Read Bandi KƆ́L̃E HESENDAA GƆLƆÍ 1 Bible Online

KƆ́L̃E HESENDAA GƆLƆÍ 1 - Bandi bible

KƆ́L̃E HESENDAA GƆLƆÍ 1

¹Nyɛ́i ngí ngáá Pɔ́ɔ, nyɛ́i Ngalángi háá h̃úúbatɛ su í lókolongɔ mbá ngáá Jísu Kílisitii géélai, nyá lɔ ngáá kɔlɔí sí vɔ́nɛ naá mú mbála Yalá fɛ́li mɔ́i Sɔsitɛ́ni.

²Kɔlɔí sí lɔ́ɔ vá wú yéle wɛ́i wú ngáá Ngala fɛ́li mbélaitii wú taí sí h̃u taá náá lolí ngáá Kɔ́l̃e, wɛ́i wú w̃ááw̃uỹangɔ fó wú báha kílii su Jísu Kílisitii wa. Ngalá ngí wú lólingɔ wú ɣɛ́ ngáá ngi vóngaa í báha naá nungáá kpɛ́lɛɛ mbá ỹánda kpɛ́lɛɛ taa Ndemɔí Jísu Kílisitii hɛ́li lɛ́i í ngáá a mu Lemɔ́i, í ngáá tiyá bɛ́lɛ ti Lemɔ́i.

³Bɛlɛ́ mu Kɛ́ɛ́ɣɛ Ngalá ɛ́ɣɛ Ndemɔí Jísu Kílisitii ti háá bɔwɔí ɛ́ɣɛ ti lííhei tí ɣɛ́ wú yɛ́.

⁴Ngáá sɛ́ɣɛɛ gulá Ngalá má hɔ́wɔ fíli wú hááw̃a kɔwɔ́ato ngi háá bɔwɔí wa í kɛ́a wú yɛ́ Jísu Kílisitii w̃áá véle w̃á.

⁵Sífaa, wú báhaa Kílisitii wa, ná í kɛ́a ngáá háwu wú faa kpɛ́lɛɛ maahɔ́lɔnga njɛpɛ h̃u ɛ́ɣɛ kele ɣéle su ngáá ngambɔ́ɔ́lɔngɔ.

⁶Ná wáá ngáá, keela wói kɔwɔ́ato Kílisitii wa i vilingá wú líí vólu kpáŋ kpáŋ.

⁷Náa hááw̃a, Ngalángi nɛ́ɛ́mai ta fíli álaa lɔ́ve wú w̃á ná wáá naa w̃áálɛlɛ gɛ́lɛ gɛlɛ ngáá Ndemɔí Jísu Kílisitii í vá vólu.

⁸Jísu aa kɛ ngáá háwu wú h̃úúbangɔ í ló kpé kpé Ngala fái h̃u í ló su faa kpɛ́lɛɛ ngákɛɛlɛmai í folo kɛinɔɔ́ faa fíli álaa ɣɛ́ wú wa folói ná w̃á a mu Lemɔ́i Jísu Kílisitii áá vá vaamá ma.

⁹Ngalá tɔ ngáá tokola ma w̃ɔ́ɔ́ lɛ́i í lókolongɔ wú wá ngáá wú háá í ɣɛ́ su yíla wáá ngi H̃íỹɛndou Lói Jísu Kílisitii a mu Lemɔ́i.

¹⁰Mu mbála Yalá fɛ́li mbélai, nyáá ngáá wú w̃áánɛɛnɛ a mu Lemɔ́i Jísu Kílisitii laahéingi h̃u ngáá wú lúw̃a ỹɔw̃ɔ́ ỹɔ́w̃ɔ woo w̃á kɛinɔɔ́ ndowah̃u kɔlɛ́ álaa ɣɛ́ wú lííwaa. Wú wóó í ɣɛ́ su yíla wú gísiyai h̃u, wú ɣɛ́ háwu yiláá má.

¹¹Mu mbála Yalá fɛ́li mbélai, nungáá lɛ́ingaa ti siỹɛndópoi sí taa ɣɛ́ ma Kulowi vɛ́lɛ lowái wu tí ndéngɔ má ngáá kɛ wú wóó yáfahangɔɔ lé ma.

¹²Sí vá ngí ma aá waa ngáá sí, nuí síí w̃ɔ́i aa ɣɛ tá, “Nyá lɔ Pɔ́ɔ volú”; nuí síí w̃ɔ́i i ɣɛ ta, “Nyá lɔ Apólo volú”; nuí síí w̃ɔ́i i ɣɛ ta, “Nyá lɔ Pítɛ volú”; nuí síí w̃ɔ́i i ɣɛ ta, “Nyá lɔ Kílisitii vólu.”

¹³Kílisitii wɔ́lɛ wɔlɛ́ngɔ laa le su. Aáva nyá láá le ngɔ́ɔ́ há wú hááw̃a kulɔ́sii w̃a, kɛlaa maa wɔ́ɔ́ ɣɛ́ nguyaí w̃ááhɔlɔngɔ wú ɣɛ́ ngáá pólu yelaa.

¹⁴Séimil̃a p̃ɛ́ɛ́, ngáá sɛ́ɣɛɛ gulá Ngalá ma ngaá, ngáá ngúya wongɔ́ ngáá wú tá fíli kɛ léi Kílesipɔni ngaa Gééyɔ.

¹⁵Faalɔ, nuu fíli ɛ́i ndé ngáá, wú ngúyai w̃ááhɔlɔngɔ wú ɣɛ́ ngáá pólu yelaa.

¹⁶Ngáá mɔ́ɔ́ giséi ma ngáá ngí ngúyai wóni ngáá Sitɛ́fɛnɔ ɛ́ɣɛ ngi vɛ́lɛ lowaí wuu yélaitii. Í séɣe léi náa nátii mba, kí ngáá mɔ́ɔ heingɔ́ ma ngɔ́ɔ́ ngúya wo ngáá nuu véka fíli.

¹⁷Kílisitii aa tɔ́vengɔ ngáá ngí ngúya wo. I tɔ́vengɔ ngáá ngí keela woó vándai lé kɔwɔ́ato mba aáva ngálaa nde nuu búsa géle ɣele su. Ná ngáá ná ɣɛ, kɛ keéla wói ngáá nde kɔwɔ́ato Kílisitii haalaí wa kulɔ́sii w̃a jíji ɛ́i ɣɛ́ su.

¹⁸Keela wói kɔwɔ́ato Kílisitii váándai wa kulɔ́sii w̃a, aá lɔ́ ngáá faa ỹááka sítii ngeyá tí wú ngáá ló sú. Kɛ́ muỹɛ́i Ngala ngáá mu wúmaawo, aa lɔ ngáá ngi yákpangi yaáh̃u ɣɛ́ngɔ ngáá mu ye.

¹⁹Pɔnɛngɔ́ɔ́ lé Ngalá Kɔ́lɔi h̃u ngáá sí Ngala ngí ɣɛ́ngɔ ta, “Sítii ti géle ɣeléngɔ, nyá lɔɔ́ ti géle ɣelengí yá mbála mba. Ngí mɔ́ɔ́ kɛ ngáá háwu ti gí maa gúlai ná ɛi ti gúla faa h̃ú.”

²⁰Ná ná áá ɣɛ́, sítii ti géle ɣélengɔ, sítii tí faa gálanga, sítii taá kele ɣéle mááɣaaliitii gúla ngeleí sí wu, kɛ míl̃inda lɔ́ taa ɣɛ́ mbá na? Ngala ngí ngakɛ́a ngáá kɛ ngeleí sí wu géle ɣélengi lɔ́ ngáá faá ỹááka.

²¹Ngalángi géle ɣélengi h̃u, i kɛngɔ́ ngáá háwu ngáá ɛi ɣɛ́ ngáá solowo fáá nungáitii ngeyá ngáá tɔɔ́ hómbo tɔ́ɔ́ ɣɛ́ kɔ́lɔ ngáá ele gíte waa ngáá laá ti bɔwɔ́ bɔ́wɔ géle ɣélengi h̃u. Kɛ́ aá ɣéle, Ngala ngí ndangɔ́ gi má ngáá í sítii ngumááwo taa lá ngáá keela woí sí náá nde, lɛ́i sítii ti ngáá ngeleí sí wu yélai gíte taa ngéɣe ngáá faa ỹááka.

²²Júsuaitii káámaa haa lɔ táá kɔlí ngáá í ngakɛ́ ngáá ti ye ngáá ná wɔ́lii keela wói sí lɔ́ ngáá tɔɔỹaá. Sítii pa taa ngáá Júsua, kéle ɣelengi lɔ taá kɔlí ngáá ti hɛmbɛ́ma hái.

²³Kɛ́ niỹá láa, keela wói níwaa nde kɔwɔ́ í tóngɔ Kílisitii háálai wa kulɔ́sii w̃a. Keela wói sí vá tɔ áá báálɛ Júsuaitii mba. Sítii pa taa ngáá Júsua, aá lɔ ti yaá ngáá faa ỹááka.

²⁴Kɛ́ sítii Ngala ngí ti lólingɔ ngáá ti ɣɛ́ ngáá ngi vóngaa, ti ɣɛ́i ngáá Júsua taa ɣɛi ngáá Júsua, Kílisitii lɔ́ áá Ngalángi yákpangi ɛ́ɣɛ ngi géle ɣélengi yakɛ́ kpál̃au.

²⁵Sífaa, sí Ngalá ngáá ngéɣe ngáá faa ỹááka, tɔvengɔ́ɔ́ lé nuu búsai ndá géle ɣélengi wa. Sí vángi Ngalá ngáá ngéɣe ngáá saɣá háá, tɔvengɔ́ɔ́ lé nuu búsai ndá h̃úúbangi wa.

²⁶Mu mbála Yalá fɛ́li mbélai, a gisíya lɛ́ɛ́ ngáá kíya wú ɣɛ́ kíli í ɣɛ́ngɔ na ná h̃u Ngalá ngí wú lólingɔ wú ɣɛ́ ngáá ngi vóngaa. Nuu búsa ndá gísiyai w̃áá véle w̃a, ki maa gúla yélaitii ɛ́ɣɛ ngákpa mbélaitii taá ɣɛ́i bih̃í wú h̃u, ná vólu, ndaaheí mbá yélaa taá ɣɛ́i bih̃í wú h̃u.

²⁷Kɛ́ Ngala ngí lókolongɔ faí sítii mba nungái taá ngéɣe ngáá faa ỹááka kɛinɔɔ́ sítii í ti gi má ngáá ti gi máá gúlangɔɔ lé, í ti yangúfe ngáá maa hái nátii taa ngeɣe ngáá faa ỹááka. Ná vólu, í lókolo fái sítii mba í nungái ki má ngáá tiyá lɔ́ ngáá saɣa haa kɛinɔɔ́ sítii í tí gí ma ngáá ti h̃úúbangɔ lé, í tí yangúfe ngáá maa hái nátii taá ngéɣe ngáá saɣá háa.

²⁸Ngala ngí lókolongɔ sí wa ngeleí sí wú yélaitii taa lɛ́ɣɛ su, ná vólu, tí súúh̃andɛ, í tí gi má ngáá aá lɔ́ ngáá faa ỹááka kɛinɔɔ́ í sí h̃úúỹaani lá í ngeleí sí wu yélaitii ki má ngáá kɛ ngatɔ́ mba.

²⁹Ngala ngí ná ɣɛ́ngɔ kɛinɔɔ́ nuu fíli álaa hómbo ɔ́ɔ́ yónga téve kákala.

³⁰I kɛngɔ́ ngáá háwu mu báha su maa Jísu Kílisitiini. Í mú ɣɛ́ ngáá kele ɣéle mbélaa, í mu yeɣé ngáá telembo mbélaa laá búte yaá ɛ́ɣɛ í mu w̃ááw̃uỹa fó fóndei, ná vólu, í mu wúmaawo mu háá ỹɔítii ngeyá. Ngala pá i sí kpɛ́lɛɛ kɛ́ngɔ mu yɛ Jísu Kílisitii w̃áá véle w̃a.

³¹Faalɔ, pɔnɛngɔ́ɔ́ lé Ngalá Kɔ́lɔi h̃u ngáá sí, “Nuí fíli áá ɣɛ́ í yonga téve, í yonga téve sí hááw̃a Ndemɔí í kɛ́a.”