Read Bandi LÓÓMI 3 Bible Online

LÓÓMI 3 - Bandi bible

LÓÓMI 3

¹Ná yáá ɣɛ́ ngáá Júsu w̃ɔ́ɔ́ bɛ́ɛ́ lɔ́ í ngáá kulasuunúmai ná h̃u? Ɔɔ bɛɛ́ lɔ́ í ngáá kulasuunúmai tɔve pɛlɛ́ vólu hái h̃u?

²Maa gúlasuunumai yámbɔɔlɔngɔɔ lé pele bíh̃iw̃aa h̃u. Hése keleí wáá ngáá, Ngala ngí ngi gééla wói hénga Júsuaitii ngéya.

³Ná náa Júsuai ti lɛ́ingaa tɛí ɣɛ́ lɔ́wɔbaɣani Ngalá ngeyá, kɛ ná lɔ́ náá áá kɛ Ngalá ngɛ́i mɔ́ɔ ɣɛ́ ngáá tɔ́wɔbaɣa w̃ɔ́ɔ?

⁴Aa h̃íí kpósouŋ, kɛ́ áá ɣéle, Ngalángi ndái lɔ nɔ́ɔ fɔ́ tɔɔỹáá w̃á bele pá nuu búsa kpɛ́lɛɛ tí ndái ɛi ɣɛ tɔɔỹaá w̃a. Maa hái waa nɔ́ɔ́ ngáá kíya pɔnɛngɔ́ Ngala Kɔ́lɔi h̃u, sí vá pɔnɛngɔ́ aá wáá ngáá sí, “Sí fíli yáá ndé aa ɣɛ ngáá tɔɔỹaá, aáva ná áá lí bɛ́lɛ í ndó kɔsɔ́ fáá wa aa nɛɛ í w̃a.”

⁵Kɛ́ ná mú háá ỹɔu ɣɛndái áá Ngálangi lélembongi yákɛ kpál̃au, kɛ ná ná áá ɣɛ́, kɛmbɛ ɛi mɔɔ ɣɛ pele w̃a ngáá Ngalá ngɔ́ɔ́ fáá bá nda a mu w̃a a mu háá ỹɔu ɣɛ́ndai hááw̃a, kɛ́lɛ? Nyá lɔɔ sí lé h̃íí ngáá kíya nuu búsa áá maa hái yákpele.

⁶Nuu wɔ́lɛ gilíí maa hái wá h̃íí aa pele w̃a kpósouŋ, sífaa, ná wɔ́lii ɔ́ɔ́ ɣɛ́ h̃íí kɛ Ngalá ngɔ́ɔ́ ɣelé nuu gɔ́sɔ náá hɔ́ɔ́?

⁷Tɛingaa yáá ndé ngáá ná í lɛ́ɛ́ gɔɔlandái áá kɛ́ ngáá háwu nguféma wála í ɣɛ́ Ngala mbɛ sífaa áá ngákɛ kpál̃au kíya Ngalá tɔ́ɔ́ỹaangɔ, kɛ ndeé lé náá hɔ́ɔ́ áá kɛ Ngalá ngí mɔ́ɔ́ í wááleve ngáá faa ỹɔ́u w̃ɔ́ɔ́ ná h̃u?

⁸Ndeé le hɔ́ɔ́ wɔ́i nde wɔ́ɔ́ ɣɛ́ ta, “A mu ɣɛ́ máa faa ỹɔ́i ɣɛ kɛinɔɔ́ faa vánda í ɣɛ́ áá gúla maa háá ỹɔu ɣɛ́ndai h̃u?” Nungáá lɛingáá tiyá lɔɔ lɔ́ve ngáá ndendáá ngáá niỹá gíte naa ná lé, kɛ́ Ngála tɔɔ vá maa háá ba láma tí w̃a ngáá sí kúle í tí w̃a tí maahɔ́lɔ.

⁹Faalɔ, muỹɛ́i mú ngáá Júsuaitii, kɛ mú gulangɔ́ɔ́ lé faa h̃u í lɔ́ve nungáá vékaitii mbá Ngala ngááh̃u? Aá h̃íí ná kulo bɛ́lɛ sífaa ní ngákɛa ngáá kɛ Júsuaitii ɛ́ɣɛ sítii taa ngáá Júsua a mu lɔ́ngɔ a muỹá lɔ́ ngáá faa ỹɔ́u yélaa.

¹⁰Maa hái waa nɔ́ɔ́ ngáá kíya pɔnɛngɔ́ Ngala Kɔ́lɔi h̃u, sí vá pɔnɛngɔ́ aá wáá ngáá sí, “Nuu fíli aa ngáá telembo mɔ́ɔ́ Ngála ngaah̃ú, í lí bɛ́lɛ í tó nuu yílaa mbá.

¹¹Nuu yílaa kéle tɔ áá na ɔ́ɔ́ tɔ́ɔ́ỹaa háá yatɔ́ mba kɛlaa nuu yílaa kéle tɔ ɔ́ɔ́ ɣɛ́ na ɔ́ɔ́ ɣɛ́ áá Ngalá kɔ́li ngáá tɔɔ ɣɛ́ fááw̃a.

¹²Ti kpɛ́lɛɛ tí vólu yáfenga Ngalá mba aáva ti ɣɛ́a ngáá ngambalámba yélaa. Nuu fíli aa na ɔ́ɔ́ faa vánda ɣɛ. Yilá w̃ɔɔ́ bɛ́lɛ áa na.

¹³Ti laa woítii kulangɔ́ɔ́ lé ngáá kambá lááwongɔitii. Ná vólu, ndɛɛ ỹɔ́u ỹɔungáitii tɔ táá gúla ti la ɛ́ɣɛ ngoo ỹɔ́u ỹɔungáitii tɔ ti la kɛ kíya kpéi kaali w̃al̃ái í na.

¹⁴Ti laa wói waa nɔ́ɔ léi ngáá silíma wóo ỹɔ́u ỹɔungáitii.

¹⁵Ti h̃úúhulangɔɔ lé nuu váándaa h̃u.

¹⁶Mbéi fíli taa lí ná taá vóndo ná ngáá ỹanda h̃uuỹááningi ɛ́ɣɛ ndííỹaanii áá ló ná.

¹⁷Aáva taá faa fíli kɔ́lɔ áá lí í tó ndiihéi véle wa.

¹⁸Ngala ndúwa mba gulo bɛ́lɛ aa ti h̃u.”

¹⁹Ní kɔ́lɔ náa ngáá sí kínɛi í Ngala sávai h̃u tiyá lɔ́ ná sítii fááw̃a tí maa hávai wu. Maa hávai vá tɔ na ngáá kɛinɔɔ́ ngooh̃úgula w̃áá álaa ɣɛ́ nuu fíli mbá, ná vólu, kɛinɔɔ́ Ngalángi gɔ́sɔngi í ló nuu kpɛ́lɛɛ mbá.

²⁰Bɔw̃álale, nuu fíli ɛi ɣɛ ngáá telembo mɔ́ɔ́ Ngalá ngaah̃ú ngáá sí ɣɛ́ndai savaí í ndengɔ́. Sí savaí áá kɛ aá wáa ngáá í ngakɛ́ ngáá kɛ nuu búsa lɔ ngáá faa ỹɔ́u w̃ɔ́ɔ́.

²¹Kɛ́ sí h̃uí náa kíya Ngalá ngáá nuu yéɣe ngáá telembo mɔ́ɔ́ maa hái ɣɛ kíli ya ngí ɣɛ́a kpál̃au. Aa ngáá nuu híyalaa ngáá Ngala sávai kpósouŋ. Nuu áá ngátɔ mba sí h̃u Ngala sávai í ndéngɔ ɛ́ɣɛ sí Ngalá ndaa háá lé mbélaitii tí pɔ́nɛni.

²²Ngalá ngáá nuu yeɣé ngáá telembo mɔ́ɔ́ ná í lángɔ áá ɣɛ́ la ngáá Jísu Kílisitii. Ngalá ngáá sí ɣɛ nuu fíli mbɛ́ ndángɔ ngáá Jísu Kílisitii suuwɔlɛ́ fáá fíli aa su,

²³sífaa, nuu kpɛ́lɛɛ i faa ỹɔ́u ɣɛ́a aáva nuu fíli áá na yɔ́ɔ́ ɣɛ́ faa ỹɔ́u áá su kíya Ngalá ngí ná faa ỹɔ́u áá su.

²⁴Ngalá ngí kɛ́a ngáá háwu a mu velé lálangɔ láá le múl̃ɔ kɔwɔ́ato ngi háá bɔwɔí wa a mú maahɔ́lɔngɔ Jísu Kílisitii w̃áá véle w̃a lɛ́i í mu wumááwongɔ.

²⁵Ngalá ngí tɔvení ngáá í ɣɛ́ ngáá saáɣa kɛinɔɔ́ laá Jísu w̃áá véle w̃a nuu búsa h̃úúhaa í ló ti háá ỹɔítii sú ti lángi w̃áá véle w̃á taa ɣɛ́ sú lá. Ngalá ngí sí ɣɛ́ngɔ kɛinɔɔ́ í ngí lélembongi yákɛ. Wɔ́lɔ wɔ́lɔ mái h̃u, Ngalá ngí liilɔ́lɔni í yááh̃u víli nungáitii ti háá ỹɔítii mááh̃u.

²⁶Kɛ́ sí h̃úi láá aa mɔɔ yaah̃u vílima núngaitii tí háá ỹɔítii mááh̃u aáva ngi lélembongi yákɛ kíli w̃úl̃a. I sí ɣɛ́ngɔ ngáá í ngákɛ ngáá laá bútei laá lɔ́ ngáá telembo mɔ́ɔ́ aáva sítii ti langɔ́ áá ɣɛ́ la ngáá Jísu aa ti kpɛ́lɛɛ ngéɣe ngáá telembo mbélaa.

²⁷Ná ná áá ɣɛ́, kɛ faa fíli aa na háá a mɔɔ́ maayónga tevé sífaa, a maa ngáá telembo mbélaa Ngalá ngááh̃u a mú gólondai h̃u Ngala sávai wú, kɛ́ aa gula ndangí h̃u a maa ɣɛ́ sú ngáá Jísu.

²⁸Faalɔ, maa hái wundangɔ́i waa ngáá, Ngalá ngáá nuu yéɣe nɔ́ɔ léi ngáá faa áá í wá ná í lángɔ áá ɣɛ́ la ngáá Jísu Kílisitii kɛ́ aa ngáá nuu gólondai savái wu.

²⁹Ngalá ngáá na Júsua ngiláá kpé fááw̃a nɔ́ɔ kɛ́ áá lɔ́ na sítii kele tɔ faaw̃a taa ngáá Júsua.

³⁰Ngalá ngí yíla kpé nɔ́ɔ aáva aa sítii ngéɣe ngáá telembo mbélaa taa ngáá Júsua ɛ́ɣɛ sítii ti ngáá Júsua nda ngílaa kpéngi w̃aa véle w̃á nɔ́ɔ taa ɣɛ́ sú ngáá Jísu Kílisitii.

³¹Kɛ́ ná aa yɛɛ́ náá ngáá kɛ a mɔí mɔ́ɔ́ goló sávai wú, kɛ́ áá ɣéle, a maá sávai yéɣe ngáá faa hína wála.