Read Bandi LÓÓMI 8 Bible Online

LÓÓMI 8 - Bandi bible

LÓÓMI 8

¹Ná wú báhangɔ áá ɣɛ́ la Jísu Kílisitii wa, kɛ Ngalá ngáá vaamá faa bá ndáma wú w̃a faa ỹɔ́u hááw̃a wáá ɣɛ́ kɛ́ni.

²Hɛ́ɛ́ma Ỹínangi aa kɛ ngáá háwu wú ndɛɛh̃u gítei w̃ááhɔlɔ áá gúla Jísu Kílisitii yaa. Ná vá tɔ áá wú wúmaawo faa ỹɔ́u ɣɛ́ndai yaá ɛ́ɣɛ sái.

³Savaí Ngalá ngí féi Muusé yáá ɛi hómbo ɔ́ɔ́ sí ɣɛ́ bɔw̃álale mu lɛ́ɛ́h̃ui sí h̃uu líívo kɛí aa kɛ ngáá háwu ngakpá ngɛ́i ɣɛ savaí yáá ɔ́ɔ́ ná ɣɛ́. Kɛ́ Ngalá ngí mú wúmaawoni ná h̃u í bɔwɔ́ bɔ́wɔ H̃íỹɛndou Loí Jísu Kílisitii lɔ́veni ngáá nuu búsa kíya nɔ́ɔ nuu búsaitii mú na ngáá í ɣɛ́ ngáá saáɣa a mu háá ỹɔítii fááw̃a. Aáva i Jísu Kílisitii gúlani ngáá saáɣa ngáá faa ỹɔí ndái álaa ndó ma.

⁴I sí ɣɛ́ni ngáá kɛinɔɔ́ a mu ɣɛ́ maa híya ngáá Ngala sávai laa wói lɛ́i tɔmbéma w̃áá fíli áá mba kolóngi w̃áá véle w̃a a maá ɣɛ́ su Hɛ́ɛ́ma Ỹínangi wu. Ná ná áá ɣɛ, a mɔí mɔ́ɔ́ híya ngáá ndiivo kɛɛ́ háitii taa ɣɛ́ mu h̃u.

⁵Sítii taa ɣɛ́ nɔ́ɔ taa híya ngáá ti liivó fáitii taá gísiya nɔ́ɔ ngáá bɔwɔ́. Kɛ́ nuí fíli áá ɣɛ́a híya ngáá sí Ngálangi Hɛ́ɛ́ma Ỹínangi áá ɣɛ́ loí áá ɣɛ́a kɛ, Ngalángi háitii tɔ́ maa w̃ɔ́i áá ɣɛ́ áá gísiya la.

⁶Ná wɔ́li nuu gitóngɔ áá ɣɛ́ nɔ́ɔ la sítii mbá taa ɣɛ́ ngáá nuu liivó fáitii, kisíya láálii ná aa kɛ nuu í sáa w̃ááhɔlɔ. Kɛ́ ná nuu gisíya áá to nɔ́ɔ sí wa Hɛ́ɛ́ma Ỹínangi áá nuu ló ma, kisíya láálii ná aa kɛ nuu í ndɛ́ɛ́h̃u gítei w̃ááhɔlɔ ɛ́ɣɛ Ngalángi lííhei.

⁷Nuu liivó fáitii ti woo áá ndái ma taá Ngála. A maa ɣɛ́ ngáá Ngalá mbaahílima yélaa bɔw̃álale, nuu liivó fáitii taa kɛ ngáá háwu a mɔ́i gólo Ngálangi hávai wu. Séimil̃a p̃ɛ́ɛ́, a mɔ́i hómbo mɔɔ́ gólo mbu.

⁸Ná nuu áá hítɛ nuu líívo fáitii kɛ́ndaa vólu, ná ná áá ɣɛ́, ɛi Ngála ndiivó fáá ɣɛ.

⁹Kɛ́ wálaa, wɔ́i híya ngáá wú líívo fáitii kɛ́ndaa, kɛ́ wáá híya ngáá Hɛ́ɛ́ma Ỹínangi liivo fáitii ná wɔ́li áá ɣɛ́ wú vólu. Nungái sítiini Kílisitii Ỹínangi áá tí vólu, taa ngáá ngi vóngaa.

¹⁰Kɛ́ wálaa, Kílisitii lɔ wú vólu, faalɔ, Hɛ́ɛ́ma Ỹínangi aa kɛ ngáá háwu wú ɣɛ́ ndɛɛh̃u gítei h̃u bɔw̃álale Ngalá ngí wú yeɣénga náá ngáá wá lɔ ngáá telembo mbélaa kíya bɛ́lɛ wú búsai sítiini kɛ nɔ́ɔ tí sáá w̃ááhɔlɔ bɔw̃álale, wá lɔ ngáá faa ỹɔ́u yélaa.

¹¹Ngála ngí Jísu yooɣéni sái h̃u ngi Hɛ́ɛ́ma Ỹínangi w̃áá vele w̃a. Ná ngi Ỹínangi ná áá ɣɛ́ wú vólu, kɛ lɛ́i i Jísu Kílisitii yooɣéni sái h̃u, aá lɔɔ vá kɛ́ma ngáá háwu wɛ́i wáá há wú ɣɛ́ ndɛɛh̃úi h̃u ngi Ỹínangi ná w̃áá véle w̃a.

¹²Mu mbála Yalá fɛ́li mbélai, kule lɔ mu w̃a mu faá ɣɛ́, kɛ́ aa ngáá mú lɛɛh̃úi h̃uuhíya ngáá kíya fíli áá nɛ́ɛ́ mu yɛ ngáá mú kɛ.

¹³Ná wáá híya nɔ́ɔ ngáá wú líívo fáitii, wáá sáa w̃ááhɔlɔ, kɛ́ ná wáá lókogula wú lámal̃a ndiivo kɛítii su Hɛ́ɛ́ma Ỹínangi w̃áá véle w̃a, kɛ waá lɔ́ɔ vá kúnafɔ lɛ́ɛ́h̃ui w̃ááhɔlɔma.

¹⁴Sítiini Ngalángi Hɛ́ɛ́ma Ỹínangi áá tí wúto, tiyá lɔ́ ti ngáá Ngalángi léngaitii.

¹⁵Maa Ỹínangi ɛi kɛ ngáá háwu wɔɔ ɣɛ́ ngáá nduwɔ lopóa ɣɛ́ kíli Ngalá ngeyá wɔɔ ɣɛ́ wáá lúwa mba. Kɛ́ áá ɣéle, áá kɛ ngáá háwu wú ɣɛ́ ngáá Ngalángi léngaa, a múwaa tóli ngáá a mu kɛ́ɛ́ɣɛ.

¹⁶Maa Ỹínangi vá tɔ áá kɛ a mú ɣɛ́ suuwɔ́lɔ kpál̃au ngáá kɛ a muỹá lɔ́ ngáá Ngalángi léngaa.

¹⁷Na aáva a mú ngáá Ngalángi léngaa, sí í ngándɔɔlɔngɔ a muỹá lɔ́ɔ vá maahɔ́lɔma a maa Kílisitiini. A mu lɔ́ngɔ muỹá lɔɔ vá ɣɛ́ma Kílisitii yákpa maanɛɛnɛɛ ngwalaí h̃u bɔw̃álale, a muỹá lɔ́ɔ w̃áánɔw̃ɔ kíya í w̃áánɔw̃ɔni.

¹⁸Ndángɔɔ lé lá gíte ngáá maanɔw̃ɔ́i náá a máá híya sú nuu ɛ́i suw̃á p̃ɛ́ɛ́ ngakpá máánɛɛnɛɛngi w̃a a máá vá suulɔmá kúna.

¹⁹Seímil̃a p̃ɛ́ɛ́, Ngalángi bátɛ wɔlingái kpɛ́lɛɛ tiyá lɔ́ɔ́ naa w̃áálɛlɛ nɔ́ɔ ngáá ndiihíka híka ngáá tí náá lɔ ngáá elení tɔ́ ti ngáá Ngalángi léngaitii.

²⁰Sífaa, Ngalángi bátɛ wɔlingái kpɛ́lɛɛ Ngála ngí ɣɛngɔ́ beeleí tí wa ngáá kɛ ngá ngáá tí wa aáva sí aa ɣɛi ngáá faa ngáá tɔɔ́ ɣɛ́ ɣɛ́i loí ɔ́ɔ́ ɣɛ́ ngáá ti ye, kɛ́ sífaa, Ngalá ngí suubátɛni ngáá í ɣɛ́ h̃íí. Kɛ́ ná fíli su, kitómaa lɔ na,

²¹ngáá kɛ náa hɔ́wɔi lɔ́ɔ́ vá fóloma maa wɔ́lingaitii kpɛ́lɛɛ ti wumáá áá wó, tɛ́i mɔ́ɔ́ ɣɛ ngáá nduwɔ lopóa ɣɛ́ kíli nduulái yaá taá mbó. Taá ɣɛ́ náa Ngalángi yákpa maanɛ́ɛ́nɛɛ ngumaawo ngwalaí sí h̃u Ngala ndéngaitiini tí su.

²²A mú súúwɔlɔ ngáá Ngalá kpátɛ wɔlingáitii kpɛ́lɛɛ tiyá lɔ́ faá báma wála h̃u ɛ́ɣɛ nduwu ya fuulɛ́ wála h̃u kíya nɔ́ɔ koo ỹah̃á áá ɣɛ́ náá ndoú lé kóóh̃ubaalɛ h̃u.

²³Aa gɛɛlɛí nɔ́ɔ ná wa, kɛ́ a muỹá ɣéle tɔ Hɛ́ɛ́ma Ỹínangi lɛ́i í ngáá Ngalangí hésendaa hembɛ wɔ́lingi i mú vólu, muỹá lɔ́ɔ́ líílɔlɔ nɔ́ɔ faa bámai yáá a múwaa naa w̃áálɛlɛ ngáá í ló sú kpóloo ná h̃ú Ngalá ngáá vá ngákɛma ngáá a muỹá lɔ́ ngáá ngi léngaa. Kɛ ná vá mbaa ngáá, a mu lúwui sí ɣéle tɔ ngumáá lɔɔ vá wóma.

²⁴Kitomái sí vá tɔ í kɛ́a ngáá háwu a mu wúmaa í wó. Kɛ́ ná sí áá ɣɛ́ ngáá a mu gitómai áá ɣɛ́ náá mu yaá kílii, kɛ a mɔí mɔ́ɔ ná w̃aalɛ́lɛ sífaa, nuu ɛ́i sí w̃áálɛlɛ aa ɣɛ́ naa ngeyá kílii.

²⁵Kɛ́ áá ɣéle, faa lɔ́ ná í ngáá a mu gitómai kɛ́ áá nɛ́ɛ mú yaá aáva a maa náa w̃aalɛ́lɛ ngáá ndiilɔlɔ́.

²⁶Pele lɛ́ingaa h̃u bɛ́kpɛ a mu h̃úú áá báni kɛ́ Hɛ́ɛ́ma Ỹínangi lɔ́ na ngáá í bɔ́ mú wa. Ngi bɔ́mba gilií tá wáá nɔ́ɔ́ ngáá ná mɔí ɣɛ́ kɔ́lɔ sí kule í má bɛ́kpɛ mú maa Yála fɛ́li, aa Ngala fɛ́li a mu haáw̃a ndiihoolɛ́ wóóni su bɛ́kpɛ ngáá mɔí hómbo mɔɔ́ pú mu yɛ́pɛ woo h̃u.

²⁷Ngalá ngí mu gísiyaitii kpɛ́lɛɛ kɔ́lɔ. Aáva i kɔlɔ́ sí áá ɣɛ́ ngáá Hɛ́ɛ́ma Ỹínangi gísiyai bɔw̃álale, ná Hɛ́ɛ́ma Ỹínangi áá ɣɛ́ áá Ngala fɛ́li a mu haáw̃a muỹɛ́i mu ngáá Ngalángi vóngaitii, sí Ngalá ndóngɔ aa ɣɛ́ la lá, laa lɔ nɔ́ɔ Hɛ́ɛ́ma Ỹínangi áá fɛ́li fááw̃a.

²⁸A mú súúwɔlɔ ngáá Ngalá tóko lɔ nɔ́ɔ fɔ́ faa lɛ́ingaa wa bɛ́kpɛ ti ngáá faa vánda a mu haáw̃a muỹɛ́i a mu longá la, muỹɛ́i i mú lolíngɔ ngáá sí ndóngɔ i ɣɛ́ mú kɛ́.

²⁹Ná wɔ́lɔ pá i suuwɔ́lɔ nɔ́ɔ ngáá elení tɔ í lókolonga tí wa i ti ɣɛ́ ngáá ngi ndá léélaa. I kpatɛngɔ́ gí ma ngáá ti ɣɛ́ ngáá ngi H̃íỹɛndou Loí ɣɛ́ kílii ngáá kɛinɔɔ́ ngi H̃íỹɛndou Loí í ɣɛ́ ngáá hésendaa Loí ndoú bíh̃i bíh̃ingaa h̃u taa ɣɛ́ ngeyá.

³⁰Ngalá pa i sítii tolínga náá í kpátɛnga gí má ngáá ti ɣɛ́ ngáá ngi H̃íỹɛndou Loí ɣɛ́ kíli, aáva áá ti yeɣé ngáá telembo mbélaa, ná vólu, í kɛ ngáá háwu tí ɣɛ́ ngi yákpa maanɛɛnɛɛngí h̃u.

³¹Kɛ maa hái ɣɛ kíli lɔ hɔ́ɔ́ ngáá sí. Ná Ngalá ngáá ɣɛ́ mu vólu, kɛ nuu fíli áá na sombóndaa ɔ́ɔ́ ɣɛ́ mú h̃u.

³²Ná Ngála ngáá bái h̃u, kɛ́ láá ɣéle, í lókogula ngi H̃íỹɛndou Loí h̃u ngáá saáɣa a mu haáw̃a, ná ná áá ɣɛ́, kɛ bɛɛ́ lɔ́ náá hɔ́ɔ́ áá bááh̃aa lokogúlama su ngáá í fé mu yɛ? Aá ɣéle p̃ɛ́ɛ́, aa ŋani kpɛ́lɛɛ fé mú yaá ngi háá bɔwɔí w̃áá véle w̃a.

³³Ná wɔ́lii Ngála ngáá ndé ngáá kɛ faa áá sítii mba í lókolonga tí wa ngáá ngi vóngaa, kɛ ele lɔ náá áá faa vɛ́lɛ ti wa?

³⁴Baa nuu fíli aa hómbo í ti waaléve ngáá taá véleni? Ná ɣéle ngɛi ɣɛ p̃ɛ́ɛ́. Aá ɣéle Jísu Kílisitii i haaní, Ngalá ngí mɔ́ɔ́ mbuyoɣé sái h̃u, aá vá tɔ́ náá héini ngufema ỹándai Ngalá kpela masandáá h̃u íwaa a mu w̃áánɛɛnɛ mbó.

³⁵Ŋani fíli ɔɔ faa fíli áá ná áá kɛ ngáá háwu ndongí í mú lówah̃u a maa Kílisitii maa í léve í lí bɛ́lɛ í tó faa bámai wa, maanɔw̃ɔ́, faa bɔ́lunda taá ndá nuu w̃á, ndɔlɛ gulá ma, nyaaní, mal̃a faa áá ɣɛ́ í ɣɛ́ ngáá nuú, ɔɔ í lí bɛ́lɛ í tó saa wa, ta fíli ɛi mu betéve ndongí wá í mú lówah̃u a maa Kílisitii.

³⁶Maa hái waa nɔ́ɔ ngáá kíya pɔnɛngɔ́ Ngala Kɔ́lɔi h̃u, sí vá pɔnɛngɔ́ aá wáa ngáá sí, “Ngele fíli áá wo, niyá lɔ nɔ́ɔ saa lowá la i hááw̃a. Taa ni h̃úúhou kíya nɔ́ɔ mbaala ɣɛ kíli i ná, ná taa ɣɛ́ náa taa vá paamá.”

³⁷Kɛ́ faa kpɛ́lɛɛ sú, a mu hombóndaa lɔ́ faa kpɛ́lɛɛ mááh̃u. Aáva sí aa ɣɛ́ h̃íi Jísu Kílisitii w̃aa véle w̃a lɛ́i ndóngɔ ngáá mu ye.

³⁸Ndángɔɔ lé lá ngwala ngáá ŋani fíli ɛi hombó ɔ́ɔ́ mu betéve Ngálangi lóngi wa. Í lí bɛ́lɛ í tó ndɛɛh̃úi sí wa mú su ɔɔ mɔɔ bɔ́ɔ́ ha. Malékaa ɣele tɔ tɛ́i hómbo. Ngakpa ŋánini kele tɔ tɛ́i hómbo. Fái sítii táá híya náa ɛ́ɣɛ sítii táá vá híyama ɔɔ ngákpa péka fíli nɔ́ɔ tɛ́i ná ɣɛ́,

³⁹ɔ́ɔ́ bɔ́ɔ́ ɣɛ́ ngáá ngelewu ɔ́ɔ́ ndɔwɔlɔ́ wúu véle. Ngalángi bátɛ wɔlingái kpɛ́lɛɛ su, ŋani fíli aa na ɔ́ɔ́ hómbo ɔɔ́ mú betéve Ngalángi lóngi wa a mú mááhɔlɔnga a mu Lemɔ́i Jísu Kílisitii w̃áá véle w̃a.