Read Bandi KƆ́L̃E HESENDAA GƆLƆÍ 10 Bible Online

KƆ́L̃E HESENDAA GƆLƆÍ 10 - Bandi bible

KƆ́L̃E HESENDAA GƆLƆÍ 10

¹Mu mbála Yalá fɛ́li mbélai, ndóngɔɔ lé wú giséi sí w̃a í híyani ngáá a mu káwalani tiyɛ́i ti hítɛi Muusé vólu. Njɛi bilíí i ɣɛi na íwaa ti w̃ááh̃u béle aáva ti kpɛ́lɛɛ ti ɣɛ́i mbu. Aáva ti kpɛ́lɛɛ ti lɔveí njɛ walái sí liiwaa taa tolí ngáá Yívo Bíỹangi faa fíli aa ɣɛí ngáá ti ye.

²Aáva ná tí ɣɛ́i njɛ bilíi wu ɛ́ɣɛ yívoi liiwáá, kulangɔ́ i ɣɛi la ngáá kíya ti kpɛ́lɛɛ taa ɣɛ́ báhai Muusé wá tí nguya w̃ááhɔlɔ.

³Ti kpɛ́lɛɛ tí mɛɛní ná ỹɛ́ɛ́ni, tí njɛ́i ná bɔ́le Ngala ngí kulaí kɛ́lɛma ti yɛ. Ná vólu, ti kpɛ́lɛɛ tí njɛ́i bɔ́leni áá gúla Ngalángi wɔ́tui ná h̃u í tóni ti wa, aáva kɔtuí ná vá i ɣɛi ngáá Kílisitii laá gíte.

⁵Kɛ́ ná fíli su, Ngalá ndiilɛ́ingɔ aa ɣɛi lá ti bih̃íw̃aa hááw̃a. Faalɔ, i kɛní ngáá háwu ti bíh̃iw̃aa tí há aáva ti vúw̃aitii ti ló ngaalaí h̃u hááli hááli.

⁶Faalɔ, faí sítii kpɛ́lɛɛ ti ɣɛ́ngɔ, tiyá lɔ ngáá tɔmaseí mú haáw̃a ngáá málaa ló ngáá faa ỹɔ́u ɣɛ́ndaa kíya tiyá ti ɣɛ́i na.

⁷Málaa ɣɛ́ ngáá kɔɔ kɔɔ́ ŋánia hɛli mbélaa taá tí yeɣé ngáá ngalángaa kɛ kíya ti lɛ́ingaa ti ɣɛ́i na, kíya pɔnɛngɔ́ Ngalá Kɔ́lɔi h̃u ngáá sí, “Nungáitii ti héini ti laaỹɛ́ tí kpɔ́le bɔlé wɔ́lingaa bɔle, ti wúyoɣe ti lóóli.”

⁸Málaa kɔlɔsiyá fáa ỹaani mbó kɛ kíya ti lɛ́ingaa tí kɛ́ni aáva folo yílaa tí hái ngáá tásu puu félengɔ maah̃úú sáángɔ.

⁹Málaa Ndemɔí Ngalá suugɔvɔ́ kɛ kíya ti lɛ́ingaa tí kɛ́i aáva kaaliáitii tí tí vááni.

¹⁰Ná vólu, málaa wú sú bɔ́ɔ́lɔ kɛ kíya ti lɛ́ingaa tí kɛ́ni aáva malékai sí taa ɣɛ ma Saa W̃álekai í tí vááni.

¹¹Faí sítii ti híyani ngáá ti ye ngáá ti ɣɛ́ ngáá kalambo mu haáw̃a aáva ti vɔ́nɛngɔɔ lé ngáá ti ɣɛ́ ngáá ndaahí ngóó mu haáw̃a. Sífaa muỹá lɔ náa ngetéyangi h̃u, kuí sí w̃a suu áá mɔ́ɔ gooh̃á kɛ ngakɛ́ɛ́lɛmai i foloá ma.

¹²Faalɔ, nuí fíli áá ɣɛ́ kí ma ngáá kɛ aá lɔ́ lóóni kpáŋ Ngala fɛ́lindai h̃u, maa w̃ɔ́i í w̃ááh̃u béle ngáá pangɔ́ ɔ́ɔ́ va gúla su.

¹³Suugɔvɔ́ngi kínɛi áá vá wú yéle ngi h̃íí lɔ nɔ́ɔ áá vá nungáá vékaitii ngelé. Kɛ́ Ngalá ngaa ngi gúúlongi hítɛ nga ɛi luw̃áma suugɔvɔ́ ngɔ́ɔ́ vá wú yéle ngáá wú yákpangi ɛ́i hómbo nda. Táingi sí w̃a suugɔvɔ́ngi áá vá wú yéle, aa suubá fé wú yɛ́ wú liilɔ́lɔ nga aáva aa pele gúla kɛlɛ́ma wú yɛ ngáá wú gúla su.

¹⁴Faalɔ, mu mbála vandáitii, a w̃aavéla kɔɔ kɔɔ́ ŋániaitii fɛ́lindai wa.

¹⁵Nyá lɔɔ yɛ́pɛ náá wú yéle ngáá kíya nuu áá yɛ́pɛ faa yátɔ mbá mbélaa yelé. Faalɔ, sí ngíwaa vá ndéma, a ngakúla náá mba bɔwɔ́ yɛ.

¹⁶Kɔ́pungi sí maa sɛ́ɣɛɛ gula Ngalá má faaw̃a ná maa ɣɛ́ maa mu Yála fɛli ndááỹɛngi wó, ná maa sí bɔ́le áá ɣɛ́ su kɛ́ a muỹá lɔɔ Kílisitii ỹááw̃ɔi yakɔ́lɛ wɔlɛ. Ná a maa biléi ná yalé ngále su a mú mɛ́ kɛ a muỹá lɔ́ɔ́ Kílisitii lúuwui yakɔ́lɛ wɔlɛ́.

¹⁷Maá ɣɛ́ ngáá nuu yílaa kíya bɛ́lɛ mu bih̃íngɔ áá ɣɛ́ la bɔw̃álale bíle yílaangi lɔ́ maá kɔlɛ wɔlɛ́ mú mɛ.

¹⁸A gisíya lɛ́ɛ ngáá Ísulɔ yeláitii, ná tɔ́ɔ́ saáɣai gúla Ngalá ngéle Ngala sááɣa gula tútui w̃a, sítii kínɛi tɔ́ɔ́ máá hááɣa ỹɛɛnií tá ỹɛ, tɔ́ɔ́ báha Ngala mbá ti háá í ɣɛ́ nɔ́ɔ náa su yíla Ngala sááɣa gula fái ná h̃u.

¹⁹Kɛ́ ngáá ndéma ngáá kɛ ngatɔ́ kɔɔ kɔɔ́ ŋániaitii mba taa ti yeɣé ngáá ngalángaa ɛ́ɣɛ mɛɛníitii taá fé ti yɛ ngáá saáɣa wɔli.

²⁰Kɛ́ sí ngíwaa nde aá waa ngáá, saáɣai taá kula sítii taa ngáá Ngalá fɛ́li mbélaa ti hááɣa gula tútui w̃á, aa ɣɛ ỹína nyɔítii fááw̃a. Maa hááɣai ɛi ɣɛ Ngala fááw̃a. Aáva ngáá loí wɔ́ɔ́ báha kpahá ỹína nyɔítii mba wú háá ɔ́ɔ́ ɣɛ́ su yíla.

²¹Wɔ́i kpɔle bɔle ŋáni bɔ́le Ngala fɛ́li ndááỹɛ mbomái wɔ́ɔ́ mɔ́ɔ ŋani bɔ́le ỹína ỹɔítii ti lááỹɛ mbomaa kɛlaa wɔ́ɔ́ laaỹɛ́ Ngala fɛ́li ndááỹɛ mbomái wɔ́ɔ́ mɔ́ɔ laaỹɛ́ waa ỹína ỹɔ́u ỹɔungáitii.

²²A málaa kɛ ngáá háwu Ndemɔí Jísu ɔ́ɔ́ lííyaw̃al̃a mu w̃a. Mu h̃úúbangɔ laa le ɔ́ɔ́ lɔ́ve mba.

²³Nungái taa nde, ti ɣɛ́ ta, “Sí fíli a maa ɣɛ́ loí mú kɛ, naa gúlangɔɔ lé kɛ́lɛma mu yɛ ngáá mú kɛ.” Tɔɔỹáá le, kɛ́ kpɛ́lɛɛ táá le ɔ́ɔ́ ɣɛ́ ngáá kulasuunúma. Taá ndé, ti ɣɛ́ ta, “Sí fíli a maa ɣɛ́ lói mú kɛ, naa gulangɔ́ɔ́ lé kɛlɛ́ma mu yɛ ngáá mú kɛ.” Kɛ́ kpɛ́lɛɛ táá le taa nuu h̃úúba Ngala fái h̃u.

²⁴Nuu fíli álaa hɛmbɛ́ héi faa vánda hɔ́lɔ fááw̃a bɔwɔ́ yɛ. Kɛ́ nuu hɛ́mbɛ héingɔ í ɣɛ́ la nungáá vékaitii mbɛ.

²⁵Waa ló mɔ́ɔ́ni mbóma kɔwɔ́ato suwa fíli mbá wáá ngiya aáva wú líi álaa wu gɔ́sɔ mɛ́ fááw̃a.

²⁶Sífaa, sí pɔnɛ́ngɔi Ngala Kɔ́lɔi h̃u aá waa ngáá sí, “Ngetéyangi ɛ́ɣɛ sí kpɛ́lɛɛ í su, Ndemɔí Ngalá tɔ ngi ndá wáá ngáá ti ye.”

²⁷Ná wɔ́lii núi ɛ́i ɣɛ́ lái ngáá Jísu Kílisitii áá wú lóli mɛɛní w̃a, sí fíli áá séi wú gákala, a mɛ. Wálaa ló mɔ́ɔ́ni mbóma kɔwɔ́ato maa ỹɛ́ɛ́ni ná wa kɛinɔɔ́ wú líí ɔ́ɔ́ va wú gɔ́sɔ mɛ fááw̃a.

²⁸Kɛ́ ná wɔ́lii nuu áá ɣɛ́ wú w̃á, “Ti sí gúlangɔ ngáá saáɣa kɔɔ kɔɔ́ ŋánia yɛ,” kɛ wálaa ná ỹɛ, kɛinɔɔ́ nuí sí áá ɣɛ́ ná léni wú w̃a faa álaa víli ngí Yála fɛlindái h̃u, maa w̃ɔ́i líí ɔ́ɔ́ kɔ́sɔ.

²⁹Tɛingaa wú ndá líí h̃u, ná aa ngáá faa kɛ́ tɛingaa aá lɔ ngáá faa nuí ná w̃ɔ́i ndá líí h̃u. Tɛingaa nuu tá va í gisíya, i ɣɛ ta, “Ndeé le sí kaɣá ɛ́i ɣɛ́ má faaw̃a, nuu vékai ndá líí h̃u hái áá kɛ ngáá háwu í ɣɛ́ má ngáá kaɣá?

³⁰Mɛɛníi ngáá sɛ́ɣɛɛ gula Ngala má ngáá ngí mɛ́, kule áá ma nuu véka ɔ́ɔ́ kpáálɛ hóu mɛ fááw̃a.”

³¹Faalɔ, bele pá wɔ́lii wáá laaỹɛ́ ɔɔ wú ŋani bɔ́le ɔɔ sí fíli nɔ́ɔ wáá kɛ, a kpɛ́lɛɛ kɛ́ ngáá kɛinɔɔ́ Ngalángi í ngúfema w̃ááhɔlɔ su.

³²Wú lɛ́ɛ́h̃ui h̃uuhíya kílii álaa kɛ ngáá háwu Júsua ɔɔ sítii taa ngáá Júsua ɔɔ Ngala fɛ́li mbéla vekaítii ti tá fíli faa ɔ́ɔ́ víli tí Yála fɛlindái h̃u.

³³Wú híya veléi í ɣɛ́ nɔ́ɔ jɔ́ kɛ kíya ní ndái í na. Nyá lɔɔ́ yákpa ngáá ngí nuu kpɛ́lɛɛ ndííla faa kpɛ́lɛɛ sú ngáá kɛ. Ngáá gísiyama ngáá faa vánda bɔ́wɔ hááw̃a nɔ́ɔ. Kɛ́ nyá lɔɔ gísiya ngáá faa vánda nuu kpɛ́lɛɛ fááw̃a ngáá kɛinɔɔ́ tí ngumaawóngi w̃ááhɔlɔ.