Read Bandi LÓÓMI 9 Bible Online

LÓÓMI 9 - Bandi bible

LÓÓMI 9

¹Nyá lɔ́ ngáá Kílisitii volú w̃ɔ́ɔ́ aáva Hɛ́ɛ́ma Ỹínangi lɔ ngáá hééle kɔwɔ́ato sí wá í ndíí h̃u, faalɔ, ngáá ndɛɛ gɔ́ɔ́lama kɛ́ tɔɔỹaá wóó lɔ ngíwaa nde.

²Ndííỹaaningɔɔ lé, mááw̃aanungɔ ngwala kpɔ́wɔ bɔ́wɔ nungáitii faaw̃a. Ná bɛ́lɛ ɔ́ɔ́ lí í to sí wa ngáá Ngalángi vélengi ɔ́ɔ́ ɣɛ́ mbá, ná vólu, ni yangí wɔ́lɛma naa Kílisitii kɛinɔɔ́ ní vóngai Júsuaitii ti gúlah̃uunuma ngɔ́ɔ́ ɣɛ́ loí ná i ɣɛ.

⁴Tiyá lɔ́ ti ngáá Ísulɔ yélaitii tiyɛ́i Ngalá ngí lókolongɔ tí wa ngáá ngi léngaa. Ti híyani Ngalángi yákpa maanɛɛnɛɛngí h̃u. I kɛ́lɛ ngeɣéni tí lówah̃u taá tiyéni, ná vólu, í ngí hávai hé ti yaá. Ngalá ngí pele gíte ɣɛ́ngɔ ngáá taa fɛlí ɛ́ɣɛ i mɔ́ɔ́ kúúlo tɛ́ingaa wóni ngáá ti ye.

⁵Ti káwalani ti ɣɛ́i wɔ́lɔ ngáá nuu yánguyangɔni Ngalá ngááh̃u. Ti káwalai sítii tɔ nɔ́ɔ mɔ́ɔ́ ti ɣɛ́i ngáá Kílisitii káwalani nuu busá gákai w̃aa vele w̃a. Bɛlɛ́ Ngalá lɛ́i í fáá kpɛ́lɛɛ mááh̃u ngáá masa, ndaaw̃áá í lɛ́ kúnafɔ taá ngí ndá gúnafɔ! Amíína.

⁶Nuu ɛ́i wɔ́ɔ́ nde ngáá Ngalá ngí ngi gúúlongi ỹáánini bɔw̃álale, nuí kpɛ́lɛɛ táá le ti ngáá Ísulɔ yeláitii tɔ́ɔ ɣɛ́ ngáá Ngalángi vóngaa.

⁷Seímil̃a p̃ɛ́ɛ́, ná Ngalá ngí Lébilah̃au guulóni, áá ɣɛi ngáá ngi láála lengáitii kpɛ́lɛɛ, kɛ́ sítii í ɣɛ́i ti w̃a ti ɣɛ́i ngáá sítii nɔ́ɔ taa gúla Áise ndá le kpambíi h̃úu véle.

⁸Ná wáá ngáá, sítii tí tí léni Ngalángi gúúlongi w̃áá véle w̃a, tiyá lɔ́ ti ngáá Ngalángi léngaa kái káingi, kɛ́ aá ɣɛi ngáá sítii taa ɣɛ́i kuulóngi ná h̃u.

⁹Kúúlongi Ngalá ngí mbóni ngáá Lébilah̃au í ɣɛ́i ngáá sí, “Ná sí h̃úi áá fólo hówonɔ, nyá lɔ́ɔ́ yángaima, aáva Sééla lɔɔ vá siỹɛndóu lou léma.”

¹⁰Wálaa lééw̃a heelangáitiini ma Lebɛ́ka í tí lení. Ti gúlani kɛɛɣɛ́ yiláá kpé ma ná wáá ngáá, a mú káwala Áise.

¹¹Ná h̃u nɛ́nɛ taá nɛ́ɛ ɣɛ́i tí léni kpósouŋ kɛlaa tɔɔ́ ɣɛ faa vánda ɣɛ́ni ɔɔ faa ỹɔ́u, Ngalá ngí ndení ti njéé Lebɛ́ka w̃a ngáá kpakolo keleí aa ɣɛ ngáá ngenge mɔ́ɔ́ ndeɣe gélei yɛ́. Ngalá ngí sí léni ngáá kɛinɔɔ́ í hómbo í ngákɛ ngáá kɛ ngi líívo peleí lɔ́ áá híya la. Kɛ́ aa ɣɛi ngáá kɛ ndengái ti híya véle lɔ́ ɔ́ɔ́ ɣɛ́ loi mááh̃u ɔ́ɔ́ ná le.

¹³Maa hái waa nɔ́ɔ ngáá kíya nɔ́ɔ pɔnɛngɔ́ Ngala Kɔ́lɔi h̃u, sí vá pɔnɛngɔ́ aá wáa ngáá sí, “Ndóngɔɔ lé ngáá Jékɔ kɛ́ silingɔ́ɔ́ lé ngáá Ísɔ.”

¹⁴Kɛ́ ná áa yɛɛ́ náa ngáá kɛ Ngalá tɔ ngáá kahá gúla mɔ́ɔ́ ɔɔ suuwɔ́lɛ mbó mɔ́ɔ́.

¹⁵Ngála ngí ndení Muusé w̃a ngáá nuí áá ɣɛ́ loi í ngaah̃ú w̃aaw̃aanú hóu maa w̃ɔ́i lɔ áá ngaah̃ú w̃aaw̃aanú hóu.

¹⁶Kɛ ná ná áá ɣɛ́, kɛ faí kpɛ́lɛɛ tɔ́ nɔ́ɔ́ Ngalá ngeyá ngáá nuí áá ɣɛ loí í ngaah̃u w̃aaw̃aanú hóu kɛ́ aa ngáá sí nuu áá ɣɛ́ loí lá ɔ́ɔ́ sí nuu áá kɛ.

¹⁷Ngala Kɔ́lɔi h̃u pɔnɛngɔ́ɔ́ lé ngáá sí Ngalá ngí ndéni Íjepi lɔwɔlɔ́ w̃ása ngwalaí w̃a wɔ́lɔ, i ɣɛ ma, “Ngí kɛ́nga ngáá háwu ngáá yí ɣɛ́ ngáá mása ngwálai ngáá kɛinɔɔ́ ngí ní yákpangi yakɛ sí w̃áá véle w̃á ngáá kɛ́ ngáá háwu yí híya su, ná vólu, nungáá kpɛ́lɛɛ ti ɣɛ́ kɔlɔ́ ỹanda kpɛ́lɛɛ kpɛ́lɛɛ ngelewu.”

¹⁸Kɛ ná ná áá ɣɛ́, faí kpɛ́lɛɛ tɔ́ nɔ́ɔ Ngála ngeyá ngáá sí áá kpátɛ gí ma ngáá í kɛ. Ná áá ɣɛ́ lói í nuu yááh̃u w̃ááw̃aanu hóu aa ngaah̃ú w̃ááw̃aanu hóu, kɛ́ ná áá ɣɛ́ lói nuu wóli h̃u bɔ́lɔngɔ í ɣɛ́ la, aa kɛ ngáá háwu maa w̃ɔ́i wóli h̃u bɔ́lɔngɔ í ɣɛ́ la.

¹⁹Tɛingaa nuu áá ɣɛ́ má, “Kɛ ná ná áá ɣɛ́, ndeé lɔ́ hɔ́ɔ́ Ngalá ngáá nuu báálɛ hóuma? Nuu fíli áá na ɔ́ɔ lókola sí lúwɔ Ngala ngáá ɣɛ́ lói í ɣɛ.”

²⁰Kɛ́ laáva mu mbálai, ele wáá ngáá í yé ngáá yáá ló Ngála ndaa wú mɔɔni fááw̃a. Fɛɛtói aa bátɛ mɔ́i w̃ɔ́ɔ́ni ngáá, “Ndéé le yí kpátɛngɔ h̃íí na?”

²¹Aa ngáá faa ỹaaní fɛɛto bátɛ mɔ́i wa ngáá áá fɛɛtóitii kpátɛ ngáá ngi híí i léélaa léélaa. Aa ta bátɛ foló wála hááw̃a, í mɔ́ɔ ta bátɛ foló gbááma fááw̃a. Aáva pɔlɔ́ híí yiláángi lɔ nɔ́ɔ áá kpɛ́lɛɛ kpátɛ la.

²²Ngimɔ́ɔ́ nɔ́ɔ í ná kɔwɔ́ato sí wa Ngalá ngí kɛ́ngɔ. Ngalá ngí ɣɛngɔ́ lói í ngi lííyaw̃al̃ai taá ngí yákpangi yákɛ sítii maa véle w̃a kule í ɣɛ́ngɔ ti w̃a ti ɣɛ kíli í ỹááni. Kɛ́ áá ɣéle, háwui ɔ́ɔ́ kɛ ɔ́ɔ́ ná ɣɛ, aá ɣéle i liilɔ́lɔngɔ ti hái ya.

²³I ná ɣɛ́ni ngáá í ngákɛ ngáá kíya ngi hái wala w̃aanɛ́ɛ́ngɔ ná í núngai sítii ngaah̃ú w̃ááw̃aanu hóuni ti ɣɛ kíli batɛ́ngɔ ngáá ti ɣɛ́ ngí yákpa maanɛɛnɛɛngí h̃u taá tiyéni.

²⁴Nuu i ɣɛ́i ngáá Júsu w̃ɔɔ ɔɔ aa ɣɛi ngáá Júsu w̃ɔɔ, muỹá lɔ Ngalá ngí mú lolíngɔ ngáá ná w̃aa yélaitii.

²⁵Ngalá ngí ndéngɔ aáva pɔnɛngɔ́ɔ́ lé ndaa háá lé mɔ́i Hóseya gɔlɔ vɔnɛngɔ́i h̃u ngáá sí, “Sítii taa ngáá ní vóngaa, nyá lɔ́ɔ vá kɛ́ma ngáá háwu tí ɣɛ́ ngáá ní vóngaa. Nyá lɔɔ vá ndɔwɔlɔ́i ná h̃uuhóuma ndó su lɛ́i áá nɛɛ ní lóngi w̃ááhɔlɔni nápa.

²⁶Sí wɔ́lɔ ngi ndéni tí w̃a i ɣɛi ngáá sí ngí ɣɛ́i ta, ‘Wáá ngáá ní vóngaa.’ Kɛ́ tiyá gíte lɔ nɔ́ɔ mɔ́ɔ́ táá vá ti lolíma ngáá Ngalángi ndɛɛh̃u í su ngi léngaitii.”

²⁷Sí vá tɔ Ngalá ndáá lé mɔ́i Aisáya í ndéni kɔwɔ́ato Ísulɔ yeláitii mba ngáá sí í ɣɛ́i ta, “Ísulɔ yeláitii ti bih̃íngɔɔ lé kíya nɔ́ɔ nyɛɛ basángi áá ɣɛ́ na yívoi la, kɛ́ sítii taa vá ngumaawóngi w̃ááhɔlɔma taá bíh̃i kulo bɛ́lɛ.

²⁸Sífaa Ndemɔí Ngalá ngáá vaamá ngumbúlɛima, kɛ́ áá ɣéle, áá lɔ́ɔ sí kái kái kɛ í maa lááhi mboní wɔ́lɔ ngáá aá lɔ́ɔ vá kɛ́ma ngeleí sí wu.”

²⁹Aisáya i mɔɔ ndení ngáá sí í ɣɛ́i ta, “Béle a mu Lemɔ́i Ngakpa Ngalá ngwalaí aa ɣɛi nungái ti lɛ́ingaa yaah̃ú w̃ááw̃aanu hóuni ɔ́ɔ́ ti w̃ááhaalo, kɛ mu kpɛ́lɛɛ mu ɣɛ́ kíli ɔ́ɔ́ ỹááni a mu wu ngí i ló su. Ɔ́ɔ́ ɣɛ́ kíya nɔ́ɔ taa walá wálai nátii tɔ́ɔ́ ti lolí ngáá Sɔ́dɔu ɛ́ɣɛ Gɔmɔ́lɔ ti ɣɛ kíli í ỹáánii pɔ́lɛɣɛ pɔ́lɛɣɛ.”

³⁰Sí kpɛ́lɛɛ polú hái waa nɔ́ɔ ngáá sítii taa ngáá Júsua taá ɣɛ́i táá péle wɔ́li mbá ngáá tɔ́ɔ ɣɛ́ ngáá telembo mbélaa Ngalá ngaah̃ú, kɛ́ Ngalá ngí ti yeɣéni ngáá telembo mbélaa ti lángi w̃áá véle w̃a ti ɣɛ́i su lá.

³¹Ngalá ngáá Ísulɔ yeláitii ngéɣeni ngáá telembo mbélaa bɔw̃álale, ti ɣɛ́i taa yákpa ngáá ti ɣɛ́ ngáá telembo mbélaa laa Ngála ngaah̃ú ngáá kolóngi w̃aa véle w̃a taa ɣɛ́ su Ngala sávai wu,

³²kɛ́ táá yákpani ngáá tɔ́ɔ ɣɛ́ ngáá telembo mbélaa Ngalá ngaah̃ú ngáá ndangí w̃aa véle w̃á taa ɣɛ́ sú la. Kɛ maa hái gúlangɔɔ lé nɔ́ɔ ngáá kɛ ti gúlangɔ kɔ́tui sí w̃a ngáá nuu áá bówa la,

³³kíya nɔ́ɔ pɔnɛngɔ́ Ngala Kɔ́lɔi h̃u, sí vá pɔnɛngɔ́i aá waa ngáá sí, “A sí w̃aa hái lɔ lɛ́ɛ́! Nyá lɔɔ́ kɔ́tu la taa walái sí h̃u taa naa lolí ngáá Jɛlúsɛl̃ɛ, lɛ́i áá kɛ́ ngáá háwu nungái ti bówa lá, ti gúla. Aáva nuí fíli áá lá lá, kitomái ɛi ỹaaní kúnafɔ.”