛ́kpɛ ngáá ngi vóngaa.

⁴Ele lɔ i náa gúlangɔ kɛ́lɛma wú yɛ́ ngáá wu ɣɛ́ wáá nungáá vékaa ti yénge mbelaa waaléve ngáá kɛ taá vélei? Ngenge mɔ́i na w̃aalíɣii lɔ́ nɔ́ɔ áá hómbo í ngákula mba ngáá ná wɔ́lii ti ndái lɔ́ pele w̃a ɔɔ aa pele w̃a. Aáva Ndemɔí lɔ́ɔ bɔ́ ngi yénge mbélaitii mba ngáá kɛinɔɔ́ sí taa ɣɛ́a kɛ, taa ɣɛ́a kɛ pele w̃a.

⁵Nungái ti lɛ́ingaa taá gísiya ngáá foló lɛ́ingaani bɛ́kpɛ ngatɔ́ tí wa í lɔ́ve pekaítii mba. Ti lɛ́ingaa vá tí gísiya ngáá ngatɔ́ fóloi kpɛ́lɛɛ mbá tɔ́iŋ. Kɛ́ wú yíla ngílangi fíli sí fíli wáá kɛ, wú gí mái ya ngí ɣɛ́ gíte kpál̃au su ngáá aá lɔ́ pele w̃a.

⁶Nuí fíli áá ngéɣe ngáá foló tá lɔ́ na ngangímba í lɔ́ve pékaitii kpɛ́lɛɛ mbá, kɛ aa lɔɔ ná ɣɛ́ ngáá í ngúfema hé Ndemɔí Ngála mbɛ ná w̃aa véle w̃a. Nuí fíli áá gísiya ngáá suwa ỹɛndái aa ngáá faa ỹɔ́u Ngála ngaah̃ú, í mɛ́ Ngalángi wúfemai h̃u í sɛ́ɣɛɛ gula ma. Kɛ́ núi fíli áá gísiya ngáá aa pele w̃a Ngalá ngaah̃ú ngáá nuu ɔ́ɔ́ súwa ỹɛ, laa bɛ́lɛ aa ná ɣɛ́ Ngalángi wúfema h̃u í sɛ́ɣɛɛ gula ma.

⁷A mú lói ndɛɛh̃ú h̃u baa a mú haaní, álaa ɣɛ́ ngáá a mu haáw̃a.

⁸A mú lói ndɛɛh̃ú h̃u, a maa lo su Ndemɔí Ngala faaw̃a, a mú haaní a maá há Ndemɔí Ngalá fááw̃a. Faalɔ, a mú lói ndɛɛh̃ú h̃u baa a mú haaní Ndemɔí Ngála tɔ́ po ngí ngáá mu ye.

⁹Sí vá tɔ h̃íí bɔw̃álale, Kílisitii i haaní í mɔ́ɔ yooɣé sái h̃u ngáá kɛinɔɔ́ í ɣɛ́ ngáá Ndemɔí saa yeláitii fááw̃a ɛ́ɣɛ sítii tí ndɛɛh̃ú h̃u.

¹⁰Wálaa wú mbala Yalá fɛ́li mbélaa vekaítii mbaagúla kíli ỹɔu wo, wɔ́ɔ́ tí h̃úúhandɛ. Foloí lɔ́ɔ vá fóloma ma Ngalá ngáá va nuu kpɛ́lɛɛ kɔ́sɔma ma.

¹¹Pɔnɛngɔ́ɔ́ lé Ngala Kɔ́lɔi h̃u ngáá sí Ndemɔí Ngala ngí ɣɛ́ngɔ ta, “Ná nɔ́ɔ léi nyá lɔ́ ná, kɛ nungáá kpɛ́lɛɛ tí wúmbu hítɛ mbɛ́ tí kúla la tí ndé ngáá kɛ nyá lɔ́ ngáá Ngalá.”

¹²Náá hááw̃a, kɛ nuu fíli í hómbo í háwu ɣɛ faítii mba bɛ́kpɛ áá ɣɛ́ kɛ́ni ngeleí sí wu. Aáva ná lɔɔ vá ɣɛ́ma Ngalá kákala.

¹³Faalɔ, á málaa ɣɛ́ máá mú mbála Yalá fɛ́li mbélaa vekáitii mbaaléve ngáá taá vélei. A nda gíte gi su kpál̃au ngáá wálaa kɛ ngaa háwu faa ɔ́ɔ́ víli Ngala fɛ́lindai h̃u ti yaá, ɔɔ tálaa víli faa ỹɔ́u ɣɛ́ndaa h̃u kɔwɔ́ato wú wa.

¹⁴Kpáha gílii w̃a Ndemɔí Jísu wa, í kɛ́a ngáá háwu ngi ɣɛ́ kɔlɔ́ ngáá kpaló mba ỹɛ́ɛ́ni fíli aa ná. Kɛ́ ná nuu fíli aá ɣɛ́ laí la ngáá kɛ mɛɛni lɛ́ingaani bɛ́kpɛ tiyá lɔ́ ngáá kpaló mba ỹɛ́ɛ́ni, kɛ laá faaw̃a tiyá lɔ́ ngáá kpaló mbá ỹɛ́ɛ́ni.

¹⁵Ná wɔ́lii mɛɛní lɛingáá bɛ́kpɛ ti ỹɛndáá wú yɛ áá ɣɛ́a kɛ ngáá háwu faa áá ɣɛ́ áá bɔ́lu nungáá la Ngala fɛ́lindai h̃u, kɛ wáá ndó ngááh̃u ɣɛ́ma. Waá kɛ́ ngáá háwu wú laaỹɛ́ɛ́ni ɔ́ɔ́ núi sí ɣɛ́ kíli ỹaaní Kílisitii í háángɔ faaw̃a.

¹⁶Wálaa kɛ́ ngáá háwu ngufe tála haa ɔ́ɔ́ lá Kílisitii hái w̃a faa lɛ́ingaa ɣɛ fááw̃a bɛ́kpɛ wú yɛ taa ɣɛ́ wú gi ma ngáá faa vánda lé.

¹⁷A mu ɣɛndáá Ngalángi w̃ásandai wu aa ngáá mɛɛní ỹɛ́ fáá nɔ́ɔ ɔɔ kpɔle wɔlíngaa bɔlendáá, kɛ́ áá lɔ́ na ngáá a mu ɣɛ́ ngáá telembo mbélaa Ngalá ngááh̃u, a mu ɣɛ́ ndiiheí h̃u, ná vólu, a mú ɣɛ́ kooh̃unɛɛ gítei h̃u. Sí kpɛ́lɛɛ pá aa ɣɛ́ Hɛ́ɛ́ma Ỹínangi w̃áá véle w̃a.

¹⁸Ná wáá yénge Kílisitii yɛ́ h̃íí na, kɛ Ngala ndiivó fái wul̃á wáá ɣɛ́ wáá kɛ, aáva nungáitii taá ɣɛ taa wúfe wú w̃a.

¹⁹Faalɔ, a mú yákpa gíte a mú lɛɛh̃úi h̃uuhíya ndiiheí h̃u, ná vólu, a mu ɣɛ́ maa bɔ́ ỹɔw̃ɔ́ ỹɔ́w̃ɔ wa ngáá a mú h̃úú í bá Ngala fái h̃u.

²⁰Wálaa kɛ́ ngáá háwu mɛɛní sí áá nɛ́ɛ́ wú la ná í Ngálangi háá h̃uubátɛngi háá h̃úú ỹááni. Mɛɛní fíli pangɔ́ɔ́ lé mɛ́ fááw̃a, kɛ́ mɛɛníí fíli mɛ́ndai áá faa víli Ngala fáá ɣɛndái h̃u nungáá lɛ́ingaa yáá kɛ aa pele w̃a ngáá nuu ɔ́ɔ́ mɛɛní ná ỹɛ.

²¹Aá ɣéle aá lɔ́ pele w̃a ngáá suwa fíli nuu áá mɛ ɔɔ ndɔɔ nuu áá kpɔlé ɔɔ faa fíli nɔ́ɔ nuu áá kɛ áá kɛ́ ngáá háwu faa áá víli Ngala fáá ɣɛndái h̃u ngí mbála Yalá fɛ́li mbélai ti tá fíli ngeya yí lókogula ná h̃u.

²²Sí fíli áá ɣɛ́ í gí ma ngáá aá lɔ́ pele w̃a kɔwɔ́ato faí sítiini mba, í ló wú lówah̃u wáá Ngála. Aá lɔ́ ngáá faa vánda í hááw̃a ngáá ná sí yáá kɛ áá ɣɛ́ í gí mái h̃u kpál̃au ngáá aá lɔ́ pele w̃a Ngala ngááh̃u ngáá yí kɛ.

²³Kɛ́ ná wɔ́lii ɛ́i ɣɛ́ í gí mái h̃u kpál̃au ngáá sí yíwaa mɛ kule lɔ í w̃a yí mɛ, kɛ Ngala ngáá í wááleve ná h̃u ngáá yáá vélei, sífaa í lángɔ ɛ́i ɣɛ́ lá ngáá kule lɔ í w̃á yí mɛ. Ná lɔ́ aá kɛ yɛ́i ɣɛ́ veléi bɔw̃álale, sí fíli yáá lái lá ngáá aa lɔ́ pelé w̃a ngáá yí kɛ, ná yáá kɛ, kɛ aá lɔ́ ngáá faa ỹɔ́u í hááw̃a.